ٹیگ کے محفوظات: رخی

خود سے ہی اپنی ہم سری کب تک

جون 1, 2021یاور ماجد،آنکھ بھر آسمان،غزلمبتدی،ندی،گونجتی،بھی،رخی،سری،صدیadmin

اتنا احساسِ کمتری کب تک

خود سے ہی اپنی ہم سری کب تک

چپ خزاؤں میں ٹوٹے پتوں کی

مرتی آواز گونجتی کب تک

بے رخی کا نہیں ہے کوئی گلہ

پر یہ نظروں کی یک رخی کب تک

درد کا پل ہے یا ہے ایک صدی

اور گزرے گی یہ صدی کب تک

کوئی دریا تو آئے رستے میں

بہتی جائے گی یہ ندی کب تک

اب تو چند ایک سانس باقی ہیں

اور وہ چند ایک بھی کب تک

مدرسے میں سخن کے سب استاد

ایک یاؔور ہی مبتدی!! کب تک؟

یاور ماجد

آنکھ بھر آسمان ۔ فہرست

جس کا ڈر تھا یہ وہ گھڑی ہے میاں

مئی 20, 2021ضامن جعفری،غزللی،گلی،گھڑی،گئی،آگہی،آدمی،ابتری،رہی،روشنی،رخیadmin

دل لگی، دل کو لگ گئی ہے میاں

جس کا ڈر تھا یہ وہ گھڑی ہے میاں

لوگ کیوں اِس قَدَر سکون سے ہیں ؟

بے حِسی ہے کہ بے رُخی ہے میاں؟

آ رہی ہے تپش مِرے دِل تَک

کیا کہیِں آگ لگ گئی ہے میاں ؟

ہنس رہے ہیں تمام دیوانے

جانے غفلت کہ آگَہی ہے میاں

حادثے نقش ہونا چاہتے ہیں

میری دہلیز دیکھ لی ہے میاں

ڈھونڈتا پھِر رہا ہے دشمن کو

جبکہ دشمن خود آدمی ہے میاں

ضامنؔ! اَللہ دے شفا تُم کو

تُم کو تَو کَربِ آگہی ہے میاں

سہل ہوتا تَو کہہ چکے ہوتے

جیسی بھی ہے گذر رہی ہے میاں

گُل کبھی ہو گیا تھا ایک چراغ

آج تک اُس کی روشنی ہے میاں

اِس مَرَض کا علاج کیسے ہو؟

ہر طرف ایک اَبتَری ہے میاں !

کوچہِ حُسن تَو نہیں یہ جگہ

دیکھی بھالی سی لگ رہی ہے میاں

کوئی پہچان جائے گا ضامنؔ

چُپ رہو یہ وہی گَلی ہے میاں

ضامن جعفری

حاصل ہمیں بھی فخر تری دوستی کا تھا

نومبر 30, 2016ہوا کا تخت،ماجد صدیقی،غزلکہی،تہی،تازگی،دوستی،رخیadmin

ماجد صدیقی ۔ غزل نمبر 68

چہرے یہ اشتہار سا اِک بے بسی کا تھا

حاصل ہمیں بھی فخر تری دوستی کا تھا

جیسے چمن سے موسمِ گُل روٹھنے لگے

منظر وہ کیا عجیب تری بے رُخی کا تھا

ہر بات پر ہماری تأمّل رہا اُسے

کھٹکا عجیب اُس کو کسی اَن کہی کا تھا

شکوہ ہی کیا ہو تجھ سے عدم ارتباط کا

ہم سے ترا سلوک ہی پہلو تہی کا تھا

نسبت کسی بھی ایک چمن سے نہ تھی ہمیں

ماجدؔ کچھ ایسا ذوق ہمیں تازگی کا تھا

ماجد صدیقی

وہ کون تھا جسے دیکھا نہیں کبھی میں نے

اکتوبر 23, 2015Jaun Elia،جون ایلیا،شعراء،غزللی،لکھی،کی،کبھی،پروری،تھی،جی،رکھی،رخی،سنیadmin

جون ایلیا ۔ غزل نمبر 184

گنوائی کس کی تمنا میں زندگی میں نے

وہ کون تھا جسے دیکھا نہیں کبھی میں نے

ترا خیال تو ہے پر ترا وجود نہیں

ترے لئے تو یہ محفل سجائی تھی میں نے

ترے عدم کو گوارا نہ تھا وجود مرا

سو اپنی بیخ کنی میں کمی نہ کی میں نے

ہیں تیری ذات سے منسوب صد فسانہ ءِ عشق

اور ایک سطر بھی اب تک نہیں لکھی میں نے

خود اپنے عشوہ و انداز کا شہید ہوں میں

خود اپنی ذات سے برتی ہے بے رخی میں نے

مرے حریف مری یکہ تازیوں پہ نثار

تمام عمر حلیفوں سے جنگ کی میں نے

خراشِ نغمہ سے سینہ چھلا ہوا میرا

فغاں کہ ترک نہ کی نغمہ پروری میں نے

دوا سے فائدہ مقصود تھا ہی کب کہ فقط

دوا کے شوق میں صحت تباہ کی میں نے

زبانہ زن تھا جگر سوز تشنگی کا عذاب

سو جوفِ سینہ میں دوزخ انڈیل لی میں نے

سرورِ مے پہ بھی غالب رہا شعور مرا

کہ ہر رعایتِ غم ذہن میں رکھی میں نے

غمِ شعور کوئی دم تو مجھ کو مہلت دے

تمام عمر جلایا ہے اپنا جی میں نے

علاج یہ ہے کہ مجبور کر دیا جاؤں

وگرنہ یوں تو کسی کی نہیں سنی میں نے

رہا میں شاہدِ تنہا نشینِ مسندِ غم

اور اپنے کربِ انا سے غرض رکھی میں نے

جون ایلیا

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: رخی

خود سے ہی اپنی ہم سری کب تک

جس کا ڈر تھا یہ وہ گھڑی ہے میاں

حاصل ہمیں بھی فخر تری دوستی کا تھا

وہ کون تھا جسے دیکھا نہیں کبھی میں نے

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: