ٹیگ کے محفوظات: پارسا

صنم پرست نہ ہو بندہ ریا واعظ

اکتوبر 25, 2015مصطفٰی خان شیفتہ،اساتذہ،غزلہوا،نارسا،پارسا،بلا،ثنا،ریاadmin

مصطفٰی خان شیفتہ ۔ غزل نمبر 56

ترے فسوں کی نہیں میرے دل میں جا واعظ

صنم پرست نہ ہو بندہ ریا واعظ

کسی صنم نے مگر آپ کو جلایا ہے

نہیں تو حوروں کی کیوں اس قدر ثنا واعظ

تمہارے حسنِ جہاں سوز سے میں جلتا ہوں

کہ ہیں رقیب مرے شیخ و پارسا، واعظ

ملا کے دیکھیں کہ ہے خوب کون دونوں میں

ہم اس کو لاتے ہیں تو حور کو بلا واعظ

ترے فسونِ اثر ریز سے رسا تر ہے

فغانِ بے اثر و آہِ نارسا واعظ

کمی تھی حالتِ رندی میں اس کو کیا یارو

کوئی یہ پوچھے کہ کیوں شیفتہ ہوا واعظ

مصطفٰی خان شیفتہ

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

بے یار و بے دیار و بے آشنا ہوئے ہیں

اکتوبر 7, 2015میر تقی میر،اساتذہ،غزلمیرزا،مبتلا،نوا،گدا،پارسا،آشنا،بجا،خفا،دعا،رہاadmin

دیوان ششم غزل 1848

اب دیکھیں آہ کیا ہو ہم وے جدا ہوئے ہیں

بے یار و بے دیار و بے آشنا ہوئے ہیں

غیرت سے نام اس کا آیا نہیں زباں پر

آگے خدا کے جب ہم محو دعا ہوئے ہیں

اہل چمن سے کیونکر اپنی ہو روشناسی

برسوں اسیر رہ کر اب ہم رہا ہوئے ہیں

بے عشق خوب رویاں اپنی نہیں گذرتی

اے وائے کس بلا میں ہم مبتلا ہوئے ہیں

جانا کہ تن میں ہر جا نازک ہے اور دلکش

ہم رفتۂ سراپا اس کے بجا ہوئے ہیں

تھے غنچے جتنے زیر دیوار باغ طائر

شب باشی چمن سے شاید خفا ہوئے ہیں

صرفہ قمیص کا ہے کیا وقر اس گلی میں

ترک لباس کر واں شاہاں گدا ہوئے ہیں

خاموش اس کے در پر ہوکر فقیر بیٹھے

یعنی کہ عاشقی میں ہم بے نوا ہوئے ہیں

عہد شباب گذرا شرب مدام ہی میں

ہم کہنہ سال ہوکر اب پارسا ہوئے ہیں

اظہار کم فراغی ہردم کی بے دماغی

ان روزوں میر صاحب کچھ میرزا ہوئے ہیں

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

خدا جانے تو ہم کو کیا جانتا ہے

اکتوبر 6, 2015میر تقی میر،اساتذہ،غزللگا،مدعا،مزہ،نما،چھپا،وفا،کیا،پارسا،بلا،بنا،بجا،جلا،دغا،سزاadmin

دیوان پنجم غزل 1782

ترے بندے ہم ہیں خدا جانتا ہے

خدا جانے تو ہم کو کیا جانتا ہے

نہیں عشق کا درد لذت سے خالی

جسے ذوق ہے وہ مزہ جانتا ہے

ہمیشہ دل اپنا جو بے جا ہے اس بن

مرے قتل کو وہ بجا جانتا ہے

گہے زیر برقع گہے گیسوئوں میں

غرض خوب وہ منھ چھپا جانتا ہے

مجھے جانے ہے آپ سا ہی فریبی

دعا کو بھی میری دغا جانتا ہے

جفا اس پہ کرتا ہے حد سے زیادہ

جنھیں یار اہل وفا جانتا ہے

لگا لے ہے جھمکے دکھاکر اسی کو

جسے مغ بچہ پارسا جانتا ہے

اسے جب نہ تب ہم نے بگڑا ہی پایا

یہی اچھے منھ کو بنا جانتا ہے

بلا شور انگیز ہے چال اس کی

اسی طرز کو خوش نما جانتا ہے

نہ گرمی جلاتی تھی ایسی نہ سردی

مجھے یار جیسا جلا جانتا ہے

یہی ہے سزا چاہنے کی ہمارے

ہمیں کشتہ خوں کے سزا جانتا ہے

مرے دل میں رہتا ہے تو ہی تبھی تو

جو کچھ دل کا ہے مدعا جانتا ہے

پری اس کے سائے کو بھی لگ سکے نہ

وہ اس جنس کو کیا بلا جانتا ہے

جہاں میر عاشق ہوا خوار ہی تھا

یہ سودائی کب دل لگا جانتا ہے

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔