ٹیگ کے محفوظات: مندر

میں انہیں دیکھتا رہتا ہوں سمندر ہو کر

دسمبر 1, 2007منصور آفاق،شعراء،غزلمندر،اندر،بندر،سمندر،سکندرadmin

منصور آفاق ۔ غزل نمبر 175

وہ جو پھرتے ہیں کناروں پہ قلندر ہو کر

میں انہیں دیکھتا رہتا ہوں سمندر ہو کر

انہی گلیوں میں ، ملا دیس نکالا جن سے

میں بھی پھرتا ہوں مقدر کا سکندر ہو کر

میں نے دیکھی ہے فقط ایک خدا کی تمجید

کبھی مسجد ، کبھی معبد ، کبھی مندر ہو کر

میں بہر طور تماشا ہوں تماشا گر کا

ڈگڈگی والا کبھی تو کبھی بندر ہو کر

مجھ کو معلوم دنیا کی حقیقت منصور

باہر آیا ہوں کئی بار میں اندر ہو کر

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

بچے نے اپنے خواب کا منظر بنا لیا

دسمبر 1, 2007منصور آفاق،شعراء،غزللشکر،مندر،منظر،کنکر،کر،پتھر،پر،اندر،اکثر،دلبر،در،سمندرadmin

منصور آفاق ۔ غزل نمبر 116

موجوں کے آس پاس کوئی گھر بنا لیا

بچے نے اپنے خواب کا منظر بنا لیا

اپنی سیاہ بختی کا اتنا رکھا لحاظ

گوہر ملا تو اس کو بھی کنکر بنا لیا

بدلی رُتوں کو دیکھ کے اک سرخ سا نشاں

ہر فاختہ نے اپنے پروں پر بنا لیا

شفاف پانیوں کے اجالوں میں تیرا روپ

دیکھا تو میں نے آنکھ کو پتھر بنا لیا

ہر شام بامِ دل پہ فروزاں کیے چراغ

اپنا مزار اپنے ہی اندر بنا لیا

پیچھے جو چل دیا مرے سائے کی شکل میں

میں نے اُس ایک فرد کو لشکر بنا لیا

شاید ہر اک جبیں کا مقدر ہے بندگی

مسجد اگر گرائی تو مندر بنا لیا

کھینچی پلک پلک کے برش سے سیہ لکیر

اک دوپہر میں رات کا منظر بنا لیا

پھر عرصۂ دراز گزارا اسی کے بیچ

اک واہموں کا جال سا اکثر بنا لیا

بس ایک بازگشت سنی ہے تمام عمر

اپنا دماغ گنبدِ بے در بنا لیا

باہر نکل رہے ہیں ستم کی سرنگ سے

لوگوں نے اپنا راستہ مل کر بنا لیا

گم کربِ ذات میں کیا یوں کربِ کائنات

آنکھوں کے کینوس پہ سمندر بنا لیا

منصور جس کی خاک میں افلاک دفن ہیں

دل نے اسی دیار کو دلبر بنا لیا

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔