ٹیگ کے محفوظات: خونبار

بال چاندی ہو گئے سونا ہوے رخسار بھی

اگست 4, 2018ناصر کاظمی،برگِ نے،غزلیار،بیمار،خونبار،دنیادار،دیوار،رخسارadmin

رنگ دکھلاتی ہے کیا کیا عمر کی رفتار بھی

بال چاندی ہو گئے سونا ہوے رخسار بھی

درد کے جھونکوں نے اب کے دل ہی ٹھنڈا کر دیا

آگ برساتا تھا آگے دیدۂ خونبار بھی

بیٹھے بیٹھے جانے کیوں بیتاب ہو جاتا ہے دل

پوچھتے کیا ہو میاں اچھا بھی ہوں بیمار بھی

شوقِ آزادی لیے جاتا ہے عالم سے پرے

روکتی ہے ہر قدم آوازِ پائے یار بھی

سادگی سے تم نہ سمجھے ترکِ دنیا کا سبب

ورنہ وہ درویش تھے پردے میں دنیادار بھی

کس طرح گزرے گا ناصر فرصتِ ہستی کا دن

جم گیا دیوار بن کر سایۂ دیوار بھی

ناصر کاظمی

اب بھی میں چپ ہوں تو مجھ پر مرے اشعار پہ خاک

نومبر 4, 2015احمد فراز،شعراء،غزلاشعار،خونبار،خار،دینار،دیوار،دستارadmin

احمد فراز ۔ غزل نمبر 55

‮‮باغباں ڈال رہا ہے گُل و گلزار پہ خاک

اب بھی میں چپ ہوں تو مجھ پر مرے اشعار پہ خاک

کیسے بے آبلہ پا بادیہ پیما ہیں کہ ہے

قطرۂ خوں کے بجائے سر ہر خار پہ خاک

سرِ دربار ستادہ ہیں پئے منصب و جاہ

تُف بر اہلِ سخن و خلعت و دستار پہ خاک

آ کے دیکھو تو سہی شہر مرا کیسا ہے

سبزہ و گل کی جگہ ہے در و دیوار پہ خاک

تا کسی پر نہ کھُلے اپنے جگر کا احوال

مَل کے آ جاتے ہیں ہم دیدۂ خونبار پہ خاک

بسکہ اک نانِ جویں رزقِ مشقت تھا فراز

آ گیا ڈال کے میں درہم و دینار پہ خاک

احمد فراز

ازل کے دن سے یہ اے یار ہوتی آئی ہے

اکتوبر 8, 2015مرزا اسد اللہ خان غالب،اساتذہ،غزلیار،انظار،بار،خونبارadmin

دیوانِ غالب ۔ غزل نمبر 268

وفا جفا کی طلب گار ہوتی آئی ہے

ازل کے دن سے یہ اے یار ہوتی آئی ہے

جوابِ جنٓتِ بزمِ نشاطِ جاناں ہے

مری نگاہ جو خونبار ہوتی آئی ہے

نموۓ جوشِ جنوں وحشیو! مبارک باد

بہار ہدیۂ انظار ہوتی آئی ہے

دل و دماغِ وفا پیشگاں کی خیر نہیں

جگر سے آہِ شرر بار ہوتی آئی ہے

مرزا اسد اللہ خان غالب

سلایا مرے خوں میں تلوار کو

اکتوبر 7, 2015میر تقی میر،اساتذہ،غزلگنہگار،آزار،بیمار،بازار،تلوار،خونبار،خریدار،دیدار،دستارadmin

دیوان ششم غزل 1858

زمانے نے دشمن کیا یار کو

سلایا مرے خوں میں تلوار کو

کھلی رہتی ہے چشم آئینہ ساں

کہاں خواب مشتاق دیدار کو

مجھے عشق اس پاس یوں لے گیا

کوئی لاوے جیسے گنہگار کو

محبت میں دشوار دینی ہے جاں

نہ جاتے سنا سہل آزار کو

کوئی دن کرے زندگی عشق میں

جو دم لینے دیں دل کے بیمار کو

بکا میں تو بازار خوبی میں جا

کہ واں بیچتے تھے خریدار کو

مرے منھ پہ رکھا ہے رنگ اب تلک

ہزار آفریں چشم خونبار کو

تب اک جرعہ مے دیں مجھے مغبچے

گرو جب کروں رخت و دستار کو

کرو مت درنگ اٹھتے اس پینٹھ میں

چلو مول لو میر بازار کو

میر تقی میر

وہ بیچتا رہے گا خریدار کب تلک

اکتوبر 7, 2015میر تقی میر،اساتذہ،غزلہشیار،گنہگار،گرفتار،آثار،بیمار،تلوار،خونبار،خریدار،دیدارadmin

دیوان ششم غزل 1833

اس کی رہے گی گرمی بازار کب تلک

وہ بیچتا رہے گا خریدار کب تلک

عہد و وعید حشر قیامت ہے دیکھیے

جیتے رہیں گے طالب دیدار کب تلک

دل کا جگر کا لوہو تو غم نے سکھا دیا

آنکھیں رہیں گی دیکھیے خونبار کب تلک

نسبت بہت گناہوں کی کرتا ہے اس طرف

بے جرم ہم رہیں گے گنہگار کب تلک

اس کی نگاہ مست ہے اکثر سوے رباط

صوفی رہیں گے حال سے ہشیار کب تلک

دیوار و در بڑے تھے جہاں واں نشاں نہیں

یاں خانوادوں کے رہیں آثار کب تلک

مہمان کوئی دن کا ہے وارفتہ عشق کا

ظاہر ہے حال سے کہ یہ بیمار کب تلک

ترسا کے مارنے میں عذاب شدید ہے

اک کھینچ کر نہ ماروگے تلوار کب تلک

صیاد اسیر کرکے جسے اٹھ گیا ہو میر

وہ دام کی شکن میں گرفتار کب تلک

میر تقی میر

عشق بھی اس کا ہے نام اک پیار کا

اکتوبر 6, 2015میر تقی میر،اساتذہ،غزلیار،پیار،اصرار،بیمار،بار،بازار،خونبار،دیوار،سرکارadmin

دیوان ششم غزل 1797

میں ہوں خاک افتادہ جس آزار کا

عشق بھی اس کا ہے نام اک پیار کا

بیچتا سرکیوں نہ گلیوں میں پھروں

میں ہوں خواہاں لطف تہ بازار کا

خون کرکے ٹک نہ دل ان نے لیا

کشتہ و مردہ ہوں اس اصرار کا

گھر سے وہ معمار کا جو اٹھ گیا

حال ابتر ہو گیا گھر بار کا

نقل اس کی بے وفائی کی ہے اصل

کب وفاداری ہے شیوہ یار کا

سر جو دے دے مارتے گھر میں پھرے

رنگ دیگر ہے در و دیوار کا

اک گداے در ہے سیلاب بہار

غم کشوں کے دیدۂ خونبار کا

دلبراں دل جنس ہے گنجائشی

اس میں کچھ نقصاں نہیں سرکار کا

عشق کا مارا ہے کیا پنپے گا میر

حال ہے بدحال اس بیمار کا

میر تقی میر

اندوہ و درد عشق نے بیمار کردیا

اکتوبر 6, 2015میر تقی میر،اساتذہ،غزلگنہگار،پار،پریدار،بیمار،بیزار،خونبار،خبردار،دیوار،سزاوار،طلبگارadmin

دیوان ششم غزل 1786

بے طاقتی نے دل کی گرفتار کردیا

اندوہ و درد عشق نے بیمار کردیا

دروازے پر کھڑا ہوں کئی دن سے یار کے

حیرت نے حسن کی مجھے دیوار کردیا

سائے کو اس کے دیکھ کے وحشت بلا ہوئی

دیوانہ مجھ کو جیسے پریدار کردیا

نسبت ہوئی گناہوں کی از بس مری طرف

بے جرم ان نے مجھ کو گنہگار کردیا

دن رات اس کو ڈھونڈے ہے دل شوق نے مجھے

نایاب کس گہر کا طلبگار کردیا

دور اس سے زار زار جو روتا رہا ہوں میں

لوگوں کو میری زاری نے بیزار کردیا

خوبی سے بخت بد کی اسے عشق سے مرے

یاروں نے رفتہ رفتہ خبردار کردیا

جس کے لگائی جی میں نہ اس کے ہوس رہی

یعنی کہ ایک وار ہی میں پار کردیا

پہلو میں دل نے لوٹ کے آتش سے شوق کی

پایان کار آنکھوں کو خونبار کردیا

کیا جانوں عشق جان سے کیا چاہتا ہے میر

خوں ریزی کا مجھے تو سزاوار کردیا

میر تقی میر

دل بہاران چمن کا ہے گرفتار ہنوز

اکتوبر 6, 2015میر تقی میر،اساتذہ،غزلیار،گرفتار،خونبار،دیوار،طلبگارadmin

دیوان پنجم غزل 1627

کب سے قیدی ہیں پہ ہے نالش بسیار ہنوز

دل بہاران چمن کا ہے گرفتار ہنوز

وہ مہ چاردہ اس شہر سے کب کا نکلا

ہر گلی جھانکتے پھرتے ہیں طلبگار ہنوز

بالا بالا ہی بہت عشق میں مارے گئے یار

وہ تہ دل سے کسو کا نہ ہوا یار ہنوز

سال میں ابر بہاری کہیں آ کر برسا

لوہو برسا رہے ہیں دیدۂ خونبار ہنوز

اب کے بالیدن گلہا تھا بہت دیکھو نہ میر

ہمسر لالہ ہے خار سر دیوار ہنوز

میر تقی میر

اب ان نے سج بنائی ہے خونخوار بے طرح

اکتوبر 6, 2015میر تقی میر،اساتذہ،غزلیار،اصرار،خونبار،خونخوار،طرحدارadmin

دیوان پنجم غزل 1597

گھر سے لیے نکلتا ہے تلوار بے طرح

اب ان نے سج بنائی ہے خونخوار بے طرح

جی بچنے کی طرح نظر آتی نہیں کوئی

کرتا ہے میرے خون پہ اصرار بے طرح

چہرہ تو ان نے اپنا بنایا ہے خوب لیک

بگڑا پھرے ہے اب وہ طرحدار بے طرح

کس طرح جائے پکڑی زباں اس کی خشم میں

کہتا ہے بیٹھا متصل اب یار بے طرح

لوہو میں ڈوبے دیکھیو دامان و جیب میر

بپھرا ہے آج دیدئہ خونبار بے طرح

میر تقی میر

عشق کی گرمی دل کو پہنچی کہتے ہی آزار بہت

اکتوبر 6, 2015میر تقی میر،اساتذہ،غزلہموار،ہشیار،پیار،آزار،بیمار،خونبار،دارadmin

دیوان پنجم غزل 1584

زرد ہیں چہرے سوکھ گئے ہیں یعنی ہیں بیمار بہت

عشق کی گرمی دل کو پہنچی کہتے ہی آزار بہت

نالہ و زاری سے عاشق کی کیا ابر بہاری طرف ہو گا

دل ہے نالاں حد سے زیادہ آنکھیں ہیں خونبار بہت

برسوں ہوئے اب ہم لوگوں سے آنکھ انھوں کی نہیں ملتی

برسوں تک آپس میں رہا ہے اپنے جنھوں کے پیار بہت

ارض و سما کی پستی بلندی اب تو ہم کو برابر ہے

یعنی نشیب و فراز جو دیکھے طبع ہوئی ہموار بہت

سو غیروں میں ہو عاشق تو ایک اسی سے شرماویں

اس مستی میں آنکھیں اس کی رہتی ہیں ہشیار بہت

کم ہے ہمیں امید بہی سے اتنی نزاری پر اس کی

پچھلے دنوں دیکھا تھا ہم نے عاشق تھے بیمار بہت

میر نہ ایسا ہووے کہیں پردے ہی پر وہ مار مرے

ڈر لگتا ہے اس سے ہم کو ہے وہ ظاہر دار بہت

میر تقی میر

داغ سے تن گلزار کیا سب آنکھوں کو خونبار کیا

اکتوبر 6, 2015میر تقی میر،اساتذہ،غزلہموار،پیار،اقرار،خونبار،زارadmin

دیوان چہارم غزل 1346

زار کیا بیمار کیا اس دل نے کیا آزار کیا

داغ سے تن گلزار کیا سب آنکھوں کو خونبار کیا

جرم ہے ہم الفت کشتوں کا لگ پڑنے سے شوخ ہوا

اب کہتے ہیں دل میں اپنے ہم نے اسے کیوں پیار کیا

چاہا ہم نے کیا کیا تھا پر اپنا چاہا کچھ نہ ہوا

عزت کھوئی ذلت کھینچی عشق نے خوار و زار کیا

پیش گئی کب پیش زمانہ طبع خشن ہر ناکس کی

اک گردش میں سپہر نے جیسے سطح زمیں ہموار کیا

سادگی میری آہ نہ جانا جی ہی اس میں جاتا ہے

عشق کا اس پرکار کے میں نے لوگوں میں اقرار کیا

میر تقی میر

حال رکھا تھا کچھ بھی ہم نے عشق نے آخر مار رکھا

اکتوبر 6, 2015میر تقی میر،اساتذہ،غزلمار،یار،پیار،خونبار،خوارadmin

دیوان سوم غزل 1089

زار رکھا بے حال رکھا بے تاب رکھا بیمار رکھا

حال رکھا تھا کچھ بھی ہم نے عشق نے آخر مار رکھا

میلان اس کا تھا کاہے کو جانب الفت کیشوں کے

اپنی طرف سے ہم نے اب تک اس ظالم سے پیار رکھا

عشق بھی ہم میں ہائے تصرف کیسے کیسے کرتا ہے

دل کو چاک جگر کو زخمی آنکھوں کو خونبار رکھا

کیا پوچھو ہودیں کے اکابر فاضل کامل صابر رنج

عزت والے کیا لوگوں کو گلیوں میں ان نے خوار رکھا

کام اس سے اک طور پہ لیتے بے طور اس کو ہونے نہ دیتے

حیف ہے میر سپہر دوں نے ہم سے اس کو نہ یار رکھا

میر تقی میر

جی ہی جاتے نظر آئے ہیں اس آزار کے ساتھ

اکتوبر 6, 2015میر تقی میر،اساتذہ،غزلیار،گفتار،آزار،تلوار،خونبار،خار،دیوار،دیدار،رفتار،طومار،عیارadmin

دیوان اول غزل 429

کیا موافق ہو دوا عشق کے بیمار کے ساتھ

جی ہی جاتے نظر آئے ہیں اس آزار کے ساتھ

رات مجلس میں تری ہم بھی کھڑے تھے چپکے

جیسے تصویر لگا دے کوئی دیوار کے ساتھ

مر گئے پر بھی کھلی رہ گئیں آنکھیں اپنی

کون اس طرح موا حسرت دیدار کے ساتھ

شوق کا کام کھنچا دور کہ اب مہر مثال

چشم مشتاق لگی جائے ہے طومار کے ساتھ

راہ اس شوخ کی عاشق سے نہیں رک سکتی

جان جاتی ہے چلی خوبی رفتار کے ساتھ

وے دن اب سالتے ہیں راتوں کو برسوں گذرے

جن دنوں دیر رہا کرتے تھے ہم یار کے ساتھ

ذکر گل کیا ہے صبا اب کہ خزاں میں ہم نے

دل کو ناچار لگایا ہے خس و خار کے ساتھ

کس کو ہر دم ہے لہو رونے کا ہجراں میں دماغ

دل کو اک ربط سا ہے دیدئہ خونبار کے ساتھ

میری اس شوخ سے صحبت ہے بعینہ ویسی

جیسے بن جائے کسو سادے کو عیار کے ساتھ

دیکھیے کس کو شہادت سے سر افراز کریں

لاگ تو سب کو ہے اس شوخ کی تلوار کے ساتھ

بے کلی اس کی نہ ظاہر تھی جو تو اے بلبل

دم کش میر ہوئی اس لب و گفتار کے ساتھ

میر تقی میر

رہنے لگا ہے دل کو اب آزار بے طرح

اکتوبر 6, 2015میر تقی میر،اساتذہ،غزلآزار،تلوار،خونبار،دیدار،ستمگارadmin

دیوان اول غزل 194

ہونے لگا گذار غم یار بے طرح

رہنے لگا ہے دل کو اب آزار بے طرح

اب کچھ طرح نہیں ہے کہ ہم غم زدے ہوں شاد

کہنے لگا ہے منھ سے ستمگار بے طرح

جاں بر تمھارے ہاتھ سے ہو گا نہ اب کوئی

رکھنے لگے ہو ہاتھ میں تلوار بے طرح

فتنہ اٹھے گا ورنہ نکل گھر سے تو شتاب

بیٹھے ہیں آ کے طالب دیدار بے طرح

لوہو میں شور بور ہے دامان و جیب میر

بپھرا ہے آج دیدئہ خونبار بے طرح

میر تقی میر

عاشق کا اپنے آخری دیدار دیکھنا

اکتوبر 6, 2015میر تقی میر،اساتذہ،غزلہار،گلزار،گرفتار،آزار،خونبار،خار،خبردار،دلدار،دیوار،دیدارadmin

دیوان اول غزل 121

آنکھوں میں جی مرا ہے ادھر یار دیکھنا

عاشق کا اپنے آخری دیدار دیکھنا

کیسا چمن کہ ہم سے اسیروں کو منع ہے

چاک قفس سے باغ کی دیوار دیکھنا

آنکھیں چرائیو نہ ٹک ابر بہار سے

میری طرف بھی دیدئہ خونبار دیکھنا

اے ہم سفر نہ آبلے کو پہنچے چشم تر

لاگا ہے میرے پائوں میں آ خار دیکھنا

ہونا نہ چار چشم دل اس ظلم پیشہ سے

ہشیار زینہار خبردار دیکھنا

صیاد دل ہے داغ جدائی سے رشک باغ

تجھ کو بھی ہو نصیب یہ گلزار دیکھنا

گر زمزمہ یہی ہے کوئی دن تو ہم صفیر

اس فصل ہی میں ہم کو گرفتار دیکھنا

بلبل ہمارے گل پہ نہ گستاخ کر نظر

ہوجائے گا گلے کا کہیں ہار دیکھنا

شاید ہماری خاک سے کچھ ہو بھی اے نسیم

غربال کرکے کوچۂ دلدار دیکھنا

اس خوش نگہ کے عشق سے پرہیز کیجو میر

جاتا ہے لے کے جی ہی یہ آزار دیکھنا

میر تقی میر

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: خونبار

بال چاندی ہو گئے سونا ہوے رخسار بھی

اب بھی میں چپ ہوں تو مجھ پر مرے اشعار پہ خاک

ازل کے دن سے یہ اے یار ہوتی آئی ہے

سلایا مرے خوں میں تلوار کو

وہ بیچتا رہے گا خریدار کب تلک

عشق بھی اس کا ہے نام اک پیار کا

اندوہ و درد عشق نے بیمار کردیا

دل بہاران چمن کا ہے گرفتار ہنوز

اب ان نے سج بنائی ہے خونخوار بے طرح

عشق کی گرمی دل کو پہنچی کہتے ہی آزار بہت

داغ سے تن گلزار کیا سب آنکھوں کو خونبار کیا

حال رکھا تھا کچھ بھی ہم نے عشق نے آخر مار رکھا

جی ہی جاتے نظر آئے ہیں اس آزار کے ساتھ

رہنے لگا ہے دل کو اب آزار بے طرح

عاشق کا اپنے آخری دیدار دیکھنا

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: