ٹیگ کے محفوظات: ملتا

کون اس راستے سے گزرا ہے؟

جون 1, 2021یاور ماجد،آنکھ بھر آسمان،غزلملتا،مچلتا،مچایا،ڈبوتا،گہرا،گھماتا،گزرا،پروتا،اچھا،اندھیرا،آیا،بہلتا،بجھاتا،بدلتا،تارا،جلتا،جگاتا،جھلستا،سنبھلتا،صحراadmin

پتا پتا شجر سے لپٹا ہے

کون اس راستے سے گزرا ہے؟

آسماں بھی سراب ہی نکلا

بحر میں آب ہے کہ صحرا ہے

جانے کب اندمال ہو اس کا

دیکھنے میں تو زخم گہرا ہے

کوئی تو ہے جو کائنات مری

بےسبب روز و شب گھماتا ہے

دل کی نیّا میں جو لگی ہے آگ

اچھی لگتی ہے، کیوں بجھاتا ہے؟

میں نہ دیکھوں تو ہے ادھورا سا

وہ فلک پر جو ایک تارا ہے

کوئی دستک سنائی دی ہے مجھے

دیکھنا کون در پہ آیا ہے

اس طرح اضطرار سے آخر

کون میرے سوا بہلتا ہے؟

لا کے چھوڑیں گی ہی بہار یہاں

شور چڑیوں نے یوں مچایا ہے

مٹ نہ پائیں گی اس کی ریکھائیں

اس طرح کاہے، ہاتھ مَلتا ہے؟

خواب میں روز آ کے اک پنچھی

رات پچھلے پہر جگاتا ہے

یاد کی گلیوں میں کوئی راہی

کبھی گرتا، کبھی سنبھلتا ہے

آسماں کے توے پہ اک سورج

روز آتا ہے روز جلتا ہے

چاند جوبن پہ جب بھی آ جائے

ناؤ میری ہی کیوں ڈبوتا ہے؟

وقت ہے اژدھا کوئی شاید

کینچلی روز اک بدلتا ہے

صبح دم ٹہنیوں پہ شبنم کے

روز موتی کوئی پروتا ہے

روز جب آفتاب ڈھل جائے

دل مرا جانے کیوں مچلتا ہے

میں نے جو سوچا، جو کہا، ہے برا

تم نے جو بھی کہا وہ اچھا ہے

پیڑ وہ ہی رہے ہرا ہر دم

روز جو دھوپ میں جھلستا ہے

بھر لو آنکھوں میں اب افق یاؔور

اس سے آگے تو بس اندھیرا ہے

یاور ماجد

آنکھ بھر آسمان ۔ فہرست

لمحوں کو اوڑھے پہلو بدلتا ہوا سکُوت

جون 1, 2021یاور ماجد،آنکھ بھر آسمان،غزلملتا،مسلتا،ٹہلتا،ٹلتا،پگھلتا،بدلتا،سنبھلتاadmin

تنہائیوں کی رات میں پلتا ہوا سُکُوت

لمحوں کو اوڑھے پہلو بدلتا ہوا سکُوت

دن بَھر کی شورشوں کی دُرشتی کو توڑ کر

غازہ گگن کے گال پہ ملتا ہوا سکوت

پھر چُپ خزاں کی رات میں پتوں کے شور سے

کانوں کے پاس آن کے ٹلتا ہوا سکوت

ان برف باریوں میں ہواؤں کی سائیں سائیں

دِل کے فلک پہ جمتا پگھلتا ہوا سکُوت

طوفاں کے بعد اُجڑتی نکھرتی سیاہ رات

لمحہ بہ لمحہ گرتا سنبھلتا ہوا سکُوت

ویراں کھنڈر میں روح سی ماتم کُناں کوئی

دِل کے اُجاڑ گھر میں ٹہلتا ہوا سکُوت

شعر و سُخن کا شور بھی یاوؔر ہوا عذاب

لاؤ صدا کے پھول مسلتا ہوا سکُوت

یاور ماجد

آنکھ بھر آسمان ۔ فہرست

اُس پر کیا لکھا جانا ہے

فروری 27, 2017ماجد صدیقی،سخناب،غزلہوا،ہوتا،فرا،لہراتا،لیا،لیتا،لکھا،لگا،لگتا،لٹکا،ملا،ملتا،مکرا،مٹتا،چلا،نکلا،چکا،چھنتا،چبھتا،چتا،چرچا،ڈھلتا،ڈرتا،کہتا،کیا،کھلواتا،کھلا،کھڑا،کرتا،گیا،ٹوٹا،ٹھہرا،ٹپکا،ٹھٹکا،پیا،پڑا،پایا،آتا،الجھا،اچّھا،اڑا،اگا،اٹکا،اٹھتا،اپنا،بچھا،بنا،بکتا،بپا،بھرا،بھرتا،بانٹا،تلتا،جلتا،جیسا،جھڑتا،جھپٹا،جانا،خدا،دہرایا،دیکھا،دیا،دیتا،رہا،رکھا،رستہ،رستا،سہا،سیکھا،سا،سجاadmin

ماجد صدیقی ۔ غزل نمبر 160

کورا کاغذ سوچ رہا ہے

اُس پر کیا لکھا جانا ہے

نرخ نہیں گو ایک سے لیکن

ہر انسان یہاں بِکتا ہے

کون ہے گالی سُن کر جس کے

ہونٹوں سے امرت ٹپکا ہے

دشتِ طلب میں بِن کُتّوں کے

کس کے ہاتھ شکار لگا ہے

اپنی چال سلامت رکھنے

شیر ہرن پر ٹوٹ پڑا ہے

کُود کے جلتی آگ میں دیکھو

پروانہ گلزار بنا ہے

ٹھیک ہے گر بیٹا یہ سوچے

اُس نے باپ سے کیا پایا ہے

پکڑا جانے والا ہی کیوں

تنہا دم مجرم ٹھہرا ہے

جس نے بھی جاں بچتی دیکھی

تنکوں تک پر وہ اٹکا ہے

مجرم نے پچھلی پیشی پر

جو بھی کہا اُس سے مُکرا ہے

خالق اپنی خلق سے کھنچ کر

عرش پہ جانے کیا کرتا ہے

بہلانے مجھ بچّے کو وہ

جنت کا لالچ دیتا ہے

پیڑ زبانوں کو لٹکائے

دشت سے جانے کیا کہتا ہے

دیواروں سے ڈرتا ہو گا

کہنے والا کیوں ٹھٹکا ہے

موجِ الم نے کھول کے بازو

مجھ کو جیسے بھنچ لیا ہے

اُتنا ہی قد کاٹھ ہے اُس کا

جتنا جس کو ظرف ملا ہے

کس کو اَب لوٹانے جائیں

گردن میں جو طوق پڑا ہے

ٹہنی عاق کرے خود اُس کو

پھول وگرنہ کب جھڑتا ہے

جینے والا جانے کیونکر

موت کے در پر آن کھڑا ہے

صحرا کی بے درد ہوا نے

بادل کو کب رُکنے دیا ہے

دیکھوں اور بس دیکھو اُس کو

جانے اُس تصویر میں کیا ہے

کہنے کی باتیں ہیں ساری

زخمِ رگِ جاں کب بھرتا ہے

رُت کی خرمستی یہ جانے

پودا کیسے پیڑ بنا ہے

برق اور رعد کے لطف و کرم سے

گلشن کو کب فیض ملا ہے

لوٹایا اِک ڈنک میں سارا

سانپ نے جتنا دُودھ پیا ہے

ربط نہیں اُس سے اتنا بھی

شہر میں جتنا کچھ چرچا ہے

بند کلی چُپ رہنا اُس کا

لب کھولے تو پھولوں سا ہے

برگ و ثمر آنے سے پہلے

شاخ نے کیا کیا جبر سہا ہے

گُل برساتا ہے اوروں پر

وُہ جو زخم مجھے دیتا ہے

کوہِ قاف سے اِس جانب وہ

ڈھونڈوں بھی تو کب ملتا ہے

اُس کی دو رنگی مت پُوچھو

کالر پر جو پھول سجا ہے

رسّی کی شِشکار ہے پیچھے

کھیت کنارے جال بِچھا ہے

ڈس لیتا ہے سانپ جسے بھی

رَسّی تک سے وہ ڈرتا ہے

قبرپہ جل مرنے والے کی

ایک دیا اب تک جلتا ہے

بانس انار سے آنکھ ملائے

اپنی قامت ناپ رہا ہے

موسیٰ ہر فرعون کی خاطر

مشکل سے نت نت آتا ہے

سارے ہونٹ سلے ہیں پھر بھی

گلیوں میں اک حشر بپا ہے

دھڑکن دھرکن ساز جدا ہیں

کس نے کس کا دُکھ بانٹا ہے

کرنا آئے مکر جسے بھی

زر کے ساتھ وُہی تُلتا ہے

خون میں زہر نہیں اُترا تو

آنکھوں سے پھر کیا رِستا ہے

ہم اُس سے منہ موڑ نہ پائے

پیار سے جس نے بھی دیکھا ہے

کون ہے وہ جو محرومی کی

تہمت اپنے سر لیتا ہے

کھُلتی ہے ہر آنکھ اُسی پر

غنچہ جب سے پھول بنا ہے

انساں اپنا زور جتانے

چاند تلک پر جا نکلا ہے

دل نے پھر گُل کھِل اُٹھنے پر

نام کسی کا دہرایا ہے

وقت صفائی مانگ کے ہم سے

کاہے کو مُنہ کھُلواتا ہے

ہم شبنم کے قطروں پرہی

سورج داتا کیوں جھپٹا ہے

فصلِ سکوں پر بُغض یہ کس کا

مکڑی بن کر آ ٹوٹا ہے

دل تتلی کا پیچھا کرتے

کن کانٹوں میں جا اُلجھا ہے

زخم اگر بھر جائے بھی تو

نقش کہاں اُس کا مٹتا ہے

انجانوں سا مجھ سے وُہ پوچھے

اُس سے مرا دل مانگتا کیاہے

پھول جھڑیں یا پتے سُوکھیں

موسم نے یہ کب دیکھا ہے

اَب تو دل کی بات اٹھاتے

لفظ بھی چھلنی سے چھنتاہے

تجھ بن جو منظر بھی دیکھیں

آنکھ میں کانٹوں سا چُبھتا ہے

کانوں کے دَر کھُل جائیں تو

پتھر تک گویا لگتا ہے

آنکھوں کی اِس جھیل میں جانے

کون کنول سا لہراتا ہے

دور فلک پر کاہکشاں کا

رنگ ترے سپنوں جیسا ہے

گلشن والے کب جانیں یہ

پنجرے میں دن کب ڈھلتا ہے

صبح اُسی کے صحن میں اُتری

جس کا دامن چاک ملا ہے

جانے کس خرمن پر پہنچے

تابہ اُفق جو کھیت ہرا ہے

مَیں وہ غار تمّنا کا ہوں

سورج جس سے رُوٹھ گیا ہے

جانے کیا کیا زہر نہ پی کر

انساں نے جینا سیکھا ہے

بحر پہ پُورے چاند کے ہوتے

پانی کیوں ٹھہرا ٹھہرا ہے

وہ کب سایہ سینت کے رکھے

رستے میں جو پیڑ اُگا ہے

اُس کا حسن برابر ہو تو

حرف زباں پر کب آتا ہے

دیکھنے پر اُس آئنہ رُو کے

پھولوں کا بھی رنگ اُڑا ہے

پھل اُترا جس ٹہنی پر بھی

پتھر اُس پر آن پڑا ہے

کب اوراق پُرانے پلٹے

وُہ کہ مجھے جو بھول چکا ہے

اپنی اپنی قبر ہے سب کی

کون کسی کے ساتھ چلا ہے

اَب تو اُس تک جانے والا

گستاخی کا ہی رستہ ہے

اُونٹ چلے ڈھلوان پہ جیسے

ایسا ہی کچھ حال اپنا ہے

لُٹ کے کہے یہ شہد کی مکھی

محنت میں بھی کیا رکھا ہے

کس نے آتا دیکھ کے مجھ کو

بارش میں در بھینچ لیا ہے

اُس سے حرفِ محبت کہنے

ہم نے کیا کیا کچھ لکھا ہے

دامن سے اُس شوخ نے مجھ کو

گرد سمجھ کر جھاڑ دیا ہے

فرق ہے کیوں انسانوں میں جب

سانس کا رشتہ اِک جیسا ہے

فرصت ہی کب پاس کسی کے

کون رُلانے بھی آتا ہے

یادوں کے اک ایک ورق پر

وُہ کلیوں سا کھِل اُٹھتا ہے

شیر بھی صید ہُوا تو آخر

دیواروں پر آ لٹکا ہے

نُچنے سے اِک برگ کے دیکھو

پیڑ ابھی تک کانپ رہا ہے

ایک ذرا سی چنگاری نے

سارا جنگل پھونک دیا ہے

لفظ سے پاگل سا برتاؤ

ساگر ناؤ سے کرتا ہے

بہلا ہے دل درد سے جیسے

بچہ کانچ سے کھیل رہا ہے

کڑوے پھل دینے والے کا

رشتہ باغ سے کب ملتا ہے

خدشوں میں پلنے والوں نے

سوچا ہے جو، وُہی دیکھا ہے

اپنے اپنے انت کو پانے

جس کو دیکھو دوڑ رہا ہے

زور آور سبزے نے دیکھو

بادل سے حق مانگ لیا ہے

کس رُت کے چھننے سے جانے

صحنِ گلستاں دشت ہوا ہے

ہونٹ گواہی دیں نہ کچھ اُس کی

دل میں جتنا زہر بھرا ہے

لفظ کے تیشے سے ابھرے جو

زخم وہی گہرا ہوتا ہے

آنکھ ٹھہرتی ہے جس پر بھی

منظر وُہ چھالوں جیسا ہے

بن کر کالی رات وہ دیکھو

کّوا چڑیا پر جھپٹا ہے

جتنا اپنے ساتھ ہے کوئی

اُتنا اُس کے ساتھ خُدا ہے

اونچی کر دے لو زخموں کی

پرسش وُہ بے رحم چِتا ہے

ساکت کر دے جو قدموں کو

جیون وُہ آسیب ہُوا ہے

دشت تھا اُس کا ہجر پہ ہم نے

یہ صحرا بھی پاٹ لیا ہے

مجھ سے اُس کا ذکر نہ چھیڑو

وہ جیسا بھی ہے اچّھا ہے

ساتھ ہمارے ہے وہ جب سے

اور بھی اُس کا رنگ کھُلا ہے

شاہی بھی قربان ہو اُس پر

ماجدؔ کو جو فقر ملا ہے

ماجد صدیقی

نیند میں ساری رات چلتا رہا

اکتوبر 25, 2015پروین شاکر،شعراء،غزلملتا،چلتا،پلتا،پَھلتا،بہلتا،بدلتا،جلتاadmin

پروین شاکر ۔ غزل نمبر 27

چاند میری طرح پگھلتا رہا

نیند میں ساری رات چلتا رہا

جانے کس دُکھ سے دل گرفتہ تھا

مُنہ پہ بادل کی راکھ ملتا رہا

میں تو پاؤں کے کانٹے چُنتی رہی

اور وہ راستہ بدلتا رہا

رات گلیوں میں جب بھٹکتی تھی

کوئی تو تھا جو ساتھ چلتا رہا

موسمی بیل تھی مَیں ، سُوکھ گئی

وہ تناور درخت، پَھلتا رہا

سَرد رُت میں ، مُسافروں کے لیے

پیڑ ، بن کر الاؤ ، جلتا رہا

دل ، مرے تن کا پُھول سا بچّہ

پتّھروں کے نگر میں پلتا رہا

نیند ہی نیند میں کھلونے لیے

خواب ہی خواب میں بہلتا رہا

پروین شاکر

تو کہیو جب چلا ہوں میں تب اس کا جی نکلتا تھا

اکتوبر 6, 2015میر تقی میر،اساتذہ،غزلملتا،نکلتاadmin

دیوان اول غزل 156

جواے قاصد وہ پوچھے میربھی ایدھر کو چلتا تھا

تو کہیو جب چلا ہوں میں تب اس کا جی نکلتا تھا

سماں افسوس و بیتابی سے تھا کل قتل کو میرے

تڑپتا تھا ادھر میں اور ادھر وہ ہاتھ ملتا تھا

میر تقی میر

ہم یہ سمجھے حادثہ ٹلتا رہا

جنوری 8, 1972شعراء،غزلملتا،چلتا،ٹلتا،پھلتا،جلتاadmin

باقی صدیقی ۔ غزل نمبر 60

آستیں میں سانپ اک پلتا رہا

ہم یہ سمجھے حادثہ ٹلتا رہا

آپ تو اک بات کہہ کر چل دئیے

رات بھر بستر مرا جلتا رہا

ایک غم سے کتنے غم پیدا ہوئے

دل ہمارا پھولتا پھلتا رہا

زندگی کی آس بھی کیا آس ہے

موج دریا پر دیا جلتا رہا

اک نظر تنکا بنی کچھ اسی طرح

دیر تک آنکھیں کوئی ملتا رہا

یہ نشاں کیسے ہیں باقیؔ دیکھنا

کون دل کی راکھ پر چلتا رہا

باقی صدیقی

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: ملتا

کون اس راستے سے گزرا ہے؟

لمحوں کو اوڑھے پہلو بدلتا ہوا سکُوت

اُس پر کیا لکھا جانا ہے

نیند میں ساری رات چلتا رہا

تو کہیو جب چلا ہوں میں تب اس کا جی نکلتا تھا

ہم یہ سمجھے حادثہ ٹلتا رہا

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: