ٹیگ کے محفوظات: ماروں

جنوں نواز بہاروں کی کوئی بات کرو

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلماروں،کناروں،اشاروں،بہاروں،دھاروں،ستاروںadmin

خردفریبِ نظاروں کی کوئی بات کرو

جنوں نواز بہاروں کی کوئی بات کرو

کسی کی وعدہ خلافی کا ذکر خوب نہیں

مرے رفیق ستاروں کی کوئی بات کرو

زمانہ ساز زمانے کی بات رہنے دو

خلوصِ دوست کے ماروں کی کوئی بات کرو

گھٹا کی اوٹ سے چھپ کر جو دیکھتے تھے ہمیں

انھی شریر ستاروں کی کوئی بات کرو

زمانہ ذکرِ حوادث سے کانپ اٹھتا ہے

سُکوں بدوش کناروں کی کوئی بات کرو

نہیں ہے حدِّ نظر تک، وجود ساحل کا

فضا مُہیب ہے، دھاروں کی کوئی بات کرو

سلامِ شوق لیے تھے کسی نے، جن سے، شکیبؔ

انھی لطیف اشاروں کی کوئی بات کرو

شکیب جلالی

خزاں سے چھیِن کے لے آئیں گے بَہاروں کو

مئی 20, 2021ضامن جعفری،غزلماروں،یادگاروں،کناروں،آبشاروں،بہاروں،سوگواروںadmin

نَظَر اُٹھا کے وہ دیکھیں تَو جاں نِثاروں کو

خزاں سے چھیِن کے لے آئیں گے بَہاروں کو

بَلائیں ڈھُونڈتی پھِرتی ہیں بے سَہاروں کو

سُکونِ قَلب کہاں زِندَگی کے ماروں کو

بھَلا مَجال ہے اِک اَشکِ غَم بھی جھانک تَو لے

سَلام، چَشمِ نَم! اِن تیرے آبشاروں کو

خِزاں نے اہلِ چمن کو یہ دی ہے آزادی

بَسالیں چَشمِ تَصَوُّر میں بَس بَہارَوں کو

ہَمارے قَتل پہ جَب بھی اُداس ہَوں قاتل

نَویدِ جَشنِ طَرَب دینا، سوگواروں کو

سَفینہ ڈُوب چکا، جَشن کی ہو تیّاری

یہ ناخُدا کا نَیا حُکم ہے کناروں کو

نِگار خانۂ دِل خَستہ حال ہے، ضامنؔ

بہت سَنبھال کے رَکّھا ہے یادگاروں کو

ضامن جعفری

نکلا چاند بھی گہنایا ہے سازش سے اندھیاروں کی

نومبر 29, 2016ہوا کا تخت،ماجد صدیقی،غزلماروں،نگاروں،کاروں،آزاروں،انگاروں،اندھیاروں،دھاروںadmin

ماجد صدیقی ۔ غزل نمبر 97

‮بے معنی بے کیف ہوئی ہے آنکھ مچولی تاروں کی

نکلا چاند بھی گہنایا ہے سازش سے اندھیاروں کی

ژالے، سیل، بگولے، بارش، شور مچاتی سرد ہوا

لمبی ہے فہرست بڑی اِس گلشن کے آزاروں کی

ایوانوں کی چبھتی چھاؤں ہے ہر سمت گھروندوں پر

رہگیروں کے ماتھوں پر ہے دُھول لپکتی کاروں کی

دعوے دار وفاؤں کے تو پہنچے، نئی مچانوں پر

جانے کس پر آنکھ لگی ہے ہم اخلاص کے ماروں کی

رُت رُت کا فیضان مقدّر ٹھہرے اُن ہی لوگوں کا

رکھتے ہیں جو اہلِ نظر پہچان بدلتے دھاروں کی

اُس کے وصل کا قصّہ ہم نے جن لفظوں میں ڈھالا ہے

در آئی اُن لفظوں میں بھی حدّت سی انگاروں کی

جب تک خون میں دھڑکن ہے جب تک یہ نطق سلامت ہے

ٹوٹ نہیں سکتی ہے ماجدؔ ہم سے سانجھ نگاروں کی

ماجد صدیقی

خونیں جگروں ، سینہ فگاروں سے گلہ ہے

اکتوبر 23, 2015Jaun Elia،جون ایلیا،شعراء،غزلفگاروں،ماروں،گزاروں،اشاروں،دیاروں،سہاروں،شماروںadmin

جون ایلیا ۔ غزل نمبر 225

یارو نگہ یار کو ، یاروں سے گلہ ہے

خونیں جگروں ، سینہ فگاروں سے گلہ ہے

جاں سے بھی گئے ، بات بھی جاناں کی نہ سمجھی

جاناں کو بہت عشق کے ماروں سے گلہ ہے

اب وصل ہو یا ہجر ، نہ اب تک بسر آیا

اک لمحہ ، جسے لمحہ شماروں سے گلہ ہے

اڑتی ہے ہر اک شور کے سینے سے خموشی

صحراؤں پر شور دیاروں سے گلہ ہے

بیکار کی اک کارگزاری کے حسابوں

بیکار ہوں اور کار گزاروں سے گلہ ہے

میں آس کی بستی میں گیا تھا سو یہ پایا

جو بھی ہے اسے اپنے سہاروں سے گلہ ہے

بے فصل اشاروں سے ہوا خون جنوں کا

ان شوخ نگاہوں کے اشاروں سے گلہ ہے

جون ایلیا

کچھ تمھیں پیار نہیں کرتے جفا ماروں کو

اکتوبر 7, 2015میر تقی میر،اساتذہ،غزلہشیاروں،ماروں،یاروں،بیماروں،تاروں،خریداروں،سزاواروں،غمخواروںadmin

دیوان ششم غزل 1862

اگلے سب چاہتے تھے ہم سے وفاداروں کو

کچھ تمھیں پیار نہیں کرتے جفا ماروں کو

شہر تو عشق میں ہے اس کے شفاخانہ تمام

وہ نہیں آتا کبھو دیکھنے بیماروں کو

مستی میں خوب گذرتی ہے کہ غفلت ہے ہمیں

مشکل اس مصطبے میں کام ہے ہشیاروں کو

فکر سے اپنے گذرتا ہے زمیں کاوی میں دن

رات جاتی ہے ہمیں گنتے ہوئے تاروں کو

خوب کرتے ہیں جو خوباں نہیں رو دیتے ہیں

منھ لگاتا ہے کوئی خوں کے سزاواروں کو

حسن بازار جہاں میں ہے متاع دلکش

صاحب اس کا ٹھگے جاتا ہے خریداروں کو

وامق و کوہکن و قیس نہیں ہے کوئی

بھکھ گیا عشق کا اژدر مرے غمخواروں کو

زندگی کرتے ہیں مرنے کے لیے اہل جہاں

واقعہ میر ہے درپیش عجب یاروں کو

میر تقی میر

جو کہوں میں کوئی ہے میرے بھی غمخواروں کے بیچ

اکتوبر 7, 2015میر تقی میر،اساتذہ،غزلماروں،گنہگاروں،انگاروں،آزاروں،بیماروں،برداروں،تاروں،دیواروں،غمخواروںadmin

دیوان ششم غزل 1820

وامق و فرہاد و مجنوں کون ہے یاروں کے بیچ

جو کہوں میں کوئی ہے میرے بھی غمخواروں کے بیچ

جمع خوباں میں مرا محبوب اس مانند ہے

جوں مہ تابندہ آتا ہے کبھو تاروں کے بیچ

جو جفا عاشق پہ ہے سو اور لوگوں پر نہیں

اس سے پیدا ہے کہ میں ہی ہوں گنہگاروں کے بیچ

مر گئے بہتیرے صاحب دل ہوس کس کو ہوئی

ایسے مرنے جینے کی ان عشق کے ماروں کے بیچ

رونا کڑھنا عشق میں دیکھا مرا جن نے کہا

کیا جیے گا یہ ستم دیدہ ان آزاروں کے بیچ

منتظر برسوں رہے افسوس آخر مر گئے

دیدنی تھے لوگ اس ظالم کے بیماروں کے بیچ

خاک تربت کیوں نہ اپنی دلبرانہ اٹھ چلے

ہم بھی تھے اس نازنیں کے ناز برداروں کے بیچ

صاف میداں لامکاں سا ہو تو میرا دل کھلے

تنگ ہوں معمورۂ دنیا کی دیواروں کے بیچ

باغ میں تھے شب گل مہتاب میرے آس پاس

یار بن یعنی رہا میں میر انگاروں کے بیچ

میر تقی میر

قیامت غم سے ہر ساعت رہی الفت کے ماروں پر

اکتوبر 6, 2015میر تقی میر،اساتذہ،غزلہزاروں،قراروں،ماروں،مزاروں،گساروں،تاجداروں،خاروںadmin

دیوان پنجم غزل 1616

سنا تم نے جو گذرا سانحہ ہجراں میں یاروں پر

قیامت غم سے ہر ساعت رہی الفت کے ماروں پر

کیا ہے عشق عالم کش نے کیا ستھراؤ لوگوں کا

نکل چل شہر سے باہر نظر کر ٹک مزاروں پر

تڑپ کر گرم ٹک جوں برق ٹھنڈے ہوتے جاتے ہیں

بسان ابر رحمت رو بہت ہم بے قراروں پر

بڑی دولت ہے درویشی جو ہمرہ ہو قناعت کے

کہ عرصہ تنگ ہے حرص و ہوا سے تاجداروں پر

سیاحت خوب مجھ کو یاد ہے پر کی بھی وحشت کی

پر اپنا پاؤں پھیلے دشت کے سر تیز خاروں پر

گئے فرہاد و مجنوں ہو کوئی تو بات بھی پوچھیں

یکایک کیا بلا آئی ہمارے غم گساروں پر

گئی اس ناتوان عشق کے آگے سے پیری ٹل

سبک روحی مری اے میر بھاری ہے ہزاروں پر

میر تقی میر

کیا کیا ان نے سلوک کیے ہیں شہر کے عزت داروں سے

اکتوبر 6, 2015میر تقی میر،اساتذہ،غزلفگاروں،ماروں،یاروں،انگاروں،آواروں،تلواروں،تکراروں،تاروں،داروںadmin

دیوان چہارم غزل 1490

خوار پھرایا گلیوں گلیوں سر مارے دیواروں سے

کیا کیا ان نے سلوک کیے ہیں شہر کے عزت داروں سے

دور اس سے تو اپنے بھائیں آگ لگی ہے گلستاں میں

آنکھیں نہیں پڑتی ہیں گل پر سینکتے ہیں انگاروں سے

شور کیا جو میں نے شبانگہ بیتابی سے دل کی بہت

کہنے لگا جی تنگ آیا ان مہر و وفا کے ماروں سے

وہ جو ماہ زمیں گرد اپنا دوپہری ہے ان روزوں

شوق میں ہر شب حرف و سخن ہے ہم کو فلک کے تاروں سے

حرف شنو ساتھ اپنے نہیں ہیں ورنہ دراے قافلہ ساں

راہ میں باتیں کس کس ڈھب کی کرتے ہیں ہم یاروں سے

خستہ ہو اپنا کیسا ہی کوئی پھر بھی گلے سے لگاتے ہیں

وحشت ایک تمھیں کو دیکھی اپنے سینہ فگاروں سے

داغ جگرداری ہیں اپنے کشتے ثبات دل کے ہیں

ہم نہ گئے جاگہ سے ہرگز قیمہ ہوئے تلواروں سے

حرف کی پہچان اس کو نہ تھی تو سادہ ہی کچھ اچھا تھا

بات اگر مانے ہے کوئی سو سو اب تکراروں سے

کوہکن و مجنوں یہ دونوں دشت و کوہ میں سرماریں

شوق نہیں ملنے کا ہم کو میر ایسے آواروں سے

میر تقی میر

مار رکھا بیتابی دل نے ہم سب غم کے ماروں کو

اکتوبر 6, 2015میر تقی میر،اساتذہ،غزلہزاروں،ماروں،کاروں،تاروں،داروںadmin

دیوان چہارم غزل 1476

کام کیے ہیں شوق سے ضائع صبر نہ آیا یاروں کو

مار رکھا بیتابی دل نے ہم سب غم کے ماروں کو

جی تو جلا احباب کا مجھ پر عشق میں اس شعلے کے پر

رو ہی نہیں ہے بات کا ہرگز اپنے جانب داروں کو

آئو نہیں دربستہ یعنی منھ پر اس مہ پارے کے

صبح تلک دیکھا کرتے ہیں محو چشمک تاروں کو

گردش چشم سیہ کاسے سے جمع نہ رکھو خاطر تم

بھوکا پیاسا مار رکھا ہے تم سے ان نے ہزاروں کو

کوہکن و مجنوں و وامق میر آئے تھے صحبت میں

منھ نہ لگایا ہم میں کنھوں نے ایسے ہرزہ کاروں کو

میر تقی میر

غمزدوں اندوہ گینوں ظلم کے ماروں میں تھے

اکتوبر 6, 2015میر تقی میر،اساتذہ،غزلماروں،یاروں،گنہگاروں،بیماروں،برداروں،خواروں،دستاروںadmin

دیوان اول غزل 607

خوب تھے وے دن کہ ہم تیرے گرفتاروں میں تھے

غمزدوں اندوہ گینوں ظلم کے ماروں میں تھے

دشمنی جانی ہے اب تو ہم سے غیروں کے لیے

اک سماں سا ہو گیا وہ بھی کہ ہم یاروں میں تھے

مت تبختر سے گذر قمری ہماری خاک پر

ہم بھی اک سرو رواں کے ناز برداروں میں تھے

مر گئے لیکن نہ دیکھا تونے اودھر آنکھ اٹھا

آہ کیا کیا لوگ ظالم تیرے بیماروں میں تھے

شیخ جی مندیل کچھ بگڑی سی ہے کیا آپ بھی

رندوں بانکوں میکشوں آشفتہ دستاروں میں تھے

گرچہ جرم عشق غیروں پر بھی ثابت تھا ولے

قتل کرنا تھا ہمیں ہم ہی گنہگاروں میں تھے

اک رہا مژگاں کی صف میں ایک کے ٹکڑے ہوئے

دل جگر جو میر دونوں اپنے غم خواروں میں تھے

میر تقی میر

ہوا نہ گور گڑھا ان ستم کے ماروں کا

اکتوبر 6, 2015میر تقی میر،اساتذہ،غزلہوشیاروں،فگاروں،ہزاروں،قراروں،ماروں،مزاروں،یاروں،گنواروں،گناہگاروں،تاروں،خاروں،سواروں،سیاہکاروںadmin

دیوان اول غزل 40

سنا ہے حال ترے کشتگاں بچاروں کا

ہوا نہ گور گڑھا ان ستم کے ماروں کا

ہزار رنگ کھلے گل چمن کے ہیں شاہد

کہ روزگار کے سر خون ہے ہزاروں کا

ملا ہے خاک میں کس کس طرح کا عالم یاں

نکل کے شہر سے ٹک سیر کر مزاروں کا

عرق فشانی سے اس زلف کی ہراساں ہوں

بھلا نہیں ہے بہت ٹوٹنا بھی تاروں کا

علاج کرتے ہیں سوداے عشق کا میرے

خلل پذیر ہوا ہے دماغ یاروں کا

تری ہی زلف کو محشر میں ہم دکھا دیں گے

جو کوئی مانگے گا نامہ سیاہکاروں کا

خراش سینۂ عاشق بھی دل کو لگ جائے

عجب طرح کا ہے فرقہ یہ دل فگاروں کا

نگاہ مست کے مارے تری خراب ہیں شوخ

نہ ٹھور ہے نہ ٹھکانا ہے ہوشیاروں کا

کریں ہیں دعوی خوش چشمی آہوان دشت

ٹک ایک دیکھنے چل ملک ان گنواروں کا

تڑپ کے مرنے سے دل کے کہ مغفرت ہو اسے

جہاں میں کچھ تو رہا نام بے قراروں کا

تڑپ کے خرمن گل پر کبھی گر اے بجلی

جلانا کیا ہے مرے آشیاں کے خاروں کا

تمھیں تو زہد و ورع پر بہت ہے اپنے غرور

خدا ہے شیخ جی ہم بھی گناہگاروں کا

اٹھے ہے گرد کی جا نالہ گور سے اس کی

غبار میر بھی عاشق ہے نے سواروں کا

میر تقی میر

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: ماروں

جنوں نواز بہاروں کی کوئی بات کرو

خزاں سے چھیِن کے لے آئیں گے بَہاروں کو

نکلا چاند بھی گہنایا ہے سازش سے اندھیاروں کی

خونیں جگروں ، سینہ فگاروں سے گلہ ہے

کچھ تمھیں پیار نہیں کرتے جفا ماروں کو

جو کہوں میں کوئی ہے میرے بھی غمخواروں کے بیچ

قیامت غم سے ہر ساعت رہی الفت کے ماروں پر

کیا کیا ان نے سلوک کیے ہیں شہر کے عزت داروں سے

مار رکھا بیتابی دل نے ہم سب غم کے ماروں کو

غمزدوں اندوہ گینوں ظلم کے ماروں میں تھے

ہوا نہ گور گڑھا ان ستم کے ماروں کا

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: