ٹیگ کے محفوظات: روانہ

تباہی پر مری راضی زمانہ ہو گیا ہے

مئی 20, 2021ضامن جعفری،غزلٹھکانہ،بہانہ،دوانہ،دانہ،روانہ،زمانہ،شانہadmin

یہ سمجھو ختم اب سارا فسانہ ہو گیا ہے

تباہی پر مری راضی زمانہ ہو گیا ہے

یہ سادہ لَوح و ناداں لوگ تیری انجمن کے

بہت خوش ہیں ، چَلو! کوئی ٹھِکانہ ہو گیا ہے

وہ حفظِ ما تَقَدُّم میں کرے گا قتل سب کو

اُسے حاصل نیا اب یہ بَہانہ ہو گیا ہے

جنابِ دل! کسی اب اَور ہی کوچے کو چَلئے

یہاں پر ختم اپنا آب و دانہ ہو گیا ہے

نہ جانے کیوں کبھی بَنتی نہیں حُسن و خِرَد میں

وہاں جو بھی گیا جا کر دِوانہ ہو گیا ہے

پریشاں بھی بہت ہے اَور کچھ اُلجھی ہُوئی بھی

تنازُع کوئی بَینِ زلف و شانہ ہو گیا ہے

ذرا ٹھیَرو! مسیحا کا پیام آیا ہے، ضامنؔ!

ہُوئی تاخیر لیکن اب روانہ ہو گیا ہے

ضامن جعفری

حسن خود محوِ تماشا ہو گا

اگست 4, 2018ناصر کاظمی،برگِ نے،غزلہویدا،لرزا،وا،کیا،گویا،آرا،اترا،بینا،برپا،برسا،بسیرا،تماشا،تنہا،دیکھا،روانہ،سا،عنقاadmin

عشق جب زمزمہ پیرا ہو گا

حسن خود محوِ تماشا ہو گا

سن کے آوازۂ زنجیرِ صبا

قفسِ غنچہ کا در وا ہو گا

جرسِ شوق اگر ساتھ رہی

ہر نفس شہپرِ عنقا ہو گا

دائم آباد رہے گی دُنیا

ہم نہ ہوں گے کوئی ہم سا ہو گا

کون دیکھے گا طلوعِ خورشید

ذرّہ جب دیدۂ بینا ہو گا

ہم تجھے بھول کے خوش بیٹھے ہیں

ہم سا بیدرد کوئی کیا ہو گا

پھر سلگنے لگا صحرائے خیال

ابر گھر کر کہیں برسا ہو گا

پھر کسی دھیان کے صد راہے پر

دلِ حیرت زدہ تنہا ہو گا

پھر کسی صبحِ طرب کا جادو

پردۂ شب سے ہویدا ہو گا

گل زمینوں کے خنک رَمنوں میں

جشنِ رامش گری برپا ہو گا

پھر نئی رُت کا اشارہ پا کر

وہ سمن بو چمن آرا ہو گا

گلِ شب تاب کی خوشبو لے کر

ابلقِ صبح روانہ ہو گا

پھر سرِ شاخِ شعاعِ خورشید

نکہتِ گل کا بسیرا ہو گا

اک صدا سنگ میں تڑپی ہو گی

اک شرر پھول میں لرزا ہو گا

تجھ کو ہر پھول میں عریاں سوتے

چاندنی رات نے دیکھا ہو گا

دیکھ کر آئینۂ آبِ رواں

پتہ پتہ لبِ گویا ہو گا

شام سے سوچ رہا ہوں ناصر

چاند کس شہر میں اُترا ہو گا

ناصر کاظمی

وہ سنہری زمانہ ہوتا ہے

جولائی 24, 2018چمن کوئی بھی ہو،باصر کاظمی،غزلنہ،ٹھکانہ،آشیانہ،خزانہ،دانہ،روانہ،زمانہadmin

طَور جب عاشقانہ ہوتا ہے

وہ سنہری زمانہ ہوتا ہے

کچھ نہیں جن کے پاس اُن کے پاس

خواہشوں کا خزانہ ہوتا ہے

دل کسی کا کسی کے کہنے سے

کبھی پہلے ہوا نہ ہوتا ہے

بجلیوں کا ہدف نجانے کیوں

ایک ہی آشیانہ ہوتا ہے

غم نہیں اب جو ہم ہیں غیر فعال

اپنا اپنا زمانہ ہوتا ہے

دیکھتے ہیں تمہاری بستی میں

کب تلک آب و دانہ ہوتا ہے

دوستو کر لیا بہت آرام

کارواں اب روانہ ہوتا ہے

ڈھونڈتے ہیں جو آپ باصرِؔ کو

اُس کا کوئی ٹھکانہ ہوتا ہے

باصر کاظمی

طپش کی یاں تئیں دل نے کہ درد شانہ ہوا

اکتوبر 6, 2015میر تقی میر،اساتذہ،غزلنہ،تازیانہ،روانہ،زمانہ،شانہadmin

دیوان اول غزل 114

جدا جو پہلو سے وہ دلبر یگانہ ہوا

طپش کی یاں تئیں دل نے کہ درد شانہ ہوا

جہاں کو فتنے سے خالی کبھو نہیں پایا

ہمارے وقت میں تو آفت زمانہ ہوا

خلش نہیں کسو خواہش کی رات سے شاید

سرشک یاس کے پردے میں دل روانہ ہوا

ہم اپنے دل کی چلے دل ہی میں لیے یاں سے

ہزار حیف سر حرف اس سے وا نہ ہوا

کھلا نشے میں جو پگڑی کا پیچ اس کی میر

سمند ناز پہ ایک اور تازیانہ ہوا

میر تقی میر

تو اُس کے نام نقدِ جاں روانہ کیوں نہیں کرتا

نومبر 14, 2013آفتاب اقبال شمیممنصفانہ،ٹھکانہ،بہانہ،باغیانہ،دوستانہ،روانہadmin

آفتاب اقبال شمیم ۔ غزل نمبر 3

تہی اپنا یہ بے بخشش خزانہ کیوں نہیں کرتا

تو اُس کے نام نقدِ جاں روانہ کیوں نہیں کرتا

تجھے اے گوشہ گیرِ ذات! جو تجھ سے رہائی دے

کوئی اقدام ایسا باغیانہ کیوں نہیں کرتا

ہمیں کیا ہوتا، ہم آئے یہاں تیرے بُلانے پر

تو پھر ہم سے سلوکِ دوستانہ کیوں نہیں کرتا

سلگتے جسم سے شاید پرِ شعلہ نکل آئے

ہوا کے راستے میں تو ٹھکانہ کیوں نہیں کرتا

رہیں گے کب تلک ہونے نہ ہونے کے تذبذب میں

ہمارا فیصلہ وُہ منصفانہ کیوں نہیں کرتا

نظر آتا ہے لیکن دیکھنے میں ہے زیاں اپنا

تو ایسے میں تغافل کا بہانہ کیوں نہیں کرتا

آفتاب اقبال شمیم

سب کچھ بس اک نگاہِ کرم کا بہانہ تھا

مارچ 3, 2012مجید امجد،امروز،غزلمسکرانا،نہ،گرانہ،آزمانا،بہانہ،خزانہ،روانہ،زمانہ،سہاناadmin

مجید امجد ۔ غزل نمبر 7

کیا کہیے کیا حجابِ حیا کا فسانہ تھا!

سب کچھ بس اک نگاہِ کرم کا بہانہ تھا

دیکھا تو ہرتبسمِ لب والہانہ تھا

پرکھا تو ایک حیلۂ صنعت گرانہ تھا

دنیا، امیدِ دید کی دنیا تھی دیدنی

دیوار و در اداس تھے، موسم سہانا تھا

ہائے وہ ایک شام کہ جب مست، نَے بلب

میں جگنوؤں کے دیس میں تنہا روانہ تھا

یہ کون ادھر سے گزرا، میں سمجھا حضور تھے

اِک موڑ اور مڑ کے جو دیکھا، زمانہ تھا

اک چہرہ، اس پہ لاکھ سخن تاب رنگتیں

اے جرأتِ نگہ، تری قسمت میں کیا نہ تھا

ان آنسوؤں کی رو میں نہ تھی موتیوں کی کھیپ

ناداں سمندروں کی تہوں میں خزانہ تھا

اےغم، انیسِ دل، یہ تری دلنوازیاں

ہم کو تری خوشی کے لیے مسکرانا تھا

اک طرفہ کیفیت، نہ توجہ نہ بےرخی

میرے جنونِ دید کو یوں آزمانا تھا

ہائے وہ دھڑکنوں سے بھری ساعتیں مجید

میں ان کو دیکھتا تھا، کوئی دیکھتا نہ تھا

مجید امجد

تمہارا ذکر رہا یا مرا فسانہ رہا

مارچ 1, 2012مجید امجد،شبِ رفتہ،غزلفسانہ،قلندرانہ،نہ،آشیانہ،روانہ،زمانہadmin

مجید امجد ۔ غزل نمبر 60

کوئی بھی دَور سرِ محفلِ زمانہ رہا

تمہارا ذکر رہا یا مرا فسانہ رہا

مرے نشانِ قدم دشتِ غم پہ ثبت رہے

اَبد کی لوح پہ تقدیر کا لکھا نہ رہا

وہ کوئی کنجِ سمن پوش تھا کہ تودۂ خس

اک آشیانہ بہرحال آشیانہ رہا

تم اک جزیرۂ دل میں سمٹ کے بیٹھ رہے

مری نگاہ میں طوفانِ صد زمانہ رہا

طلوعِ صبح کہاں، ہم طلوع ہوتے گئے

ہمارا قافلۂ بے درا روانہ رہا

یہ پیچ پیچ بھنور، اس کی اک گرہ تو کھلی

کوئی تڑپتا سفینہ رہا رہا نہ رہا

نہ شاخ گل پہ نشیمن نہ رازِ گل کی خبر

وہ کیا رہا جو جہاں میں قلندرانہ رہا

?1952

مجید امجد

اسے گلے سے لگائے زمانہ ہو گیا ہے

جنوری 14, 2012عرفان صدیقی،غزلفسانہ،نشانہ،بہانہ،دوانہ،روانہ،زمانہadmin

عرفان صدیقی ۔ غزل نمبر 325

بدن میں جیسے لہو تازیانہ ہو گیا ہے

اسے گلے سے لگائے زمانہ ہو گیا ہے

چمک رہا ہے افق تک غبارِ تیرہ شبی

کوئی چراغ سفر پر روانہ ہو گیا ہے

ہمیں تو خیر بکھرنا ہی تھا کبھی نہ کبھی

ہوائے تازہ کا جھونکا بہانہ ہو گیا ہے

غرض کہ پوچھتے کیا ہو مآلِ سوختگاں

تمام جلنا جلانا فسانہ ہو گیا ہے

فضائے شوق میں اس کی بساط ہی کیا تھی

پرند اپنے پروں کا نشانہ ہو گیا ہے

کسی نے دیکھے ہیں پت جھڑ میں پھول کھلتے ہوئے

دل اپنی خوش نظری میں دوانہ ہو گیا ہے

عرفان صدیقی

کچھ کم سماعتوں کو سنانا بھی ہوتا ہے

جنوری 13, 2012عرفان صدیقی،غزلنشانا،ٹھکانا،آنا،خزانا،روانہ،سناناadmin

عرفان صدیقی ۔ غزل نمبر 312

کچھ تو فغاں کا خیر بہانا بھی ہوتا ہے

کچھ کم سماعتوں کو سنانا بھی ہوتا ہے

دیکھو ہمارے چاک گریباں پہ خوش نہ ہو

یہ ہے جنوں اور اس کا نشانا بھی ہوتا ہے

آزادگاں کو خانہ خرابی کا کیا ملال

کیا موج گل کا کوئی ٹھکانا بھی ہوتا ہے

ہم اس جگہ میں خوش ہیں کہ ایسے خرابوں میں

سانپوں کے ساتھ ساتھ خزانا بھی ہوتا ہے

میں کیوں ڈروں کہ جان سے جاتا ہوں ایک بار

دشمن کو میرے لوٹ کے آنا بھی ہوتا ہے

اب آپ لوگ سود و زیاں سوچتے رہیں

بندہ تو چوتھی سمت روانہ بھی ہوتا ہے

عرفان صدیقی

چراغ لمبے سفر پر روانہ ہوتا ہوا

جنوری 2, 2012عرفان صدیقی،غزلیگانہ،بیکرانہ،روانہ،زمانہ،شامیانہadmin

عرفان صدیقی ۔ غزل نمبر 27

تمام جلنا جلانا فسانہ ہوتا ہوا

چراغ لمبے سفر پر روانہ ہوتا ہوا

عجب گداز پرندے بدن میں اڑتے ہوئے

اسے گلے سے لگائے زمانہ ہوتا ہوا

ہری زمین سلگنے لگی تو راز کھلا

کہ جل گیا وہ شجر شامیانہ ہوتا ہوا

نظر میں ٹھہری ہوئی ایک روشنی کی لکیر

افق پہ سایۂ شب بیکرانہ ہوتا ہوا

رقابتیں مرا عہدہ بحال کرتی ہوئی

میں جان دینے کے فن میں یگانہ ہوتا ہوا

عرفان صدیقی

میں موت کی طرف ہوں روانہ بھی اپنے آپ

دسمبر 1, 2007منصور آفاق،شعراء،غزلفسانہ،مانا،گھمانا،پرانا،جانا،خانہ،روانہadmin

منصور آفاق ۔ غزل نمبر 248

گزرا ہے مجھ میں ایک زمانہ بھی اپنے آپ

میں موت کی طرف ہوں روانہ بھی اپنے آپ

بے شکل صورتوں کا ٹھکانا بھی اپنے آپ

بننے لگا ہے آئینہ خانہ بھی اپنے آپ

جب دھوپ سے ہنسی ترے آنچل کی شوخ تار

روٹھا بھی اپنے آپ میں ، مانا بھی اپنے آپ

جاری ہے جس کے مرکزی کردار کی تلاش

لوگوں نے لکھ دیا وہ فسانہ بھی اپنے آپ

صرفِ نظر بھی آپ کیا بزم میں مگر

اس دلنواز شخص نے جانا بھی اپنے آپ

کتنا ابھی ابھی تر و تازہ تھا شاخ پر

یہ کیا کہ ہو گیا ہے پرانا بھی اپنے آپ

منصور کائنات کا ہم رقص کون ہے

یہ گھومنا بھی اور گھمانا بھی اپنے آپ

منصور آفاق

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: روانہ

تباہی پر مری راضی زمانہ ہو گیا ہے

حسن خود محوِ تماشا ہو گا

وہ سنہری زمانہ ہوتا ہے

طپش کی یاں تئیں دل نے کہ درد شانہ ہوا

تو اُس کے نام نقدِ جاں روانہ کیوں نہیں کرتا

سب کچھ بس اک نگاہِ کرم کا بہانہ تھا

تمہارا ذکر رہا یا مرا فسانہ رہا

اسے گلے سے لگائے زمانہ ہو گیا ہے

کچھ کم سماعتوں کو سنانا بھی ہوتا ہے

چراغ لمبے سفر پر روانہ ہوتا ہوا

میں موت کی طرف ہوں روانہ بھی اپنے آپ

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: