ٹیگ کے محفوظات: حالات

یہی بہتر کہ اُٹھا رکھوں ملاقات پہ بات

جولائی 24, 2018موجِ خیال، باصر کاظمی، غزلہات، ملاقات، برسات، حالات، راتadmin

خط میں کیا کیا لکھوں یاد آتی ہے ہر بات پہ بات

یہی بہتر کہ اُٹھا رکھوں ملاقات پہ بات

رات کو کہتے ہیں کل بات کریں گے دن میں

دن گزر جائے تو سمجھو کہ گئی رات پہ بات

اپنی باتوں کے زمانے تو ہوا بُرد ہوئے

اب کیا کرتے ہیں ہم صورتِ حالات پہ بات

لوگ جب ملتے ہیں کہتے ہیں کوئی بات کرو

جیسے رکھی ہوئی ہوتی ہو مِرے ہات پہ بات

مِل نہ سکنے کے بہانے اُنہیں آتے ہیں بہت

ڈھونڈ لیتے ہیں کوئی ہم بھی ملاقات پہ بات

دوسروں کو بھی مزا سننے میں آئے باصرِؔ

اپنے آنسو کی نہیں کیجیے برسات پہ بات

باصر کاظمی

Rate this:

شاعری ماجد! عبارت ہو اگر صدمات سے

اگست 31, 2017ماجد صدیقی، اَکھیاں بیچ الاؤ، غزلپات، آلات، حالات، رات، صدماتadmin

ماجد صدیقی ۔ غزل نمبر 21

کم نہیں وجدان پر اُتری ہوئی آیات سے

شاعری ماجد! عبارت ہو اگر صدمات سے

ہر تمنّا ہے اِسی کی دھند میں لپٹی ہوئی

مدّتوں سے ہے یہی رشتہ اندھیری رات سے

کر لئے بے ذائقہ وہ دن بھی جو آئے نہیں

درس کیا لیتے بھلا ہم اور جھڑتے پات سے

بن گئیں پیڑوں کی شاخیں بھی قفس کی تیلیاں

سامنا ہے باغ میں ایسے ہی کچھ حالات سے

ابنِ آدم اب کے پھر فرعون ٹھہرا ہے جسے

مل گیا زعمِ خدائی آہنی آلات سے

ماجد صدیقی

Rate this:

خیر سگالی کے اب وُہ جذبات کہاں

مارچ 31, 2017ماجد صدیقی، غزل، غزل سراہات، نغمات، گھات، جذبات، حالات، رات، صدماتadmin

ماجد صدیقی ۔ غزل نمبر 80

پت جھڑ کی رُت میں پیڑوں پر پات کہاں

خیر سگالی کے اب وُہ جذبات کہاں

لفظوں میں جھنکار کہاں اَب جذبوں کی

ہونٹوں پر جھرنوں جیسے نغمات کہاں

جھُول رہے ہیں جسکے تُند بہاؤ پر

دیکھیں لے کر جاتی ہے یہ رات کہاں

اپنی دُھن میں اُڑنے والا کیا جانے

کون کھڑا ہے اُس کی لگائے گھات کہاں

گُم سُم ہو جائیں مہمان کی دستک پر

گھر والوں کو لے آئے حالات کہاں

اُٹھے ہیں جو فرعونی دستاروں پر

کٹنے سے بچ سکتے ہیں وُہ ہات کہاں

ماجدؔ بنیاؤں سا حصّہ، جیون سے

لینے سے باز آتے ہیں صدمات کہاں

ماجد صدیقی

Rate this:

آج پھر چاند کی چودہویں رات ہے

اکتوبر 31, 2016ماجد صدیقی، آغاز، غزلپات، برسات، حالات، راتadmin

ماجد صدیقی ۔ غزل نمبر 68

تُجھ سے کہنے کی بس اَب یہی بات ہے

آج پھر چاند کی چودہویں رات ہے

اپنی خواہش، کہ گُل پیرہن ہو چلیں

اور فضائے چمن، وقفِ حالات ہے

چار سُو ایک ہی منظرِ بے سکوں

چار سُو خشک پتّوں کی برسات ہے

اَب تو ماجدؔ خزاں کے نہ منکر رہو

شاخ پر اَب تو کوئی کوئی پات ہے

ماجد صدیقی

Rate this:

لے اڑی جانے کہاں صرصرِ حالات ہمیں

اکتوبر 24, 2015شکیب جلالی، شعراء، غزلنغمات، بات، حالات، خیالات، رات، سات، شکایاتadmin

شکیب جلالی ۔ غزل نمبر 44

اب میسّر نہیں فرصت کے وہ دن رات ہمیں

لے اڑی جانے کہاں صرصرِ حالات ہمیں

آج وہ یوں نگہِ شوق سے بچ کر گزرے

جیسے یاد آئے کوئی بھولی ہوئی بات ہمیں

کیسے اڑتے ہوئے لمحوں کا تعاقب کیجے

دوستو اب تو یہی فکر ہے دن رات ہمیں

نہ سہی کوئی، ہجومِ گل و لالہ نہ سہی

دشت سے کم بھی نہیں کنجِ خیالات ہمیں

وہ اگر غیر نہ سمجھے تو کوئی بات کریں

دلِ ناداں سے بہت سی ہیں شکایات ہمیں

دھوپ کی لہر ہے تو، سایۂِ دیوار ہیں ہم

آج بھی ایک تعلق ہے ترے سات ہمیں

رنگ و مستی کے جزیروں میں لیے پھرتے ہیں

اس کی پائل سے چرائے ہوئے نغمات ہمیں

شکیب جلالی

Rate this:

حسن قبول کیا ہو مناجات کے تئیں

اکتوبر 6, 2015میر تقی میر، اساتذہ، غزلہات، ملاقات، مناجات، آفات، بات، حالات، خرابات، ذات، راتadmin

دیوان اول غزل 330

تا پھونکیے نہ خرقۂ طامات کے تئیں

حسن قبول کیا ہو مناجات کے تئیں

کیفیتیں اٹھے ہیں یہ کب خانقاہ میں

بدنام کر رکھا ہے خرابات کے تئیں

ڈریے خرام ناز سے خوباں کے ہمنشیں

ٹھوکر سے یہ اٹھاتے ہیں آفات کے تئیں

ہم جانتے ہیں یا کہ دل آشنا زدہ

کہیے سو کس سے عشق کے حالات کے تئیں

خوبی کو اس کے ساعد سیمیں کی دیکھ کر

صورت گروں نے کھینچ رکھا ہات کے تئیں

اتنی بھی حرف ناشنوی غیر کے لیے

رکھ کان ٹک سنا بھی کرو بات کے تئیں

سید ہو یا چمار ہو اس جا وفا ہے شرط

کب عاشقی میں پوچھتے ہیں ذات کے تئیں

آخر کے یہ سلوک ہم اب تیرے دیکھ کر

کرتے ہیں یاد پہلی ملاقات کے تئیں

آنکھوں نے میر صاحب و قبلہ ورم کیا

حضرت بکا کیا نہ کرو رات کے تئیں

میر تقی میر

Rate this:

صد شکر کہ اپنی راتوں میں اب ہجر کی کوئی رات نہیں

اپریل 3, 2012فیض احمد فیض، زنداں نامہ، غزلمات، بات، حالات، ذات، راتadmin

فیض احمد فیض ۔ غزل نمبر 12

کب یاد میں تیرا ساتھ نہیں، کب ہات میں تیرا ہات نہیں

صد شکر کہ اپنی راتوں میں اب ہجر کی کوئی رات نہیں

مشکل ہے اگر حالات وہاں، دل بیچ آئیں جاں دے آئیں

دل والو کوچہء جاناں میں‌کیا ایسے بھی حالات نہیں

جس دھج سے کوئی مقتل میں گیا، وہ شان سلامت رہتی ہے

یہ جان توآنی جانی ہے ، اس جاں کی تو کوئی بات نہیں

میدانِ وفا دربار نہیں یاں‌ نام و نسب کی پوچھ کہاں

عاشق تو کسی کا نام نہیں، کچھ عشق کسی کی ذات نہیں

گر بازی عشق کی بازی ہے جو چاہو لگا دو ڈر کیسا

گرجیت گئے تو کیا کہنا، ہارے بھی تو بازی مات نہیں

فیض احمد فیض

Rate this:

رہ رہے ہیں رات میں ہم رات کے مارے ہوئے

دسمبر 1, 2007منصور آفاق، شعراء، غزلبرسات، جات، حالات، ذات، راتadmin

منصور آفاق ۔ غزل نمبر 511

جا نہیں سکتے کہیں ظلمات کے مارے ہوئے

رہ رہے ہیں رات میں ہم رات کے مارے ہوئے

رات کے پچھلی گلی میں ایک میں اور ایک چاند

جاگتے پھرے ہیں دو حالات کے مارے ہوئے

دیدۂ شب میں پہن کر بارشوں کے پیرہن

پھر رہے ہیں موسمِ برسات کے مارے ہوئے

لوگ تھے اور فیض جاری تھی کسی درگاہ پر

لوٹ آئے ہم شعورِ ذات کے مارے ہوئے

ہم بھارت اور پاکستان کے منصور لوگ

دونوں کشمیری علاقہ جات کے مارے ہوئے

منصور آفاق

Rate this:

چلتی ہے کتنے پہر کسی ذات کی گھڑی

دسمبر 1, 2007منصور آفاق، شعراء، غزلفتوحات، ملاقات، مناجات، مکافات، مدارات، اوقات، آیات، حوالات، حالات، ذات، سماواتadmin

منصور آفاق ۔ غزل نمبر 460

کچھ کہہ رہی ہے مجھ سے ترے ہاتھ کی گھڑی

چلتی ہے کتنے پہر کسی ذات کی گھڑی

لیکن میں روک سکتانہیں رات کی گھڑی

دیوار پر لگادی ہے اوقات کی گھڑی

باہر سے لوٹ جائے وہ مہتاب کی کرن

اب ختم ہوچکی ہے ملاقات کی گھڑی

اچھی ہیں یار کی متلون مزاجیاں

ممکن ہے پھر وہ آئے مدارات کی گھڑی

بہتا ہے میرے سینے میں اک چشمۂ دعا

ٹھہری ہوئی ہے مجھ میں مناجات کی گھڑی

یہ اور بات دیکھ کے پہچانتے نہیں

آتی ہے روز، روزِ مکافات کی گھڑی

دیکھو ازل نژاد ہے چلتی ہوئی ہوا

سمجھو ابد خرام ہے آیات کی گھڑی

اب ختم ہورہی ہے مشقت نصیب کی

چلنے پہ آگئی ہے حوالات کی گھڑی

گھڑیال مسجدوں کے بتاتے ہیں اور وقت

کچھ اور کہہ رہی ہے سماوات کی گھڑی

اعمال دیکھ کر مرے آقائے لوح نے

امت سے چھین لی ہے فتوحات کی گھڑی

منصور بہہ رہا ہے مرے وقت سے لہو

چلتی سدا ہے زخم میں حالات کی گھڑی

منصور آفاق

Rate this:

اٹھ گئے ہم کہ کوئی بات تھی ہونے والی

دسمبر 1, 2007منصور آفاق، شعراء، غزلمفاجات، ملاقات، مناجات، مات، مدارات، بات، برسات، جنسجمادات، حالات، خیرات، رات، سماوات، ساتھadmin

منصور آفاق ۔ غزل نمبر 455

اک تعلق کی شروعات تھی ہونے والی

اٹھ گئے ہم کہ کوئی بات تھی ہونے والی

لوح پر دیکھ لیا مشرق و مغرب کا نصیب

بس کہیں صبح ، کہیں رات تھی ہونے والی

دیکھنے والا تھا، پھر مڑکے، کوئی ایک نظر

کیا ہوا ، دید کی خیرات تھی ہونے والی

اپنے قہوے کا سماوار ابھی ٹھنڈا تھا

اور مسجد میں مناجات تھی ہونے والی

لینے آئے ہوئے تھے رومی و اقبال ہمیں

اپنی باہو سے ملاقات تھی ہونے والی

کیا ہوا ، وقت بدلنے کی خبر آئی تھی

وا کہیں چشمِ سماوات تھی ہونے والی

تم نہ ملتے تو یہاں سے بھی ہمیں جانا تھا

ایسی کچھ صورتِ حالات تھی ہونے والی

اب جہاں دھوپ نکل آئی ہے کنجِ لب سے

کچھ ہی پہلے یہاں برسات تھی ہونے والی

اس کے کہنے پہ بدل آئے ہیں رستہ اپنا

جب محبت میں اسے مات تھی ہونے والی

ہم چلے آئے ہیں اُس حسن کے دستر خواں سے

جب ہماری بھی مدارات تھی ہونے والی

قتل نامہ تھا کہ جلاد نے ڈھاڑیں ماریں

کیسی اک مرگِ مفاجات تھی ہونے والی

ارتقاء آخری منزل پہ تھا میرا اُس وقت

خلق جب جنسِجمادات تھی ہونے والی

میں پلٹ آیا ہوں منصور ’’مقامِ ہو‘‘ سے

اک عجب بات مرے ساتھ تھی ہونے والی

منصور آفاق

Rate this:

فوٹو گراف ہوتی ہوئی بات کے بھی دیکھ

دسمبر 1, 2007منصور آفاق، شعراء، غزلملاقات، بات، برسات، حالات، راتadmin

منصور آفاق ۔ غزل نمبر 413

انداز گفتگو کے، مدارات کے بھی دیکھ

فوٹو گراف ہوتی ہوئی بات کے بھی دیکھ

ممکن نہیں ہے قید میں رکھنا چراغ کو

یہ اضطراب اپنی سیہ رات کے بھی دیکھ

بادل پہن لیے ہیں درختوں کے جسم نے

یہ معجزے پہاڑ پہ برسات کے بھی دیکھ

اک آخری امید تھی مٹی میں مل گئی

کچھ روز اب تُو سختیِ حالات کے بھی دیکھ

قربت کی انتہا پہ ہیں صدیوں کے فاصلے

منصور سلسلے یہ ملاقات کے بھی دیکھ

منصور آفاق

Rate this:

پھر بھی میں ہوں جلتی بجھتی روشنی کے ساتھ ساتھ

دسمبر 1, 2007منصور آفاق، شعراء، غزلپات، برسات، حالات، ذات، ساتھadmin

منصور آفاق ۔ غزل نمبر 405

چل رہی ہے زندگی کی اک بھیانک رات ساتھ

پھر بھی میں ہوں جلتی بجھتی روشنی کے ساتھ ساتھ

میں نے سوچا کیا کہیں گے میرے بچپن کے رفیق

اور پھر رختِ سفر میں رکھ لیے حالات ساتھ

میں اکیلا رونے والا تو نہیں ہوں دھوپ میں

دے رہی ہے کتنے برسوں سے مرا برسات ساتھ

چاہیے تھا صرف تعویذِ فروغِ کُن مجھے

دے دیا درویش نے اذنِ شعورِ ذات ساتھ

یہ خزاں زادے کہیں کیا گل رتوں کے مرثیے

یونہی بے مقصد ہواؤں کے ہیں سوکھے پات ساتھ

ایک بچھڑے یار کی پرسوز یادوں میں مگن

کوئی بگلا چل رہا تھا پانیوں کے ساتھ ساتھ

منصور آفاق

Rate this:

میرے ساتھ چلی جاؤ تم یا سورج کے ساتھ۔ ایک ہی بات

دسمبر 1, 2007منصور آفاق، شعراء، غزلہاتھ، فرمودات، مات، پات، برسات، حالات، ساتھ، ساداتadmin

منصور آفاق ۔ غزل نمبر 139

اُس کی منزل تاریکی ہے،میری منزل رات۔ ایک ہی بات

میرے ساتھ چلی جاؤ تم یا سورج کے ساتھ۔ ایک ہی بات

موسم اور میں ایک ہی دریا کے دو پاگل فرد۔درد نورد

برکھا رت کے آنسو ہوں یاآنکھوں کی برسات۔ ایک ہی بات

تیز ہوا کی زد پر دونوں ،ایک ہی پل کا روپ۔موت کی دھوپ

جیون سے آویختہ میں یا پیڑ سے مردہ پات۔ ایک ہی بات

اس کے کنجِ لب میں میری مسکانوں کی دھول۔ ہجرکے پھول

یعنی جیت کسی کی اور مسلسل میری مات۔ ایک ہی بات

میں گمنام یہاں تو اس کا جانے کون مقام۔کون غلام

ملک سخن کامیں شہزادہ اور ہے وہ سادات۔ ایک ہی بات

تیز کراہیں ، آہیں ، چیخیں ،گرمی اور سیلاب۔سانس عذاب

پاکستان کے منظر ہو ں یادوزخ کے حالات۔ ایک ہی بات

رنگ گریں گے قوسِ قزح سے،پھولوں سے سنگیت۔میت کے گیت

صبحِ بدن پر میرا ہو یا بادصبا کا ہاتھ۔ ایک ہی بات

کیسے کہوں میں باہو ، بلھا ، وارث ، شاہ حسین۔پیر فرید

کیسے کہوں منصور کے یا اقبال کے فرمودات۔ ایک ہی بات

منصور آفاق

Rate this:

انگڑائی لے کے موج خرابات رہ گئی

جنوری 8, 1972باقی صدیقی، شعراء، غزلبات، حالات، خرابات، ذاتadmin

باقی صدیقی ۔ غزل نمبر 158

ان کے لبوں پر آ کے مری بات رہ گئی

انگڑائی لے کے موج خرابات رہ گئی

پھر رخ بدل دیا غم ہستی نے دہر کا

پھر زیر بحث آ کے تری ذات رہ گئی

ہونے کو ان سے سینکڑوں باتیں ہوئیں مگر

جس بات کا گلہ تھا وہی بات رہ گئی

باقیؔ کسی سے ان کی شکایت نہ کر سکے

کچھ یوں بدل کے صورت حالات رہ گئی

باقی صدیقی

Rate this: