ٹیگ کے محفوظات: قرانی

ہے ہوا کی نوحہ خوانی آنکھ میں

دسمبر 1, 2007منصور آفاق،شعراء،غزلفانی،قرانی،مکانی،مدھانی،معانی،نشانی،کہانی،گمانی،گنگنانی،پانی،بچھانی،بیکرانی،بسانی،جہانی،حکمرانی،خوانی،زبانی،سہانی،سبحانی،سجانیadmin

منصور آفاق ۔ غزل نمبر 341

دشت کی صدیوں پرانی آنکھ میں

ہے ہوا کی نوحہ خوانی آنکھ میں

اسمِ اللہ کے تصور سے گرے

آبشارِ بیکرانی آنکھ میں

لال قلعے سے قطب مینار تک

وقت کی ہے شہ جہانی آنکھ میں

لکھ رہا ہے اس کا آیت سا وجود

ایک تفسیرِ قرانی آنکھ میں

دودھیا باہیں ، سنہری چوڑیاں

گھومتی ہے اک مدھانی آنکھ میں

دیکھتا ہوں جو دکھاتا ہے مجھے

یار کی ہے حکمرانی آنکھ میں

برف رُت کے اس تعلق کی غزل

دھوپ نے ہے گنگنانی آنکھ میں

اجڑے خوابو!، ٹوٹی امیدو!سنو

ایک بستی ہے بسانی آنکھ میں

چل رہی ہے اپنے کرداروں کے ساتھ

فلم کی اب تک کہانی آنکھ میں

چاہتی ہے کیوں بصارت تخلیہ

کون ہے ظلِ ’سبحانی‘ آنکھ میں

کپکپاتے ساحلوں سے ہمکلام

دھوپ ہے کتنی سہانی آنکھ میں

آمد آمد شاہِ نظارہ کی ہے

سرخ مخمل ہے بچھانی آنکھ میں

تجھ سے پہلے توہواکرتے تھے اور

روشنی کے کچھ معانی آنکھ میں

پہلے ہوتے تھے مقاماتِ عدم

اب فقط ہے لا مکانی آنکھ میں

دیکھتے رہنا ہے نقشِ یار بس

بزمِ وحشت ہے سجانی آنکھ میں

بس یہی ہیں یادگاریں اپنے پاس

بس یہی آنسو نشانی آنکھ میں

اُس حویلی کے کھنڈر کی آج بھی

چیختی ہے بے زبانی آنکھ میں

زیرِآب آنے لگی تصویرِیار

پھیلتا جاتا ہے پانی آنکھ میں

شکرہے اُس اعتمادِذات کی

آ گیا ہوں غیر فانی آنکھ میں

دیکھ آئی ہے کسی کو اُس کے ساتھ

اب نہیں ہے خوش گمانی آنکھ میں

منصور آفاق

الفاظ و معانی سے سنوں شورِ انا الحق

دسمبر 1, 2007منصور آفاق،شعراء،غزلقرانی،معانی،جہانی،جوانی،روانی،زمانیadmin

منصور آفاق ۔ غزل نمبر 210

میں کُن کی کہانی سے سنوں شورِ انا الحق

الفاظ و معانی سے سنوں شورِ انا الحق

پانی بھی علیحدہ نہیں سر چشمہ ء کل سے

دریا کی روانی سے سنوں شورِ انا الحق

اڑتے ہوئے پتے بھی تو ہیں پیڑ کا حصہ

موسم کی جوانی سے سنوں شورِ انا الحق

کثرت کو میں وحدت سے جدا کر نہیں سکتا

تخلیقِ جہانی سے سنوں شورِ انا الحق

آواز سے لفظوں کی جدائی نہیں ممکن

آیاتِ قرانی سے سنوں شورِ انا الحق

منصور زمانے کو خدا کہتی ہے دانش

تقویمِ زمانی سے سنوں شورِ انا الحق

منصور آفاق

سخت کم ظرفی ہے اک دو بوند پانی پر گھمنڈ

نومبر 19, 2005امیر مینائی،غزلفانی،فشانی،قرانی،مہربانی،نہانی،ناتوانی،کہانی،پانی،بیانی،ترانی،جوانی،جانی،جاودانی،خوانی،زبانیadmin

امیر مینائی ۔ غزل نمبر 21

خنجرِ قاتل نہ کر اتنا روانی پر گھمنڈ

سخت کم ظرفی ہے اک دو بوند پانی پر گھمنڈ

شمع کے مانند کیا آتش زبانی پر گھمنڈ

صورتِ پروانہ کر سوز نہانی پر گھمنڈ

ہے اگر شمشیر قاتل کو روانی پر گھمنڈ

بسملوں کو بھی ہے اپنی سخت جانی پر گھمنڈ

ناز اُٹھانے کا ہے اس کے حوصلہ اے جانِ زار

اب تلک تجھ کو ہے زور ناتوانی پر گھمنڈ

نوبت شاہی سے آتی ہے صدا شام و سحر

اور کر لے چار دن اس دار فانی پر گھمنڈ

دیکھ او نادان کہ پیری کا زمانہ ہے قریب

کیا لڑکپن ہے کہ کرتا ہے جوانی پر گھمنڈ

چار ہی نالے ہمارے سن کے چپکی لگ گئی

تھا بہت بلبل کو اپنی خوش بیانی پر گھمنڈ

عفو کے قابل مرے اعمال کب ہیں اے کریم

تیری رحمت پر ہے تیری مہربانی پر گھمنڈ

شمع محفل شامت آئی ہے تری خاموش ہو

دل جلوں کے سامنے آتش زبانی پر گھمنڈ

طبع شاعر آ کے زوروں پر کرے کیوں کر نہ ناز

سب کو ہوتا ہے جوانی میں جوانی پر گھمنڈ

چار موجوں میں ہماری چشم تر کے رہ گیا

ابر نیساں کو یہی تھا ڈر فشانی پر گھمنڈ

دیکھنے والوں کی آنکھیں آپ نے دیکھی نہیں

حق بجانب ہے اگر ہے لن ترانی پر گھمنڈ

عاشق و معشوق اپنے اپنے عالم میں ہیں مست

واں نزاکت پر تو یاں ہے ناتوانی پر گھمنڈ

تو سہی کلمہ ترا پڑھوا کے چھوڑوں اے صنم

زاہدوں کو ہے بہت تسبیح خوانی پر گھمنڈ

سبزہ خط جلد یارب رخ پر اُس کے ہو نمود

خضر کو ہے اپنی عمر جاودانی پر گھمنڈ

گور میں کہتی ہے عبرت قیصر و فغفور سے

کیوں نہیں کرتے ہو اب صاحب قرانی پر گھمنڈ

ہے یہی تاثیر آبِ خنجر جلّاد میں

چشمۂ حیواں نہ کر تو اپنے پانی پر گھمنڈ

حال پر اجداد و آبا کے تفاخر کیا امیر

ہیں وہ ناداں جن کو ہے قصے کہانی پر گھمنڈ

امیر مینائی

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: قرانی

ہے ہوا کی نوحہ خوانی آنکھ میں

الفاظ و معانی سے سنوں شورِ انا الحق

سخت کم ظرفی ہے اک دو بوند پانی پر گھمنڈ

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: