ٹیگ کے محفوظات: زنداں

زخموں کی طرح سِینہِ سوزاں میں رہے پُھول

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلمژگاں،گلستاں،بہاراں،حیراں،زنداں،سوزاںadmin

شاخوں پہ رہے اور نہ داماں میں رہے پُھول

زخموں کی طرح سِینہِ سوزاں میں رہے پُھول

دوشیزگیِ رنگ کے لُٹ جانے کا ڈر تھا

سہمے ہوئے آغوشِ بہاراں میں رہے پھول

کیا کم ہے یہ احسان ترا یادِ بہاراں !

ہمراہ مِرے گوشہِ زنداں میں رہے پُھول

شُعلہ صفت و بَرق شعار و شفق انداز

کیا کیا نہ مِرے دیدہِ حیراں میں رہے پھول

اک موجِ بلاخیز بہا لے گئی آخر

کچھ دیر تو کنجِ خسِ مِژگاں میں رہے پُھول

اک طرفہ تماشا تھی بدلتی ہوئی رُت بھی

غیروں کی طرح اپنے گلستاں میں رہے پُھول

شکیب جلالی

دیوانوں کی تکراروں سے، خاموشیِ بیاباں ٹوٹ گئی

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلگلستاں،بیاباں،جاں،دوراں،زنداں،طوفاںadmin

وحشت کے ان معماروں سے، بنیادِ ایواں ٹوٹ گئی

دیوانوں کی تکراروں سے، خاموشیِ بیاباں ٹوٹ گئی

اے عزمِ جواں شورش کیسی، اب تک تو یہ سنتے آئے ہیں

دو نازک سی پتواروں سے، ہر جرأتِ طوفاں ٹوٹ گئی

تخیئل کی دَرپردہ ضربیں، وحشی کا سہارا بن ہی گئیں

زنجیروں کی جھنکاروں سے، پابندیِ زنداں ٹوٹ گئی

زنداں کی اندھیری راتوں میں، جینے کا سہارا ختم ہُوا

افسوس کہ ان بے چاروں سے، تصویرِ گلستاں ٹوٹ گئی

دیوانوں نے آخر گلشن، رو رو کے بیاباں کر ڈالا

آنکھوں کے لرزتے پاروں سے، دیوارِ گلستاں ٹوٹ گئی

قسمت کی کرشمہ سازی تھی یا لُطف و کرم ملّاحوں کا

ٹکرا کر خشک کناروں سے پروردہِ طوفاں ٹوٹ گئی

دکھ درد کے ماروں کا ہر غم، ساغر کی کھنک میں ڈوب گیا

پیمانوں کی جھنکاروں سے فکرِ غمِ دوراں ٹوٹ گئی

بارِ غمِ اُلفت اُٹھ نہ سکا، کم ظرفوں کی نبضیں چھوٹ گئیں

افسوس ہے ان بیماروں سے، توقیرِ غمِ جاں ٹوٹ گئی

ہستیِ شکیبؔ زار کو، رنج و غم کے ہی چرکے کافی تھے

ان نازک سی دیواروں سے تعمیرِ دل و جاں ٹوٹ گئی

شکیب جلالی

داغِ جگر کو رشکِ گُلستاں بنا دیا

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلگلستاں،آساں،انساں،دیواں،زنداں،طوفاں،عریاںadmin

گلہائے صبر و ضبط کا خواہاں بنا دیا

داغِ جگر کو رشکِ گُلستاں بنا دیا

پابندیوں نے موت کا ساماں بنا دیا

قلبِ حزیں کو تلخیِ زنداں بنا دیا

جلووں نے ان کی دید کا ساماں بنا دیا

میرے تصوّرات کو عُریاں بنا دیا

منظور تھی جو شانِ کریمی کو بندگی

خالق نے مُشتِ خاک کو انساں بنا دیا

مایوسیوں نے دل کا سَفینہ ڈبو کے آج

افسوس ایک موج کو طوفاں بنا دیا

اللہ رے فریبِ تصوّر کی خوبیاں

دشواریِ فراق کو آساں بنا دیا

دیکھا شکیبؔ! نقطے جما کر بنائے حَرف

حَرفوں سے شعر، شعر سے دیواں بنا دیا

شکیب جلالی

یاد کیا تجھ کو دلائیں ترا پیماں جاناں

مئی 30, 2021عرفان ستار،غزلہاں،فراواں،مژگاں،نگہباں،ناداں،گریباں،پیماں،امکاں،بیاباں،جنباں،جاناں،حریفاں،خواں،دوراں،درماں،زنداں،ساماںadmin

تُو کہ ہم سے ہے بصد ناز گریزاں جاناں

یاد کیا تجھ کو دلائیں ترا پیماں جاناں

چل یہ مانا کہ تجھے یاد نہیں کچھ بھی۔ مگر

یہ چمکتا ہوا کیا ہے سرِ مژگاں جاناں

آج قدموں تلے روندی ہے کلاہِ پندار

آج وا مجھ پہ ہوا ہے درِ امکاں جاناں

میں بھی کیا چیز ہوں آخر، جو یہاں میرے لے

ہیں فنا اور بقا دست و گریباں جاناں

خواب، تنہائی، تری یاد، مرا ذوقِ سخن

عمر بھر کے لیے کافی ہے یہ ساماں جاناں

زندگی ٹھہری ہوئی، اور گزرتی ہوئی عمر

دیکھ کیا کچھ ہے یہاں ساکت و جنباں جاناں

جتنی زنجیر ہے، اُتنی ہی مری حدِّ سفر

ہے مری حدِّ نظر وسعتِ زنداں جاناں

ابھی حالات موافق ہیں تو کچھ طے کرلیں

کتنا ٹھہرے گی بھلا گردشِ دوراں جاناں

اک ترے غم کی کمی تھی تری دیوانے کو

ورنہ وحشت تو یہاں تھی ہی فراواں جاناں

درد تازہ بھی ہے، گہرا بھی ہے، جاں سوز بھی ہے

کوئی مرہم، کوئی نشتر، کوئی درماں جاناں

اپنا تو ایک ہی لہجہ ہے یہ، سیدھا، سچا

بزمِ احباب ہو، یا بزمِ حریفاں جاناں

اور ہوں گے جو ترے عشق کی تشہیر کریں

ہم نہیں وہ، جو کریں چاک گریباں جاناں

پوچھتا رہتا ہوں اکثر، کہ ہُوا کیا ہے تجھے؟

کچھ بتاتا ہی نہیں ہے دلِ ناداں جاناں

جُز دعا نذرگزارے گا تجھے کیا یہ فقیر؟

جا تری خیر، خدا تیرا نگہباں جاناں

’’خلقتِ شہر تو کہنے کو فسانے مانگے‘‘

ہم بہت خوش ہیں ترے بعد، ارے ہاں جاناں

ہم جہاں جائیں یونہی خاک اڑاتے جائیں

پاوٗں کے ساتھ بندھا ہے یہ بیاباں جاناں

یاد آتا تو بہت ہو گا تجھے جانِ فراز

کس قدر پیار سے کہتا تھا وہ جاناں، جاناں

ہائے کیا وقت تھا، اس بام پہ ہوتے تھے فراز

اب جہاں ہوتا ہے عرفان غزل خواں، جاناں

عرفان ستار

اچّھا یہ میرے درد کا درماں کِیا گیا

مئی 20, 2021ضامن جعفری،غزلچراغاں،یزداں،پریشاں،امکاں،احساں،درماں،زنداں،ساماںadmin

ہر زخمِ دل کو بزم میں عُریاں کِیا گیا

اچّھا یہ میرے درد کا درماں کِیا گیا

روزِ اَزَل ہی سے مجھے حیراں کِیا گیا

مسجود کر کے ہمسرِ یزداں کِیا گیا

آساں کتابِ زیست نہ تھی، اُس پہ مستزاد

اَوراقِ زندگی کو پریشاں کِیا گیا

دُشواریاں تھیں اِتنی اگر راہِ عشق میں

کیوں وصلِ یار داخلِ امکاں کِیا گیا

روشن شبِ فراق رہے تیرے خدّ و خال

ہر داغِ دل سے دل میں چراغاں کِیا گیا

بدلا تھا تُو نے خُود مِرا مفہومِ زندگی

اب خُود ہی کہہ رَہا ہے کہ احساں کِیا گیا

اِظہارِ عشق کیا ہے، تقاضائے حُسن ہے

خُود اُس طَرَف سے دِید کا ساماں کِیا گیا

ضامنؔ نے اِنتباہِ مسلسل کے باوجود

پِھر سچ کہا تَو داخلِ زنداں کِیا گیا

ضامن جعفری

منظر وہ ابھی تم نے مری جاں! نہیں دیکھا

فروری 28, 2017ماجد صدیقی،سخناب،غزلفراواں،لرزاں،افشاں،جاں،خواں،زنداں،سلیماںadmin

ماجد صدیقی ۔ غزل نمبر 5

ہوتے ہیں بدن کیسے گلستاں، نہیں دیکھا

منظر وہ ابھی تم نے مری جاں! نہیں دیکھا

ہم صبح ومساجان بہ لب حبسِ چمن سے

اور ہم پہ عتاب اُن کو کہ زنداں نہیں دیکھا

جس شاخ کو تھی راس نہ جنبش بھی ہَوا کی

پھل جب سے لُٹے پھر اُسے لرزاں نہیں دیکھا

چھلکا ہے جو آنکھوں سے شبِ جور میں اب کے

ایسا تو کبھی رنجِ فراواں نہیں دیکھا

مدّاح وہی اُس کے سکوں کا ہے کہ جس نے

مہتاب سرِغرب پر افشاں نہیں دیکھا

جب تک ہے تصّرف میں فضا اُس کے بدن کی

ہم کیوں یہ کہیں تختِ سلیماں نہیں دیکھا

دیوار کے کانوں سے ڈرا لگتا ہے شاید

ماجدؔ کو کئی دن سے غزل خواں نہیں دیکھا

ماجد صدیقی

سر بہ زانو ہے کوئی سر بہ گریباں جاناں

نومبر 4, 2015احمد فراز،شعراء،غزلہجراں،ہراساں،گریباں،پریشاں،جاناں،زنداں،عنواںadmin

احمد فراز ۔ غزل نمبر 56

اب کے کچھ ایسی سجی محفل یاراں جاناں

سر بہ زانو ہے کوئی سر بہ گریباں جاناں

ہم بھی کیا سادہ تھے ہم نے بھی سمجھ رکھا تھا

غم دوراں سے جدا ہے غم جاناں جاناں

ہر کوئی اپنی ہی آواز سے کانپ اٹھتا ہے

ہر کوئی اپنے ہی سائے سے ہراساں جاناں

جس کو دیکھو وہی زنجیر بہ پا لگتا ہے

شہر کا شہر ہوا داخل زنداں جاناں

اب ترا ذکر بھی شاید ہی غزل میں آئے

اور سے اور ہوئے درد کے عنواں جاناں

ہم کہ روٹھی ہوئی رت کو بھی منا لیتے تھے

ہم نے دیکھا ہی نہ تھا موسم ہجراں جاناں

ہوش آیا تو سبھی خواب تھے ریزہ ریزہ

جیسے اڑتے ہوئے اوراق پریشاں جاناں

احمد فراز

کافر لگے ہوئے ہیں مسلماں کے ساتھ ساتھ

اکتوبر 25, 2015قمر جلالوی،شعراء،غزلمسلماں،گلستاں،گریباں،انساں،تاباں،دوراں،درباں،زنداں،طوفاں،عریاںadmin

قمر جلالوی ۔ غزل نمبر 84

گیسو ہیں ان کے عارضِ تاباں کے ساتھ ساتھ

کافر لگے ہوئے ہیں مسلماں کے ساتھ ساتھ

سامان خاک آیا تھا انساں کے ساتھ ساتھ

صرف ایک روح تھی تنِ عریاں کے ساتھ ساتھ

اے ناخدا وہ حکمِ خدا تھا جو بچ گئی

کشتی کو اب تو چھوڑ دے دے طوفاں کے ساتھ ساتھ

اے باغباں گلوں پہ ہی بجلی نہیں گری

ہم بھی لٹے ہیں تیرے گلستاں کے ساتھ ساتھ

جب لطف ہو جنوں تو کہیں زنداں سے لے اڑے

وہ ڈھونڈتے پھریں مجھے درباں کے ساتھ ساتھ

دو چار ٹانکے اور لگے ہاتھ بخیر گر

دامن بھی کچھ پھٹا ہے گریباں کے ساتھ ساتھ

تم میرا خوں چھپا تو رہے ہو خبر بھی ہے

دو دو فرشتے رہتے ہیں انساں کے ساتھ ساتھ

اہلِ قفس کا اور تو کچھ بس نہ چل سکا

آہیں بھریں نسیمِ گلستاں کے ساتھ ساتھ

دیوانے شاد ہیں کہ وہ آئے ہیں دیکھنے

تقدیر کھل گئے درِ زنداں کے ساتھ ساتھ

واعظ مٹے گا تجھ سے غمِ روزگار کیا

ساغر چلے گا گردشِ دوراں کے ساتھ ساتھ

اک شمع کیا کوئی شبِ فرقت نہیں قمر

تارے بھی چھپ گئے ہیں مہِ تاباں کے ساتھ ساتھ

قمر جلالوی

میں ہوں وہ قطرۂ شبنم کہ ہو خارِ بیاباں پر

اکتوبر 8, 2015مرزا اسد اللہ خان غالب،اساتذہ،غزلگلِستاں،گریباں،بیاباں،داں،دبستاں،زنداں،شہیداں،عنواںadmin

دیوانِ غالب ۔ غزل نمبر 122

لرزتا ہے مرا دل زحمتِ مہرِ درخشاں پر

میں ہوں وہ قطرۂ شبنم کہ ہو خارِ بیاباں پر

نہ چھوڑی حضرتِ یوسف نے یاں بھی خانہ آرائی

سفیدی دیدۂ یعقوب کی پھرتی ہے زنداں پر

فنا "تعلیمِ درسِ بے خودی” ہوں اُس زمانے سے

کہ مجنوں لام الف لکھتا تھا دیوارِ دبستاں پر

فراغت کس قدر رہتی مجھے تشویش مرہم سے

بہم گر صلح کرتے پارہ ہائے دل نمک داں پر

نہیں اقلیم الفت میں کوئی طومارِ ناز ایسا

کہ پشتِ چشم سے جس کی نہ ہووے مُہر عنواں پر

مجھے اب دیکھ کر ابرِ شفق آلودہ یاد آیا

کہ فرقت میں تری آتش برستی تھی گلِستاں پر

بجُز پروازِ شوقِ ناز کیا باقی رہا ہو گا

قیامت اِک ہوائے تند ہے خاکِ شہیداں پر

نہ لڑ ناصح سے، غالب، کیا ہوا گر اس نے شدّت کی

ہمارا بھی تو آخر زور چلتا ہے گریباں پر

مرزا اسد اللہ خان غالب

رازِ مکتوب بہ بے ربطئِ عنواں سمجھا

اکتوبر 8, 2015مرزا اسد اللہ خان غالب،اساتذہ،غزلمسلماں،گریباں،آساں،حیراں،زنداں،سوزاں،شبستان،عنواںadmin

دیوانِ غالب ۔ غزل نمبر 102

وہ میری چینِ جبیں سے غمِ پنہاں سمجھا

رازِ مکتوب بہ بے ربطئِ عنواں سمجھا

یک الِف بیش نہیں صقیلِ آئینہ ہنوز

چاک کرتا ہوں میں جب سے کہ گریباں سمجھا

شرحِ اسبابِ گرفتارئِ خاطر مت پوچھ

اس قدر تنگ ہوا دل کہ میں زنداں سمجھا

بدگمانی نے نہ چاہا اسے سرگرمِ خرام

رخ پہ ہر قطرہ عرق دیدۂ حیراں سمجھا

عجزسے اپنے یہ جانا کہ وہ بد خو ہو گا

نبضِ خس سے تپشِ شعلۂ سوزاں سمجھا

سفرِ عشق میں کی ضعف نے راحت طلبی

ہر قدم سائے کو میں اپنے شبستان سمجھا

تھا گریزاں مژۂ یار سے دل تا دمِ مرگ

دفعِ پیکانِ قضا اِس قدر آساں سمجھا

دل دیا جان کے کیوں اس کو وفادار، اسدؔ

غلطی کی کہ جو کافر کو مسلماں سمجھا

مرزا اسد اللہ خان غالب

وہ اک گلدستہ ہے ہم بیخودوں کے طاقِ نسیاں کا

اکتوبر 8, 2015مرزا اسد اللہ خان غالب،اساتذہ،غزلمژگاں،مرجاں،نَیَستاں،چراغاں،نسیاں،پریشاں،دہقاں،درباں،زنداں،شبنمستاں،غریباںadmin

دیوانِ غالب ۔ غزل نمبر 79

ستایش گر ہے زاہد ، اس قدر جس باغِ رضواں کا

وہ اک گلدستہ ہے ہم بیخودوں کے طاقِ نسیاں کا

بیاں کیا کیجئے بیدادِکاوش ہائے مژگاں کا

کہ ہر یک قطرہء خوں دانہ ہے تسبیحِ مرجاں کا

نہ آئی سطوتِ قاتل بھی مانع ، میرے نالوں کو

لیا دانتوں میں جو تنکا ، ہوا ریشہ نَیَستاں کا

دکھاؤں گا تماشہ ، دی اگر فرصت زمانے نے

مِرا ہر داغِ دل ، اِک تخم ہے سروِ چراغاں کا

کیا آئینہ خانے کا وہ نقشہ تیرے جلوے نے

کرے جو پرتوِ خُورشید عالم شبنمستاں کا

مری تعمیر میں مُضمر ہے اک صورت خرابی کی

ہیولٰی برقِ خرمن کا ، ہے خونِ گرم دہقاں کا

اُگا ہے گھر میں ہر سُو سبزہ ، ویرانی تماشہ کر

مدار اب کھودنے پر گھاس کے ہے، میرے درباں کا

خموشی میں نہاں ، خوں گشتہ@ لاکھوں آرزوئیں ہیں

چراغِ مُردہ ہوں ، میں بے زباں ، گورِ غریباں کا

ہنوز اک "پرتوِ نقشِ خیالِ یار” باقی ہے

دلِ افسردہ ، گویا، حجرہ ہے یوسف کے زنداں کا

نہیں معلوم ، کس کس کا لہو پانی ہوا ہو گا

قیامت ہے سرشک آلودہ ہونا تیری مژگاں کا

نظر میں ہے ہماری جادۂ راہِ فنا غالب

کہ یہ شیرازہ ہے عالَم کے اجزائے پریشاں کا

نسخۂ حسرت موہانی میں ’سرگشتہ‘

مرزا اسد اللہ خان غالب

کوئی دلچسپی، کوئی ربطِ دل و جاں جاناں

دسمبر 1, 2007منصور آفاق،شعراء،غزلہجراں،فروزاں،ہراساں،مہماں،مژگاں،نمکداں،نمایاں،ناداں،چراغاں،گلستاں،گریباں،گریزاں،پیماں،پریشاں،انساں،احساں،بیاباں،جاں،حیراں،دبستاں،درخشاں،زنداں،ساماں،شبستاں،طوفاں،عنواں،عریاںadmin

منصور آفاق ۔ غزل نمبر 266

صحبتِ قوسِ قزح کا کوئی امکاں جاناں

کوئی دلچسپی، کوئی ربطِ دل و جاں جاناں

میرے اندازِ ملاقات پہ ناراض نہ ہو

مجھ پہ گزرا ہے ابھی موسمِ ہجراں جاناں

جو مرے نام کو دنیا میں لیے پھرتے ہیں

تیری بخشش ہیں یہ اوراقِ پریشاں جاناں

آ مرے درد کے پہلو میں دھڑک کہ مجھ میں

بجھتی جاتی ہے تری یادِ فروزاں جاناں

تیری کھڑکی کہ کئی دن سے مقفل مجھ پر

جیسے کھلتا نہیں دروازئہ زنداں جاناں

تیری گلیاں ہیں ترا شہر ہے تیرا کوچہ

میں ، مرے ساتھ ترا وعدہ و پیماں جاناں

پھر کوئی نظم لٹکتی ہے ترے کعبہ پر

پھر مرے صبر کی بے چارگی عنواں جاناں

ہجر کا ایک تعلق ہے اسے رہنے دے

میرے پہلو میں تری یاد ہراساں جاناں

ہم فرشتوں کی طرح گھر میں نہیں رہ سکتے

ہاں ضروری ہے بہت رشتہء انساں جاناں

زخم آیا تھا کسی اور کی جانب سے مگر

میں نے جو غور کیا تیرا تھا احساں جاناں

اس تعلق میں کئی موڑ بڑے نازک ہیں

اور ہم دونوں ابھی تھوڑے سے ناداں جاناں

دشت میں بھی مجھے خوشبو سے معطر رکھے

دائم آباد رہے تیرا گلستاں جاناں

ویسا الماری میں لٹکا ہے عروسی ملبوس

بس اسی طرح پڑا ہے ترا ساماں جاناں

مجھ کو غالب نے کہا رات فلک سے آ کر

تم بھی تصویر کے پردے میں ہو عریاں جاناں

وہ جو رُوٹھی ہوئی رت کو بھی منا لیتے ہیں

بس وہی شعرِ فراز اپنا دبستاں جاناں

روشنی دل کی پہنچ پائی نہ گھر تک تیرے

میں نے پلکوں پہ کیا کتنا چراغاں جاناں

کیا کہوں ہجر کہاں وصل کہاں ہے مجھ میں

ایک جیسے ہیں یہاں شہر و بیاباں جاناں

چھت پہ چڑھ کے میں تمہیں دیکھ لیا کرتا تھا

تم نظر آتی تھی بچپن سے نمایاں جاناں

اک ذرا ٹھہر کہ منظر کو گرفتار کروں

کیمرہ لائے ابھی دیدئہ حیراں جاناں

مانگ کر لائے ہیں آنسو مری چشمِ نم سے

یہ جو بادل ہیں ترے شہر کے مہماں جاناں

لڑکیاں فین ہیں میری انہیں دشنام نہ دے

تتلیاں پھول سے کیسے ہوں گریزاں جاناں

آگ سے لختِ جگر اترے ہیں تازہ تازہ

خانہء دل میں ہے پھر دعوتِ مژگاں جاناں

زخم در زخم لگیں دل کی نمائش گاہیں

اور ہر ہاتھ میں ہے ایک نمکداں جاناں

تھم نہیں سکتے بجز تیرے کرم کے، مجھ میں

کروٹیں لیتے ہوئے درد کے طوفاں جاناں

بلب جلتے رہیں نیلاہٹیں پھیلاتے ہوئے

میرے کمرے میں رہے تیرا شبستاں جاناں

رات ہوتے ہی اترتا ہے نظر پر میری

تیری کھڑکی سے کوئی مہرِ درخشاں جاناں

تُو کہیں بستر کمخواب پہ لیٹی ہو گی

پھر رہا ہوں میں کہیں چاک گریباں جاناں

نذرِ احمد فراز

منصور آفاق

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: زنداں

زخموں کی طرح سِینہِ سوزاں میں رہے پُھول

دیوانوں کی تکراروں سے، خاموشیِ بیاباں ٹوٹ گئی

داغِ جگر کو رشکِ گُلستاں بنا دیا

یاد کیا تجھ کو دلائیں ترا پیماں جاناں

اچّھا یہ میرے درد کا درماں کِیا گیا

منظر وہ ابھی تم نے مری جاں! نہیں دیکھا

سر بہ زانو ہے کوئی سر بہ گریباں جاناں

کافر لگے ہوئے ہیں مسلماں کے ساتھ ساتھ

میں ہوں وہ قطرۂ شبنم کہ ہو خارِ بیاباں پر

رازِ مکتوب بہ بے ربطئِ عنواں سمجھا

وہ اک گلدستہ ہے ہم بیخودوں کے طاقِ نسیاں کا

کوئی دلچسپی، کوئی ربطِ دل و جاں جاناں

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: