ٹیگ کے محفوظات: مہماں

‎دھیان جا نکلا مگر اک روئے تاباں کی طرف

مئی 30, 2021عرفان ستار،غزلہاں،فروزاں،مہماں،مژگاں،آساں،امکاں،تاباں،جاںadmin

آج کرنا تھی توجہ چاکِ داماں کی طرف

‎دھیان جا نکلا مگر اک روئے تاباں کی طرف

‎جب ہوا کے نام پہنچا آمدِ شب کا پیام

‎ایک جھونکا چل دیا شمعِ فروزاں کی طرف

‎ایک چہرہ جگمگایا ہے سرِ دشتِ خیال

‎ایک شعلہ اٹھ رہا ہے دل سے مژگاں کی طرف

‎یہ بیاباں اور اس میں چیختی گاتی ہوا

‎ان سے دل بھر لے تو جاؤں راہِ آساں کی طرف

‎اس طرح حائل نہیں ہوتے کسی کی راہ میں

‎کیوں بھلا اتنی توجہ ایک مہماں کی طرف

‎عین ممکن ہے کہ تو سچ بول کر زندہ رہے

‎میں اشارہ کر رہا ہوں ایک امکاں کی طرف

‎اک تقاضا بے بسی کی راکھ میں دہکا ہوا

‎اک تذبذب کا سفر انکار سے ہاں کی طرف

‎جس کے بدلے موت صدیوں کی بسر کرنا پڑے

‎زندگی کا قرض اتنا تو نہیں جاں کی طرف

عرفان ستار

مختصر سا ہے سَفَر ساماں بہت

مئی 20, 2021ضامن جعفری،غزلمہماں،امکاں،انساں،احساں،حیراں،ساماںadmin

تنگیٔ دِل وسعتِ داماں بہت

مختصر سا ہے سَفَر ساماں بہت

کیا ضرورت اِتنی آبادی کی تھی؟

دِل دُکھانے کو ہے ایک اِنساں بہت

دیکھا گَرد آلُود آئینہ جو کَل

دیکھ کر دونوں ہوئے حیراں بہت

قید میں کب تک رہے گی زندگی؟

آپ کے پہلے بھی ہیں احساں بہت

گھر کے اندر بَند ہیں میں اُور گھُٹَن

گھر کے باہر مَوت کے امکاں بہت

زندگی رقصِ اَجَل میں تھَک کے چُور

اَور اَجَل خُوش ہے کہ ہیں مہماں بہت

ضامن جعفری

کچھ بھی ہوجائے پریشاں نہیں ہوتا کوئی

مئی 20, 2021ضامن جعفری،غزلمہماں،گریباں،پریشاں،امکاں،خواںadmin

اب کسی بات پہ حیراں نہیں ہوتا کوئی

کچھ بھی ہوجائے پریشاں نہیں ہوتا کوئی

عقل نے ڈال دیے جب سے جنوں پر تالے

خود سے بھی دست و گریباں نہیں ہوتا کوئی

سر بَہ سجدہ ہُوئے اِک روز ملائک پھر بھی

قائلِ عالمِ امکاں نہیں ہوتا کوئی

گوشہِ عافیت اِک سب کے ہے اندر موجود

جانے کیا سوچ کے مہماں نہیں ہوتا کوئی

چشمِ گریاں سے ٹَپَک پڑتا ہے ضامنؔ یہ سوال

کیسا گلشن ہے غزل خواں نہیں ہوتا کوئی

ضامن جعفری

موت کی جیب سے بھی زیست کا ساماں نکلا

جولائی 24, 2018موجِ خیال،باصر کاظمی،غزلمہماں،مژگاں،بیاباں،جاناں،جاں،ساماںadmin

موجب رنگِ چمن خونِ شہیداں نکلا

موت کی جیب سے بھی زیست کا ساماں نکلا

ٹھوکریں کھائی ہیں اتنی کہ اب اپنے دل سے

شوقِ آوارگیِ دشت و بیاباں نکلا

ہم بہت خوش تھے کہ جاگ اٹھی ہے اپنی قسمت

آنے والا کسی ہمسائے کا مہماں نکلا

ہے عجب بات کہ جس رستے پہ ہم چل نکلے

گھوم پھر کر وہ سرِ کوچہء جاناں نکلا

بے حسی نے جو کبھی فرصتِ غم دی ہم کو

ایک سیلاب نہفتہ تہِ مژگاں نکلا

چارہ گر خطرۂ جاں کہتے تھے جس کو باصرِؔ

وہی غم باعثِ آرامِ رگِ جاں نکلا

باصر کاظمی

یہاں ہو گی یہاں ہو گا، وہاں ہو گی وہاں ہو گا

اکتوبر 25, 2015قمر جلالوی،شعراء،غزلمہماں،مہرباں،وہاں،کہاں،کارواں،آشیاں،بیں،بیاںadmin

قمر جلالوی ۔ غزل نمبر 18

قیامت اب جہاں ہو گی ستم تیرا باں ہو گا

یہاں ہو گی یہاں ہو گا، وہاں ہو گی وہاں ہو گا

نہ گھبرا اے مریضِ عشق دونوں آنے والے ہیں

قضا بھی مہماں ہو گی وہ بت بھی مہماں ہو گا

بہار آخر ہے پی لی بیٹھ کر اے شیخ رندوں میں

یہ محفل پھر کہاں ہو گی یہ جلسہ پھر کہاں ہو گا

چمن میں توڑ ڈالی باغباں نے مجھ سے یہ کہہ کر

نہ شاخِ آشیاں ہو گی نہ تیرا آشیاں ہو گا

کدھر ڈھونڈے گا اپنے قافلے سے چھوٹنے والے

نہ گردِ کارواں ہو گی نہ شورِ کارواں ہو گا

مجھے معلوم ہے اپنی کہانی، ماجرا اپنا

نہ قاصد سے بیاں ہو گی نہ قاصد سے بیاں ہو گا

وہ چہرے سے سمجھ لیں گے مری حالت مرا ارماں

نہ محتاجِ بیاں ہو گی نہ محتاجِ بیں ہو گا

تم اپنے در پہ دیتے ہو اجازت دفنِ دشمن کی

مری تربت کہاں ہو گی مرا مرقد کہاں ہو گا

ابھی کیا ہے قمر ان ی ذرا نظریں تو پھرنے دو

زمیں نا مہرباں ہو گی فلک نا مہرباں ہو گا

قمر جلالوی

مرا دامن بنے تو باندھ دو گل کے گریباں سے

اکتوبر 6, 2015میر تقی میر،اساتذہ،غزلمہماں،گریاں،گریباں،پریشاں،جاں،حیراں،ساماںadmin

دیوان سوم غزل 1274

بہار آئی نکالو مت مجھے اب کے گلستاں سے

مرا دامن بنے تو باندھ دو گل کے گریباں سے

نہ ٹک واشد ہوئی دل کو نہ جی کی لاگ کچھ پائی

رہے دس دن جو اپنی عمر کے یاں ہم سو مہماں سے

غم ہجراں نے شاید آگ دی اس ماہ بن دل کو

شرارے تب تو نکلے ہیں ہماری چشم گریاں سے

سبب آشفتہ طبعی کا ہماری رہتے ہیں دونوں

نہ دل جمعی ہے اس کے خط سے نے زلف پریشاں سے

ادھر زنجیر کے غل ہیں ادھر ہنگامے لڑکوں کے

جنوں اس دشت میں ہم نے کیا ہے کیسے ساماں سے

محبت میں کسو کی رنج و محنت سے گئے دونوں

رہی شرمندگی ہی عمر بھر مجھ کو دل و جاں سے

خدا جانے کہ دل کس خانہ آباداں کو دے بیٹھے

کھڑے تھے میر صاحب گھر کے دروازے پہ حیراں سے

میر تقی میر

سو ہی بات آئی اٹھے اس پاس سے جاں سے گئے

اکتوبر 6, 2015میر تقی میر،اساتذہ،غزلقرآں،مہماں،گلستاں،پریشاں،ایماں،بیاباں،جاںadmin

دیوان دوم غزل 1013

ہم نہ کہتے تھے رہے گا ہم میں کیا یاں سے گئے

سو ہی بات آئی اٹھے اس پاس سے جاں سے گئے

کیا بخود رہنا ہمارا کچھ رکھے ہے اعتبار

آپ میں آئے کبھو اب ہم تو مہماں سے گئے

جب تلک رہنا بنا دل تنگ غنچے سے رہے

دیکھیے کیا گل کھلے گا اب گلستاں سے گئے

کیا غزالوں ہی کو ہم بن وحشت بسیار ہے

کوہ بھی نالاں رہے جب ہم بیاباں سے گئے

لائی آفت خانقاہ و مسجد اوپر وہ نگاہ

صوفیاں دیں سے گئے سب شیخ ایماں سے گئے

دور کر خط کو کیا چہرہ کتابی ان نے صاف

اب قیامت ہے کہ سارے حرف قرآں سے گئے

جی تو اس کی زلف میں دل کا کل پیچاں میں میر

جا بھی نکلے اس کنے تو ہم پریشاں سے گئے

میر تقی میر

سر ہمارے ہیں گوے میداں کی

اکتوبر 6, 2015میر تقی میر،اساتذہ،غزلمہماں،میداں،گریباں،انساں،ایماں،بان،درباںadmin

دیوان دوم غزل 951

ٹپہ بازی سے چرخ گرداں کی

سر ہمارے ہیں گوے میداں کی

جی گیا اس کے تیر کے ہمراہ

تھی تواضع ضرور مہماں کی

ہیں لیے آبروے خنجر و تیغ

ترچھی پلکیں تری بھویں بانکی

پھوڑ ڈالیں گے سر ہی اس در پر

منت اٹھتی نہیں ہے درباں کی

سر دامن سے گفتگو کریے

بات بگڑی لب گریباں کی

اس بت شوخ کی ہے طینت میں

دشمنی میرے دین و ایماں کی

آدمی سے ملک کو کیا نسبت

شان ارفع ہے میر انساں کی

میر تقی میر

پہ جوش دل میں کبھو آگیا تو طوفاں ہیں

اکتوبر 6, 2015میر تقی میر،اساتذہ،غزلمہماں،مسلماں،نمایاں،ایماں،بداماں،جاں،حیراں،ساماں،طوفاںadmin

دیوان دوم غزل 898

اگرچہ اب کے ہم اے ابر خشک مژگاں ہیں

پہ جوش دل میں کبھو آگیا تو طوفاں ہیں

صنم پرستی میں اے راہباں نہ کی تقصیر

تم اہل صومعہ سے پوچھو وے مسلماں ہیں

کریں انھوں پہ بھلا کس طرح نظر گستاخ

بتان شہر ہمارے تو دین و ایماں ہیں

چمن میں جاکے بھرو تم گلوں سے جیب و کنار

ہم اپنے دل ہی کے ٹکڑوں سے گل بداماں ہیں

رہے ہیں دیکھ جو تصویر سے ترے منھ کو

ہماری آنکھ سے ظاہر ہے یہ کہ حیراں ہیں

رہا ہے کون سا پردہ ترے ستم کا شوخ

کہ زخم سینہ ہمارے سبھی نمایاں ہیں

شبیہ شکل سا ہے حال ضبط عشق کے بیچ

کہ رنگ روپ ہے سب کچھ ولیک بے جاں ہیں

بنے تو عزت عشاق میں نہ کر تقصیر

کہ ایسے لوگ پیارے عزیز مہماں ہیں

جو ابر دشت میں برسے تو ہم اڑاویں خاک

وہ میر آب ہے ہم یاں کے میر ساماں ہیں

میر تقی میر

دامن گل گریۂ خونیں سے سب افشاں ہوا

اکتوبر 6, 2015میر تقی میر،اساتذہ،غزلمہماں،نالاں،ویراں،گریاں،پاں،افشاں،آساں،جاں،حیراں،داماں،طوفاںadmin

دیوان دوم غزل 710

وارد گلشن غزل خواں وہ جو دلبر یاں ہوا

دامن گل گریۂ خونیں سے سب افشاں ہوا

طائران باغ کو تھا بیت بحثی کا دماغ

پر ہر اک درد سخن سے میر کے نالاں ہوا

دل کی آبادی کو پہنچا اپنے گویا چشم زخم

دیکھتے ہی دیکھتے یہ شہر سب ویراں ہوا

سبز بختی پر ہے اس کی طائر سدرہ کو رشک

جو شکار اس تیغ کے سائے تلے بے جاں ہوا

خاک پر بھی دوڑتی ہے چشم مہر و ماہ چرخ

کس دنی الطبع کے گھر جا کے میں مہماں ہوا

تھا جگر میں جب تلک قطرہ ہی تھا خوں کا سرشک

اب جو آنکھوں سے تجاوز کر چلا طوفاں ہوا

اس کے میرے بیچ میں آئینہ آیا تھا ولے

صورت احوال ساری دیکھ کر حیراں ہوا

دل نے خوں ہو عشق خوباں میں بھی کیا بدلے ہیں رنگ

چہروں کو غازہ ہوا ہونٹوں کا رنگ پاں ہوا

تم جو کل اس راہ نکلے برق سے ہنستے گئے

ابر کو دیکھو کہ جب آیا ادھر گریاں ہوا

جی سے جانا بن گیا اس بن ہمیں پل مارتے

کام تو مشکل نظر آتا تھا پر آساں ہوا

جب سے ناموس جنوں گردن بندھا ہے تب سے میر

جیب جاں وابستۂ زنجیر تا داماں ہوا

میر تقی میر

نکالا سر سے میرے جاے مو خار مغیلاں کو

اکتوبر 6, 2015میر تقی میر،اساتذہ،غزلہجراں،فراواں،مہماں،مغیلاں،نیستاں،نامسلماں،گریاں،پنہاں،پریشاں،انساں،آساں،بیاباں،باراں،جواناں،جاں،خنداں،دہقاں،دنداں،سازاں،سخنداں،سردرگریباں،عریاں،عزیزاں،غزالاںadmin

دیوان اول غزل 377

فلک نے گر کیا رخصت مجھے سیر بیاباں کو

نکالا سر سے میرے جاے مو خار مغیلاں کو

وہ ظالم بھی تو سمجھے کہہ رکھا ہے ہم نے یاراں کو

کہ گورستان سے گاڑیں جدا ہم اہل ہجراں کو

نہیں یہ بید مجنوں گردش گردون گرداں نے

بنایا ہے شجر کیا جانیے کس مو پریشاں کو

ہوئے تھے جیسے مرجاتے پر اب تو سخت حسرت ہے

کیا دشوار نادانی سے ہم نے کار آساں کو

کہیں نسل آدمی کی اٹھ نہ جاوے اس زمانے میں

کہ موتی آب حیواں جانتے ہیں آب انساں کو

تجھے گر چشم عبرت ہے تو آندھی اور بگولے سے

تماشا کر غبار افشانی خاک عزیزاں کو

لباس مرد میداں جوہر ذاتی کفایت ہے

نہیں پرواے پوشش معرکے میں تیغ عریاں کو

ہواے ابر میں گرمی نہیں جو تو نہ ہو ساقی

دم افسردہ کردے منجمد رشحات باراں کو

جلیں ہیں کب کی مژگاں آنسوئوں کی گرم جوشی سے

اس آب چشم کی جوشش نے آتش دی نیستاں کو

وہ کافر عشق کا ہے دل کہ میری بھی رگ جاں تک

سدا زنار ہی تسبیح ہے اس نامسلماں کو

غرور ناز سے آنکھیں نہ کھولیں اس جفا جونے

ملا پائوں تلے جب تک نہ چشم صد غزالاں کو

نہ سی چشم طمع خوان فلک پر خام دستی سے

کہ جام خون دے ہے ہر سحر یہ اپنے مہماں کو

زبس صرف جنوں میرے ہوا آہن عجب مت کر

نہ ہو گر حلقۂ در خانۂ زنجیر سازاں کو

بنے ناواقف شادی اگر ہم بزم عشرت میں

دہان زخم دل سمجھے جو دیکھا روے خنداں کو

نہیں ریگ رواں مجنوں کے دل کی بے قراری نے

کیا ہے مضطرب ہر ذرئہ گرد بیاباں کو

کسی کے واسطے رسواے عالم ہو پہ جی میں رکھ

کہ مارا جائے جو ظاہر کرے اس راز پنہاں کو

گری پڑتی ہے بجلی ہی تبھی سے خرمن گل پر

ٹک اک ہنس میرے رونے پر کہ دیکھے تیرے دنداں کو

غرور ناز قاتل کو لیے جا ہے کوئی پوچھے

چلا تو سونپ کر کس کے تئیں اس صید بے جاں کو

وہ تخم سوختہ تھے ہم کہ سرسبزی نہ کی حاصل

ملایا خاک میں دانہ نمط حسرت سے دہقاں کو

ہوا ہوں غنچۂ پژمردہ آخر فصل کا تجھ بن

نہ دے برباد حسرت کشتۂ سردرگریباں کو

غم و اندوہ و بیتابی الم بے طاقتی حرماں

کہوں اے ہم نشیں تاچند غم ہاے فراواں کو

گل وسرو وسمن گر جائیں گے مت سیرگلشن کر

ملا مت خاک میں ان باغ کے رعنا جواناں کو

بہت روئے جو ہم یہ آستیں رکھ منھ پہ اے بجلی

نہ چشم کم سے دیکھ اس یادگارچشم گریاں کو

مزاج اس وقت ہے اک مطلع تازہ پہ کچھ مائل

کہ بے فکرسخن بنتی نہیں ہرگز سخنداں کو

میر تقی میر

مرغ خوش خواں عزیز کوئی تھا

اکتوبر 6, 2015میر تقی میر،اساتذہ،غزلمہماں،یاں،کنعاں،جاں،خواںadmin

دیوان اول غزل 59

شب تھا نالاں عزیز کوئی تھا

مرغ خوش خواں عزیز کوئی تھا

تھی تمھارے ستم کی تاب اس تک

صبر جو یاں عزیز کوئی تھا

شب کو اس کا خیال تھا دل میں

گھر میں مہماں عزیز کوئی تھا

چاہ بے جا نہ تھی زلیخا کی

ماہ کنعاں عزیز کوئی تھا

اب تو اس کی گلی میں خوار ہے لیک

میر بے جاں عزیز کوئی تھا

میر تقی میر

کوئی دلچسپی، کوئی ربطِ دل و جاں جاناں

دسمبر 1, 2007منصور آفاق،شعراء،غزلہجراں،فروزاں،ہراساں،مہماں،مژگاں،نمکداں،نمایاں،ناداں،چراغاں،گلستاں،گریباں،گریزاں،پیماں،پریشاں،انساں،احساں،بیاباں،جاں،حیراں،دبستاں،درخشاں،زنداں،ساماں،شبستاں،طوفاں،عنواں،عریاںadmin

منصور آفاق ۔ غزل نمبر 266

صحبتِ قوسِ قزح کا کوئی امکاں جاناں

کوئی دلچسپی، کوئی ربطِ دل و جاں جاناں

میرے اندازِ ملاقات پہ ناراض نہ ہو

مجھ پہ گزرا ہے ابھی موسمِ ہجراں جاناں

جو مرے نام کو دنیا میں لیے پھرتے ہیں

تیری بخشش ہیں یہ اوراقِ پریشاں جاناں

آ مرے درد کے پہلو میں دھڑک کہ مجھ میں

بجھتی جاتی ہے تری یادِ فروزاں جاناں

تیری کھڑکی کہ کئی دن سے مقفل مجھ پر

جیسے کھلتا نہیں دروازئہ زنداں جاناں

تیری گلیاں ہیں ترا شہر ہے تیرا کوچہ

میں ، مرے ساتھ ترا وعدہ و پیماں جاناں

پھر کوئی نظم لٹکتی ہے ترے کعبہ پر

پھر مرے صبر کی بے چارگی عنواں جاناں

ہجر کا ایک تعلق ہے اسے رہنے دے

میرے پہلو میں تری یاد ہراساں جاناں

ہم فرشتوں کی طرح گھر میں نہیں رہ سکتے

ہاں ضروری ہے بہت رشتہء انساں جاناں

زخم آیا تھا کسی اور کی جانب سے مگر

میں نے جو غور کیا تیرا تھا احساں جاناں

اس تعلق میں کئی موڑ بڑے نازک ہیں

اور ہم دونوں ابھی تھوڑے سے ناداں جاناں

دشت میں بھی مجھے خوشبو سے معطر رکھے

دائم آباد رہے تیرا گلستاں جاناں

ویسا الماری میں لٹکا ہے عروسی ملبوس

بس اسی طرح پڑا ہے ترا ساماں جاناں

مجھ کو غالب نے کہا رات فلک سے آ کر

تم بھی تصویر کے پردے میں ہو عریاں جاناں

وہ جو رُوٹھی ہوئی رت کو بھی منا لیتے ہیں

بس وہی شعرِ فراز اپنا دبستاں جاناں

روشنی دل کی پہنچ پائی نہ گھر تک تیرے

میں نے پلکوں پہ کیا کتنا چراغاں جاناں

کیا کہوں ہجر کہاں وصل کہاں ہے مجھ میں

ایک جیسے ہیں یہاں شہر و بیاباں جاناں

چھت پہ چڑھ کے میں تمہیں دیکھ لیا کرتا تھا

تم نظر آتی تھی بچپن سے نمایاں جاناں

اک ذرا ٹھہر کہ منظر کو گرفتار کروں

کیمرہ لائے ابھی دیدئہ حیراں جاناں

مانگ کر لائے ہیں آنسو مری چشمِ نم سے

یہ جو بادل ہیں ترے شہر کے مہماں جاناں

لڑکیاں فین ہیں میری انہیں دشنام نہ دے

تتلیاں پھول سے کیسے ہوں گریزاں جاناں

آگ سے لختِ جگر اترے ہیں تازہ تازہ

خانہء دل میں ہے پھر دعوتِ مژگاں جاناں

زخم در زخم لگیں دل کی نمائش گاہیں

اور ہر ہاتھ میں ہے ایک نمکداں جاناں

تھم نہیں سکتے بجز تیرے کرم کے، مجھ میں

کروٹیں لیتے ہوئے درد کے طوفاں جاناں

بلب جلتے رہیں نیلاہٹیں پھیلاتے ہوئے

میرے کمرے میں رہے تیرا شبستاں جاناں

رات ہوتے ہی اترتا ہے نظر پر میری

تیری کھڑکی سے کوئی مہرِ درخشاں جاناں

تُو کہیں بستر کمخواب پہ لیٹی ہو گی

پھر رہا ہوں میں کہیں چاک گریباں جاناں

نذرِ احمد فراز

منصور آفاق

بات اس کی کاٹتے رہے اور ہمزباں رہے

نومبر 15, 2006الطاف حسین حالیہمزباں،مہماں،مغاں،نہاں،کارواں،جاں،درمیاںadmin

الطاف حسین حالی ۔ غزل نمبر 23

کل مدعی کو آپ پر کیا کیا گماں رہے

بات اس کی کاٹتے رہے اور ہمزباں رہے

یارانِ تیز گام نے محمل کو جالیا

ہم محوِ نالۂ جرسِ کارواں رہے

یا کھینچ لائے دہر سے رندوں کو اہلِ وعظ

یا آپ بھی ملازمِ پیر مغاں رہے

وصل مدام سے بھی ہماری بجھی نہ پیاس

ڈوبے ہم آبِ خضر میں اور نیم جاں رہے

کل کی خبر ہو تو جھوٹے کا رو سیاہ

تم مدعی کے گھر گئے اور مہماں رہے

دریا کو اپنی موج کی طغیانیوں سے کام

کشتی کسی کی پار ہو یا درمیاں رہے

حالیؔ کے بعد کوئی نہ ہمدرد پھر ملا

کچھ راز تھے کہ دل میں ہمارے نہاں رہے

الطاف حسین حالی

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: مہماں

‎دھیان جا نکلا مگر اک روئے تاباں کی طرف

مختصر سا ہے سَفَر ساماں بہت

کچھ بھی ہوجائے پریشاں نہیں ہوتا کوئی

موت کی جیب سے بھی زیست کا ساماں نکلا

یہاں ہو گی یہاں ہو گا، وہاں ہو گی وہاں ہو گا

مرا دامن بنے تو باندھ دو گل کے گریباں سے

سو ہی بات آئی اٹھے اس پاس سے جاں سے گئے

سر ہمارے ہیں گوے میداں کی

پہ جوش دل میں کبھو آگیا تو طوفاں ہیں

دامن گل گریۂ خونیں سے سب افشاں ہوا

نکالا سر سے میرے جاے مو خار مغیلاں کو

مرغ خوش خواں عزیز کوئی تھا

کوئی دلچسپی، کوئی ربطِ دل و جاں جاناں

بات اس کی کاٹتے رہے اور ہمزباں رہے

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: