ٹیگ کے محفوظات: رستا

وہ اگر ٹُوٹ کے بِکھرا ہو گا

مئی 20, 2021ضامن جعفری،غزلہمارا،کیا،ٹکڑا،آتا،اترا،بکھرا،رستاadmin

کیسے اپنے کو سَمیٹا ہو گا

وہ اگر ٹُوٹ کے بِکھرا ہو گا

ایک رَٹ دل نے لگا رکّھی ہے

"چاند کس شہر میں اُترا ہو گا”

نئی دولت جو یہ ہاتھ آئی ہے

میرے دل کا کوئی ٹکڑا ہو گا!

چاند تاروں کو ہَٹا دے کوئی

یہ مری آہ کا رَستا ہو گا

دولتِ غم ہے تمہارے دم سے

تم نہیں ہو گے تو پھر کیا ہو گا

اب ہیں اہداف خلوص اور وفا

اب ہر اِک زخم ہمارا ہو گا

زندگی رہنِ گماں ہے ضامنؔ

وہ مجھے دیکھنے آتا ہو گا

ضامن جعفری

خود سے ملتا ہوں تو پھر کھُل کے برستا ہوں میں

مئی 20, 2021ضامن جعفری،غزلمچلتا،کرتا،اترتا،برستا،تڑپتا،ترستا،رستا،سمجھتاadmin

انجمن ہو تو بہت بولتا ہنستا ہوں میں

خود سے ملتا ہوں تو پھر کھُل کے برستا ہوں میں

دیکھتا رہتا ہوں ملنے کو تَرَستا ہوں میں

یوں گذر جاتے ہو جیسے کوئی رَستا ہوں میں

خواہشِ وصل ہو پہنے ہُوئے پیراہنِ عشق

اِس کو اِخلاص کی تَضحیک سمجھتا ہوں میں

بوالہوس چیَن سے رہتے ہیں خزاں ہو کہ بہار

بوئے گل، بادِ صبا، سب کو تَرَستا ہوں میں

حُسن نے لمس کو معراجِ محبت جانا

ایسے معیار پہ کب پورا اُترتا ہوں میں

عشق دائم ہے اگر وصل کا پابند نہ ہو

جھومتا اَور ہے دل جتنا تڑپتا ہوں میں

حُسن کو ساری روایات سے باغی کردوں

اِس کی تدبیر کوئی دیکھئے کرتا ہوں میں

وہ تو یہ کہیے جنوں میرا مرے کام آیا

پھر بہلتا نہیں ضامنؔ جو مچلتا ہوں میں

ضامن جعفری

اگر ستارہ نہیں کوئی اشک پارا دے

جولائی 24, 2018موجِ خیال،باصر کاظمی،غزللوٹا،چونکا،پارا،دنیا،رستاadmin

ترس گئی مری بینائی کچھ اجالا دے

اگر ستارہ نہیں کوئی اشک پارا دے

شبِ سیاہ مجھے انتظارِ صبح نہیں

جو ہو سکے تو مرا چاند مجھ کو لوٹا دے

جو درد حاصلِ ہستی تھا وہ تو چھین لیا

اب اُس کے بدلے میں تو چاہے ساری دنیا دے

بلا رہا ہے وہ خوابوں کے چاند سے مجھ کو

ردائے تیرگی ہٹ سامنے سے رستا دے

کیا ہے تلخی دوراں نے اِس قدر بے حس

کوئی خبر نہیں ایسی جو مجھ کو چونکا دے

باصر کاظمی

جو ہو رہا ہے کچھ اس پر بھی تم نے سوچا ہے

جولائی 24, 2018موجِ خیال،باصر کاظمی،غزلکا،ٹکڑا،پکارا،جاگا،دھڑکتا،رستا،سوچاadmin

وہ ہو رہے گا بالآخر جو ہونے والا ہے

جو ہو رہا ہے کچھ اس پر بھی تم نے سوچا ہے

افُق کی آنکھ میں پھیلی ہوئی ہے لالی سی

یہ آسمان کہاں ساری رات جاگا ہے

سنو کہ آج تمہیں یاد کے دریچوں سے

صدائے رفتہ نے اک بار پھر پکارا ہے

گزر نسیمِ سحر اِس چمن سے آہستہ

کہ پتا پتا بہاروں کے دل کا ٹکڑا ہے

بھٹکتے پھرتے ہیں ہم جس کی دُھن میں مدت سے

جو سوچیے تو وہ منزل بھی ایک رَستا ہے

مرے سفر میں کئی منزلیں پڑیں لیکن

تری گلی میں عجب طرح دل دھڑکتا ہے

وہ قافلہ تو کبھی کا گزر چکا باصرِؔ

کھڑے ہو راہ میں اب انتظار کس کا ہے

باصر کاظمی

آنے لگا ہوں میں بھی نظر کچھ آدھا سا

فروری 27, 2017ماجد صدیقی،سخناب،غزلکستا،آدھا،اجڑتا،بھیگا،جلتا،جھانسا،رستاadmin

ماجد صدیقی ۔ غزل نمبر 113

جب سے اُسے دیکھا ہے خود سے کھنچتا سا

آنے لگا ہوں میں بھی نظر کچھ آدھا سا

اُترا تھا جو کل تک ارضِ سماعت میں

آنکھوں سے وہ زہر لگے اب رِستا سا

پوچھتے کیا ہو حال مرا یہ جان ہے اور

ایک شکنجہ چاروں اور سے کستا سا

دشتِ نظر میں کب نت لوٹ کے آتا ہے

اُس کی دید کا موسم بھیگا بھیگا سا

کیا جانوں یہ جان سلگتی ہے کیونکر

پل پل دیکھوں خون رگوں میں جلتا سا

انت ملے کب جانے سُکھ کے سپنوں کو

جو پل آئے دے جائے اک جھانسا سا

ماجدؔ ریت جھنکی پھر اپنی آنکھوں میں

دیکھا ہے پھر منظر ایک اجڑتا سا

ماجد صدیقی

اُس پر کیا لکھا جانا ہے

فروری 27, 2017ماجد صدیقی،سخناب،غزلہوا،ہوتا،فرا،لہراتا،لیا،لیتا،لکھا،لگا،لگتا،لٹکا،ملا،ملتا،مکرا،مٹتا،چلا،نکلا،چکا،چھنتا،چبھتا،چتا،چرچا،ڈھلتا،ڈرتا،کہتا،کیا،کھلواتا،کھلا،کھڑا،کرتا،گیا،ٹوٹا،ٹھہرا،ٹپکا،ٹھٹکا،پیا،پڑا،پایا،آتا،الجھا،اچّھا،اڑا،اگا،اٹکا،اٹھتا،اپنا،بچھا،بنا،بکتا،بپا،بھرا،بھرتا،بانٹا،تلتا،جلتا،جیسا،جھڑتا،جھپٹا،جانا،خدا،دہرایا،دیکھا،دیا،دیتا،رہا،رکھا،رستہ،رستا،سہا،سیکھا،سا،سجاadmin

ماجد صدیقی ۔ غزل نمبر 160

کورا کاغذ سوچ رہا ہے

اُس پر کیا لکھا جانا ہے

نرخ نہیں گو ایک سے لیکن

ہر انسان یہاں بِکتا ہے

کون ہے گالی سُن کر جس کے

ہونٹوں سے امرت ٹپکا ہے

دشتِ طلب میں بِن کُتّوں کے

کس کے ہاتھ شکار لگا ہے

اپنی چال سلامت رکھنے

شیر ہرن پر ٹوٹ پڑا ہے

کُود کے جلتی آگ میں دیکھو

پروانہ گلزار بنا ہے

ٹھیک ہے گر بیٹا یہ سوچے

اُس نے باپ سے کیا پایا ہے

پکڑا جانے والا ہی کیوں

تنہا دم مجرم ٹھہرا ہے

جس نے بھی جاں بچتی دیکھی

تنکوں تک پر وہ اٹکا ہے

مجرم نے پچھلی پیشی پر

جو بھی کہا اُس سے مُکرا ہے

خالق اپنی خلق سے کھنچ کر

عرش پہ جانے کیا کرتا ہے

بہلانے مجھ بچّے کو وہ

جنت کا لالچ دیتا ہے

پیڑ زبانوں کو لٹکائے

دشت سے جانے کیا کہتا ہے

دیواروں سے ڈرتا ہو گا

کہنے والا کیوں ٹھٹکا ہے

موجِ الم نے کھول کے بازو

مجھ کو جیسے بھنچ لیا ہے

اُتنا ہی قد کاٹھ ہے اُس کا

جتنا جس کو ظرف ملا ہے

کس کو اَب لوٹانے جائیں

گردن میں جو طوق پڑا ہے

ٹہنی عاق کرے خود اُس کو

پھول وگرنہ کب جھڑتا ہے

جینے والا جانے کیونکر

موت کے در پر آن کھڑا ہے

صحرا کی بے درد ہوا نے

بادل کو کب رُکنے دیا ہے

دیکھوں اور بس دیکھو اُس کو

جانے اُس تصویر میں کیا ہے

کہنے کی باتیں ہیں ساری

زخمِ رگِ جاں کب بھرتا ہے

رُت کی خرمستی یہ جانے

پودا کیسے پیڑ بنا ہے

برق اور رعد کے لطف و کرم سے

گلشن کو کب فیض ملا ہے

لوٹایا اِک ڈنک میں سارا

سانپ نے جتنا دُودھ پیا ہے

ربط نہیں اُس سے اتنا بھی

شہر میں جتنا کچھ چرچا ہے

بند کلی چُپ رہنا اُس کا

لب کھولے تو پھولوں سا ہے

برگ و ثمر آنے سے پہلے

شاخ نے کیا کیا جبر سہا ہے

گُل برساتا ہے اوروں پر

وُہ جو زخم مجھے دیتا ہے

کوہِ قاف سے اِس جانب وہ

ڈھونڈوں بھی تو کب ملتا ہے

اُس کی دو رنگی مت پُوچھو

کالر پر جو پھول سجا ہے

رسّی کی شِشکار ہے پیچھے

کھیت کنارے جال بِچھا ہے

ڈس لیتا ہے سانپ جسے بھی

رَسّی تک سے وہ ڈرتا ہے

قبرپہ جل مرنے والے کی

ایک دیا اب تک جلتا ہے

بانس انار سے آنکھ ملائے

اپنی قامت ناپ رہا ہے

موسیٰ ہر فرعون کی خاطر

مشکل سے نت نت آتا ہے

سارے ہونٹ سلے ہیں پھر بھی

گلیوں میں اک حشر بپا ہے

دھڑکن دھرکن ساز جدا ہیں

کس نے کس کا دُکھ بانٹا ہے

کرنا آئے مکر جسے بھی

زر کے ساتھ وُہی تُلتا ہے

خون میں زہر نہیں اُترا تو

آنکھوں سے پھر کیا رِستا ہے

ہم اُس سے منہ موڑ نہ پائے

پیار سے جس نے بھی دیکھا ہے

کون ہے وہ جو محرومی کی

تہمت اپنے سر لیتا ہے

کھُلتی ہے ہر آنکھ اُسی پر

غنچہ جب سے پھول بنا ہے

انساں اپنا زور جتانے

چاند تلک پر جا نکلا ہے

دل نے پھر گُل کھِل اُٹھنے پر

نام کسی کا دہرایا ہے

وقت صفائی مانگ کے ہم سے

کاہے کو مُنہ کھُلواتا ہے

ہم شبنم کے قطروں پرہی

سورج داتا کیوں جھپٹا ہے

فصلِ سکوں پر بُغض یہ کس کا

مکڑی بن کر آ ٹوٹا ہے

دل تتلی کا پیچھا کرتے

کن کانٹوں میں جا اُلجھا ہے

زخم اگر بھر جائے بھی تو

نقش کہاں اُس کا مٹتا ہے

انجانوں سا مجھ سے وُہ پوچھے

اُس سے مرا دل مانگتا کیاہے

پھول جھڑیں یا پتے سُوکھیں

موسم نے یہ کب دیکھا ہے

اَب تو دل کی بات اٹھاتے

لفظ بھی چھلنی سے چھنتاہے

تجھ بن جو منظر بھی دیکھیں

آنکھ میں کانٹوں سا چُبھتا ہے

کانوں کے دَر کھُل جائیں تو

پتھر تک گویا لگتا ہے

آنکھوں کی اِس جھیل میں جانے

کون کنول سا لہراتا ہے

دور فلک پر کاہکشاں کا

رنگ ترے سپنوں جیسا ہے

گلشن والے کب جانیں یہ

پنجرے میں دن کب ڈھلتا ہے

صبح اُسی کے صحن میں اُتری

جس کا دامن چاک ملا ہے

جانے کس خرمن پر پہنچے

تابہ اُفق جو کھیت ہرا ہے

مَیں وہ غار تمّنا کا ہوں

سورج جس سے رُوٹھ گیا ہے

جانے کیا کیا زہر نہ پی کر

انساں نے جینا سیکھا ہے

بحر پہ پُورے چاند کے ہوتے

پانی کیوں ٹھہرا ٹھہرا ہے

وہ کب سایہ سینت کے رکھے

رستے میں جو پیڑ اُگا ہے

اُس کا حسن برابر ہو تو

حرف زباں پر کب آتا ہے

دیکھنے پر اُس آئنہ رُو کے

پھولوں کا بھی رنگ اُڑا ہے

پھل اُترا جس ٹہنی پر بھی

پتھر اُس پر آن پڑا ہے

کب اوراق پُرانے پلٹے

وُہ کہ مجھے جو بھول چکا ہے

اپنی اپنی قبر ہے سب کی

کون کسی کے ساتھ چلا ہے

اَب تو اُس تک جانے والا

گستاخی کا ہی رستہ ہے

اُونٹ چلے ڈھلوان پہ جیسے

ایسا ہی کچھ حال اپنا ہے

لُٹ کے کہے یہ شہد کی مکھی

محنت میں بھی کیا رکھا ہے

کس نے آتا دیکھ کے مجھ کو

بارش میں در بھینچ لیا ہے

اُس سے حرفِ محبت کہنے

ہم نے کیا کیا کچھ لکھا ہے

دامن سے اُس شوخ نے مجھ کو

گرد سمجھ کر جھاڑ دیا ہے

فرق ہے کیوں انسانوں میں جب

سانس کا رشتہ اِک جیسا ہے

فرصت ہی کب پاس کسی کے

کون رُلانے بھی آتا ہے

یادوں کے اک ایک ورق پر

وُہ کلیوں سا کھِل اُٹھتا ہے

شیر بھی صید ہُوا تو آخر

دیواروں پر آ لٹکا ہے

نُچنے سے اِک برگ کے دیکھو

پیڑ ابھی تک کانپ رہا ہے

ایک ذرا سی چنگاری نے

سارا جنگل پھونک دیا ہے

لفظ سے پاگل سا برتاؤ

ساگر ناؤ سے کرتا ہے

بہلا ہے دل درد سے جیسے

بچہ کانچ سے کھیل رہا ہے

کڑوے پھل دینے والے کا

رشتہ باغ سے کب ملتا ہے

خدشوں میں پلنے والوں نے

سوچا ہے جو، وُہی دیکھا ہے

اپنے اپنے انت کو پانے

جس کو دیکھو دوڑ رہا ہے

زور آور سبزے نے دیکھو

بادل سے حق مانگ لیا ہے

کس رُت کے چھننے سے جانے

صحنِ گلستاں دشت ہوا ہے

ہونٹ گواہی دیں نہ کچھ اُس کی

دل میں جتنا زہر بھرا ہے

لفظ کے تیشے سے ابھرے جو

زخم وہی گہرا ہوتا ہے

آنکھ ٹھہرتی ہے جس پر بھی

منظر وُہ چھالوں جیسا ہے

بن کر کالی رات وہ دیکھو

کّوا چڑیا پر جھپٹا ہے

جتنا اپنے ساتھ ہے کوئی

اُتنا اُس کے ساتھ خُدا ہے

اونچی کر دے لو زخموں کی

پرسش وُہ بے رحم چِتا ہے

ساکت کر دے جو قدموں کو

جیون وُہ آسیب ہُوا ہے

دشت تھا اُس کا ہجر پہ ہم نے

یہ صحرا بھی پاٹ لیا ہے

مجھ سے اُس کا ذکر نہ چھیڑو

وہ جیسا بھی ہے اچّھا ہے

ساتھ ہمارے ہے وہ جب سے

اور بھی اُس کا رنگ کھُلا ہے

شاہی بھی قربان ہو اُس پر

ماجدؔ کو جو فقر ملا ہے

ماجد صدیقی

کاش منزل سے بھی آگے کوئی رستا جاتا

نومبر 1, 2015احمد فراز،شعراء،غزلہنستا،برستا،ترستا،رستاadmin

احمد فراز ۔ غزل نمبر 4

ایک دیوانہ یہ کہتے ہوئے ہنستا جاتا

کاش منزل سے بھی آگے کوئی رستا جاتا

اے میرے ابر گریزاں مری آنکھوں کی طرح

گر برسنا ہی تجھے تھا تو برستا جاتا

آج تک یاد ہے اظہار محبت کا وہ پل

کہ مری بات کی لکنت پہ وہ ہنستا جاتا

اتنے محدود کرم سے تو تغافل بہتر

گر ترسنا ہی مجھے تھا تو ترستا جاتا

احمد فراز

آدم زاد خدا بن جائے

نومبر 16, 2013آفتاب اقبال شمیمنوحہ،نیا،خدا،دریا،رستا،سا،سزاadmin

آفتاب اقبال شمیم ۔ غزل نمبر 55

پل میں کیا سے کیا بن جائے

آدم زاد خدا بن جائے

ظرفِ نظر کم کر کے دیکھو

قطرہ بھی دریا بن جائے

مات زمانے بھر کی کھا کر

شاید وہ ہم سا بن جائے

تُو جانے اے طائر تنہا!

نغمہ کیوں نوحہ بن جائے

اثنا بھی بے آس نہ ہونا

جینا ایک سزا بن جائے

وقت کا بھید ملا ہو جس کو

عہد بہ عہد نیا بن جائے

بس اک پہل ضروری ہے

پھر خود ہی رستا بن جائے

آفتاب اقبال شمیم

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: رستا

وہ اگر ٹُوٹ کے بِکھرا ہو گا

خود سے ملتا ہوں تو پھر کھُل کے برستا ہوں میں

اگر ستارہ نہیں کوئی اشک پارا دے

جو ہو رہا ہے کچھ اس پر بھی تم نے سوچا ہے

آنے لگا ہوں میں بھی نظر کچھ آدھا سا

اُس پر کیا لکھا جانا ہے

کاش منزل سے بھی آگے کوئی رستا جاتا

آدم زاد خدا بن جائے

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: