ٹیگ کے محفوظات: حرم

چند کو چھوڑ کے سب اہلِ قلم جھوٹے ہیں

مئی 30, 2021عرفان ستار،غزلہم،قلم،قدم،کم،اہم،حرم،خم،عدمadmin

وصل کا عیش غلط، ہجر کے غم جھوٹے ہیں

چند کو چھوڑ کے سب اہلِ قلم جھوٹے ہیں

اپنا رستہ یہاں خود ڈھونڈنا پڑتا ہے میاں

عشق کی راہ میں سب نقشِ قدم جھوٹے ہیں

گونجتی ہے یہی آواز دمادم ہر سُو

ایھا النّاس سنو، دیر و حرم جھوٹے ہیں

اولاً ہم تھے جنھیں خواب کا آزار ملا

اور تُو پھر بھی سمجھتا ہے کہ ہم جھوٹے ہیں

میری جانب ہیں بہت عام سے سچے، دو چار

اور ترے ساتھ بہت سارے اہم جھوٹے ہیں

کم سے کم کہتے وہی ہیں کہ جو دل مانتا ہے

یعنی ہم جھوٹے اگر ہیں بھی تو کم جھوٹے ہیں

ہے کوئی اور ہی اقلیم جو شاید سچ ہو

یہ مگر طے ہے وجود اور عدم جھوٹے ہیں

تم بھلا کون، کسی حرف کے تقدیر کشا؟

وقت کو فیصلہ کرنے دو کہ ہم جھوٹے ہیں

راہ عرفان محبت کی ہے سیدھی، سچی

اب کھلا ہم پہ کہ اس راہ کے خم جھوٹے ہیں

عرفان ستار

کارواں پھر ملیں گے بہم صبر کر صبر کر

اگست 4, 2018ناصر کاظمی،دیوانِ ناصر،غزلہم،قلم،قسم،نم،کرم،بہم،بدم،حرم،رقم،ستم،صنم،علمadmin

رہ نوردِ بیابانِ غم صبر کر صبر کر

کارواں پھر ملیں گے بہم صبر کر صبر کر

بے نشاں ہے سفر رات ساری پڑی ہے مگر

آ رہی ہے صدا دم بدم صبر کر صبر کر

تیری فریاد گونجے گی دھرتی سے آکاش تک

کوئی دِن اور سہہ لے ستم صبر کر صبر کر

تیرے قدموں سے جاگیں گے اُجڑے دِلوں کے ختن

پاشکستہ غزالِ حرم صبر کر صبر کر

شہر اُجڑے تو کیا، ہے کشادہ زمینِ خدا

اِک نیا گھر بنائیں گے ہم صبر کر صبر کر

یہ محلاتِ شاہی تباہی کے ہیں منتظر

گرنے والے ہیں اِن کے علم صبر کر صبر کر

دف بجائیں گے برگ و شجر صف بہ صف ہر طرف

خشک مٹی سے پھوٹے گا نم صبر کر صبر کر

لہلہائیں گی پھر کھیتیاں کارواں کارواں

کھل کے برسے گا ابرِ کرم صبر کر صبر کر

کیوں پٹکتا ہے سر سنگ سے جی جلا ڈھنگ سے

دل ہی بن جائے گا خود صنم صبر کر صبر کر

پہلے کھل جائے دل کا کنول پھر لکھیں گے غزل

کوئی دم اے صریرِ قلم صبر کر صبر کر

درد کے تار ملنے تو دے ہونٹ ہلنے تو دے

ساری باتیں کریں گے رقم صبر کر صبر کر

دیکھ ناصر زمانے میں کوئی کسی کا نہیں

بھول جا اُس کے قول و قسم صبر کر صبر کر

ناصر کاظمی

یہ ستم اور بھی بالائے ستم ہوتا ہے

اکتوبر 25, 2015قمر جلالوی،شعراء،غزلکم،کرم،حرم،دم،ستم،غمadmin

قمر جلالوی ۔ غزل نمبر 137

وہ ستا کر مجھے کہتے ہیں کہ غم ہوتا ہے

یہ ستم اور بھی بالائے ستم ہوتا ہے

جل کر مرنا بھی بڑا کارِ اہم ہوتا ہے

یہ تو اک چھوٹے سے پروانے کا دم ہوتا ہے

قصۂ برہمن و شیخ کو بس رہنے دو

آج تک فیصلۂ دیر و حرم ہوتا ہے

گر حسیں دل میں نہ ہوں عظمت دل بڑھ جائے

بت کدہ تو انھیں باتوں سے حرم ہوتا ہے

پھونک اے آتشِ گل ورنہ تری بات گئی

آشیاں برق کا ممنونِ کرم ہوتا ہے

چارہ گر میں تری خاطر سے کہے دیتا ہوں

درد ہوتا ہے مگر پہلے سے کم ہوتا ہے

ہجر کی رات بھی ہوتی ہے عجب رات قمر

تارے ہنستے ہیں فلک پر مجھے غم ہوتا ہے

قمر جلالوی

آتا ہوں ہے کے گھر سے تیری قسم ابھی

اکتوبر 25, 2015قمر جلالوی،شعراء،غزلہم،قسم،الم،ارم،حرم،دم،ستمadmin

قمر جلالوی ۔ غزل نمبر 105

وہ فتنہ ساز دے کے گیا ہے یہ دم ابھی

آتا ہوں ہے کے گھر سے تیری قسم ابھی

ظالم وہ دیکھ پاس سے اٹھتے ہیں چارہ گر

تیرے مریضِ ہجر نے توڑا ہے دم ابھی

ان کے لیئے تو کھیل ہے دنیا کا انقلاب

چاہیں تو بتکدے کو بنا دیں حرم ابھی

کیا آپ سا کوئی نہیں ہے جہاں میں

اچھا حضور آئینہ لاتے ہیں ہم ابھی

کوچے سے ان کے اٹھتے ہی یوں بدحواس ہوں

آیا ہوں جیسے چھوڑ کے باغِ ارم ابھی

ذوق الم میں حق سے دعا مانگتا ہوں میں

جتنے بھی مجھ کو دینے ہیں دے دے الم ابھی

شکوے فضول گردشِ دوراں کے اے قمر

یہ آسماں نہ چھوڑے گا جورو ستم ابھی

قمر جلالوی

پھر سوچ لو باقی تو نہیں کوئی ستم اور

اکتوبر 25, 2015قمر جلالوی،شعراء،غزلہم،قدم،قسم،کم،حرم،دم،رقم،ستمadmin

قمر جلالوی ۔ غزل نمبر 42

مجھ پر ہے یہ نزع کا عالم اور

پھر سوچ لو باقی تو نہیں کوئی ستم اور

ہے وعدہ خلافی کے علاوہ بھی ستم اور

گر تم نہ خفا ہو تو بتا دیں تمھیں ہم اور

یہ مئے ہے ذرا سوچ لے اے شیخِ حرم اور

تو پہلے پہل پیتا ہے کم اور ارے کم اور

وہ پوچھتے ہیں دیکھئے یہ طرفہ ستم اور

کس کس نے ستایا ہے تجھے ایک تو ہم اور

وہ دیکھ لو احباب لیے جاتے ہیں میت

لو کھاؤ مریضِ غم فرقت کی قسم اور

اب قبر بھی کیا دور ہے جاتے ہو جو واپس

جب اتنے چلے آئے ہو دو چار قدم اور

قاصد یہ جواب ان کا ہے کس طرح یقین ہو

تو اور بیاں کرتا ہے خط میں ہے رقم اور

موسیٰؑ سے ضرور آج کوئی بات ہوئی ہے

جاتے میں قدم اور تھے آتے میں قدم اور

تربت میں رکے ہیں کہ کمر سیدھی تو کر لیں

منزل ہے بہت دور کی لے لیں ذرا دم اور

یہ بات ابھی کل کی ہے جو کچھ تھے ہمیں تھے

اللہ تری شان کہ اب ہو گئے ہم اور

بے وقت عیادت کا نتیجہ یہی ہو گا

دوچار گھڑی کے لیے رک جائے گا دم اور

اچھا ہوا میں رک گیا آ کر تہِ تربت

پھر آگے قیامت تھی جو بڑھ جاتے قدم اور

ہوتا قمر کثرت و وحدت میں بڑا فرق

بت خانے بہت سے ہیں نہیں ہے تو حرم اور

قمر جلالوی

خجل ہوئے پہ یہ توڑی قسم تو کیا ہو گا

اکتوبر 25, 2015قمر جلالوی،شعراء،غزلقسم،نم،حرمadmin

قمر جلالوی ۔ غزل نمبر 24

ہمارے بعد جو چھوڑے ستم تو کیا ہو گا

خجل ہوئے پہ یہ توڑی قسم تو کیا ہو گا

یہ سوچتا ہوں سر جھکاتے ہیں پئے سجدہ

سمٹ کے آ گئے دیرو حرم تو کیا ہو گا

یہ بزمِ غیر ہے کچھ آبروئے عشق کا پاس

تھمے نہ اشک اے چشمِ نم تو کیا ہو گا

قمر جلالوی

اگر خدائی بتوں کی ہوتی تو دیر ہوتا حرم نہ ہوتا

اکتوبر 25, 2015قمر جلالوی،شعراء،غزلقدم،حرم،غمadmin

قمر جلالوی ۔ غزل نمبر 8

نگاہِ دنیائے عاشقی میں وجودِ دل محترم نہ ہوتا

اگر خدائی بتوں کی ہوتی تو دیر ہوتا حرم نہ ہوتا

رہِ محبت میں دل کو کب تک فریبِ دیرو حرم نہ ہوتا

ہزاروں سجدے بھٹکتے پھرتے جو تیرا نقشِ قدم نہ ہوتا

نہ پوچھ صیاد حال مجھ سے کہ کیوں مقدر پہ رو رہا ہوں

قفس میں گر بال و پر نہ کٹتے مجھے اسیری کا غم نہ ہوتا

قمر جلالوی

کچھ تمہارا بھی کرم یاد آیا

اکتوبر 25, 2015مصطفٰی خان شیفتہ،اساتذہ،غزلہم،قسم،کم،کرم،جم،حرم،رقم،رم،سم،ستمadmin

مصطفٰی خان شیفتہ ۔ غزل نمبر 30

جب رقیبوں کا ستم یاد آیا

کچھ تمہارا بھی کرم یاد آیا

کب ہمیں حاجتِ پرہیز پڑی

غم نہ کھایا تھا کہ سم یاد آیا

نہ لکھا خط کہ خطِ پیشانی

مجھ کو ہنگامِ رقم یاد آیا

شعلۂ زخم سے اے صید فگن

داغِ آہوئے حرم یاد آیا

ٹھیرے کیا دل کہ تری شوخی سے

اضطرابِ پئے ہم یاد آیا

خوبیِ بخت کہ پیمانِ عدو

اس کو ہنگامِ قسم یاد آیا

کھل گئی غیر سے الفت اس کی

جام مے سے مجھے جم یاد آیا

وہ مرا دل ہے کہ خود بینوں کو

دیکھ کر آئینہ کم یاد آیا

کس لئے لطف کی باتیں ہیں پھر

کیا کوئی اور ستم یاد آیا

ایسے خود رفتہ ہو اے شیفتہ کیوں

کہیں اس شوخ کا رم یاد آیا

مصطفٰی خان شیفتہ

صد رہ آہنگِ زمیں بوسِ قدم ہے ہم کو

اکتوبر 8, 2015مرزا اسد اللہ خان غالب،اساتذہ،غزلہم،قدم،قسم،کم،کرم،اہم،حرم،دم،رم،سَم،ستمadmin

دیوانِ غالب ۔ غزل نمبر 142

واں پہنچ کر جو غش آتا پئے ہم ہے ہم کو

صد رہ آہنگِ زمیں بوسِ قدم ہے ہم کو

دل کو میں اور مجھے دل محوِ وفا رکھتا ہے

کس قدر ذوقِ گرفتاریِ ہم ہے ہم کو

ضعف سے نقشِ پئے مور، ہے طوقِ گردن

ترے کوچے سے کہاں طاقتِ رم ہے ہم کو

جان کر کیجے تغافل کہ کچھ امّید بھی ہو

یہ نگاہِ غلط انداز تو سَم ہے ہم کو

رشکِ ہم طرحی و دردِ اثرِ بانگِ حزیں

نالۂ مرغِ سحر تیغِ دو دم ہے ہم کو

سر اڑانے کے جو وعدے کو مکرّر چاہا

ہنس کے بولے کہ ’ترے سر کی قسم ہے ہم کو!‘

دل کے خوں کرنے کی کیا وجہ؟ ولیکن ناچار

پاسِ بے رونقیِ دیدہ اہم ہے ہم کو

تم وہ نازک کہ خموشی کو فغاں کہتے ہو

ہم وہ عاجز کہ تغافل بھی ستم ہے ہم کو

لکھنؤ آنے کا باعث نہیں کھلتا یعنی

ہوسِ سیر و تماشا، سو وہ کم ہے ہم کو

مقطعِ سلسلۂ شوق نہیں ہے یہ شہر

عزمِ سیرِ نجف و طوفِ حرم ہے ہم کو

لیے جاتی ہے کہیں ایک توقّع غالب

جادۂ رہ کششِ کافِ کرم ہے ہم کو

مرزا اسد اللہ خان غالب

وقف اولاد ہے وہ باغ تو غم کاہے کو

اکتوبر 6, 2015میر تقی میر،اساتذہ،غزلہم،قلم،قدم،قسم،کرم،حرم،ستم،علم،غمadmin

دیوان سوم غزل 1228

بہرفردوس ہو آدم کو الم کاہے کو

وقف اولاد ہے وہ باغ تو غم کاہے کو

کہتے ہیں آوے گا ایدھر وہ قیامت رفتار

چلتے پھرتے رہیں گے تب تئیں ہم کاہے کو

یہ بھی اک ڈھب ہے نہ ایذا نہ کسو کو راحت

رحم موقوف کیا ہے تو ستم کاہے کو

نرگس ان آنکھوں کو جو لکھ گئے نابینا تھے

اپنے نزدیک ہیں وے دست قلم کاہے کو

اس کی تلوار سے گر جان کو رکھتے نہ عزیز

مرتے اس خواری سے تو صید حرم کاہے کو

چشم پوشی کا مری جان تمھیں لپکا ہے

کھاتے ہو دیدہ درائی سے قسم کاہے کو

میری آنکھوں پہ رکھو پائوں جو آئو لیکن

رکھتے ہو ایسی جگہ تم تو قدم کاہے کو

دل کو کہتے ہیں کہ اس گنج رواں کا گھر ہے

اس خرابے میں کرے ہے وہ کرم کاہے کو

شور نے نام خدا ان کے بلا سر کھینچا

میر سا ہے کوئی عالم میں علم کاہے کو

میر تقی میر

پر تنگ آگئے ہیں تمھارے ستم سے ہم

اکتوبر 6, 2015میر تقی میر،اساتذہ،غزلہم،قلم،قدم،قسم،نم،حرم،دم،ستم،صنمadmin

دیوان سوم غزل 1166

جی کے تئیں چھپاتے نہیں یوں تو غم سے ہم

پر تنگ آگئے ہیں تمھارے ستم سے ہم

اپنے خیال ہی میں گذرتی ہے اپنی عمر

پر کچھ نہ پوچھو سمجھے نہیں جاتے ہم سے ہم

زانو پہ سر ہے قامت خم گشتہ کے سبب

پیری میں اپنی آن لگے ہیں قدم سے ہم

جوں چکمہ میرحاج کا ہے خوار جانماز

بت خانے میں جو آئے ہیں چل کر حرم سے ہم

روتے بھی ان نے دیکھ کے ہم کو کیا نہ رحم

اک چشم داشت رکھتے تھے مژگان نم سے ہم

بدعہدیاں ہی کرتے گئے اس کو سال و ماہ

اب کب تسلی ہوتے ہیں قول و قسم سے ہم

زنار سا بندھا ہے گلے اپنے اب تو کفر

بدنام ہیں جہان میں عشق صنم سے ہم

لوگوں کے وصف کرنے سے بالیدگی ہوئی

جوں شیشہ پھیل پھوٹ پڑے ان کے دم سے ہم

طرفیں رکھے ہے ایک سخن چار چار میر

کیا کیا کہا کریں ہیں زبان قلم سے ہم

میر تقی میر

تڑپا ہزار نوبت دل ایک ایک دم میں

اکتوبر 6, 2015میر تقی میر،اساتذہ،غزلہم،حرم،دم،عدمadmin

دیوان دوم غزل 878

کیا کوفتیں اٹھائیں ہجراں کے درد وغم میں

تڑپا ہزار نوبت دل ایک ایک دم میں

گو قیس منھ کو نوچے فرہاد سر کو چیرے

یہ کیا عجب ہے ایسے ہوتے ہیں لوگ ہم میں

اہل نظر کسو کو ہوتی ہے محرمیت

آنکھوں کے اندھے ہم تو مدت رہے حرم میں

کلفت میں گذری ساری مدت تو زندگی کی

آسودگی کا منھ اب دیکھیں گے ہم عدم میں

کرتے ہیں میر مل کر واعظ سے حبس دم کا

کیا یہ بھی آگئے ہیں اس پوچ گو کے دم میں

میر تقی میر

دستۂ داغ و فوج غم لے کر

اکتوبر 6, 2015میر تقی میر،اساتذہ،غزلہم،قلم،قسم،الم،حرم،دم،رقم،علم،غمadmin

دیوان اول غزل 223

ہم بھی پھرتے ہیں یک حشم لے کر

دستۂ داغ و فوج غم لے کر

دست کش نالہ پیش رو گریہ

آہ چلتی ہے یاں علم لے کر

مرگ اک ماندگی کا وقفہ ہے

یعنی آگے چلیں گے دم لے کر

اس کے اوپر کہ دل سے تھا نزدیک

غم دوری چلے ہیں ہم لے کر

تیری وضع ستم سے اے بے درد

ایک عالم گیا الم لے کر

بارہا صید گہ سے اس کی گئے

داغ یاس آہوے حرم لے کر

ضعف یاں تک کھنچا کہ صورت گر

رہ گئے ہاتھ میں قلم لے کر

دل پہ کب اکتفا کرے ہے عشق

جائے گا جان بھی یہ غم لے کر

شوق اگر ہے یہی تو اے قاصد

ہم بھی آتے ہیں اب رقم لے کر

میر صاحب ہی چوکے اے بد عہد

ورنہ دینا تھا دل قسم لے کر

میر تقی میر

جیسے بچھڑے ہوئے کعبے میں صنم آتے ہیں

اپریل 2, 2012فیض احمد فیض،دستِ صبا،غزلقدم،کم،کرم،حرم،صنمadmin

فیض احمد فیض ۔ غزل نمبر 29

دل میں اب یوں ترے بھولے ہوئے غم آتے ہیں

جیسے بچھڑے ہوئے کعبے میں صنم آتے ہیں

ایک اک کرکے ہوئے جاتے ہیں تارے روشن

میری منزل کی طرف تیرے قدم آتے ہیں

رقصِ مے تیز کرو، ساز کی لے تیز کرو

سوئے مے خانہ سفیرانِ حرم آتے ہیں

کچھ ہمیں کو نہیں احسان اُٹھانے کا دماغ

وہ تو جب آتے ہیں، مائل بہ کرم آتے ہیں

اور کچھ دیر نہ گزرے شبِ فرقت سے کہو

دل بھی کم دکھتا ہے، وہ یاد بھی کم آتے ہیں

فیض احمد فیض

عشق کے دم قدم کی بات کرو

اپریل 2, 2012فیض احمد فیض،دستِ صبا،غزلقدم،نم،کرم،جم،حرم،صنم،غمadmin

فیض احمد فیض ۔ غزل نمبر 21

عجزِ اہل ستم کی بات کرو

عشق کے دم قدم کی بات کرو

بزمِ اہل طرب کو شرماو

بزمِ اصحابِ غم کی بات کرو

بزمِ ثروت کے خوش نشینوں سے

عظمتِ چشمِ نم کی بات کرو

ہے وہی بات یوں بھی اور یوں بھی

تم ستم یا کرم کی بات کرو

خیر، ہیں اہلِ دیر جیسے ہیں

آپ اہل حرم کی بات کرو

ہجر کی شب تو کٹ ہی جائے گی

روزِ وصلِ صنم کی بات کرو

جان جائیں گے جاننے والے

فیض، فرہاد و جم کی بات کرو

فیض احمد فیض

یہی ہیں ہر دھرم کے ساتھ کاغذ

دسمبر 1, 2007منصور آفاق،شعراء،غزلقدم،محترم،نم،کم،کرم،الم،بھرم،حرم،حشم،خم،دھرم،درم،ستم،صنم،علم،عدم،غمadmin

منصور آفاق ۔ غزل نمبر 160

پڑے ہیں جو قلم کے ساتھ کاغذ

یہی ہیں ہر دھرم کے ساتھ کاغذ

جلا آیا جلوسِ دانشِ دِین

شعورِ محترم کے ساتھ کاغذ

جڑے بس رہ گئے ہیں داستاں میں

ترے عہدِ ستم کے ساتھ کاغذ

یہی بس التماسِ دل کہ رکھنا

یہ دیوارِ حرم کے ساتھ کاغذ

پرندے بنتے جاتے ہیں مسلسل

ترے فضل و کرم کے ساتھ کاغذ

میانوالی میں آئے ہیں فلک سے

یہ امکانِ عدم کے ساتھ کاغذ

خود اپنے قتل نامے کا کسی کو

دیا پورے بھرم کے ساتھ کاغذ

کسی مبہم سی انجانی زباں میں

پڑے ہیں ہر قدم کے ساتھ کاغذ

الٹنے ہیں پلٹنے ہیں لحد تک

خیالِ بیش و کم کے ساتھ کاغذ

یہ وہ تہذیب ہے جو بیچتی ہے

ابھی دام و درم کے ساتھ کاغذ

کسی کو دستخط کرکے دیے ہیں

سرِ تسلیم خم کے ساتھ کاغذ

درازوں میں چھپانے پڑ رہے ہیں

کلامِ چشمِ نم کے ساتھ کاغذ

انہیں عباس نے لکھا ہے خوں سے

یہ چپکا دے علم کے ساتھ کاغذ

چمکتے پھر رہے ہیں آسماں کے

چراغِ ذی حشم کے ساتھ کاغذ

بدل جاتے ہیں اکثر دیکھتا ہوں

مری تاریخِ غم کے ساتھ کاغذ

ابد کے قہوہ خانے میں ملے ہیں

کسی تازہ صنم کے ساتھ کاغذ

ہوئے ہیں کس قدر منصور کالے

یہ شب ہائے الم کے ساتھ کاغذ

منصور آفاق

ورنہ اک قافلہ ملک عدم ہیں ہم لوگ

جنوری 8, 1972باقی صدیقی،شعراء،غزلکم،جم،حرم،ستم،عدمadmin

باقی صدیقی ۔ غزل نمبر 102

کوئی سمجھے تو زمانے کا بھرم ہیں ہم لوگ

ورنہ اک قافلہ ملک عدم ہیں ہم لوگ

دیکھئے کون سی منزل ہمیں اپناتی ہے

راندۂ میکدہ و دیر و حرم ہیں ہم لوگ

مسکراہٹ کو سمجھ لیتے ہیں دل کا پر تو

آشنا دہر کے انداز سے کم ہیں ہم لوگ

یاد آئیں گے زمانے کو ہم آتے آتے

اک تری بھولی ہوئی طرز ستم ہیں ہم لوگ

کوئی نسبت نہیں ارباب نظر سے باقیؔ

سائے کی طرح پس ساغر جم ہیں ہم لوگ

باقی صدیقی

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: حرم

چند کو چھوڑ کے سب اہلِ قلم جھوٹے ہیں

کارواں پھر ملیں گے بہم صبر کر صبر کر

یہ ستم اور بھی بالائے ستم ہوتا ہے

آتا ہوں ہے کے گھر سے تیری قسم ابھی

پھر سوچ لو باقی تو نہیں کوئی ستم اور

خجل ہوئے پہ یہ توڑی قسم تو کیا ہو گا

اگر خدائی بتوں کی ہوتی تو دیر ہوتا حرم نہ ہوتا

کچھ تمہارا بھی کرم یاد آیا

صد رہ آہنگِ زمیں بوسِ قدم ہے ہم کو

وقف اولاد ہے وہ باغ تو غم کاہے کو

پر تنگ آگئے ہیں تمھارے ستم سے ہم

تڑپا ہزار نوبت دل ایک ایک دم میں

دستۂ داغ و فوج غم لے کر

جیسے بچھڑے ہوئے کعبے میں صنم آتے ہیں

عشق کے دم قدم کی بات کرو

یہی ہیں ہر دھرم کے ساتھ کاغذ

ورنہ اک قافلہ ملک عدم ہیں ہم لوگ

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: