ٹیگ کے محفوظات: نیت

ضبط آنکھوں کی مرّوت ہو گئی

اکتوبر 25, 2015اساتذہ،داغ دہلوی،غزلقناعت،قیامت،قسمت،محبت،مدت،مرّوت،نیت،نصیحت،وحشت،کرامت،بدولت،حاجت،خدمت،سےمحبت،صورت،غفلتadmin

داغ دہلوی ۔ غزل نمبر 42

حسن کی تم پر حکومت ہو گئی

ضبط آنکھوں کی مرّوت ہو گئی

یہ نہ پوچھو کیوں یہ حالت ہو گئی

خود بدولت کی بدولت ہو گئی

لے گئے آنکھوں ہی آنکھوں میں وہ دل

ہوشیاری اپنی غفلت ہو گئی

وہ جو تجھ سے دوستی کرنے لگا

مجھ کو دشمن سےمحبت ہو گئی

اس قدر بھی سادگی اچھی نہیں

عاشقوں کی پاک نیت ہو گئی

مان کر دل کا کہا پچھتائے ہم

عمر بھر کو اب نصیحت ہو گئی

کیا عجب ہے گر ترا ثانی نہیں

اچھی صورت ایک صورت ہو گئی

غیر بھی روتے ہیں تیرے عشق میں

کیا مری قسمت کی قسمت ہو گئی

اس کی مژگاں پر ہوا قربان دل

تیر تکّوں پر قناعت ہو گئی

جب ریاست اپنی آبائی مٹی

نوکری کی ہم کو حاجت ہو گئی

شاعروں کی بھی طبیعت ہے ولی

جو نئی سوجھی کرامت ہو گئی

تیری زلفوں کا اثر تجھ پر نہیں

دیکھتے ہی مجھ کو وحشت ہو گئی

کھیل سمجھے تھے لڑکپن کو تیرے

بیٹھتے اٹھتے قیامت ہو گئی

مفت پیتے ہیں وہ ہر قسم کی

جن کو مے خانے کی خدمت ہو گئی

میرے دل سے غم ترا کیوں‌دور ہو

پاس رہنے کی محبت ہو گئی

کہتے ہیں کب تک کوئی گھبرا نہ جائے

دل میں رہتے رہتے مدت ہو گئی

نقشہ بگڑا رہتے رہتے غصّہ ناک

کٹ کھنی قاتل کی صورت ہو گئی

داغ کا دم ہے غنیمت بزم میں

دو گھڑی کو گرم محبت ہو گئی

داغ دہلوی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

سنا نہیں ہے مگر یہ کہ جوگی کس کے میت

اکتوبر 6, 2015میر تقی میر،اساتذہ،غزلمیت،مبیت،مسیت،نیت،گیت،پلیت،اتیت،بھیت،جیتadmin

دیوان سوم غزل 1112

عجب نہیں ہے نہ جانے جو میر چاہ کی ریت

سنا نہیں ہے مگر یہ کہ جوگی کس کے میت

مت ان نمازیوں کو خانہ ساز دیں جانو

کہ ایک اینٹ کی خاطر یہ ڈھاتے ہیں گے مسیت

غم زمانہ سے فارغ ہیں مایہ باختگاں

قمارخانۂ آفاق میں ہے ہار ہی جیت

ہزار شانہ و مسواک و غسل شیخ کرے

ہمارے عندیے میں تو ہے وہ خبیث پلیت

کسو کے بستر و سنجاب و قصر سے کیا کام

ہماری گور کے بھی ڈھیر میں مکاں ہے مبیت

ہوئے ہیں سوکھ کے عاشق طنبورے کے سے تار

رقیب دیکھو تو گاتے ہیں بیٹھے اور ہی گیت

شفق سے ہیں در و دیوار زرد شام و سحر

ہوا ہے لکھنؤ اس رہگذر میں پیلی بھیت

کہا تھا ہم نے بہت بولنا نہیں ہے خوب

ہمارے یار کو سو اب ہمیں سے بات نہ چیت

ملے تھے میر سے ہم کل کنار دریا پر

فتیلہ مو وہ جگر سوختہ ہے جیسے اتیت

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

اعمال چھوڑ تُو مری نیت پہ رحم کر

دسمبر 1, 2007منصور آفاق،شعراء،غزلمشیت،نیت،وصیت،اذیت،حمیتadmin

منصور آفاق ۔ غزل نمبر 172

پرودگار! حرفِ کمیت پہ رحم کر

اعمال چھوڑ تُو مری نیت پہ رحم کر

نیزے پہ سج گیا ہے وہ چہرہ حسین کا

اے بے نیاز اپنی مشیت پہ رحم کر

اک دھوپ سے بھرے ہوئے بے رحم پہر میں

کھلتی ہوئی کلی کی اذیت پہ رحم کر

کچھ دن مزارِ دل پہ جلا درد کے چراغ

کچھ مرنے والے کی بھی وصیت پہ رحم کر

اتنی اکیلگی میں بھی اپنی طلب کرے

منصور کچھ تو دل کی حمیت پہ رحم کر

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

دل کی صورت چپ ہیں کھیت

جنوری 8, 1972شعراء،غزلنیت،کھیت،ریت،سمیتadmin

باقی صدیقی ۔ غزل نمبر 7

اب کے آیا ایسا چیت

دل کی صورت چپ ہیں کھیت

پھیلا دریا کا دامن

اوپر پانی نیچے ریت

راہوں کے سناٹے میں

ڈوب گیا دل درد سمیت

اس موسم کا نام ہے کیا

دل میں ساون منہ پر چیت

نام کو آنچ نہیں باقیؔ

دل ہے یا ندی کی ریت

باقی صدیقی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔