ٹیگ کے محفوظات: سامان

اِک بُت نے ہم کو صاحبِ ایمان کر دیا

مئی 20, 2021ضامن جعفری،غزلہلکان،مسلمان،پریشان،انجان،ایمان،سامانadmin

حیرت ہے حق پہ کفر نے احسان کر دیا

اِک بُت نے ہم کو صاحبِ ایمان کر دیا

سوچا تھا کام رکّھیں گے ہم اپنے کام سے

نار و بہشت! تم نے پریشان کر دیا

کل شب تمہارے ساتھ کے جاگے ہُوئے تھے ہم

اِمشَب تمہاری یاد نے ہلکان کر دیا

ہم نے جہانِ کُفر کو عِلم و عَمَل بغیر

کلمہ پڑھا پڑھا کے مسلمان کر دیا

عاشق کے گھر میں حُسن پہ صدقے کے واسطے

ایمان رہ گیا تھا سو ایمان کر دیا

اے حُسن! کوئی تیری رَقابَت کی حد بھی ہے

دل کو حواس و ہوش سے انجان کر دیا

یادوں سے سہل ہو گیا تنہائی کا سفر

ضامنؔ کے ساتھ آپ نے سامان کر دیا

ضامن جعفری

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

جبکہ ہر بات میں پوشیدہ ہو امکانِ غزل

جولائی 24, 2018ہوائے طرب،باصر کاظمی،غزلمیدان،مرجان،نگہبان،گلستان،پیمان،امکان،بیابان،خوان،خیابان،دیوان،دبستان،سامانadmin

کیا بیاں کیجیے اب وسعتِ دامانِ غزل

جبکہ ہر بات میں پوشیدہ ہو امکانِ غزل

آپ ہم لاکھ بگاڑا کریں اس کی صورت

کوئی قوت ہے پُراسرار نگہبانِ غزل

قطب تھا اُن میں کوئی اور ولی تھا کوئی

دیکھنے میں تو وہ تھے محض ثنا خوانِ غزل

چاہیے شعر کو اب بھی وہی سودا وہی درد

توسنِ طبع وہی اور وہی میدانِ غزل

میرِ محفل تھا وہ ملتی نہیں کچھ اُس کی نظیر

اُس کے دم سے ہوا بھرپور گلستانِ غزل

آتشِ عشق نے دی جرأتِ اظہار مجھے

شجرِ غم کا ثمر ہے مرا دیوانِ غزل

کام گو بند نہیں کوئی بھی غالب کے بغیر

نام سے اُس کے ہی روشن ہے خیابانِ غزل

ناسخ و ذوق و ظفر، مومن و حالی و امیر

ان کے پھولوں سے مہکتا ہے گلستانِ غزل

راہ شاعر کو دکھاتا ہے وہی داغِ فراق

آج بھی ہجر کا سامان ہے سامانِ غزل

سفرِ فکر میں اقبال رہا میرا انیس

اُس نے سیراب کیا میرا بیابانِ غزل

لخت ہائے جگرِ وحشی کو معمولی نہ جان

کوئی یاقوتِ غزل ہے کوئی مرجانِ غزل

عمر بھر ہم کو وفا پیشہ اُسی نے رکھا

ہم نے باندھا تھا لڑکپن میں جو پیمانِ غزل

فیض پایا ہے کئی چشموں سے یوں تو باصِرؔ

مدرسہ میرا ہے ناصِر کا دبستانِ غزل

باصر کاظمی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

نام ہمارے،کیا کیا کُچھ تاوان ہوئے

اپریل 30, 2017ماجد صدیقی،آنگن آنگن رات،غزلویران،انسان،احسان،تاوان،سامانadmin

ماجد صدیقی ۔ غزل نمبر 36

فصلیں اُجڑیں اور قُرقی کھلیان ہوئے

نام ہمارے،کیا کیا کُچھ تاوان ہوئے

اُگتی فصلوں کو چاٹا، آسیبوں نے

موسم بھر بھی، چاہ اگر، ویران ہوئے

رہبروں کی قامت، بالا کرنے کو

ہم کیا کیا، تعمیر کا ہیں سامان ہوئے

اپنے ناپ سے ناپیں، اُس کی رحمت کو

اِس جگ میں ایسے بھی کُچھ انسان ہوئے

ماجدؔ کاش، کبھی چھم سے، وُہ آ جائے

عمر ہوئی ہے ہم پر، یہ احسان ہوئے

ماجد صدیقی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

زور آور ہے وہ فرمان اُسی کے ہیں

مارچ 31, 2017ماجد صدیقی،غزل،غزل سرافرمان،ارمان،جان،دسترخوان،سامان،شانadmin

ماجد صدیقی ۔ غزل نمبر 61

جتنے رستے ہیں آسان اُسی کے ہیں

زور آور ہے وہ فرمان اُسی کے ہیں

اِک اِک سانس بندھا ہے اُس کی ڈوری میں

یہ پیکر یہ دل اور جان اُسی کے ہیں

وہ چاہے جو صورت اِن کو دے ڈالے

دل میں ہیں جتنے ارمان اُسی کے ہیں

پہنچا ہے جو تتلی تتلی پھُولوں تک

راحت کے سارے سامان اُسی کے ہیں

چھاپ ہے اُس کی ہر اُمید کے خوشے پر

ہر موسم کے دسترخوان اُسی کے ہیں

ہم جیسوں سے آنکھ ملائیں کب ماجدؔ

شہر میں ہیں جو جو ذی شان اُسی کے ہیں

ماجد صدیقی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

مجھ میں اُتر گیا ہے وہ سرطان کی طرح

اکتوبر 25, 2015پروین شاکر،شعراء،غزلمہمان،کلیان،رحمان،سامان،سرطان،شیزان،شریانadmin

پروین شاکر ۔ غزل نمبر 32

دشمن ہے اور ساتھ رہے جان کی طرح

مجھ میں اُتر گیا ہے وہ سرطان کی طرح

جکڑے ہُوئے ہے تن کو مرے ، اس کی آرزو

پھیلا ہُوا ہے جال سا شریان کی طرح

دیوار و در نے جس کے لیے ہجر کاٹے تھے

آیا تھا چند روز کو ، مہمان کی طرح

دکھ کی رُتوں میں پیڑ نے تنہا سفر کیا

پتّوں کو پہلے بھیج کے سامان کی طرح

گہرے خنک اندھیرے میں اُجلے تکلّفات

گھر کی فضا بھی ہو گئی شیزان کی طرح

ڈوبا ہُوا ہے حسنِ سخن میں سکوتِ شب

تارِ ربابِ رُوح میں کلیان کی طرح

آہنگ کے جمال میں انجیل کی دُعا

نرمی میں اپنی ، سورہ ءِ رحمان کی طرح

پروین شاکر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

احسان کا مزا ہے احسان کر کے بھولے

اکتوبر 25, 2015اساتذہ،داغ دہلوی،غزلقرآن،مہمان،نقصان،پیمان،آسان،انسان،احسان،ارمان،دھیان،دربان،سامانadmin

داغ دہلوی ۔ غزل نمبر 44

گر ہو سلوک کرنا انسان کر کے بھولے

احسان کا مزا ہے احسان کر کے بھولے

نشتر سے کم نہیں ہے کچھ چھیڑ آرزو کی

عاشق مزاج کیوں کر ارمان کر کے بھولے

وعدہ کیا پھر اُس پر تم نے قسم بھی کھائی

کیا بھول ہے انساں پیمان کر کے بھولے

وعدے کی شب رہا ہے کیا انتظار مجھ کو

آنے کا وہ یہاں تک سامان کر کے بھولے

اپنے کئے پہ نازاں ہو آدمی نہ ہر گز

طاعت ہو یا اطاعت انسان کر کے بھولے

خود ہی مجھے بلایا پھر بات بھی نہ پوچھی

وہ انجمن میں اپنی مہمان کر کے بھولے

یہ بھول بھی ہماری ہے یادگار دیکھو

دل دے کے مفت اپنا نقصان کر کے بھولے

تم سے وفا جو کی ہے ہم سے خطا ہوئی ہے

ایسا قصور کیوں کر انسان کر کے بھولے

آخر تو آدمی تھے نسیان کیوں نہ ہوتا

میری شناخت شب کو دربان کر کے بھولے

اب یاد ہے اُسی کی فریاد ہے اُسی کی

سارے جہاں کو جس کا ہم دھیان کر کے بھولے

اب عشق کا صحیفہ یوں دل سے مٹ گیا ہے

جس طرح یاد کوئی قرآن کر کے بھولے

اے داغ اپنا احساں رکھے گا یاد قاتل

وہ اور میری مشکل آسان کر کے بھولے

داغ دہلوی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

مر گئے لاکھوں اسی ارمان میں

اکتوبر 25, 2015اساتذہ،داغ دہلوی،غزلنقصان،انسان،ارمان،سامانadmin

داغ دہلوی ۔ غزل نمبر 34

حضرت دل آپ ہیں جس دھیان میں

مر گئے لاکھوں اسی ارمان میں

گر فرشتہ وش ہوا کوئی تو کیا

آدمیت چاہئے انسان میں

جس نے دل کھویا اسی کو کچھ ملا

فائدہ دیکھا اسی نقصان میں

کسی نے ملنے کا کیا وعدہ کہ داغ

آج ہو تم اور ہی سامان میں

داغ دہلوی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

جھوٹی قسم سے آپ کا ایمان تو گیا

اکتوبر 25, 2015اساتذہ،داغ دہلوی،غزلقربان،پہچان،ایمان،احسان،جان،سامانadmin

داغ دہلوی ۔ غزل نمبر 29

خاطر سے یا لحاظ سے میں مان تو گیا

جھوٹی قسم سے آپ کا ایمان تو گیا

دل لے کے مفت کہتے ہیں کہ کام کا نہیں

اُلٹی شکایتیں ہوئیں، احسان تو گیا

دیکھا ہے بُت کدے میں جو اے شیخ، کچھ نہ پوچھ

ایمان کی تو یہ ہے کہ ایمان تو گیا

افشائے رازِ عشق میں گو ذلتیں ہوئیں

لیکن اُسے جتا تو دیا، جان تو گیا

گو نامہ بر سے خوش نہ ہوا، پر ہزار شکر

مجھ کو وہ میرے نام سے پہچان تو گیا

بزمِ عدو میں صورت پروانہ دل میرا

گو رشک سے جلا تیرے قربان تو گیا

ہوش و ہواس و تاب و تواں داغ جا چکے

اب ہم بھی جانے والے ہیں سامان تو گیا

داغ دہلوی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

ہے دستِ فتنہ اور گریبانِ فتنہ ہے

اکتوبر 23, 2015Jaun Elia،جون ایلیا،شعراء،غزلگریبان،پنہان،پستان،آن،جان،جانان،درمان،سامان،طغیانadmin

جون ایلیا ۔ غزل نمبر 226

کیوں غم کریں جو شہر میں طوفانِ فتنہ ہے

ہے دستِ فتنہ اور گریبانِ فتنہ ہے

درمانِ فتنہ کے لئے ہے سر بہ جیب کیوں

فتنی اٹھا کہ فتنی ہی درمانِ فتنہ ہے

لب وا ہوئے کہ فتنہ فضا تا فضا پڑا

یہ جنبشِ نفس ہے کہ طغیانِ فتنہ ہے

بےجان ہیں یہ سارے بدن ہائے رقصِ شب

ہائے وہ اک بدن جو بدن جانِ فتنہ ہے

مت جا قریب پاسِ نشیب و فراز ہے

یہ پہلوئے فساد ہے، پستانِ فتنہ ہے

بھاگ اپنے سائے سے کہ بنایا گیا ہے یہ

سائے میں ایک پرتوِ پنہانِ فتنہ ہے

اس کے بدن میں کیسے اماں مل گئی تجھے

جو تشنگی کی جان ہے، جانانِ فتنہ ہے

آثار تک نہیں کسی فتنے کے دور تک

فارغ نہ بیٹھو کہ یہی آنِ فتنہ ہے

نکلا بھی جونؔ وقت پہ سورج گیا بھی ڈوب

آں سوئے کہکشاں کوئی سامانِ فتنہ ہے

جون ایلیا

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

تُو میری جانِ جاں سو مری جان الوداع

اکتوبر 23, 2015Jaun Elia،جون ایلیا،شعراء،غزلگریبان،پریشان،پشیمان،آن،انسان،ایمان،بیابان،بان،جان،سامانadmin

جون ایلیا ۔ غزل نمبر 54

راس آ نہیں سکا کوئی بھی پیمان الوداع

تُو میری جانِ جاں سو مری جان الوداع

میں تیرے ساتھ بُجھ نہ سکا حد گزر گئی

اے شمع! میں ہوں تجھ سے پشیمان الوداع

میں جا رہا ہوں اپنے بیابانِ حال میں

دامان الوداع! گریبان الوداع

اِک رودِ ناشناس میں ہے ڈوبنا مجھے

سو اے کنارِ رود ، بیابان الوداع

خود اپنی اک متاعِ زبوں رہ گیا ہوں میں

سو الوداع، اے مرے سامان الوداع

سہنا تو اک سزا تھی مرادِ محال کی

اب ہم نہ مل سکیں گے ، میاں جان الوداع

اے شام گاہِ صحنِ ملالِ ہمیشگی

کیا جانے کیا تھی تری ہر اک آن ، الوداع

کِس کِس کو ہے علاقہ یہاں اپنے غیر سے

انسان ہوں میں ، تُو بھی ہے انسان الوداع

نسبت کسی بھی شہہ سے کسی شے کو یاں نہیں

ہے دل کا ذرہ ذرہ پریشان الوداع

رشتہ مرا کوئی بھی الف ، بے سے اب نہیں

امروہا الوداع سو اے بان الوداع

اب میں نہیں رہا ہوں کسی بھی گمان کا

اے میرے کفر ، اے مرے ایمان الوداع

جون ایلیا

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

ہو مختلط جو ان سے تو ایمان کیا رہے

اکتوبر 7, 2015میر تقی میر،اساتذہ،غزلمہمان،پہچان،ایمان،ارمان،جان،حیران،سامانadmin

دیوان ششم غزل 1886

کافر بتوں سے مل کے مسلمان کیا رہے

ہو مختلط جو ان سے تو ایمان کیا رہے

شمشیر اس کی حصہ برابر کرے ہے دو

ایسی لگی ہے ایک تو ارمان کیا رہے

ہے سر کے ساتھ مال و منال آدمی کا سب

جاتا رہے جو سر ہی تو سامان کیا رہے

ویرانی بدن سے مرا جی بھی ہے اداس

منزل خراب ہووے تو مہمان کیا رہے

اہل چمن میں میں نے نہ جانا کسو کے تیں

مدت میں ہو ملاپ تو پہچان کیا رہے

حال خراب جسم ہے جی جانے کی دلیل

جب تن میں حال کچھ نہ رہے جان کیا رہے

جب سے جہاں ہے تب سے خرابی یہی ہے میر

تم دیکھ کر زمانے کو حیران کیا رہے

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

مہر بت دگر سے طوفان کر کے مارا

اکتوبر 6, 2015میر تقی میر،اساتذہ،غزلپہچان،پیمان،احسان،جان،حیران،سامان،طوفانadmin

دیوان سوم غزل 1064

کیا رویئے ہمیں کو یوں آن کر کے مارا

مہر بت دگر سے طوفان کر کے مارا

تربت کا میری لوحہ آئینے سے کرے ہے

یعنی کہ ان نے مجھ کو حیران کر کے مارا

بیگانہ جان ان نے کیا چوٹ رات کو کی

منھ دیکھ دیکھ میرا پہچان کر کے مارا

پہلے گلے لگایا پھر دست جور اٹھایا

مارا تو ان نے لیکن احسان کر کے مارا

اس سست عہد نے کیا کی تھی قسم مجھی سے

بہتوں کو ان نے عہد و پیمان کر کے مارا

حاضر یراق ہونا کاہے کو چاہیے تھا

مجھ بے نوا کو کیا کیا سامان کر کے مارا

کہنے لگا کہ شب کو میرے تئیں نشہ تھا

مستانہ میر کو میں کیا جان کر کے مارا

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

دکھلائی دے جہاں تک میدان ہورہا ہے

اکتوبر 6, 2015میر تقی میر،اساتذہ،غزلقربان،مہمان،میدان،ایوان،آسان،جان،حیران،سامان،طوفانadmin

دیوان اول غزل 491

بے یار شہر دل کا ویران ہورہا ہے

دکھلائی دے جہاں تک میدان ہورہا ہے

اس منزل جہاں کے باشندے رفتنی ہیں

ہر اک کے ہاں سفر کا سامان ہورہا ہے

اچھا لگا ہے شاید آنکھوں میں یار اپنی

آئینہ دیکھ کر کچھ حیران ہورہا ہے

ٹک زیر طاق نیلی وسواس سے رہا کر

مدت سے گرنے پر یہ ایوان ہورہا ہے

گل دیکھ کر چمن میں تجھ کو کھلا ہی جا ہے

یعنی ہزار جی سے قربان ہورہا ہے

حال زبون اپنا پوشیدہ کچھ نہ تھا تو

سنتا نہ تھا کہ یہ صید بے جان ہورہا ہے

ظالم ادھر کی سدھ لے جوں شمع صبح گاہی

ایک آدھ دم کا عاشق مہمان ہورہا ہے

قرباں گہ محبت وہ جا ہے جس میں ہر سو

دشوار جان دینا آسان ہورہا ہے

ہر شب گلی میں اس کی روتے تو رہتے ہو تم

اک روز میر صاحب طوفان ہورہا ہے

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

سب کو دعویٰ ہے ولے ایک میں یہ جان نہیں

اکتوبر 6, 2015میر تقی میر،اساتذہ،غزلمسلمان،امکان،ایمان،جان،خاطرمہمان،دربان،سامانadmin

دیوان اول غزل 369

عشق کرنے کو جگر چاہیے آسان نہیں

سب کو دعویٰ ہے ولے ایک میں یہ جان نہیں

غارت دیں میں نگہ خصمی ایماں میں ادا

تجھ کو کافر نہ کہے جو وہ مسلمان نہیں

سرسری ملیے بتوں سے جو نہ ہوتاب جفا

عشق کا ذائقہ کچھ داخل ایمان نہیں

ایک بے درد تجھے پاس نہیں عاشق کا

ورنہ عالم میں کسے خاطرمہمان نہیں

کیونکے غم سرزدہ ہر لحظہ نہ آوے دل میں

گھر ہے درویش کا یاں در نہیں دربان نہیں

ہم نشیں آہ نہ تکلیف شکیبائی کر

عشق میں صبر و تحمل ہو یہ امکان نہیں

کس طرح منزل مقصود پہ پہنچیں گے میر

سفر دور ہے اور ہم کنے سامان نہیں

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

ہو گر شریف مکہ مسلمان ہی نہیں

اکتوبر 6, 2015میر تقی میر،اساتذہ،غزلمسلمان،گریبان،پہچان،پریشان،امکان،انسان،جان،حیران،سامانadmin

دیوان اول غزل 306

جو حیدری نہیں اسے ایمان ہی نہیں

ہو گر شریف مکہ مسلمان ہی نہیں

وہ ترک صید پیشہ مرا قصد کیا کرے

دبلے پنے سے تن میں مرے جان ہی نہیں

خال و خط ایسے فتنے نگاہیں یہ آفتیں

کچھ اک بلا وہ زلف پریشان ہی نہیں

ہیں جزو خاک ہم تو غبار ضعیف سے

سر کھینچنے کا ہم کنے سامان ہی نہیں

دیکھی ہو جس نے صورت دلکش وہ ایک آن

پھر صبر اس سے ہو سکے امکان ہی نہیں

خورشید و ماہ و گل سبھی اودھر رہے ہیں دیکھ

اس چہرے کا اک آئینہ حیران ہی نہیں

یکساں ہے تیرے آگے جو دل اور آرسی

کیا خوب و زشت کی تجھے پہچان ہی نہیں

سجدہ اس آستاں کا نہ جس کے ہوا نصیب

وہ اپنے اعتقاد میں انسان ہی نہیں

کیا تجھ کو بھی جنوں تھا کہ جامے میں تیرے میر

سب کچھ بجا ہے ایک گریبان ہی نہیں

میر تقی میر

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

اس عیش کے لیے سر و سامان چاہیے

جنوری 15, 2012عرفان صدیقی،غزلمیدان،نقصان،آسان،امکان،اعلان،بیابان،حیران،دیوان،سلیمان،سامانadmin

عرفان صدیقی ۔ غزل نمبر 354

وحشت کے ساتھ دشت مری جان چاہیے

اس عیش کے لیے سر و سامان چاہیے

کچھ عشق کے نصاب میں کمزور ہم بھی ہیں

کچھ پرچۂ سوال بھی آسان چاہیے

تجھ کو سپردگی میں سمٹنا بھی ہے ضرور

سچا ہے کاروبار تو نقصان چاہیے

اب تک کس انتظار میں بیٹھے ہوئے ہیں لوگ

امید کے لیے کوئی امکان چاہیے

ہو گا یہاں نہ دست و گریباں کا فیصلہ

اس کے لیے تو حشر کا میدان چاہیے

آخر ہے اعتبارِ تماشا بھی کوئی چیز

انسان تھوڑی دیر کو حیران چاہیے

جاری ہیں پائے شوق کی ایذا رسانیاں

اب کچھ نہیں تو سیرِ بیابان چاہیے

سب شاعراں خریدۂ دربار ہو گئے

یہ واقعہ تو داخلِ دیوان چاہیے

ملکِ سخن میں یوں نہیں آنے کا انقلاب

دو چار بار نون کا اعلان چاہیے

اپنا بھی مدتوں سے ہے رقعہ لگا ہوا

بلقیس شاعری کو سلیمان چاہیے

عرفان صدیقی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

یاد وہ بھی نہیں آتا ہے پریشان جو ہیں

جنوری 8, 2012عرفان صدیقی،غزلمہمان،ناداں،گریبان،پریشان،امکان،بیابان،سامانadmin

عرفان صدیقی ۔ غزل نمبر 173

کچھ نہ کچھ بھول تو ہوجاتی ہے انسان جو ہیں

یاد وہ بھی نہیں آتا ہے پریشان جو ہیں

صرف اتنا کہ بڑی چیز ہے ملنا دل کا

ہم کوئی بات سمجھتے نہیں ناداں جو ہیں

رونقِ شہر سے مایوس نہ ہو بانوئے شہر

خاک اڑانے کو ترے بے سرو سامان جو ہیں

خیر دُنیا مری وحشت کے لیے تنگ سہی

اور یہ عرصۂ باطن میں بیابان جو ہیں

اے شبِ دربدری آنکھ میں روشن کیا ہے

کچھ ستارے کہ سرِ مطلعِ امکان جو ہیں

اگلے موسم میں ہماری کوئی پہچان تو ہو

ان کو محفوظ رکھیں تارِ گریبان جو ہیں

رات کی رات فقیروں کی بھی دلداری کر

دائم آباد زمیں، ہم ترے مہمان جو ہیں

عرفان صدیقی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

میرے لہو نے سب سر و سامان کر دیا

جنوری 3, 2012عرفان صدیقی،غزلمہمان،میدان،مسلمان،نقصان،گریبان،پریشان،اعلان،سامانadmin

عرفان صدیقی ۔ غزل نمبر 64

زرتاب ترا قریۂ ویران کر دیا

میرے لہو نے سب سر و سامان کر دیا

اس بار یوں ہوا کہ اندھیروں کی فوج کو

دو چار جگنوؤں نے پریشان کر دیا

کمزور طائروں کو لہو کی ترنگ نے

شاہیں بچوں سے دست و گریبان کر دیا

دست ستم کا دل پہ کوئی بس نہ چل سکا

تھوڑا سا مریے جسم کا نقصان کر دیا

سینے پہ نیزہ، پشت پہ دیوار سنگ تھی

تنگ آکے ہم نے جنگ کا اعلان کر دیا

وہ آفتیں پڑیں کہ خدا یاد آگیا

ان حادثوں نے مجھ کو مسلمان کر دیا

وہ درد ہے کہ دل سے نکلتا نہیں سو آج

ہم نے سپرد خانہ بہ مہمان کر دیا

عرفانؔ ، بزم بادہ و گل تھی زمین شعر

تم نے تو اس کو حشر کا میدان کر دیا

عرفان صدیقی

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

وحشت میں مبتلا ہوا انسان کس لئے

دسمبر 1, 2007منصور آفاق،شعراء،غزلمہمان،نقصان،ویران،گلدان،انسان،دالان،سلطان،سامان،سرطانadmin

منصور آفاق ۔ غزل نمبر 498

ہر لمحہ تازہ قتل کا امکان کس لئے

وحشت میں مبتلا ہوا انسان کس لئے

میں سوچتا ہوں دیکھ کے اڑتے ہوئے پرند

لایا ہوں ہفتہ بھر کا یہ سامان کس لئے

شاخیں لدی ہوئی ہیں گلابوں سے غیر کی

خالی ہے میری ذات کا گلدان کس لئے

جنت نما ہیں اہل ستم کی ریاستیں

اپنے دیارِ زندگی ویران، کس لئے

رائج جہاں میں کیوں ہوئی جنگل کی شہریت

کچھ بھیڑیاصفت ہوئے سلطان کس لئے

کیا جانوں کس نے پیٹھ لگائی تھی اس کے ساتھ

پھیلا ہوا پیڑ میں سرطان کس لئے

آخر کہاں گئی ہیں وہ کرنیں وہ گرم دھوپ

ویراں پڑا ہوا ہے یہ دالان کس لئے

آسیب پھر رہا ہے کوئی میرے ساتھ ساتھ

ہونے لگا ہے روزہی نقصان کس لئے

جاتے نہیں ہیں لوٹ کے اپنے ستاروں پر

منصور کائنات کے مہمان کس لئے

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

یہ رات چاند رات ہے کم آن سائیکی

دسمبر 1, 2007منصور آفاق،شعراء،غزلہیجان،نروان،وجدان،کپتان،پہچان،پریشان،امکان،آن،دیوان،دالان،رومان،سنسان،سامان،سرطان،طوفانadmin

منصور آفاق ۔ غزل نمبر 467

پہلو میں آ کہ اپنا ہو عرفان سائیکی

یہ رات چاند رات ہے کم آن سائیکی

میرے سگار میں رہے جلتے تمام عمر

احساس، خواب، آگہی، وجدان، سائیکی

اٹکا ہوا ہے خوف کے دھڑ میں مرا دماغ

وحشت زدہ خیال، پریشان سائیکی

باہر مرے حریمِ حرم سے نکل کے آ

اپنے چراغِ طور کو پہچان سائیکی

رستہ نجات کا ترے لاکٹ میں بند ہے

باہر کہیں نہیں کوئی نروان سائیکی

لاکھوں بلیک ہول ہیں مجھ میں چھپے ہوئے

میری خلاؤں سے بھی ہے سنسان سائیکی

کیا تُو برہنہ پھرتی ہے میری رگوں کے بیچ

میرے بدن میں کیسا ہے ہیجان سائیکی

خالی ہے دیکھ یاد کی کرسی پڑی ہوئی

سونا پڑا ہے شام کا دالان سائیکی

دریا نکل بھی سکتا ہے صحرائے چشم سے

تجھ میں دھڑکتا ہے کوئی طوفان سائیکی

یہ گیت یہ بہار یہ دستک یہ آہٹیں

یہ کیا کسی کا رہ گیا سامان سائیکی

یہ حسرتیں یہ روگ یہ ارماں یہ درد و غم

کرتی ہو جمع میر کا دیوان، سائیکی

شاخوں سے بر گ و بارکی امید کیا کروں

پہنچا ہوا جڑوں میں ہے سرطان سائیکی

ممکن ہے تجھ سے اپنی ملاقات ہوکبھی

موجود ہیں بڑے ابھی امکان سائیکی

گرداب کھینچ سکتے ہیں پاتال کی طرف

کوئی جہاز کا نہیں کپتان سائیکی

پھر ڈھونڈتا ہے تیرے خدو خال روح میں

منصور کا ہے پھر نیا رومان سائیکی

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

نظر دیوار سے گزری، رکی ڈھلوان پر بارش

دسمبر 1, 2007منصور آفاق،شعراء،غزلنقصان،ویران،ڈھلوان،گلدان،پیمان،پاکستان،امکان،دیوان،دھان،دالان،دامان،دان،ریگستان،سامان،شمشان،شان،طوفانadmin

منصور آفاق ۔ غزل نمبر 192

تحیر خیز موسم کی ہوئی وجدان پر بارش

نظر دیوار سے گزری، رکی ڈھلوان پر بارش

ترے پاگل کی باتیں اتفاقاتِ جہاں ہیں کیا

ہوئی ہے یوں ہی برسوں بعد ریگستان پر بارش

سراپا آگ !دم بھر کو مرے چہرے پہ نظریں رکھ

تری آنکھوں سے ہو گی تیرے آتش دان پر بارش

گرے تو پھول بن جائے ترے چہرے پہ مہتابی

پڑے تو آگ بن جائے ترے دامان پر بارش

کتابِ غم کو کتنی بار برساتوں میں رکھا ہے

نہیں پڑتی جنابِ میر کے دیوان پر بارش

وہ برساتیں پہن کر گاؤں میں پھرتی ہوئی لڑکی

مجھے یاد آتی ہے اس سے مہکتی دھان پر بارش

محبت جاگتی ہے جب تو پھر ہوتی ہے سپنوں کی

مقام یاد پر بارش، شبِ پیمان پر بارش

عدم آباد سے آگے خدا کی آخری حد تک

رہی ہے زندگی کی قریہء امکان پر بارش

گئے گزرے زمانے ڈھونڈتی بدلی کی آنکھوں سے

یونہی ہے اِس کھنڈر جیسے دلِ ویران پر بارش

کئی برسوں سے پانی کو ترستی تھی مری چوپال

کسی کا پاؤں پڑتے ہی ہوئی دالان پر بارش

بڑی مشکل سے بادل گھیر لایا تھا کہیں سے میں

اتر آئی ہے اب لیکن مرے نقصان پر بارش

بہا کر لے گئی جو شہر کے کچے گھروندوں کو

نہیں ویسی نہیں ہے قصرِ عالی شان پر بارش

کہے ہے بادلو! یہ ڈوبتے سورج کی تنہائی

ذرا سی اہتمامِ شام کے سامان پر بارش

بدن کو ڈھانپ لیتی ہیں سنہری بھاپ کی لہریں

اثر انداز کیا ہو لمس کے طوفان پر بارش

جلایا کس گنہ گارہ کو معصوموں کی بستی نے

کہ اتری بال بکھرائے ہوئے شمشان پر بارش

کسی مشہور نٹ کا رقص تھا اونچی حویلی میں

ہوئی اچھی بھلی نوٹوں کی پاکستان پر بارش

مجھے مرجھاتے پھولوں کا ذرا سا دکھ ہوا منصور

مسلسل ہو رہی ہے کانچ کے گلدان پر بارش

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔