ٹیگ کے محفوظات: سمائے

ہم گلستاں میں کب سمائے ہیں

مئی 31, 2021کلیاتِ شکیب جلالی ۔ غزلیں،شکیب جلالی،غزلپرائے،آئے،بجھائے،سمائےadmin

دشت و صحرا اگر بسائے ہیں

ہم گلستاں میں کب سمائے ہیں

آپ نغموں کے منتظر ہوں گے

ہم تو فریاد لے کے آئے ہیں

ایک اپنا دیا جلانے کو

تم نے لاکھوں دیئے بجھائے ہیں

کیا نظر آئے گا ابھی ہم کو

یک بیک روشنی سے آئے ہیں

یوں تو سارا چمن ہمارا ہے

پھول جتنے بھی ہیں پرائے ہیں

شکیب جلالی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

رنج بھی ایسے اٹھائے ہیں کہ جی جانتا ہے

اکتوبر 25, 2015اساتذہ،داغ دہلوی،غزللائے،ملائے،پائے،آئے،اٹھائے،سمائےadmin

داغ دہلوی ۔ غزل نمبر 46

لطف وہ عشق میں پائے ہیں کہ جی جانتا ہے

رنج بھی ایسے اٹھائے ہیں کہ جی جانتا ہے

سادگی، بانکپن، اغماز، شرارت، شوخی

تُو نے انداز وہ پائے ہیں کہ جی جانتا ہے

مسکراتے ہوئے وہ مجمعِ اغیار کے ساتھ

آج یوں بزم میں آئے ہیں کہ جی جانتا ہے

انہی قدموں نے تمھارے انہی قدموں کی قسم

خاک میں اتنے ملائے ہیں کہ جی جانتا ہے

تم نہیں جانتے اب تک یہ تمھارے انداز

وہ مرے دل میں سمائے ہیں کہ جی جانتا ہے

داغِ وارفتہ کو ہم آج ترے کوچے سے

اس طرح کھینچ کہ لائے ہیں کہ جی جانتا ہے

داغ دہلوی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

ہونٹوں پہ جان آئی پر آہ وے نہ آئے

اکتوبر 6, 2015میر تقی میر،اساتذہ،غزلہلائے،لگائے،ملائے،مٹائے،پائے،آئے،اٹھائے،بنائے،جلائے،دکھائے،سمائے،سائےadmin

دیوان اول غزل 549

کل وعدہ گاہ میں سے جوں توں کے ہم کو لائے

ہونٹوں پہ جان آئی پر آہ وے نہ آئے

زخموں پہ زخم جھیلے داغوں پہ داغ کھائے

یک قطرہ خون دل نے کیا کیا ستم اٹھائے

اس کی طرف کو ہم نے جب نامہ بر چلائے

ان کا نشاں نہ پایا خط راہ میں سے پائے

خوں بستہ جب تلک تھیں در یا رکے کھڑے تھے

آنسو گرے کروڑوں پلکوں کے ٹک ہلائے

اس جنگ جو کے زخمی اچھے نہ ہوتے دیکھے

گل جب چمن میں آئے وے زخم سب دکھائے

بڑھتیں نہیں پلک سے تا ہم تلک بھی پہنچیں

پھرتی ہیں وے نگاہیں پلکوں کے سائے سائے

پر کی بہار میں جو محبوب جلوہ گر تھے

سو گردش فلک نے سب خاک میں ملائے

ہر قطعۂ چمن پر ٹک گاڑ کر نظر کر

بگڑیں ہزار شکلیں تب پھول یہ بنائے

یک حرف کی بھی مہلت ہم کو نہ دی اجل نے

تھا جی میں آہ کیا کیا پر کچھ نہ کہنے پائے

چھاتی سراہ ان کی پائیز میں جنھوں نے

خار و خس چمن سے ناچار دل لگائے

آگے بھی تجھ سے تھا یاں تصویر کا سا عالم

بے دردی فلک نے وے نقش سب مٹائے

مدت ہوئی تھی بیٹھے جوش و خروش دل کو

ٹھوکر نے اس نگہ کی آشوب پھر اٹھائے

اعجاز عشق ہی سے جیتے رہے وگرنہ

کیا حوصلہ کہ جس میں آزار یہ سمائے

دل گر میاں انھوں کی غیروں سے جب نہ تب تھیں

مجلس میں جب گئے ہم غیرت نے جی جلائے

جیتے تو میر ہر شب اس طرز عمر گذری

پھر گور پر ہماری لے شمع گو کہ آئے

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔