ٹیگ کے محفوظات: مسیحا

ہو کوئی بے بَصَر تَو بھَلا کیا دکھائی دے

مئی 20, 2021ضامن جعفری، غزلمسیحا، نقشا، کیا، تمنّا، تنہا، دریا، زیباadmin

حُسنِ نظر کو حُسن ہر اِک جا دکھائی دے

ہو کوئی بے بَصَر تَو بھَلا کیا دکھائی دے

خوش رنگیِ چمن بھی ہے غارت گرِ سکوں

گلشن بہ ہر نظر رخِ زیبا دکھائی دے

رشکِ صد انجمن ہے وہ تنہا اگر ملے

آجائے انجمن میں تَو تنہا دکھائی دے

اِس انجمن میں سَب کو ہے اپنی پڑی ہُوئی

دربارِ حُسن حشر کا نقشا دکھائی دے

الزامِ خودکُشی ہمیں دینے سے پیشتر

قاتل سے بھی کہیَں نہ مسیحا دکھائی دے

کب تک پیے گا شہر میں آنسو ہر ایک شخص

ہے کوئی جس کو قطرے میں دریا دکھائی دے

ضامنؔ! یہ کیسا گلشنِ امّید ہے جہاں

ہر برگِ گل پہ خونِ تمنّا دکھائی دے

ضامن جعفری

فیصلہ دیتے ہوئے عادل بھی رُسوا ہو گئے

اگست 31, 2017ماجد صدیقی، اَکھیاں بیچ الاؤ، غزلمسیحا، افشا، رسوا، صحرا، عنقاadmin

ماجد صدیقی ۔ غزل نمبر 26

کیا کہیں ذی مرتبت کتنے تھے اور کیا ہو گئے

فیصلہ دیتے ہوئے عادل بھی رُسوا ہو گئے

کونپلیں کیا کیا نہیں جھلسی ہیں بادِ مکر سے

گلستاں امید کے، کیا کیا نہ صحرا ہو گئے

جن دنوں کی چاہ میں بے تاب تھی خلقت بہت

شو مئی قسمت سے وہ دن اور عنقا ہو گئے

خُبث کیا کیا کھُل گیا اُن کا بھی جو تھے ذی شرف

نیّتوں کے جانے کیا کیا راز افشا ہو گئے

دم بخود ٹھہرے ہیں اُن کی پاک دامانی پہ ہم

قتل کرنے پر بھی جو ماجد مسیحا ہو گئے

ماجد صدیقی

کہتے ہیں ہم محتاجوں کا مسیحا ہے

جولائی 31, 2017ماجد صدیقی، دِل دِل کرب کمان، غزلمسیحا، کرشمہ، ٹھہرایا، پہنچا، جھپٹا، رکھاadmin

ماجد صدیقی ۔ غزل نمبر 1

وہ کہ جو دھونس جمانے آگ سا برسا ہے

کہتے ہیں ہم محتاجوں کا مسیحا ہے

بہرِ تحفّظ، گنتی کی کچھ راتوں کو

بھیڑ نے چِیتے کو مہماں ٹھہرایا ہے

جو چڑیا سونے کا انڈا دیتی تھی

غاصب اب کے اُس چڑیا پر جھپٹا ہے

کیا کہیے کس کس نے مستقبل اپنا

ہاتھ کسی کے کیونکر گروی رکھا ہے

بپھری خلق کے دھیان کو جس نے بدلا وہ

شعبدہ بازوں کی ڈفلی کا کرشمہ ہے

چودھری اور انداز سے خانہ بدوشوں سے

اپنا بھتّہ ہتھیانے آ پہنچا ہے

ماجد صدیقی

تجھ سے کچھ اور نہ اے میرے مسیحا! مانگوں

مئی 31, 2017ماجد صدیقی، شہر پناہ، غزلمچلتا، مسیحا، کیا، اجالا، بینا، بیضا، بالاadmin

ماجد صدیقی ۔ غزل نمبر 19

صحنِ امروز میں بچپن کا اُجالا مانگوں

تجھ سے کچھ اور نہ اے میرے مسیحا! مانگوں

بہرِ عرفان، عطا زیست مکّرر ہو اگر

میں جو مانگوں تو فقط دیدۂ بینا مانگوں

ہونٹ مانگوں وہ تپش جن سے، سخن کی جھلکے

اور درونِ رگِ جاں، خون مچلتا مانگوں

حرفِ حق منہ پہ جو ہے، اُس کی پذیرائی کو

پیشِ فرعون، خدا سے یدِ بیضا مانگوں

جس نے دی عمر مجھے، وام ہی، چاہے دی ہے

وہ سخی مدِّ مقابل ہو تو کیا کیا مانگوں

جو بھی دیکھے اُسے صنّاع مرا، یاد آئے

میں سرِ خاک بس ایسا قدِ بالا مانگوں

جس پہ ٹھہرے نہ کوئی چشمِ تماشا ماجدؔ

لفظ در لفظ وہ معنی کا اُجالا مانگوں

ماجد صدیقی

اتنا میٹھا ہے کہ کڑوا لاگے

اپریل 30, 2017ماجد صدیقی، آنگن آنگن رات، غزلمداوا، مسیحا، کڑوا، تماشا، دیکھاadmin

ماجد صدیقی ۔ غزل نمبر 32

کیا کہیں کیسا وُہ اچّھا لاگے

اتنا میٹھا ہے کہ کڑوا لاگے

جُھوٹ اُس نہج کو پہنچا ہے کہ اَب

حق سرائی بھی تماشا لاگے

ہاتھ شہ رگ پہ بھی رکھتا ہے مدام

وُہ کہ ظاہر میں مسیحا لاگے

دردمیں اَب کے وُہ شدّت اُتری

آنچ بھی جس کا مداوا لاگے

جیسے اپنا ہی چلن ہو ماجدؔ

مکر اس طور سے دیکھا لاگے

ماجد صدیقی

بچھڑنا ہے تو جھگڑا کیوں کریں ہم

اکتوبر 23, 2015Jaun Elia، جون ایلیا، شعراء، غزلہلکا، مسیحا، وا، ٹہلا، پیچھا، پرواہ، پردا، ایفا، اکٹھا، بھروسہ، برپا، تمنا، جھگڑا، دعوی، سوداadmin

جون ایلیا ۔ غزل نمبر 56

نیا اک رشتہ پیدا کیوں کریں ہم

بچھڑنا ہے تو جھگڑا کیوں کریں ہم

خموشی سے ادا ہو رسمِ دوری

کوئی ہنگامہ برپا کیوں کریں ہم

یہ کافی ہے کہ ہم دشمن نہیں ہیں

وفاداری کا دعویٰ کیوں کریں ہم

وفا، اخلاص، قربانی، مروّت

اب ان لفظوں کا پیچھا کیوں کریں ہم

سنا دیں عصمتِ مریم کا قصّہ؟

پر اب اس باب کو وا کیوں کریں ہم

زلیخائے عزیزاں بات یہ ہے

بھلا گھاٹے کا سودا کیوں کریں ہم

ہماری ہی تمنّا کیوں کرو تم

تمہاری ہی تمنا کیوں کریں ہم

کیا تھا عہد جب لمحموں میں ہم نے

تو ساری عمر ایفا کیوں کریں ہم

اُٹھا کر کیوں نہ پھینکیں ساری چیزیں

فقط کمروں میں ٹہلا کیوں کریں ہم

جو اک نسل فرومایہ کو پہنچے

وہ سرمایہ اکٹھا کیوں کریں ہم

نہیں دُنیا کو جب پرواہ ہماری

تو پھر دُنیا کی پرواہ کیوں کریں ہم

برہنہ ہیں سرِبازار تو کیا

بھلا اندھوں سے پردا کیوں کریں ہم

ہیں باشندے اسی بستی کے ہم بھی

سو خود پر بھی بھروسہ کیوں کریں ہم

پڑی رہنے دو انسانوں کی لاشیں

زمیں کا بوجھ ہلکا کیوں کریں ہم

یہ بستی ہے مسلمانوں کی بستی

یہاں کارِ مسیحا کیوں کریں ہم

جون ایلیا

ہوتا ہے شب و روز تماشا مرے آگے

اکتوبر 8, 2015مرزا اسد اللہ خان غالب، اساتذہ، غزللیلے، مینا، مسیحا، کلیسا، کیا، کا، اچھا، اشیا، تمنا، تماشا، تیرا، دریا، سیما، صہباadmin

دیوانِ غالب ۔ غزل نمبر 234

بازیچۂ اطفال ہے دنیا مرے آگے

ہوتا ہے شب و روز تماشا مرے آگے

اک کھیل ہے اورنگِ سلیماں مرے نزدیک

اک بات ہے اعجاز مسیحا مرے آگے

جز نام نہیں صورتِ عالم مجھے منظور

جز وہم نہیں ہستئِ اشیا مرے آگے

ہوتا ہے نہاں گرد میں صحرا مرے ہوتے

گِھستا ہے جبیں خاک پہ دریا مرے آگے

مت پوچھ کہ کیا حال ہے میر ا ترے پیچھے

تو دیکھ کہ کیا رنگ ہے تیرا مرے آگے

سچ کہتے ہو خود بین و خود آرا ہوں، نہ کیو ں ہوں

بیٹھا ہے بتِ آئنہ سیما مرے آگے

پھر دیکھیے اندازِ گل افشانئِ گفتار

رکھ دے کوئی پیمانۂ صہبا مرے آگے

نفرت کا گماں گزرے ہے، میں رشک سے گزرا

کیونکر کہوں، لو نام نہ ان کا مرے آگے

ایماں مجھے روکے ہے، جو کھینچے ہے مجھے کفر

کعبہ مرے پیچھے ہے کلیسا مرے آگے

عاشق ہوں پہ معشوق فریبی ہے مرا کام

مجنوں کو برا کہتی ہے لیلےٰ مرے آگے

خوش ہوتے ہیں پر وصل میں یوں مر نہیں جاتے

آئی شب ہجراں کی تمنا مرے آگے

ہے موجزن اک قلزمِ خوں کاش یہی ہو

آتا ہے ابھی دیکھیے کیا کیا مرے آگے

گو ہاتھ کو جنبش نہیں آنکھوں میں تو دم ہے!

رہنے دو ابھی ساغر و مینا مرے آگے

ہم پیشہ و ہم مشرب و ہم راز ہے میرا

غالب کو برا کیوں کہو اچھا مرے آگے

مرزا اسد اللہ خان غالب

زخم پڑ پڑ گیا مرے پا پر

اکتوبر 6, 2015میر تقی میر، اساتذہ، غزلمینا، مسیحا، پا، بینا، تمنا، دریا، صہبا، صحراadmin

دیوان اول غزل 225

پشت پا ماری بسکہ دنیا پر

زخم پڑ پڑ گیا مرے پا پر

ڈوبے اچھلے ہے آفتاب ہنوز

کہیں دیکھا تھا تجھ کو دریا پر

گرو مے ہوں آئو شیخ شہر

ابر جھوما ہی جا ہے صحرا پر

دل پر خوں تو تھا گلابی شراب

جی ہی اپنا چلا نہ صہبا پر

یاں جہاں میں کہ شہر کوراں ہے

سات پردے ہیں چشم بینا پر

فرصت عیش اپنی یوں گذری

کہ مصیبت پڑی تمنا پر

طارم تاک سے لہو ٹپکا

سنگ باراں ہوا ہے مینا پر

میر کیا بات اس کے ہونٹوں کی

جینا دوبھر ہوا مسیحا پر

میر تقی میر

مسیحا

مارچ 3, 2012مجید امجد، نظم، امروزمسیحاadmin

سدا لکھیں

انگلیاں یہ

لکھتی رہیں

انگلیاں یہ

کاغذ پر

رکی ہوئیں

آنکھیں یہ

کاغذ پر

جمی ہوئیں!

گہری سوچ

جذبِ عمق

آنکھوں سے

روح تلک

پھیلی اِک

دھیان دھنک

آنکھیں سرخ

چپ خودسوز

ڈورے سرخ

لرزاں، محو!

سامنے اک

پارۂ جاں

درد ہی درد

ٹیس، کراہ

بو، تلچھٹ

جرثومے

کوئی سبیل؟

کچھ بھی نہیں

کوئی افق؟

کچھ بھی نہیں

آنکھیں فکر

آنکھیں صدق

آنکھیں کشف

ایک رمق

اک یہ طریق

اک وہ اصول

یہ مشروب

وہ محلول

کچھ کیپسول

سطرِ شفا

حرفِ بقا

آنکھیں یہ

سدا جلیں

سدا جئیں

سکھ بانٹیں

انگلیاں یہ

سدا لکھیں

لکھتی رہیں

سطرِ شفا

حرفِ بقا

لکھتی رہیں

مجید امجد

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: مسیحا

ہو کوئی بے بَصَر تَو بھَلا کیا دکھائی دے

فیصلہ دیتے ہوئے عادل بھی رُسوا ہو گئے

کہتے ہیں ہم محتاجوں کا مسیحا ہے

تجھ سے کچھ اور نہ اے میرے مسیحا! مانگوں

اتنا میٹھا ہے کہ کڑوا لاگے

بچھڑنا ہے تو جھگڑا کیوں کریں ہم

ہوتا ہے شب و روز تماشا مرے آگے

زخم پڑ پڑ گیا مرے پا پر

مسیحا

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: