ٹیگ کے محفوظات: وادی

موسم پیار کی وادی کا

ماجد صدیقی ۔ غزل نمبر 19
مظہر ہے بربادی کا
موسم پیار کی وادی کا
تھامیں پیٹ کی پوجا کو
دامن ہم کس ہادی کا
لو پھر بستی سہم گئی
سُن کر ڈھول منادی کا
اِک اِک سُوکھا پیڑ لگے
ہاتھ کسی فریادی کا
حرفِ دُعا کب ہوتا ہے
بول کسی شہزادی کا
ماجدؔ اک اک لفظ تِرا
پرچم ہے آزادی کا
ماجد صدیقی

ننگ ہے نام رہائی تری صیادی کا

دیوان اول غزل 131
نقش بیٹھے ہے کہاں خواہش آزادی کا
ننگ ہے نام رہائی تری صیادی کا
داد دے ورنہ ابھی جان پہ کھیلوں ہوں میں
دل جلانا نہیں دیکھا کسی فریادی کا
تونے تلوار رکھی سر رکھا میں بندہ ہوں
اپنی تسلیم کا بھی اور تری جلادی کا
شہر کی سی رہی رونق اسی کے جیتے جی
مر گیا قیس جو تھا خانہ خدا وادی کا
شیخ کیا صورتیں رہتی تھیں بھلا جب تھا دیر
رو بہ ویرانی ہو اس کعبے کی آبادی کا
ریختہ رتبے کو پہنچایا ہوا اس کا ہے
معتقد کون نہیں میر کی استادی کا
میر تقی میر

خلوصِ زر لٹاتی جائے شہزادی محبت میں

منصور آفاق ۔ غزل نمبر 314
بڑی سیدھی محبت میں بڑی سادی محبت
خلوصِ زر لٹاتی جائے شہزادی محبت میں
اسے دیوارِ جاں پر کوئی آویزاں کرے کیسے
کہ ہے تصویر کا ہر نقش فریادی محبت میں
نظر میں وصل کی قوسِ قزح ہے ،پاؤں میں بادل
سنورتی جاتی ہے پھولوں بھری وادی محبت میں
سنا ہے اپنے گھر کے بام و در تک پھونک آیا ہوں
جہاں تک مجھ سے ممکن تھا ،کی بربادی محبت میں
تیرے بالوں میں میرے انگلیوں کے تار لزراں ہوں
بس اتنی چاہئے منصور آزادی محبت میں
منصور آفاق