ٹیگ کے محفوظات: عزت

کچھ بھی نہیں بگڑا ابھی، عزت سے نکل جا

مئی 30, 2021عرفان ستار،غزلمصیبت،اجازت،رفاقت،رعایت،ساعت،شہرت،عزتadmin

اچھا ہے اگر شہرِ رقابت سے نکل جا

کچھ بھی نہیں بگڑا ابھی، عزت سے نکل جا

لمحات کئی اور گزرنے کو ہیں بے تاب

ٹھہری ہوئی اس درد کی ساعت سے نکل جا

تُو عشق ہے بےخوف گزر شہرِ جنوں سے

اس مسئلہءِ اذن و اجازت سے نکل جا

ہے عقل کا کہنا کہ کسی طور نبھا لے

دل کہتا ہے بے فیض رفاقت سے نکل جا

جو رنج ترا ہے ہی نہیں اُس سے حذر کر

دنیا کا کہا مان، مصیبت سے نکل جا

ممکن ہے دوبارہ نہ وہ پوچھے تری مرضی

موقع ہے تو اس بابِ رعایت سے نکل جا

اے وارثِ خوشبوئے سخن زارِ حقیقت

اس رزم گہِ قامت و شہرت سے نکل جا

عرفان ستار

ہر اِک، اظہارِ حیرت کر رہا ہے

مئی 20, 2021ضامن جعفری،غزلقیامت،محبت،مروّت،بیعت،حیرت،حجّت،عبادت،عداوت،عزتadmin

وہ مجھ پر کیوں عنایت کر رہا ہے

ہر اِک، اظہارِ حیرت کر رہا ہے

یہ انساں کس لئے، قبل از قیامت

قیامت پر قیامت کر رہا ہے

ہر اِک طاقِ اَنا پر، ایک بُت ہے

ہر اِک اپنی عبادت کر رہا ہے

جسے ، احساسِ عزت ہی نہیں ہے

وہ، کیسے میری عزت کر رہا ہے

ہوئے ہم جب سے رسوائے زمانہ

ہر اِک آ آ کے بیعت کر رہا ہے

ہم اچھے تَو نہیں لگنے لگے ہیں

وہ ہم سے کیوں عداوت کر رہا ہے

نگاہ و دل سمجھتے ہی نہیں ہیں

یقیناً وہ مروّت کر رہا ہے

ہر اِک سُو گرمی ِٔ بازارِ وحشت

ہر اِک اُس سے محبت کر رہا ہے

بُرا مت مان ضامنؔ کی نظر کا

یہ دل اتمامِ حجّت کر رہا ہے

ضامن جعفری

دھوم رہی ہے سر پر میرے رنج و عتاب و کلفت کی

اکتوبر 6, 2015میر تقی میر،اساتذہ،غزلفرصت،قیامت،قسمت،منت،مدت،مروت،کلفت،دولت،رخصت،صحبت،عزتadmin

دیوان سوم غزل 1255

کیسے نحس دنوں میں یارب میں نے اس سے محبت کی

دھوم رہی ہے سر پر میرے رنج و عتاب و کلفت کی

میں تو سرو و شاخ گل کی قطع ہی کا دیوانہ تھا

یار نے قد قامت دکھلاکر سر پر میرے قیامت کی

قسمت میں جو کچھ کہ بدا ہو دیتے ہیں وہ ہی انساں کو

غم غصہ ہی ہم کو ملا ہے خوبی اپنی قسمت کی

خلوت یار ہے عالم عالم ایک نہیں ہے ہم کو بار

در پر جاکر پھر آتے ہیں خوب ہماری عزت کی

اک گردن سے سو حق باندھے کیا کیا کریے ہوں جو ادا

مدت اس پر ایک نفس جوں صبح ہماری فرصت کی

شیوہ اس کا قہر و غضب ہے ناز و خشم و ستم وے سب

کوئی نگاہ لطف اگر کی ان نے ہم سے مروت کی

بے پروائی درویشی کی تھوڑی تھوڑی تب آئی

جب کہ فقیری کے اوپر میں خرچ بڑی سی دولت کی

ناز و خشم کا رتبہ کیسا ہٹ کس اعلیٰ درجے میں

بات ہماری ایک نہ مانی برسوں ہم نے منت کی

دکھن پورب پچھم سے لوگ آکر مجھ کو دیکھیں ہیں

حیف کہ پروا تم کو نہیں ہے مطلق میری صحبت کی

دوستی یاری الفت باہم عہد میں اس کے رسم نہیں

یہ جانے ہیں مہر و وفا اک بات ہے گویا مدت کی

آب حسرت آنکھوں میں اس کی نومیدانہ پھرتا تھا

میر نے شاید خواہش دل کی آج کوئی پھر رخصت کی

میر تقی میر

ہاتھ لگتے میلے ہوتے ہو لطافت ہائے رے

اکتوبر 6, 2015میر تقی میر،اساتذہ،غزلقیامت،قامت،لطافت،محنت،مدت،سماجت،عزتadmin

دیوان دوم غزل 973

بو کیے کمھلائے جاتے ہو نزاکت ہائے رے

ہاتھ لگتے میلے ہوتے ہو لطافت ہائے رے

یار بے پروا و مفتر اور میں بے اختیار

پیش کچھ جاتی نہیں منت سماجت ہائے رے

سختی کھینچی کوہکن نے قیس نے رنج و تعب

کیا گئی برباد ان یاروں کی محنت ہائے رے

شور اٹھتا ہے جو ہوتے جلوہ گر ہو ناز سے

کھینچنا قد کا بلا آفت قیامت ہائے رے

خانقہ والے ہی کچھ تنہا نہیں الفت میں خوار

کیسے کیسوں کی گئی ہے مفت عزت ہائے رے

عشق میں افسوس سا افسوس اپنا کرچکے

زیر لب کہتے رہے ہم ایک مدت ہائے رے

ریجھنے ہی کے ہے قابل یار کی ترکیب میر

واہ وا رے چشم و ابرو قد و قامت ہائے رے

میر تقی میر

چشم بیمار کے دیکھ آنے کی رخصت دیجے

اکتوبر 6, 2015میر تقی میر،اساتذہ،غزلمہلت،تہمت،راحت،رخصت،طاقت،عزتadmin

دیوان دوم غزل 965

یک مژہ اے دم آخر مجھے فرصت دیجے

چشم بیمار کے دیکھ آنے کی رخصت دیجے

نو گرفتار ہوں اس باغ کا رحم اے صیاد

موسم گل رہے جب تک مجھے مہلت دیجے

خوار و خستہ کئی پامال تری راہ میں ہیں

کیجیے رنجہ قدم ان کو بھی عزت دیجے

اپنے ہی دل کا گنہ ہے جو جلاتا ہے مجھے

کس کو لے مریے میاں اور کسے تہمت دیجے

چھوٹے ہیں قید قفس سے تو چمن تک پہنچیں

اتنی اے ضعف محبت ہمیں طاقت دیجے

مر گیا میر نہ آیا ترے جی میں اے شوخ

اپنے محنت زدہ کو بھی کبھی راحت دیجے

میر تقی میر

اس بے وفا کو ہم سے کچھ الفت نہیں رہی

اکتوبر 6, 2015میر تقی میر،اساتذہ،غزلفرصت،قدرت،مت،مدت،الفت،صحبت،عزتadmin

دیوان دوم غزل 957

وہ رابطہ نہیں وہ محبت نہیں رہی

اس بے وفا کو ہم سے کچھ الفت نہیں رہی

دیکھا تو مثل اشک نظر سے گرا دیا

اب میری اس کی آنکھ میں عزت نہیں رہی

رندھنے سے جی کے کس کو رہا ہے دماغ حرف

دم لینے کی بھی ہم کو تو فرصت نہیں رہی

تھی تاب جی میں جب تئیں رنج و تعب کھنچے

وہ جسم اب نہیں ہے وہ قدرت نہیں رہی

منعم امل کا طول یہ کس جینے کے لیے

جتنی گئی اب اتنی تو مدت نہیں رہی

دیوانگی سے اپنی ہے اب ساری بات خبط

افراط اشتیاق سے وہ مت نہیں رہی

پیدا کہاں ہیں ایسے پراگندہ طبع لوگ

افسوس تم کو میر سے صحبت نہیں رہی

میر تقی میر

نیندوں کی بستیوں پہ مصیبت بنی ہوئی

دسمبر 1, 2007منصور آفاق،شعراء،غزلمحبت،مصیبت،برکت،صورت،ضرورت،عبرت،عزتadmin

منصور آفاق ۔ غزل نمبر 446

اس کی حرافہ یاد ہے آفت بنی ہوئی

نیندوں کی بستیوں پہ مصیبت بنی ہوئی

جلتی جہاں تھی آگ وہاں دیکھ تو سہی

اڑتی ہے راکھ، نوحۂ عبرت بنی ہوئی

وہ جمع لوگ ہیں کسی پاگل کے آس پاس

کوئی ہے انقلاب کی صورت بنی ہوئی

لگتا ہے تم ملاؤ گی اس کو بھی خاک میں

تھوڑی سی جو ہے شہر میں عزت بنی ہوئی

وہ اپنی خواہشوں کی ہے تکمیل کا چلن

جو چیز ہے جہاں میں محبت بنی ہوئی

ہر رات نظمِ تازہ اترتی ہے صحن میں

کیاہے جدائی باعثِ برکت بنی ہوئی

منصور رکھ د یا ہے اٹھا کرسٹور میں

پھرتی تھی وہ جو میری ضرورت بنی ہوئی

منصور آفاق

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: عزت

کچھ بھی نہیں بگڑا ابھی، عزت سے نکل جا

ہر اِک، اظہارِ حیرت کر رہا ہے

دھوم رہی ہے سر پر میرے رنج و عتاب و کلفت کی

ہاتھ لگتے میلے ہوتے ہو لطافت ہائے رے

چشم بیمار کے دیکھ آنے کی رخصت دیجے

اس بے وفا کو ہم سے کچھ الفت نہیں رہی

نیندوں کی بستیوں پہ مصیبت بنی ہوئی

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: