ٹیگ کے محفوظات: نصیحت

ضبط آنکھوں کی مرّوت ہو گئی

اکتوبر 25, 2015اساتذہ،داغ دہلوی،غزلقناعت،قیامت،قسمت،محبت،مدت،مرّوت،نیت،نصیحت،وحشت،کرامت،بدولت،حاجت،خدمت،سےمحبت،صورت،غفلتadmin

داغ دہلوی ۔ غزل نمبر 42

حسن کی تم پر حکومت ہو گئی

ضبط آنکھوں کی مرّوت ہو گئی

یہ نہ پوچھو کیوں یہ حالت ہو گئی

خود بدولت کی بدولت ہو گئی

لے گئے آنکھوں ہی آنکھوں میں وہ دل

ہوشیاری اپنی غفلت ہو گئی

وہ جو تجھ سے دوستی کرنے لگا

مجھ کو دشمن سےمحبت ہو گئی

اس قدر بھی سادگی اچھی نہیں

عاشقوں کی پاک نیت ہو گئی

مان کر دل کا کہا پچھتائے ہم

عمر بھر کو اب نصیحت ہو گئی

کیا عجب ہے گر ترا ثانی نہیں

اچھی صورت ایک صورت ہو گئی

غیر بھی روتے ہیں تیرے عشق میں

کیا مری قسمت کی قسمت ہو گئی

اس کی مژگاں پر ہوا قربان دل

تیر تکّوں پر قناعت ہو گئی

جب ریاست اپنی آبائی مٹی

نوکری کی ہم کو حاجت ہو گئی

شاعروں کی بھی طبیعت ہے ولی

جو نئی سوجھی کرامت ہو گئی

تیری زلفوں کا اثر تجھ پر نہیں

دیکھتے ہی مجھ کو وحشت ہو گئی

کھیل سمجھے تھے لڑکپن کو تیرے

بیٹھتے اٹھتے قیامت ہو گئی

مفت پیتے ہیں وہ ہر قسم کی

جن کو مے خانے کی خدمت ہو گئی

میرے دل سے غم ترا کیوں‌دور ہو

پاس رہنے کی محبت ہو گئی

کہتے ہیں کب تک کوئی گھبرا نہ جائے

دل میں رہتے رہتے مدت ہو گئی

نقشہ بگڑا رہتے رہتے غصّہ ناک

کٹ کھنی قاتل کی صورت ہو گئی

داغ کا دم ہے غنیمت بزم میں

دو گھڑی کو گرم محبت ہو گئی

داغ دہلوی

رنج و محنت کمال راحت ہے

اکتوبر 6, 2015میر تقی میر،اساتذہ،غزلفرصت،قیامت،قسمت،محبت،مصیبت،نصیحت،الحقیقت،الزیارت،آفت،اذیت،جراحت،حکایت،حالت،حسرت،خفت،راحت،رحمت،رخصت،سلامت،صورتadmin

دیوان اول غزل 583

نالۂ عجز نقص الفت ہے

رنج و محنت کمال راحت ہے

عشق ہی گریۂ ندامت ہے

ورنہ عاشق کو چشم خفت ہے

تا دم مرگ غم خوشی کا نہیں

دل آزردہ گر سلامت ہے

دل میں ناسور پھر جدھر چاہے

ہر طرف کوچۂ جراحت ہے

رونا آتا ہے دم بدم شاید

کسو حسرت کی دل سے رخصت ہے

فتنے رہتے ہیں اس کے سائے میں

قد و قامت ترا قیامت ہے

نہ تجھے رحم نے اسے ٹک صبر

دل پہ میرے عجب مصیبت ہے

تو تو نادان ہے نپٹ ناصح

کب موثر تری نصیحت ہے

دل پہ جب میرے آ کے یہ ٹھہرا

کہ مجھے خوش دلی اذیت ہے

رنج و محنت سے باز کیونکے رہوں

وقت جاتا رہے تو حسرت ہے

کیا ہے پھر کوئی دم کو کیا جانو

دم غنیمت میاں جو فرصت ہے

تیرا شکوہ مجھے نہ میرا تجھے

چاہیے یوں جو فی الحقیقت ہے

تجھ کو مسجد ہے مجھ کو میخانہ

واعظا اپنی اپنی قسمت ہے

ایسے ہنس مکھ کو شمع سے تشبیہ

شمع مجلس کی رونی صورت ہے

باطل السحر دیکھ باطل تھے

تیری آنکھوں کا سحر آفت ہے

ابرتر کے حضور پھوٹ بہا

دیدئہ تر کو میرے رحمت ہے

گاہ نالاں طپاں گہے بے دم

دل کی میرے عجب ہی حالت ہے

کیا ہوا گر غزل قصیدہ ہوئی

عاقبت قصۂ محبت ہے

تربت میر پر ہیں اہل سخن

ہر طرف حرف ہے حکایت ہے

تو بھی تقریب فاتحہ سے چل

بخدا واجب الزیارت ہے

میر تقی میر

غش بھی آیا تو مِری روح کو رخصت کرنے

نومبر 20, 2005امیر مینائی،غزلنصیحت،امامت،رخصتadmin

امیر مینائی ۔ غزل نمبر 43

کون بیماری میں آتا ہے عیادت کرنے؟

غش بھی آیا تو مِری روح کو رخصت کرنے

اُس کو سمجھاتے نہیں جا کے کسی دن ناصح

روز آتے ہیں مجھ ہی کو یہ نصیحت کرنے

تیر کے ساتھ چلا دل، تو کہا میں نے، کہاں؟

حسرتیں بولیں کہ، مہمان کو رخصت کرنے

آئے میخانے میں، تھے پیرِ خرابات امیر

اب چلے مسجدِ جامع کی امامت کرنے

امیر مینائی

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: نصیحت

ضبط آنکھوں کی مرّوت ہو گئی

رنج و محنت کمال راحت ہے

غش بھی آیا تو مِری روح کو رخصت کرنے

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: