ٹیگ کے محفوظات: نایاب

ٹُوٹ جاتے ہیں سہانے خواب آدھی رات کو

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلنایاب،احباب،خواب،زہرابadmin

گُونجتا ہے نالہِ مہتاب آدھی رات کو

ٹُوٹ جاتے ہیں سہانے خواب آدھی رات کو

بھاگتے سایوں کی چیخیں، ٹُوٹتے تاروں کا شور

میں ہوں اور اک محشرِ بے خواب آدھی رات کو

شام ہی سے بزمِ انجم نشہِ غفلت میں تھی

چاند نے بھی پی لیا زہراب آدھی رات کو

اک شکستہ خواب کی کڑیاں ملانے آئے ہیں

دیر سے بچھڑے ہوئے احباب آدھی رات کو

دولتِ احساسِ غم کی اتنی اَرزانی ہوئی

نیند سی شے ہو گئی نایاب آدھی رات کو

شکیب جلالی

جنس نایاب ہو گئی شاید

اکتوبر 25, 2015پروین شاکر،شعراء،غزلمہتاب،نایاب،پایاب،خواب،سیلاب،غرقابadmin

پروین شاکر ۔ غزل نمبر 37

نیند تو خواب ہو گئی شاید

جنس نایاب ہو گئی شاید

اپنے گھر کی طرح وہ لڑکی بھی

نذرِ سیلاب ہو گئی شاید

تجھ کو سوچوں تو روشنی دیکھوں

یاد ، مہتاب ہو گئی شاید

ایک مدت سے آنکھ روئی نہیں

جھیل پایاب ہو گئی شاید

ہجر کے پانیوں میں عشق کی ناؤ

کہیں غرقاب ہو گئی شاید

چند لوگوں کی دسترس میں ہے

زیست کم خواب ہو گئی شاید

پروین شاکر

چشمِ صدف سے گوہرِ نایاب لے گیا

اکتوبر 25, 2015پروین شاکر،شعراء،غزلمِضراب،محراب،نایاب،گرداب،اب،خونناب،خواب،سیلابadmin

پروین شاکر ۔ غزل نمبر 31

آنکھوں سے میری، کون مرے خواب لے گیا

چشمِ صدف سے گوہرِ نایاب لے گیا

اِس شہرِ خوش جمال کو کِس کی لگی ہے آہ

کِس دل زدہ کا گریہ خونناب لے گیا

کُچھ نا خدا کے فیض سے ساحل بھی دُور تھا

کُچھ قسمتوں کے پھیر میں گرداب لے گیا

واں شہر ڈُوبتے ہیں ، یہاں بحث کہ اُنہیں

خُم لے گیا ہے یا خمِ محراب لے گیا

کچھ کھوئی کھوئی آنکھیں بھی موجوں کے ساتھ تھیں

شاید اُنہیں بہا کے کوئی خواب لے گیا

طوفان اَبر و باد میں سب گیت کھو گئے

جھونکا ہَوا کا ہاتھ سے مِضراب لے گیا

غیروں کی دشمنی نے نہ مارا،مگر ہمیں

اپنوں کے التفات کا زہر اب لے گیا

اے آنکھ!اب تو خواب کی دُنیا سے لوٹ آ

’’مژگاں تو کھول!شہر کو سیلاب لے گیا!

پروین شاکر

فرش ہے مخمل و کمخواب ترے کوچے میں

اکتوبر 25, 2015مصطفٰی خان شیفتہ،اساتذہ،غزلنایاب،ناب،کمخواب،احباب،تاب،خوناب،خواب،دولاب،شادابadmin

مصطفٰی خان شیفتہ ۔ غزل نمبر 74

کیوں نہ اڑ جائے مرا خواب ترے کوچے میں

فرش ہے مخمل و کمخواب ترے کوچے میں

دولتِ حسن یہاں تک تو لٹائی ظالم

اشک ہے گوہرِ نایاب ترے کوچے میں

جوششِ گریۂ عشاق سے اک دم میں ہوا

شجرِ سوختہ، شاداب ترے کوچے میں

ہوش کا پاؤں جو یاں آ کے پھسل جاتا ہے

کیا لنڈھائی ہے مئے ناب ترے کوچے میں

ہے کفِ پائے عدو، پا سے ترے رنگیں تر

بس کہ ہم روتے ہیں خوناب ترے کوچے میں

گوشہ گیری سے بھی گردش نہ گئ طالع کی

پھرتے ہیں صورتِ دولاب ترے کوچے میں

غیر نے سنگ جو پھینکے وہ ہوئے بالشِ سر

چین سے کرتے ہیں ہم خواب ترے کوچے میں

وہ بھی محروم نہیں جن کو نہیں بزم میں بار

تیرے رخسار کی ہے تاب ترے کوچے میں

چل دیا شیفتہ سودے میں خدا جانے کہاں

ڈھونڈتے پھرتے ہیں احباب ترے کوچے میں

مصطفٰی خان شیفتہ

کہ کچھ حظ اٹھے سیرِ مہتاب کا

اکتوبر 25, 2015مصطفٰی خان شیفتہ،اساتذہ،غزلمہتاب،نایاب،ناب،آب،احباب،اسباب،باب،تاب،جلباب،خواب،سیماب،عنابadmin

مصطفٰی خان شیفتہ ۔ غزل نمبر 17

پلا جام ساقی مے ناب کا

کہ کچھ حظ اٹھے سیرِ مہتاب کا

دلِ زار کا ماجرا کیا کہوں

فسانہ ہے مشہور سیماب کا

کہاں پھر وہ نایاب، پایا جسے

غلط شوق ہے جنسِ نایاب کا

نہ کیجو غل اے خوش نوایانِ صبح

یہ ہے وقت ان کی شکر خواب کا

محبت نہ ہرگز جتائی گئی

رہا ذکر کل اور ہر باب کا

دمِ سرد سے لا نہ طوفانِ باد

نہ سن ماجرا چشمِ پر آب کا

وہاں بے خودوں کی خبر کون لے

جہاں شغل ہو بادۂ ناب کا

وہاں تیرہ روزوں کی پروا کسے

جہاں شوق ہو سیرِ مہتاب کا

وہ تشخیصِ شخصی بھی جاتی رہی

کنارا الٹتے ہی جلباب کا

میں بے جرم رہتا ہوں خائف کہ واں

جفا میں نہیں دخل اسباب کا

پڑے صبر آرام کی جان پر

مری جانِ بے صبر و بے تاب کا

لبِ لعل کو کس کے جنبش ہوئی

ہوا میں ہے کچھ رنگ عناب کا

نہ کرنا خطا پر نظر شیفتہ

کہ اغماض شیوہ ہے احباب کا

مصطفٰی خان شیفتہ

شعلۂ جوّالہ ہر اک حلقۂ گرداب تھا

اکتوبر 8, 2015مرزا اسد اللہ خان غالب،اساتذہ،غزلنایاب،ناب،یاب،کمخواب،گرداب،احباب،باب،سیلابadmin

دیوانِ غالب ۔ غزل نمبر 91

شب کہ برقِ سوزِ دل سے زہرۂ ابر آب تھا

شعلۂ جوّالہ ہر اک حلقۂ گرداب تھا

واں کرم کو عذرِ بارش تھا عناں گیرِ خرام

گریے سے یاں پنبۂ بالش کفِ سیلاب تھا

واں خود آرائی کو تھا موتی پرونے کا خیال

یاں ہجومِ اشک میں تارِ نگہ نایاب تھا

جلوۂ گل نے کیا تھا واں چراغاں آب جو

یاں رواں مژگانِ چشمِ تر سے خونِ ناب تھا

یاں سرِ پرشور بے خوابی سے تھا دیوار جو

واں وہ فرقِ ناز محوِ بالشِ کمخواب تھا

یاں نفَس کرتا تھا روشن، شمعِ بزمِ بےخودی

جلوۂ گل واں بساطِ صحبتِ احباب تھا

فرش سے تا عرش واں طوفاں تھا موجِ رنگ کا

یاں زمیں سے آسماں تک سوختن کا باب تھا

ناگہاں اس رنگ سے خوں نابہ ٹپکانے لگا

دل کہ ذوقِ کاوشِ ناخن سے لذت یاب تھا

مرزا اسد اللہ خان غالب

جی دل کے اضطراب سے بے تاب تھا سو تھا

اکتوبر 6, 2015میر تقی میر،اساتذہ،غزلنایاب،ناب،آب،اسباب،تاب،خواب،سیرابadmin

دیوان سوم غزل 1103

آنکھوں میں اپنی رات کو خوناب تھا سو تھا

جی دل کے اضطراب سے بے تاب تھا سو تھا

آکر کھڑا ہوا تھا بہ صدحسن جلوہ ناک

اپنی نظر میں وہ در نایاب تھا سو تھا

ساون ہرے نہ بھادوں میں ہم سوکھے اہل درد

سبزہ ہماری پلکوں کا سیراب تھا سو تھا

درویش کچھ گھٹا نہ بڑھا ملک شاہ سے

خرقہ کلاہ پاس جو اسباب تھا سو تھا

کیا بھاری بھاری قافلے یاں سے چلے گئے

تجھ کو وہی خیال گراں خواب تھا سو تھا

برسوں سے ہے تلاوت و سجادہ و نماز

پر میل دل جو سوے مئے ناب تھا سو تھا

ہم خشک لب جو روتے رہے جوئیں بہ چلیں

پر میر دشت عشق کا بے آب تھا سو تھا

میر تقی میر

ٹپکا کرے ہے آنکھوں سے خونناب روز و شب

اکتوبر 6, 2015میر تقی میر،اساتذہ،غزلمحراب،نایاب،احباب،بیتاب،خونناب،خواب،سیلابadmin

دیوان اول غزل 175

اب وہ نہیں کہ آنکھیں تھیں پرآب روز و شب

ٹپکا کرے ہے آنکھوں سے خونناب روز و شب

اک وقت رونے کا تھا ہمیں بھی خیال سا

آئی تھی آنکھوں سے چلی سیلاب روز و شب

اس کے لیے نہ پھرتے تھے ہم خاک چھانتے

رہتا تھا پاس وہ در نایاب روز و شب

قدرت تو دیکھ عشق کی مجھ سے ضعیف کو

رکھتا ہے شاد بے خور و بے خواب روز و شب

سجدہ اس آستاں کا نہیں یوں ہوا نصیب

رگڑا ہے سر میانۂ محراب روز و شب

اب رسم ربط اٹھ ہی گئی ورنہ پیش ازیں

بیٹھے ہی رہتے تھے بہم احباب روز و شب

دل کس کے رو و مو سے لگایا ہے میر نے

پاتے ہیں اس جوان کو بیتاب روز و شب

میر تقی میر

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: نایاب

ٹُوٹ جاتے ہیں سہانے خواب آدھی رات کو

جنس نایاب ہو گئی شاید

چشمِ صدف سے گوہرِ نایاب لے گیا

فرش ہے مخمل و کمخواب ترے کوچے میں

کہ کچھ حظ اٹھے سیرِ مہتاب کا

شعلۂ جوّالہ ہر اک حلقۂ گرداب تھا

جی دل کے اضطراب سے بے تاب تھا سو تھا

ٹپکا کرے ہے آنکھوں سے خونناب روز و شب

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: