کیا چیز ہے یہ سعیِ پیہم، کیا جذبہِ کامل ہوتا ہے!

اللہ کو اگر منظور نہ ہو، ہر مقصد باطل ہوتا ہے

اک ٹیس سی پَیہم پاتا ہوں، کیا اس کو محبت کہتے ہیں !

محسوس مجھے میٹھا میٹھا کچھ درد سا اے دل ہوتا ہے

تسکین کو دھوکا دیتے ہیں، ناکامِ تمنا یہ کہہ کر:

ہر گام پہ منزل ہوتی ہے، ہر موج میں ساحل ہوتا ہے

یہ رنج و الم ہی میرے لیے اب زیست کا عنواں ہیں ہمدم

اس دنیا میں پہلے پہلے ہر کام ہی مشکل ہوتا ہے

تسکین سی کیوں مل جاتی ہے، مضرابِ دستِ شوق مجھے

ہر تارِ گریباں، کیا وحشت کے ساز کا حامل ہوتا ہے

دھیرے دھیرے چلنے والے، یہ راہ روی کو کیا جانیں

جو تھک کر راہ میں بیٹھ گیا ہو، صاحبِ منزل ہوتا ہے؟

کیا کم ہے شکیبؔ زار جو حُسنِ دوست سے نسبت رکھتا ہو

جس دل میں نہ ہو اُلفت کی تڑپ، کس کام کا وہ دل ہوتا ہے

شکیب جلالی

مصطفٰی خان شیفتہ ۔ غزل نمبر 38

یوں بزمِ گل رخاں میں ہے اس دل کو اضطراب

جیسے بہار میں ہو عنادل کو اضطراب

نیرنگِ حسن و عشق کے کیا کیا ظہور ہیں

بسمل کو اضطراب ہے، قاتل کو اضطراب

آ جائے ہم نشیں وہ پری وش تو کیا نہ ہو

دیوانہ وار ناصحِ عاقل کو اضطراب

سیماب وار سارے بدن کو ہے یاں تپش

تسکین ہو سکے جو ہو اک دل کو اضطراب

وہ با ادب شہید ہوں میرا جو نام لے

قاتل، تو پھر نہ ہو کسی بسمل کو اضطراب

افسوس بادِ آہ سے ہل بھی نہ جائے اور

یوں ہو ہوا سے پردۂ محمل کو اضطراب

میں جاں بہ لب ہوں اور خبرِ وصل جاں طلب

کیا کیا نہیں دہندہ و سائل کو اضطراب

لکھا ہے خط میں حال دلِ بے قرار کا

ہو گا ضرور شیفتہ حامل کو اضطراب

مصطفٰی خان شیفتہ

دیوان دوم غزل 904

کیا عبث مجنوں پئے محمل ہے میاں

یہ دوانہ بائولا عاقل ہے میاں

قند کا کون اس قدر مائل ہے میاں

جو ہے ان ہونٹوں ہی کا قائل ہے میاں

ہم نے یہ مانا کہ واعظ ہے ملک

آدمی ہونا بہت مشکل ہے میاں

چشم تر کی خیر جاری ہے سدا

سیل اس دروازے کا سائل ہے میاں

مرنے کے پیچھے تو راحت سچ ہے لیک

بیچ میں یہ واقعہ حائل ہے میاں

دل کی پامالی ستم ہے قہر ہے

کوئی یوں دلتا ہے آخر دل ہے میاں

آج کیا فرداے محشر کا ہراس

صبح دیکھیں کیا ہو شب حامل ہے میاں

دل تڑپتا ہی نہیں کیا جانیے

کس شکار انداز کا بسمل ہے میاں

چاہیے پیش از نماز آنکھیں کھلیں

حیف اس کا وقت جو غافل ہے میاں

رنگ بے رنگی جدا تو ہے ولے

آب سا ہر رنگ میں شامل ہے میاں

سامنے سے ٹک ٹلے تو دق نہ ہو

آسماں چھاتی پر اپنی سل ہے میاں

دل لگی اتنی جہاں میں کس لیے

رہگذر ہے یہ تو کیا منزل ہے میاں

بے تہی دریاے ہستی کی نہ پوچھ

یاں سے واں تک سو جگہ ساحل ہے میاں

چشم حق بیں سے کرو ٹک تم نظر

دیکھتے جو کچھ ہو سب باطل ہے میاں

دردمندی ہی تو ہے جو کچھ کہ ہے

حق میں عاشق کے دوا قاتل ہے میاں

برسوں ہم روتے پھرے ہیں ابر سے

زانو زانو اس گلی میں گل ہے میاں

کہنہ سالی میں ہے جیسے خورد سال

کیا فلک پیری میں بھی جاہل ہے میاں

کیا دل مجروح و محزوں کا گلہ

ایک غمگیں دوسرے گھائل ہے میاں

دیکھ کر سبزہ ہی خرم دل کو رکھ

مزرع دنیا کا یہ حاصل ہے میاں

مستعدوں پر سخن ہے آج کل

شعر اپنا فن سو کس قابل ہے میاں

کی زیارت میر کی ہم نے بھی کل

لاابالی سا ہے پر کامل ہے میاں

میر تقی میر