ٹیگ کے محفوظات: صنم

کس نے دل توڑا جو ہم یاد آئے

مئی 20, 2021ضامن جعفری،غزلہم،قلم،قدم،قسم،صنمadmin

کیوں تجھے اپنے ستم یاد آئے

کس نے دل توڑا جو ہم یاد آئے

جھک گئی کیوں یہ نظر ملتے ہی

کیا کوئی قول و قسم یاد آئے

کچھ نہ کچھ ہے تو اُداسی کا سبب

مان بھی جاؤ کہ ہم یاد آئے

بت کدہ چھوڑ کے جانے والو

کیا کروگے جو صنم یاد آئے

جب بھی پامالیِ اقدار ہوئی

وقت کو اہلِ قلم یاد آئے

کیا ہُوا راہِ جنوں کو ضامنؔ

کیوں مرے نقشِ قدم یاد آئے

ضامن جعفری

متاعِ زیست کو وقفِ اَلَم کروں نہ کروں

مئی 20, 2021ضامن جعفری،غزلقلم،الم،خم،صنمadmin

فسانہِ غمِ ہستی رَقَم کروں نہ کروں

متاعِ زیست کو وقفِ اَلَم کروں نہ کروں

وہ جن میں دھڑکنیں اُن کے بھی دل کی ہیں شامل

وہ حادثات سپُردِ قَلَم کروں نہ کروں

تمام عمر لیے دل میں سوچتا ہی رَہا

قبول ہو نہ ہو نذرِ صَنَم کروں نہ کروں

ہو بحثِ رشتہِ عصیاں و زلف گر ضامنؔ

کہو کہ تذکرہِ پیچ و خَم کروں نہ کروں

ضامن جعفری

کیوں نہ ہَوں کیا کسی سے کم ہیں ہم

مئی 20, 2021ضامن جعفری،غزلہم،نم،کم،بہم،رقم،صنمadmin

خسروِ کِشوَرِ اَلَم ہیں ہم

کیوں نہ ہَوں کیا کسی سے کم ہیں ہم

شبِ تنہائی اب یہ ڈر کیسا

اَور کوئی نہیں ہے ہم ہیں ہم

کس قدر پُر سکون ہے دنیا

لبِ خاموش و چشمِ نَم ہیں ہم

کچھ عناصِر ابھی نہیں بِکھرے

دَمِ تحریر تَو بَہَم ہیں ہم

زندگی ایسی رایگاں بھی نہیں

کچھ دِلوں پر کہیِں رَقَم ہیں ہم

احتیاطاً کِیا نہ ذِکر اُن کا

سارا موضوع بیش و کم ہیں ہم

ضامنؔ! اِک رازِ کاینات کہوں ؟

خود پُجاری ہیں خود صَنَم ہیں ہم

ضامن جعفری

کارواں پھر ملیں گے بہم صبر کر صبر کر

اگست 4, 2018ناصر کاظمی،دیوانِ ناصر،غزلہم،قلم،قسم،نم،کرم،بہم،بدم،حرم،رقم،ستم،صنم،علمadmin

رہ نوردِ بیابانِ غم صبر کر صبر کر

کارواں پھر ملیں گے بہم صبر کر صبر کر

بے نشاں ہے سفر رات ساری پڑی ہے مگر

آ رہی ہے صدا دم بدم صبر کر صبر کر

تیری فریاد گونجے گی دھرتی سے آکاش تک

کوئی دِن اور سہہ لے ستم صبر کر صبر کر

تیرے قدموں سے جاگیں گے اُجڑے دِلوں کے ختن

پاشکستہ غزالِ حرم صبر کر صبر کر

شہر اُجڑے تو کیا، ہے کشادہ زمینِ خدا

اِک نیا گھر بنائیں گے ہم صبر کر صبر کر

یہ محلاتِ شاہی تباہی کے ہیں منتظر

گرنے والے ہیں اِن کے علم صبر کر صبر کر

دف بجائیں گے برگ و شجر صف بہ صف ہر طرف

خشک مٹی سے پھوٹے گا نم صبر کر صبر کر

لہلہائیں گی پھر کھیتیاں کارواں کارواں

کھل کے برسے گا ابرِ کرم صبر کر صبر کر

کیوں پٹکتا ہے سر سنگ سے جی جلا ڈھنگ سے

دل ہی بن جائے گا خود صنم صبر کر صبر کر

پہلے کھل جائے دل کا کنول پھر لکھیں گے غزل

کوئی دم اے صریرِ قلم صبر کر صبر کر

درد کے تار ملنے تو دے ہونٹ ہلنے تو دے

ساری باتیں کریں گے رقم صبر کر صبر کر

دیکھ ناصر زمانے میں کوئی کسی کا نہیں

بھول جا اُس کے قول و قسم صبر کر صبر کر

ناصر کاظمی

خُدا سمجھتے رہے تھے جِسے صنم نکلا

اپریل 30, 2017ماجد صدیقی،آنگن آنگن رات،غزلبم،جنم،خم،ستم،صنمadmin

ماجد صدیقی ۔ غزل نمبر 17

نہیں کُچھ ایسا تغافل میں وُہ بھی کم نکلا

خُدا سمجھتے رہے تھے جِسے صنم نکلا

یہاں کے لوگ اذیّت پسند ہیں کیا کیا

مِلے جِسے بھی وُہ گرویدۂ ستم نکلا

وُہی جو قلقلِ خوں میں تھا رقصِ بِسمل کے

کُچھ اپنی لے میں بھی ایسا ہی زیر و بم نکلا

یقیں نہیں ہے پہ حسبِ روایتِ غیراں

جنم ہمارا بھی ہے ناطلب جنم نکلا

سنور گئے ہیں یہاں قصر کیا سے کیا ماجدؔ

مِرے مکان کی دیوار کا نہ خم نکلا

ماجد صدیقی

ڈھونڈھتے، روز کا رزق ہم تھک گئے

اپریل 30, 2017ماجد صدیقی،آنگن آنگن رات،غزلہم،قلم،قدم،کرم،صنمadmin

ماجد صدیقی ۔ غزل نمبر 67

جمع کرتے بدن کی یہ نم، تھک گئے

ڈھونڈھتے، روز کا رزق ہم تھک گئے

یوں لگے، ڈھیل توبہ کی دیتے ہوئے

ہم پہ ہوتے رہے جو، کرم تھک گئے

ایک انساں، نہ سجدوں سے باز آ سکا

پُوجے جانے سے، کیا کیا صنم تھک گئے

آرزو جستجو اور محرومیاں

اس مسلسل سفر سے، قدم تھک گئے

ہیں کُچھ ایسی ہی ماجدؔ حکایاتِ غم

لکھتے لکھتے جنہیں، سب قلم تھک گئے

ماجد صدیقی

وُہ ماجرا سرِ دیوار ہے رقم دیکھا

مارچ 31, 2017ماجد صدیقی،غزل،غزل سراقلم،نم،بھرم،بھسم،جنم،رقم،صنمadmin

ماجد صدیقی ۔ غزل نمبر 22

لب و زباں پہ اُترتے جسے ہے کم دیکھا

وُہ ماجرا سرِ دیوار ہے رقم دیکھا

وُہ دل بھی سنگ سے کمتر ہے کب کہ جس نے کبھی

کوئی خُدا، نہ پسِ آرزو، صنم دیکھا

شبِ الم کے تصّور سے یوں لگے جیسے

اِسی حیات میں اِک اور ہو جنم دیکھا

ستم کو نام دیا اَب کے جو ستمگر نے

کسی بھی جھُوٹ کا کھُلتے نہ یوں بھرم دیکھا

ملا فروغ جہاں بھی سکوں کے نغموں کو

وُہ شاخ راکھ ہوئی، آشیاں بھسم دیکھا

کبھی بہ حسنِ سلامت ہمیں نہ یاد آیا

وُہ شخص جس کو بچھڑتے بہ چشمِ نم دیکھا

ہوا کی چھیڑ بھی ماجدؔ تھی شاخِ بالا سے

نہ جھُک سکا جو کہیں سر وُہی قلم دیکھا

ماجد صدیقی

رکھنے لگے اغیار میں اپنا بھرم اچّھا

فروری 27, 2017ماجد صدیقی،سخناب،غزلنم،کم،کرم،بھرم،بھسم،جنم،صنمadmin

ماجد صدیقی ۔ غزل نمبر 73

سمجھیں وُہ ہمارے لیے ابرو میں خم اچّھا

رکھنے لگے اغیار میں اپنا بھرم اچّھا

کہتے ہیں وہ آلام کو خاطر میں نہ لاؤ

ٹھہرے گا تمہارے لیے اگلا جنم اچّھا

وجداں نے کہی بات یہ کیا حق میں ہمارے

چہرہ یہ مرا اور لباس اُس کا نم اچّھا

جو شاخ بھی کٹتی ہے کٹے نام نمو پر

دیکھو تو چمن پر ہے یہ کیسا کرم اچّھا

کس درجہ بھروسہ ہے اُنہیں ذات پہ اپنی

وہ لوگ کہ یزداں سے جنہیں ہے صنم اچّھا

یہ لفظ تھے کل ایک جنونی کی زباں پر

بسنے سے ہے اِس شہر کا ہونا بھسم اچّھا

غیروں سے ملے گا تو کھلے گا کبھی تجھ پر

ماجدؔ بھی ترے حق میں نہ تھا ایسا کم اچّھا

ماجد صدیقی

پھر بھی اپنے عہد پر قائم ہیں ہم اپنی جگہ

نومبر 5, 2015احمد فراز،شعراء،غزلہم،محترم،نم،صنمadmin

احمد فراز ۔ غزل نمبر 86

تیرا غم اپنی جگہ دنیا کے غم اپنی جگہ

پھر بھی اپنے عہد پر قائم ہیں ہم اپنی جگہ

کیا کریں یہ دل کسی کی ناصحا سنتا نہیں

آپ نے جو کچھ کہا اے محترم، اپنی جگہ

ہم موحد ہیں بتوں کے پوجنے والے نہیں

پر خدا لگتی کہیں تو وہ صنم اپنی جگہ

یارِ بے پروا! کبھی ہم نے کوئی شکوہ کیا

ہاں مگر ان ناسپاس آنکھوں کا نم اپنی جگہ

محفلِ جاناں ہو، مقتل ہو کہ مے خانہ فراز

جس جگہ جائیں بنا لیتے ہیں ہم اپنی جگہ

احمد فراز

بہت نکلے مرے ارمان لیکن پھر بھی کم نکلے

اکتوبر 8, 2015مرزا اسد اللہ خان غالب،اساتذہ،غزلہم،قلم،کم،جم،خم،دم،ستم،صنمadmin

دیوانِ غالب ۔ غزل نمبر 227

ہزاروں خواہشیں ایسی کہ ہر خواہش پہ دم نکلے

بہت نکلے مرے ارمان لیکن پھر بھی کم نکلے

ڈرے کیوں میرا قاتل؟ کیا رہے گا اُس کی گر د ن پر

وہ خوں، جو چشم تر سے عمر بھر یوں دم بہ دم نکلے؟

نکلنا خلد سے آدم کا سنتے آئے ہیں لیکن

بہت بے آبرو ہو کر ترے کوچے سے ہم نکلے

بھر م کھل جائے ظالم تیرے قامت کی درازی کا

اگر اس طرۂ پرپیچ و خم کا پیچ و خم نکلے

@مگر لکھوائے کوئی اس کو خط تو ہم سے لکھوائے

ہوئی صبح اور گھر سے کان پر رکھ کر قلم نکلے

ہوئی اِس دور میں منسوب مجھ سے بادہ آشامی

پھر آیا وہ زمانہ جو جہاں میں جامِ جم نکلے

ہوئی جن سے توقع خستگی کی داد پانے کی

وہ ہم سے بھی زیادہ خستۂ تیغِ ستم نکلے

محبت میں نہیں ہے فرق جینے اور مرنے کا

اسی کو دیکھ کر جیتے ہیں جس کافر پہ دم نکلے

ذرا کر زور سینے پر کہ تیر پر ستم نکلے

جو وہ نکلے تو دل نکلے جو دل نکلے تو دم نکلے

خدا کے واسطے پردہ نہ کعبہ سے اٹھا ظالم

کہیں ایسا نہ ہو یاں بھی وہی کافر صنم نکلے

کہاں میخانے کا دروازہ غالب! اور کہاں واعظ

پر اِتنا جانتے ہیں، کل وہ جاتا تھا کہ ہم نکلے

@ نسخۂ حمیدیہ (اور مہر) میں یہاں لفظ "اگر” ہے، دوسرے تمام نسخوں میں "مگر”، صرف طباطبائی نے حمیدیہ کی املا قبول کی ہے۔ ممکن ہے کہ حمیدیہ میں یہ لفظ کتابت کی غلطی ہو۔

مرزا اسد اللہ خان غالب

پر تنگ آگئے ہیں تمھارے ستم سے ہم

اکتوبر 6, 2015میر تقی میر،اساتذہ،غزلہم،قلم،قدم،قسم،نم،حرم،دم،ستم،صنمadmin

دیوان سوم غزل 1166

جی کے تئیں چھپاتے نہیں یوں تو غم سے ہم

پر تنگ آگئے ہیں تمھارے ستم سے ہم

اپنے خیال ہی میں گذرتی ہے اپنی عمر

پر کچھ نہ پوچھو سمجھے نہیں جاتے ہم سے ہم

زانو پہ سر ہے قامت خم گشتہ کے سبب

پیری میں اپنی آن لگے ہیں قدم سے ہم

جوں چکمہ میرحاج کا ہے خوار جانماز

بت خانے میں جو آئے ہیں چل کر حرم سے ہم

روتے بھی ان نے دیکھ کے ہم کو کیا نہ رحم

اک چشم داشت رکھتے تھے مژگان نم سے ہم

بدعہدیاں ہی کرتے گئے اس کو سال و ماہ

اب کب تسلی ہوتے ہیں قول و قسم سے ہم

زنار سا بندھا ہے گلے اپنے اب تو کفر

بدنام ہیں جہان میں عشق صنم سے ہم

لوگوں کے وصف کرنے سے بالیدگی ہوئی

جوں شیشہ پھیل پھوٹ پڑے ان کے دم سے ہم

طرفیں رکھے ہے ایک سخن چار چار میر

کیا کیا کہا کریں ہیں زبان قلم سے ہم

میر تقی میر

جیسے بچھڑے ہوئے کعبے میں صنم آتے ہیں

اپریل 2, 2012فیض احمد فیض،دستِ صبا،غزلقدم،کم،کرم،حرم،صنمadmin

فیض احمد فیض ۔ غزل نمبر 29

دل میں اب یوں ترے بھولے ہوئے غم آتے ہیں

جیسے بچھڑے ہوئے کعبے میں صنم آتے ہیں

ایک اک کرکے ہوئے جاتے ہیں تارے روشن

میری منزل کی طرف تیرے قدم آتے ہیں

رقصِ مے تیز کرو، ساز کی لے تیز کرو

سوئے مے خانہ سفیرانِ حرم آتے ہیں

کچھ ہمیں کو نہیں احسان اُٹھانے کا دماغ

وہ تو جب آتے ہیں، مائل بہ کرم آتے ہیں

اور کچھ دیر نہ گزرے شبِ فرقت سے کہو

دل بھی کم دکھتا ہے، وہ یاد بھی کم آتے ہیں

فیض احمد فیض

عشق کے دم قدم کی بات کرو

اپریل 2, 2012فیض احمد فیض،دستِ صبا،غزلقدم،نم،کرم،جم،حرم،صنم،غمadmin

فیض احمد فیض ۔ غزل نمبر 21

عجزِ اہل ستم کی بات کرو

عشق کے دم قدم کی بات کرو

بزمِ اہل طرب کو شرماو

بزمِ اصحابِ غم کی بات کرو

بزمِ ثروت کے خوش نشینوں سے

عظمتِ چشمِ نم کی بات کرو

ہے وہی بات یوں بھی اور یوں بھی

تم ستم یا کرم کی بات کرو

خیر، ہیں اہلِ دیر جیسے ہیں

آپ اہل حرم کی بات کرو

ہجر کی شب تو کٹ ہی جائے گی

روزِ وصلِ صنم کی بات کرو

جان جائیں گے جاننے والے

فیض، فرہاد و جم کی بات کرو

فیض احمد فیض

پر اسے معرکۂ عشق سے کم جانتے ہیں

جنوری 8, 2012عرفان صدیقی،غزلکم،جم،رم،ستم،صنمadmin

عرفان صدیقی ۔ غزل نمبر 186

سخت ہے مرحلۂ رزق بھی ہم جانتے ہیں

پر اسے معرکۂ عشق سے کم جانتے ہیں

آج تک ان کی خدائی سے ہے انکار مجھے

میں تو اک عمر سے کافر ہوں‘ صنم جانتے ہیں

ان کمندوں میں گرفتار نہ ہوں گے کہ غزال

زخم خوردہ ہیں مگر شیوۂ رم جانتے ہیں

یہی اک دھوپ کا ٹکڑا‘ یہی اک کوزۂ خاک

ہم اسے دولتِ اسکندر و جم جانتے ہیں

جانتے سب ہیں کہ ہم رکھتے ہیں خم طرفِ کلاہ

اور کیوں رکھتے ہیں، یہ اہلِ ستم جانتے ہیں

عرفان صدیقی

یہی ہیں ہر دھرم کے ساتھ کاغذ

دسمبر 1, 2007منصور آفاق،شعراء،غزلقدم،محترم،نم،کم،کرم،الم،بھرم،حرم،حشم،خم،دھرم،درم،ستم،صنم،علم،عدم،غمadmin

منصور آفاق ۔ غزل نمبر 160

پڑے ہیں جو قلم کے ساتھ کاغذ

یہی ہیں ہر دھرم کے ساتھ کاغذ

جلا آیا جلوسِ دانشِ دِین

شعورِ محترم کے ساتھ کاغذ

جڑے بس رہ گئے ہیں داستاں میں

ترے عہدِ ستم کے ساتھ کاغذ

یہی بس التماسِ دل کہ رکھنا

یہ دیوارِ حرم کے ساتھ کاغذ

پرندے بنتے جاتے ہیں مسلسل

ترے فضل و کرم کے ساتھ کاغذ

میانوالی میں آئے ہیں فلک سے

یہ امکانِ عدم کے ساتھ کاغذ

خود اپنے قتل نامے کا کسی کو

دیا پورے بھرم کے ساتھ کاغذ

کسی مبہم سی انجانی زباں میں

پڑے ہیں ہر قدم کے ساتھ کاغذ

الٹنے ہیں پلٹنے ہیں لحد تک

خیالِ بیش و کم کے ساتھ کاغذ

یہ وہ تہذیب ہے جو بیچتی ہے

ابھی دام و درم کے ساتھ کاغذ

کسی کو دستخط کرکے دیے ہیں

سرِ تسلیم خم کے ساتھ کاغذ

درازوں میں چھپانے پڑ رہے ہیں

کلامِ چشمِ نم کے ساتھ کاغذ

انہیں عباس نے لکھا ہے خوں سے

یہ چپکا دے علم کے ساتھ کاغذ

چمکتے پھر رہے ہیں آسماں کے

چراغِ ذی حشم کے ساتھ کاغذ

بدل جاتے ہیں اکثر دیکھتا ہوں

مری تاریخِ غم کے ساتھ کاغذ

ابد کے قہوہ خانے میں ملے ہیں

کسی تازہ صنم کے ساتھ کاغذ

ہوئے ہیں کس قدر منصور کالے

یہ شب ہائے الم کے ساتھ کاغذ

منصور آفاق

چل کے دو چار قدم دیکھتے ہیں

جنوری 8, 1972باقی صدیقی،شعراء،غزلہم،قدم،کم،کرم،خم،درم،ستم،صنمadmin

باقی صدیقی ۔ غزل نمبر 128

آپ ہیں دور کہ ہم دیکھتے ہیں

چل کے دو چار قدم دیکھتے ہیں

اپنی آواز پہ رحم آتا ہے

اس بلندی پہ ستم دیکھتے ہیں

ہم سفر کیسے کہ ہم مڑ مڑ کے

اپنے ہی نقش قدم دیکھتے ہیں

زلزلہ کوئی ادھر سے گزرا

تیری دیوار میں خم دیکھتے ہیں

قافلے شوق حرم سے گزرے

اوج پر بخت صنم دیکھتے ہیں

زندگی جنتی بلند اڑتی ہے

درد ہم اتنا ہی کم دیکھتے ہیں

جب کسی غم کا سوال آتا ہے

صورت اہل کرم دیکھتے ہیں

ریگ ساحل ہے مقدر اپنا

کیا ہر اک موج میں ہم دیکھتے ہیں

کتنا خوں اپنا جلا کر باقیؔ

صورت نان و درم دیکھتے ہیں

باقی صدیقی

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: صنم

کس نے دل توڑا جو ہم یاد آئے

متاعِ زیست کو وقفِ اَلَم کروں نہ کروں

کیوں نہ ہَوں کیا کسی سے کم ہیں ہم

کارواں پھر ملیں گے بہم صبر کر صبر کر

خُدا سمجھتے رہے تھے جِسے صنم نکلا

ڈھونڈھتے، روز کا رزق ہم تھک گئے

وُہ ماجرا سرِ دیوار ہے رقم دیکھا

رکھنے لگے اغیار میں اپنا بھرم اچّھا

پھر بھی اپنے عہد پر قائم ہیں ہم اپنی جگہ

بہت نکلے مرے ارمان لیکن پھر بھی کم نکلے

پر تنگ آگئے ہیں تمھارے ستم سے ہم

جیسے بچھڑے ہوئے کعبے میں صنم آتے ہیں

عشق کے دم قدم کی بات کرو

پر اسے معرکۂ عشق سے کم جانتے ہیں

یہی ہیں ہر دھرم کے ساتھ کاغذ

چل کے دو چار قدم دیکھتے ہیں

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: