ٹیگ کے محفوظات: دکھائی

خدا اُس کو خدائی دے رہا ہے

مئی 31, 2017ماجد صدیقی، شہر پناہ، غزلہنسائی، نارسائی، کمائی، خدائی، دکھائی، سنائی، صفائیadmin

ماجد صدیقی ۔ غزل نمبر 39

جہاں جس کی دُہائی دے رہا ہے

خدا اُس کو خدائی دے رہا ہے

چُرا کر خضر کا جامہ ہمیں وہ

سلگتی جگ ہنسائی دے رہا ہے

پڑی زد جرم کی جس پر وہ چُپ ہے

جو مجرم ہے صفائی دے رہا ہے

بگولہ گھیر کر ہر ذِی طلب کو

ثمر تک نارسائی دے رہا ہے

وہ لاوا جو سِلے ہونٹوں کے پیچھے

دہکتا ہے سُنائی دے رہا ہے

وہ دے کر زر دریدہ عصمتوں کو

اُنہیں اُن کی کمائی دے رہا ہے

تناؤ ساس کے تیور کا ماجدؔ

دُلہن کو ’منہ دِکھائی‘ دے رہا ہے

ماجد صدیقی

Rate this:

یہی جُنوں ہے مِرا وُہ مجھے رہائی نہ دے

مارچ 31, 2017ماجد صدیقی، غزل، غزل سرانوائی، آشنائی، دہائی، دکھائی، رہائی، صفائیadmin

ماجد صدیقی ۔ غزل نمبر 85

اسیرِ قرب کرے، وسعتِ خُدائی نہ دے

یہی جُنوں ہے مِرا وُہ مجھے رہائی نہ دے

وُہ مثلِ موج مِلے آ کے ریگِ ساحل سے

مگر اُسے بھی کبھی اذنِ آشنائی نہ دے

یہ عہدِ جیب تراشی ہے کیا کہ جس میں کہیں

کوئی بھی کھُل کے کسی اور کی صفائی نہ دے

یہی دُعا ہے کہ بے آب ہوں نہ حرف مِرے

سزا کوئی بھی وُہ دے، عجزِ بے نوائی نہ دے

امیرِ شہر کا کیا وُہ تو بس یہی چاہے

یہاں کوئی بھی کسی بات کی دُہائی نہ دے

یہ کیسا منبعِٔ ظلمت ہے دَورِ نو کہ جہاں

جز اپنی ذات کے ماجدؔ کوئی دکھائی نہ دے

ماجد صدیقی

Rate this:

جس کو اُونچا سُنائی دیتا ہے

فروری 28, 2017ماجد صدیقی، سخناب، غزلکمائی، جدائی، دہائی، دکھائی، رہائی، سنائی، صفائیadmin

ماجد صدیقی ۔ غزل نمبر 14

وُہ اُسے ہی خُدائی دیتا ہے

جس کو اُونچا سُنائی دیتا ہے

کون بَونا بنے چھُڑا کے مجھے

کون میری صفائی دیتا ہے

سر بلندی مجھی سے ہے جس کی

کب مجھے وُہ رہائی دیتا ہے

ہے قرابت اُسی سے مالی کی

پیڑ جو بھی کمائی دیتا ہے

کون ہے وُہ چمن کے آنگن سے

جو مہک کو جُدائی دیتا ہے

ہر ستم کوش کو چلن اُس کا

کتنا ارفع دکھائی دیتا ہے

سنگ کب موم میں ڈھلے ماجدؔ

دل یہ کس کی دہائی دیتا ہے

ماجد صدیقی

Rate this:

زخمِ ہُنر کو حوصلہ لب کشائی دے

اکتوبر 25, 2015پروین شاکر، شعراء، غزلکمائی، کربلائی، کشائی، انتہائی، دکھائی، رہائی، رسائی، سنائی، سجھائیadmin

پروین شاکر ۔ غزل نمبر 98

یارب! مرے سکوت کو نغمہ سرائی دے

زخمِ ہُنر کو حوصلہ لب کشائی دے

لہجے کو جُوئے آب کی وہ نے نوائی دے

دُنیا کو حرف حرف کا بہنا سنائی دے

رگ رگ میں اُس کا لمس اُترتا دکھائی دے

جو کیفیت بھی جسم کو دے ،انتہائی دے

شہرِ سخن سے رُوح کو وہ آشنائی دے

آنکھیں بھی بند رکھوں تو رستہ سجھائی دے

تخیئلِ ماہتاب ہو، اظہارِ آئینہ

آنکھوں کو لفظ لفظ کا چہرہ دکھائی دے

دل کو لہو کروں تو کوئی نقش بن سکے

تو مجھ کو کربِ ذات کی سچی کمائی دے

دُکھ کے سفر میں منزلِ نایافت کُچھ نہ ہو

زخمِ جگر سے زخمِ ہُنر تک رسائی دے

میں عشق کائنات میں زنجیر ہوسکوں

مجھ کو حصارِ ذات کے شہر سے رہائی دے

پہروں کی تشنگی پہ بھی ثابت قدم رہوں

دشتِ بلا میں ، رُوح مجھے کربلائی دے

پروین شاکر

Rate this:

مری بخت آزمائی ہوچکی بس

اکتوبر 6, 2015میر تقی میر، اساتذہ، غزللڑائی، میرزائی، نمائی، آئی، آزمائی، آشنائی، ادائی، دکھائی، رہائی، سمائیadmin

دیوان سوم غزل 1143

امیروں تک رسائی ہوچکی بس

مری بخت آزمائی ہوچکی بس

بہار اب کے بھی جو گذری قفس میں

تو پھر اپنی رہائی ہوچکی بس

کہاں تک اس سے قصہ قضیہ ہر شب

بہت باہم لڑائی ہوچکی بس

نہ آیا وہ مرے جاتے جہاں سے

یہیں تک آشنائی ہوچکی بس

لگا ہے حوصلہ بھی کرنے تنگی

غموں کی اب سمائی ہوچکی بس

برابر خاک کے تو کر دکھایا

فلک بس بے ادائی ہوچکی بس

دنی کے پاس کچھ رہتی ہے دولت

ہمارے ہاتھ آئی ہوچکی بس

دکھا اس بت کو پھر بھی یا خدایا

تری قدرت نمائی ہوچکی بس

شرر کی سی ہے چشمک فرصت عمر

جہاں دی ٹک دکھائی ہوچکی بس

گلے میں گیروی کفنی ہے اب میر

تمھاری میرزائی ہوچکی بس

میر تقی میر

Rate this:

مجھ دل زدہ کو نیند نہ آئی تمام شب

اکتوبر 6, 2015میر تقی میر، اساتذہ، غزللڑائی، نمائی، آئی، اٹھائی، دکھائی، درائی، سرائیadmin

دیوان دوم غزل 768

اندوہ سے ہوئی نہ رہائی تمام شب

مجھ دل زدہ کو نیند نہ آئی تمام شب

جب میں شروع قصہ کیا آنکھیں کھول دیں

یعنی تھی مجھ کو چشم نمائی تمام شب

چشمک چلی گئی تھی ستاروں کی صبح تک

کی آسماں نے دیدہ درائی تمام شب

بخت سیہ نے دیر میں کل یاوری سی کی

تھی دشمنوں سے اس کو لڑائی تمام شب

بیٹھے ہی گذری وعدے کی شب وہ نہ آپھرا

ایذا عجب طرح کی اٹھائی تمام شب

سناہٹے سے دل سے گذر جائیں سو کہاں

بلبل نے گو کی نالہ سرائی تمام شب

تارے سے میری پلکوں پہ قطرے سرشک کے

دیتے رہے ہیں میر دکھائی تمام شب

میر تقی میر

Rate this:

اے چاند، دکھائی دے تو جانوں

جنوری 6, 2012عرفان صدیقی، غزلکمائی، دہائی، دکھائی، سمائی، سنائیadmin

عرفان صدیقی ۔ غزل نمبر 136

جلنے سے رہائی دے تو جانوں

اے چاند، دکھائی دے تو جانوں

تنہا نہیں نواحِ شب میں

آہٹ ہی سنائی دے تو جانوں

کیا زندہ ہے زخم کھانے والا

اک بار دہائی دے تو جانوں

دکھ دل سے بڑا نہیں ہے‘ معبود

تو دل کو سمائی دے تو جانوں

اوروں کا لہو لٹانے والے

کچھ اپنی کمائی دے تو جانوں

اے ذہن میں بسنے والی دُنیا

آنکھوں کو دکھائی دے تو جانوں

عرفان صدیقی

Rate this:

کیا جلتی ہوئی آگ دکھائی نہیں دیتی

جنوری 8, 1972باقی صدیقی، شعراء، غزلگدائی، پائی، پرائی، دکھائی، سنائیadmin

باقی صدیقی ۔ غزل نمبر 161

زنجیر ہوس دل کو رہائی نہیں دیتی

کیا جلتی ہوئی آگ دکھائی نہیں دیتی

دنیا کے لئے بھول گئے اپنے خدا کو

کیا قبر کی آواز سنائی نہیں دیتی

کیا اپنے سوا کوئی نظر آئے نہ ہم کو

کیوں دل کو سکوں بات پرائی نہیں دیتی

جو مانگنا ہے مانگئے اﷲ سے اپنے

تسکیں کبھی دنیا کی گدائی نہیں دیتی

احساس سفر سے یہ گرہ کھلتی ہے باقیؔ

منزل کی خبر آبلہ پائی نہیں دیتی

باقی صدیقی

Rate this:

شہر کیسا دکھائی دینے لگا

جنوری 8, 1972شعراء، غزلجدائی، دکھائی، سنائیadmin

باقی صدیقی ۔ غزل نمبر 55

کیوں میں تیری دہائی دینے لگا

شہر کیسا دکھائی دینے لگا

لو غم آشنائی دینے لگا

میں جہاں کو دکھائی دینے لگا

اے خیال ہجوم ہم سفراں

تو بھی داغ جدائی دینے لگا

کون اندر سے اٹھ گیا باقیؔ

شور دل کا سنائی دینے لگا

باقی صدیقی

Rate this: