دیوان اول غزل 11

جس سر کو غرور آج ہے یاں تاجوری کا

کل اس پہ یہیں شور ہے پھر نوحہ گری کا

شرمندہ ترے رخ سے ہے رخسار پری کا

چلتا نہیں کچھ آگے ترے کبک دری کا

آفاق کی منزل سے گیا کون سلامت

اسباب لٹا راہ میں یاں ہر سفری کا

زنداں میں بھی شورش نہ گئی اپنے جنوں کی

اب سنگ مداوا ہے اس آشفتہ سری کا

ہر زخم جگر داور محشر سے ہمارا

انصاف طلب ہے تری بے داد گری کا

اپنی تو جہاں آنکھ لڑی پھر وہیں دیکھو

آئینے کو لپکا ہے پریشاں نظری کا

صد موسم گل ہم کو تہ بال ہی گذرے

مقدور نہ دیکھا کبھو بے بال و پری کا

اس رنگ سے جھمکے ہے پلک پر کہ کہے تو

ٹکڑا ہے مرا اشک عقیق جگری کا

کل سیر کیا ہم نے سمندر کو بھی جاکر

تھا دست نگر پنجۂ مژگاں کی تری کا

لے سانس بھی آہستہ کہ نازک ہے بہت کام

آفاق کی اس کار گہ شیشہ گری کا

ٹک میر جگر سوختہ کی جلد خبر لے

کیا یار بھروسا ہے چراغ سحری کا

میر تقی میر

عرفان صدیقی ۔ غزل نمبر 180

پرند نامہ بری میں کہاں سے آتے ہیں

سخن یہ بے خبری میں کہاں سے آتے ہیں

ہمیں بھی یاد نہیں ہے کہ ہم شرر کی طرح

ہوا کی ہم سفری میں کہاں سے آتے ہیں

مسافتیں کوئی دیکھے کہ ہم سرابوں تک

گمانِ خوش نظری میں کہاں سے آتے ہیں

گھروں میں آنکھیں‘ دروں میں چراغ جلتے ہوئے

یہ خواب دربدری میں کہاں سے آتے ہیں

یہ کون جادۂ گم گشتگاں اجالتا ہے

فرشتے دشت و تری میں کہاں سے آتے ہیں

اگر تراوشِ زخم جگر نہیں کوئی چیز

تو رنگ بے ہنری میں کہاں سے آتے ہیں

عرفان صدیقی