ٹیگ کے محفوظات: جاں

دیوانوں کی تکراروں سے، خاموشیِ بیاباں ٹوٹ گئی

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلگلستاں،بیاباں،جاں،دوراں،زنداں،طوفاںadmin

وحشت کے ان معماروں سے، بنیادِ ایواں ٹوٹ گئی

دیوانوں کی تکراروں سے، خاموشیِ بیاباں ٹوٹ گئی

اے عزمِ جواں شورش کیسی، اب تک تو یہ سنتے آئے ہیں

دو نازک سی پتواروں سے، ہر جرأتِ طوفاں ٹوٹ گئی

تخیئل کی دَرپردہ ضربیں، وحشی کا سہارا بن ہی گئیں

زنجیروں کی جھنکاروں سے، پابندیِ زنداں ٹوٹ گئی

زنداں کی اندھیری راتوں میں، جینے کا سہارا ختم ہُوا

افسوس کہ ان بے چاروں سے، تصویرِ گلستاں ٹوٹ گئی

دیوانوں نے آخر گلشن، رو رو کے بیاباں کر ڈالا

آنکھوں کے لرزتے پاروں سے، دیوارِ گلستاں ٹوٹ گئی

قسمت کی کرشمہ سازی تھی یا لُطف و کرم ملّاحوں کا

ٹکرا کر خشک کناروں سے پروردہِ طوفاں ٹوٹ گئی

دکھ درد کے ماروں کا ہر غم، ساغر کی کھنک میں ڈوب گیا

پیمانوں کی جھنکاروں سے فکرِ غمِ دوراں ٹوٹ گئی

بارِ غمِ اُلفت اُٹھ نہ سکا، کم ظرفوں کی نبضیں چھوٹ گئیں

افسوس ہے ان بیماروں سے، توقیرِ غمِ جاں ٹوٹ گئی

ہستیِ شکیبؔ زار کو، رنج و غم کے ہی چرکے کافی تھے

ان نازک سی دیواروں سے تعمیرِ دل و جاں ٹوٹ گئی

شکیب جلالی

مٹے ہیں لاکھوں ستارے ہی کہکشاں کے لیے

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلکہکشاں،کہاں،جاں،خزاں،داں،داستاںadmin

ہر ایک موت ہے تعمیرِ نکتہ داں کے لیے

مٹے ہیں لاکھوں ستارے ہی کہکشاں کے لیے

یہ بہکی بہکی سی باتیں یہ مضمحل نظریں

سُکوں نواز نہ بن جائیں نیم جاں کے لیے

غَرَض کے واسطے جیتی ہے فطرتاً دنیا

بہار پھول کھلاتی نہیں خزاں کے لیے

خوشی زمانے کو مرغوب ہی سہی، لیکن

الم حَسین ہے عنوانِ داستاں کے لیے

خرامِ ناز، نظرمست، منتشر زلفیں

یہ اہتمام ہے کیوں، کس لیے، کہاں کے لیے!

حقائقِ غمِ اُلفت کبھی چُھپے ہیں شکیبؔ!

بیان کیسے بدلتا میں راز داں کے لیے

شکیب جلالی

اک کارگہِ شیشہ گراں ہیں تری آنکھیں

مئی 31, 2021کلیاتِ شکیب جلالی ۔ غزلیں،شکیب جلالی،غزللباں،نگراں،کہاں،گراں،جاں،خواں،زباںadmin

آئینہِ جذباتِ نہاں ہیں تری آنکھیں

اک کارگہِ شیشہ گراں ہیں تری آنکھیں

سر چشمہِ افکار جواں ہیں تری آنکھیں

تابندہ خیالات کی جاں ہیں تری آنکھیں

اندازِ خموشی میں ہے گفتار کا پہلو

گویا نہ سہی، چپ بھی کہاں ہیں تری آنکھیں

جاؤں گا کہاں توڑ کے زنجیرِ وفا کو

ہر سو مری جانب نگراں ہیں تری آنکھیں

کہنا ہے وہی جس کی توقع ہے تجھے بھی

مت پوچھ مرے دل کی زباں ہیں تری آنکھیں

پلکوں کے جھروکوں سے سبو جھانک رہے ہیں

امید گہِ تشنہ لباں ہیں تری آنکھیں

یوں ہی تو نہیں امڈی چلی آتی ہیں غزلیں

پہلو میں مرے ، زمزمہ خواں ہیں تری آنکھیں

شکیب جلالی

کچھ بھی میرے سِوا یہاں نہ رہے

مئی 30, 2021عرفان ستار،غزلہاں،نشاں،وہاں،یہاں،کہاں،کلاں،گماں،اماں،بیاں،جہاں،جاں،درمیاں،رائگاں،رازداں،زیاں،سائباںadmin

یہ زمیں اور آسماں نہ رہے

کچھ بھی میرے سِوا یہاں نہ رہے

میں ہی اول بھی اور آخر بھی

کوئی بھی میرے درمیاں نہ رہے

بس معانی ہوں، لفظ کھو جائیں

روح رہ جائے، جسم و جاں نہ رہے

میری یکسوئی میں پڑے نہ خلل

"میں رہوں اور یہ جہاں نہ رہے”

مہرباں آج مجھ پہ ہے جو نظر

عین ممکن ہے کل کلاں نہ رہے

ہاں بلا سے مری، رہے نہ وجود

نہیں رہتا عدم بھی، ہاں نہ رہے

سوچتا ہوں خموش ہو جاؤں

اور یہ حرفِ رائگاں نہ رہے

کاش چھا جائے ایک ابرِ اماں

اور کوئی بھی بے اماں نہ رہے

اک سہارا۔ ہے بے یقینوں کا

کیا کریں وہ اگر گماں نہ رہے

بات کیسی جو سننے والا نہ ہو

راز کیسا جو رازداں نہ رہے

وہی ہوتا ہے رائگاں کہ جو ہو

نہ رہوں میں تو یہ زیاں نہ رہے

زخم تو سارے بھر ہی جاتے ہیں

بات تب ہے اگر نشاں نہ رہے

ہے وہاں ماں، یہاں مرے بچے

اب رہے دل کہاں، کہاں نہ رہے

زخمِ دل کو زبان مل جائے

درد ناقابلِ بیاں نہ رہے

کیا خبر کس گھڑی چلے آندھی

اور سر پر یہ سائباں نہ رہے

شہرِ دام و درم کی تم جانو

اہلِ دل تو کبھی وہاں نہ رہے

ان دنوں ہے یہاں، مگر عرفان

بس چلے تو کبھی یہاں نہ رہے

عرفان ستار

جہاں پہ تُو بھی نہیں تھا وہاں بھی زندہ رہے

مئی 30, 2021عرفان ستار،غزلوہاں،گماں،جاں،داستاں،درمیاں،زیاں،زباںadmin

بہت خجل ہیں کہ ہم رائگاں بھی زندہ رہے

جہاں پہ تُو بھی نہیں تھا وہاں بھی زندہ رہے

عجیب شرط ہے اس بے یقیں مزاج کی بھی

کہ تُو بھی پاس ہو تیرا گماں بھی زندہ رہے

تجھے یہ ضد ہے مگر اس طرح نہیں ہوتا

کہ تُو بھی زندہ رہے داستاں بھی زندہ رہے

وہ کون لوگ تھے جن کا وجود جسم سے تھا

یہ کون ہیں جو پسِ جسم و جاں بھی زندہ رہے

جو یہ نہ ہو تو سخن کا کوئی جواز نہیں

ضمیر زندہ رہے تو زباں بھی زندہ رہے

یہ کائنات فقط منفعت کا نام نہیں

یہاں پہ کوئی برائے زیاں بھی زندہ رہے

عدم میں جو بھی نہیں تھا وہ سب وجود میں تھا

یہ ہم ہی تھے جو کہیں درمیاں بھی زندہ رہے

عرفان ستار

تُو جو موجود نہ ہوتا، تو کہاں تھے ہم بھی

مئی 30, 2021عرفان ستار،غزلفغاں،نگراں،یہاں،کہاں،کجکلہاں،گماں،گراں،بیاں،جاں،دگراں،زیاں،سخناںadmin

تیری نسبت سے زمانے پہ عیاں تھے ہم بھی

تُو جو موجود نہ ہوتا، تو کہاں تھے ہم بھی

حرمتِ حرف نہیں ہے سو یہ ارزانی ہے

ورنہ وہ دن بھی تھے جب خوابِ گراں تھے ہم بھی

ہم بھی حیراں ہیں بہت خود سے بچھڑ جانے پر

مستقل اپنی ہی جانب نگراں تھے ہم بھی

اب کہیں کیا، کہ وہ سب قصہءِ پارینہ ہُوا

رونقِ محفلِ شیریں سخناں تھے ہم بھی

وقت کا جبر ہی ایسا ہے کہ خاموش ہیں اب

ورنہ تردیدِ صفِ کجکلہاں تھے ہم بھی

رنج مت کر، کہ تجھے ضبط کا یارا نہ رہا

کس قدر واقفِ آدابِ فغاں تھے ہم بھی

تُو بھی کردار کہانی سے الگ تھا کوئی

اپنے قصے میں حدیثِ دگراں تھے ہم بھی

کیسی حیرت، جو کہیں ذکر بھی باقی نہ رہا

تُو بھی تحریر نہ تھا، حرفِ بیاں تھے ہم بھی

ہم کہ رکھتے تھے یقیں اپنی حقیقت سے سِوا

اب گماں کرنے لگے ہیں کہ گماں تھے ہم بھی

رائگاں ہوتا رہا تُو بھی پئے کم نظراں

ناشناسوں کے سبب اپنا زیاں تھے ہم بھی

تُو بھی کس کس کے لیے گوش برآواز رہا

ہم کو سنتا تو سہی، نغمہءِ جاں تھے ہم بھی

ہم نہیں ہیں، تو یہاں کس نے یہ محسوس کیا؟

ہم یہاں تھے بھی تو ایسے، کہ یہاں تھے ہم بھی

عرفان ستار

میں کہ ٹھہرا گدائے دیارِ سخن مجھ کو یہ ذمّہ داری کہاں سونپ دی

مئی 30, 2021عرفان ستار،غزلوشاں،کہاں،کماں،کراں،گماں،اماں،آئندگاں،جاں،دلبراں،داستاں،رائگاں،زیاں،عناںadmin

مری کم مائیگی کو ترے ذوق نے دولتِ حرفِ تازہ بیاں سونپ دی

میں کہ ٹھہرا گدائے دیارِ سخن مجھ کو یہ ذمّہ داری کہاں سونپ دی

قاصدِ شہرِ دل نے مرے خیمۂ خواب میں آ کے مجھ سے کہا جاگ جا

بادشاہِ جنوں نے تجھے آج سے لشکرِ اہلِ غم کی کماں سونپ دی

میرا ذوقِ سفر یوں بھی منزل سے بڑھ کر کسی ہمرہی کا طلب گار تھا

اس لیے وصل کے موڑ پر ہجر کو اُس نے رہوارِ دل کی عناں سونپ دی

تشنگی کو مرے شوق کی لہر نے کس سرابِ نظر کے حوالے کیا

کیسے بنجر یقیں کو مرے خواب نے اپنی سر سبز فصلِ گماں سونپ دی

احتیاطِ نظر اور وضعِ خرد کے تقاضوں کی تفصیل رہنے ہی دے

یہ مجھے بھی خبر ہے کہ میں نے تجھے اپنی وارفتگی رائگاں سونپ دی

اپنے ذوقِ نظر سے تری چشمِ حیراں کو تازہ بہ تازہ مناظر دیے

تیرے پہلو میں دھڑکن جگانے کی خاطر ترے جسم کو اپنی جاں سونپ دی

رازداری کی مہلت زیادہ نہ ملنے پہ احباب سب مجھ سے ناراض ہیں

قصہ گو مجھ سے خوش ہیں کہ میں اُنہیں ایک پُر ماجرا داستاں سونپ دی

میری وحشت پسندی کو آرائشِ زلف و رخسار و ابرو کی فرصت کہاں

تُو نے کس بے دلی سے یہ امید کی یہ کسے خدمتِ مہ وشاں سونپ دی

دل پہ جب گُل رُخوں اور عشوہ طرازوں کی یلغار کا زور بڑھنے لگا

میں نے گھبرا کے آخر تری یاد کو اپنی خلوت گہِ بے اماں سونپ دی

کار گاہِ زمانہ میں جی کو لگانے سے آخر خسارہ ہی مقدور تھا

یہ بھی اچھا ہوا میں نے یہ زندگی تیرے غم کو برائے زیاں سونپ دی

اُس نے ذوقِ تماشا دیا عشق کو خوشبوئوں کو صبا کے حوالے کیا

مجھ رفاقت طلب کو نگہبانیٔ دشتِ وحشت کراں تا کراں سونپ دی

مجھ میں میرے سوا کوئی تھا جو ہوس کے تقاضے نبھانے پہ مائل بھی تھا

میں نے بھی تنگ آ کر اُسی شخص کو ناز برداریٔ دلبراں سونپ دی

ایک امکان کیا گنگنایا مرے چند اشعار میں حرفِ اظہار میں

میں یہ سمجھا خدائے سخن نے مجھے مسندِ بزمِ آئندگاں سونپ دی

عرفان ستار

تیری آسودہ حالی کی امید پر، کر گئے ہم تو اپنا زیاں یا اخی

مئی 30, 2021عرفان ستار،غزلمہرباں،نشاں،یہاں،کہاں،آسماں،بیاں،جاں،دھواں،داستاں،درمیاں،زیاں،سائباںadmin

رزق کی جستجو میں کسے تھی خبر، تُو بھی ہو جائے گا رائگاں یا اخی

تیری آسودہ حالی کی امید پر، کر گئے ہم تو اپنا زیاں یا اخی

جب نہ تھا یہ بیابانِ دیوار و در، جب نہ تھی یہ سیاہی بھری رہگزر

کیسے کرتے تھے ہم گفتگو رات بھر، کیسے سنتا تھا یہ آسماں یا اخی

جب یہ خواہش کا انبوہِ وحشت نہ تھا، شہر اتنا تہی دستِ فرصت نہ تھا

کتنے آباد رہتے تھے اہلِ ہنر، ہر نظر تھی یہاں مہرباں یا اخی

یہ گروہِ اسیرانِ کذب و ریا، بندگانِ درم بندگانِ انا

ہم فقط اہلِ دل یہ فقط اہلِ زر، عمر کیسے کٹے گی یہاں یا اخی

خود کلامی کا یہ سلسلہ ختم کر، گوش و آواز کا فاصلہ ختم کر

اک خموشی ہے پھیلی ہوئی سر بہ سر، کچھ سخن چاہیے درمیاں یا اخی

جسم کی خواہشوں سے نکل کر چلیں، زاویہ جستجو کا بدل کا چلیں

ڈھونڈنے آگہی کی کوئی رہگزر، روح کے واسطے سائباں یا اخی

ہاں کہاتھا یہ ہم نے بچھڑتے ہوئے، لوٹ آئیں گے ہم عمر ڈھلتے ہوئے

ہم نے سوچا بھی تھا واپسی کا مگر، پھر یہ سوچا کہ تُو اب کہاں یا اخی

خود شناسی کے لمحے بہم کب ہوئے، ہم جو تھے درحقیقت وہ ہم کب ہوئے

تیرا احسان ہو تُو بتا دے اگر، کچھ ہمیں بھی ہمارا نشاں یا اخی

قصۂ رنج و حسرت نہیں مختصر، تجھ کو کیا کیا بتائے گی یہ چشمِ تر

آتش غم میں جلتے ہیں قلب و جگر، آنکھ تک آ رہا ہے دھواں یا اخی

عمر کے باب میں اب رعایت کہاں، سمت تبدیل کرنے کی مہلت کہاں

دیکھ بادِ فنا کھٹکھٹاتی ہے در، ختم ہونے کو ہے داستاں یا اخی

ہو چکا سب جو ہونا تھا سود و زیاں، اب جو سوچیں تو کیا رہ گیا ہے یہاں

اور کچھ فاصلے کا یہ رختِ سفر، اور کچھ روز کی نقدِ جاں یا اخی

تُو ہمیں دیکھ آ کر سرِ انجمن، یوں سمجھ لے کہ ہیں جانِ بزمِ سخن

ایک تو روداد دلچسپ ہے اس قدر، اور اس پر ہمارا بیاں یا اخی

عرفان ستار

کہیں ہو نہ جاؤں میں رائگاں، مری آدھی عمر گزر گئی

مئی 30, 2021عرفان ستار،غزلمکاں،ناگہاں،گماں،جاں،دوستاں،داں،داستاں،درمیاں،رائگاں،رازداںadmin

یونہی بے یقیں یونہی بے نشاں، مری آدھی عمر گزر گئی

کہیں ہو نہ جاؤں میں رائگاں، مری آدھی عمر گزر گئی

کبھی سائباں نہ تھا بہم، کبھی کہکشاں تھی قدم قدم

کبھی بے مکاں کبھی لا مکاں، مری آدھی عمر گزر گئی

ترے وصل کی جو نوید ہے، وہ قریب ہے کہ بعید ہے

مجھے کچھ خبر تو ہو جانِ جاں، مری آدھی عمر گزر گئی

کبھی مجھ کو فکرِ معاش ہے، کبھی آپ اپنی تلاش ہے

کوئی گُر بتا مرے نکتہ داں، مری آدھی عمر گزر گئی

کبھی ذکرِ حرمتِ حرف میں، کبھی فکرِ آمد و صرف میں

یونہی رزق و عشق کے درمیاں، مری آدھی عمر گزر گئی

کوئی طعنہ زن مری ذات پر، کوئی خندہ زن کسی بات پر

پئے دل نوازیٔ دوستاں، مری آدھی عمر گزر گئی

ابھی وقت کچھ مرے پاس ہے، یہ خبر نہیں ہے قیاس ہے

کوئی کر گلہ مرے بد گماں، مری آدھی عمر گزر گئی

اُسے پا لیا اُسے کھو دیا، کبھی ہنس دیا کبھی رو دیا

بڑی مختصر سی ہے داستاں، مری آدھی عمر گزر گئی

تری ہر دلیل بہت بجا، مگر انتظار بھی تا کجا

ذرا سوچ تو مرے رازداں، مری آدھی عمر گزر گئی

کہاں کائنات میں گھر کروں، میں یہ جان لوں تو سفر کروں

اسی سوچ میں تھا کہ ناگہاں، مری آدھی عمر گزر گئی

عرفان ستار

عجب یقین پسِ پردہ ءِ گماں ہے یہاں

مئی 30, 2021عرفان ستار،غزلنقدجاں،گماں،آسماں،اماں،بیاں،جاں،داستاں،درمیاں،رفتگاں،رائیگاںadmin

نہیں ہے جو، وہی موجود و بے کراں ہے یہاں

عجب یقین پسِ پردہ ءِ گماں ہے یہاں

نہ ہو اداس، زمیں شق نہیں ہوئی ہے ابھی

خوشی سے جھوم، ابھی سر پہ آسماں ہے یہاں

یہاں سخن جو فسانہ طراز ہو، وہ کرے

جو بات سچ ہے وہ ناقابلِ بیاں ہے یہاں

نہ رنج کر، کہ یہاں رفتنی ہیں سارے ملال

نہ کر ملال، کہ ہر رنج رائیگاں ہے یہاں

زمیں پلٹ تو نہیں دی گئی ہے محور پر؟

نمو پذیر فقط عہدِ رفتگاں ہے یہاں

یہ کارزارِ نفس ہے، یہاں دوام کسے

یہ زندگی ہے مری جاں، کسے اماں ہے یہاں

ہم اور وصل کی ساعت کا انتظار کریں؟

مگر وجود کی دیوار درمیاں ہے یہاں

چلے جو یوں ہی ابد تک، تو اِس میں حیرت کیا؟

ازل سے جب یہی بے ربط داستاں ہے یہاں

جو ہے وجود میں، اُس کو گماں کی نذر نہ کر

یہ مان لے کہ حقیقت ہی جسم و جاں ہے یہاں

کہا گیا ہے جو وہ مان لو، بلا تحقیق

کہ اشتباہ کی قیمت تو نقدِجاں ہے یہاں

عرفان ستار

‎دھیان جا نکلا مگر اک روئے تاباں کی طرف

مئی 30, 2021عرفان ستار،غزلہاں،فروزاں،مہماں،مژگاں،آساں،امکاں،تاباں،جاںadmin

آج کرنا تھی توجہ چاکِ داماں کی طرف

‎دھیان جا نکلا مگر اک روئے تاباں کی طرف

‎جب ہوا کے نام پہنچا آمدِ شب کا پیام

‎ایک جھونکا چل دیا شمعِ فروزاں کی طرف

‎ایک چہرہ جگمگایا ہے سرِ دشتِ خیال

‎ایک شعلہ اٹھ رہا ہے دل سے مژگاں کی طرف

‎یہ بیاباں اور اس میں چیختی گاتی ہوا

‎ان سے دل بھر لے تو جاؤں راہِ آساں کی طرف

‎اس طرح حائل نہیں ہوتے کسی کی راہ میں

‎کیوں بھلا اتنی توجہ ایک مہماں کی طرف

‎عین ممکن ہے کہ تو سچ بول کر زندہ رہے

‎میں اشارہ کر رہا ہوں ایک امکاں کی طرف

‎اک تقاضا بے بسی کی راکھ میں دہکا ہوا

‎اک تذبذب کا سفر انکار سے ہاں کی طرف

‎جس کے بدلے موت صدیوں کی بسر کرنا پڑے

‎زندگی کا قرض اتنا تو نہیں جاں کی طرف

عرفان ستار

ہر لمحہ وہ رقصِ دل و جاں بھول گئے کیا

مئی 20, 2021ضامن جعفری،غزلمیاں،نگراں،گماں،بیاں،جہاں،جاں،دہناںadmin

آغازِ محبت کا سماں بھول گئے کیا

ہر لمحہ وہ رقصِ دل و جاں بھول گئے کیا

چہرے کی تب و تاب وہ آہٹ پہ ہماری

ہر پل وہ سوئے دَر نِگَراں بھول گئے کیا

کیا حرفِ محبت کو تکلّم کی ضرورت

آنکھوں میں ہے جو حُسنِ بیاں بھول گئے کیا

وہ حسن و جوانی کے لپکتے ہوئے شعلے

اور اُن میں سکونِ دو جہاں بھول گئے کیا

ہر چیز اہم تھی، نظر و لہجہ و الفاظ

ہر چیز پہ سو سو تھے گماں بھول گئے کیا

یوں یاد دِلاتا ہوں اُنہیں وعدۂ فردا

میں آپ کے صدقے مری جاں بھول گئے کیا

ہے کوئی جو اُن سے یہ ذرا پوچھ کے آئے

قدریں وہ بزرگوں کی میاں بھول گئے کیا

شیرینیٔ گفتار ہے ضامنؔ جو تمہاری

ہے صدقۂ شیریں دہناں بھول گئے کیا

ضامن جعفری

ہوتے ہیں غمِ دل کے بیاں اور طرح کے

اگست 4, 2018ناصر کاظمی،دیوانِ ناصر،غزلفغاں،نشاں،گماں،گراں،بیاں،جہاں،جواں،جاں،خزاںadmin

قصے ہیں خموشی میں نہاں اور طرح کے

ہوتے ہیں غمِ دل کے بیاں اور طرح کے

تھی اور ہی کچھ بات کہ تھا غم بھی گوارا

حالات ہیں اب درپے جاں اور طرح کے

اے راہروِ راہِ وفا دیکھ کے چلنا

اس راہ میں ہیں سنگِ گراں اور طرح کے

کھٹکا ہے جدائی کا نہ ملنے کی تمنا

دل کو ہیں مرے وہم و گماں اور طرح کے

پر سال تو کلیاں ہی جھڑی تھیں مگر اب کے

گلشن میں ہیں آثارِ خزاں اور طرح کے

دُنیا کو نہیں تاب مرے درد کی یارب

دے مجھ کو اسالیبِ فغاں اور طرح کے

ہستی کا بھرم کھول دیا ایک نظر نے

اب اپنی نظر میں ہیں جہاں اور طرح کے

لشکر ہے نہ پرچم ہے نہ دَولت ہے نہ ثروت

ہیں خاک نشینوں کے نشاں اور طرح کے

مرتا نہیں اب کوئی کسی کے لیے ناصر

تھے اپنے زمانے کے جواں اور طرح کے

ناصر کاظمی

ابر گرجا گلِ باراں چمکے

اگست 4, 2018ناصر کاظمی،دیوانِ ناصر،غزلہجراں،باراں،جاں،عنواں،غریباںadmin

پھر نئی فصل کے عنواں چمکے

ابر گرجا گلِ باراں چمکے

آنکھ جھپکوں تو شرارے برسیں

سانس کھینچوں تو رگِ جاں چمکے

کیا بگڑ جائے گا اے صبحِ جمال

آج اگر شامِ غریباں چمکے

اے فلک بھیج کوئی برقِ خیال

کچھ تو شامِ شبِ ہجراں چمکے

پھر کوئی دل کو دُکھائے ناصر

کاش یہ گھر کسی عنواں چمکے

ناصر کاظمی

دل کا یہ حال کہاں تھا پہلے

اگست 4, 2018ناصر کاظمی،برگِ نے،غزلفغاں،مکاں،نہاں،نشاں،کہاں،گراں،اماں،جہاں،جواں،جاں،خزاں،دھواں،رواں،سماںadmin

کچھ توں احساسِ زیاں تھا پہلے

دل کا یہ حال کہاں تھا پہلے

اب تو جھونکے سے لرز اُٹھتا ہوں

نشۂ خوابِ گراں تھا پہلے

اب تو منزل بھی ہے خود گرمِ سفر

ہر قدم سنگِ نشاں تھا پہلے

سفرِ شوق کے فرسنگ نہ پوچھ

وقت بے قیدِ مکاں تھا پہلے

یہ الگ بات کہ غم راس ہے اب

اس میں اندیشۂ جاں تھا پہلے

یوں نہ گھبرائے ہوے پھرتے تھے

دل عجب کنجِ اماں تھا پہلے

اب بھی تو پاس نہیں ہے لیکن

اس قدر دور کہاں تھا پہلے

ڈیرے ڈالے ہیں بگولوں نے جہاں

اُس طرف چشمہ رواں تھا پہلے

اب وہ دریا، نہ وہ بستی، نہ وہ لوگ

کیا خبر کون کہاں تھا پہلے

ہر خرابہ یہ صدا دیتا ہے

میں بھی آباد مکاں تھا پہلے

اُڑ گئے شاخ سے یہ کہہ کے طیور

سرو اک شوخ جواں تھا پہلے

کیا سے کیا ہو گئی دنیا پیارے

تو وہیں پر ہے جہاں تھا پہلے

ہم نے آباد کیا ملکِ سخن

کیسا سنسان سماں تھا پہلے

ہم نے بخشی ہے خموشی کو زباں

درد مجبورِ فغاں تھا پہلے

ہم نے ایجاد کیا تیشۂ عشق

شعلہ پتھر میں نہاں تھا پہلے

ہم نے روشن کیا معمورۂ غم

ورنہ ہر سمت دھواں تھا پہلے

ہم نے محفوظ کیا حسنِ بہار

عطرِ گل صرفِ خزاں تھا پہلے

غم نے پھر دل کو جگایا ناصر

خانہ برباد کہاں تھا پہلے

ناصر کاظمی

دیکھ دنیائے جسم و جاں سے دور

اگست 4, 2018ناصر کاظمی،برگِ نے،غزلمکاں،یہاں،کارواں،آسماں،آشیاں،جاں،خزاں،زباں،شمعداںadmin

دُور اِس تیرہ خاکداں سے دُور

دیکھ دنیائے جسم و جاں سے دور

آنے والی بہار کے افسوں

دیکھ ویرانۂ خزاں سے دُور

پھول جلتے ہیں شاخچوں سے جدا

شمع روتی ہے شمعداں سے دُور

شہر خلقِ خدا سے بیگانہ

کارواں میرِ کارواں سے دُور

تیرے زندانیوں کی کون سنے

برق چمکی ہے آشیاں سے دُور

چیختی ہیں ڈراؤنی راتیں

چاند نکلا ہے آسماں سے دُور

سو گیا پچھلی رات کا جادو

کوئی اب لے چلے یہاں سے دُور

دل عجب گوشۂ فراغت ہے

کیوں بھٹکتے ہو اس مکاں سے دُور

کوئی سنتا نہیں یہاں ناصر

بات دل کی رہی زباں سے دور

ناصر کاظمی

خوفِ بے مہریٔ خزاں بھی ہے

اگست 4, 2018ناصر کاظمی،برگِ نے،غزلگراں،بیاں،جاں،خزاں،دھواں،رفتگاں،رواں،سماں،شررفشاںadmin

فکرِ تعمیرِ آشیاں بھی ہے

خوفِ بے مہریٔ خزاں بھی ہے

خاک بھی اُڑ رہی ہے رستوں میں

آمدِ صبح کا سماں بھی ہے

رنگ بھی اُڑ رہا ہے پھُولوں کا

غنچہ غنچہ شررفشاں بھی ہے

اوس بھی ہے کہیں کہیں لرزاں

بزمِ انجم دھواں دھواں بھی ہے

کچھ تو موسم بھی ہے خیال انگیز

کچھ طبیعت مری رواں بھی ہے

کچھ ترا حسن بھی ہے ہوش رُبا

کچھ مری شوخیٔ بیاں بھی ہے

ہر نفس شوق بھی ہے منزل کا

ہر قدم یادِ رفتگاں بھی ہے

وجہِ تسکیں بھی ہے خیال اُس کا

حد سے بڑھ جائے تو گراں بھی ہے

زندگی جس کے دم سے ہے ناصر

یاد اُس کی عذابِ جاں بھی ہے

ناصر کاظمی

وہ دیکھا ہے جہاں دیکھا نہ جائے

اگست 4, 2018ناصر کاظمی،برگِ نے،غزلفغاں،مہرباں،کارواں،آسماں،جہاں،جاں،دھواں،رواں،زماں،سماںadmin

کسے دیکھیں کہاں دیکھا نہ جائے

وہ دیکھا ہے جہاں دیکھا نہ جائے

مری بربادیوں پر رونے والے

تجھے محوِ فغاں دیکھا نہ جائے

زمیں لوگوں سے خالی ہو رہی ہے

یہ رنگِ آسماں دیکھا نہ جائے

سفر ہے اور غربت کا سفر ہے

غمِ صد کارواں دیکھا نہ جائے

کہیں آگ اور کہیں لاشوں کے انبار

بس اے دورِ زماں دیکھا نہ جائے

در و دیوار ویراں شمع مدھم

شبِ غم کا سماں دیکھا نہ جائے

پرانی صحبتیں یاد آ رہی ہیں

چراغوں کا دھواں دیکھا نہ جائے

بھری برسات خالی جا رہی ہے

سرِ ابرِ رواں دیکھا نہ جائے

کہیں تم اور کہیں ہم، کیا غضب ہے

فراقِ جسم و جاں دیکھا نہ جائے

وہی جو حاصلِ ہستی ہے ناصر

اُسی کو مہرباں دیکھا نہ جائے

ناصر کاظمی

اُن سے ہمیں جب جہاں ملاؤ

جولائی 24, 2018موجِ خیال،باصر کاظمی،غزلہاں،کماں،جہاں،جاں،زباںadmin

کیا کہتے ہو کب کہاں ملاؤ

اُن سے ہمیں جب جہاں ملاؤ

میں کب سے ہوں گوش بر آواز

لفظوں سے کبھی زباں ملاؤ

سَر آنکھوں پہ اختلاف لیکن

اک بار تو ہاں میں ہاں ملاؤ

کچھ یاد دلائیں آپ کو ہم

آنکھیں تو ہماری جاں ملاؤ

اب زخم ہمارے بھر گئے ہیں

ناوک سے ذرا کماں ملاؤ

باصر کاظمی

موت کی جیب سے بھی زیست کا ساماں نکلا

جولائی 24, 2018موجِ خیال،باصر کاظمی،غزلمہماں،مژگاں،بیاباں،جاناں،جاں،ساماںadmin

موجب رنگِ چمن خونِ شہیداں نکلا

موت کی جیب سے بھی زیست کا ساماں نکلا

ٹھوکریں کھائی ہیں اتنی کہ اب اپنے دل سے

شوقِ آوارگیِ دشت و بیاباں نکلا

ہم بہت خوش تھے کہ جاگ اٹھی ہے اپنی قسمت

آنے والا کسی ہمسائے کا مہماں نکلا

ہے عجب بات کہ جس رستے پہ ہم چل نکلے

گھوم پھر کر وہ سرِ کوچہء جاناں نکلا

بے حسی نے جو کبھی فرصتِ غم دی ہم کو

ایک سیلاب نہفتہ تہِ مژگاں نکلا

چارہ گر خطرۂ جاں کہتے تھے جس کو باصرِؔ

وہی غم باعثِ آرامِ رگِ جاں نکلا

باصر کاظمی

جہاں ، جہاں ، جہاں کھُلا، صراطِ مُستقیم سے

جولائی 13, 2018افتخار فلک،اذیت،غزلفکاں،آسماں،ازاں،جہاں،جاں،دلبراںadmin

خدائے مہرباں کھُلا صراطِ مُستقیم سے

جہاں ، جہاں ، جہاں کھُلا، صراطِ مُستقیم سے

میں چل پڑا تو حد ہوئی، ہر اک جگہ مدد ہوئی

قدیم آسماں کھُلا صراطِ مُستقیم سے

نظر کی پیش گوئیاں ہیں آج بھی عُروج پر

عُروج، جاں بہ جاں کھُلا صراطِ مُستقیم سے

ترا حُصول انتہائے معرفت ہے یا خدا!

فرازِ کُن فکاں کھُلا، صراطِ مُستقیم سے

بسر کیا گیا یہاں حیاتِ بے ثبات کو

ثبات بعد ازاں کھُلا صراطِ مُستقیم سے

بُتوں کو چھوڑنا پڑا، مجھے یہ کھولنا پڑا

خدائے دِلبراں کھُلا صراطِ مُستقیم سے

افتخار فلک

اے لرزتے زرد پتّے مت خزاں کی بات کر

ستمبر 30, 2017ماجِد نشان،ماجد صدیقی،غزلکماں،گماں،آسماں،آستاں،جاں،خزاںadmin

ماجد صدیقی ۔ غزل نمبر 56

خاک میں ملنے پہ در آتے زماں کی بات کر

اے لرزتے زرد پتّے مت خزاں کی بات کر

تیرنے کو ہیں یہ نیّائیں فراتِ زیست میں

بات کر ایقان کی یا تُو گماں کی بات کر

ہاں وہی جو ہم نے حفظِ جاں کو حاصل کی نہیں

اور ہمیں پر جو تنی ہے اُس کماں کی بات کر

جس کے فیض و غیض ہر دو میں دوگونہ لطف ہے

چھوڑ سارے مخمصے اُس جانِ جاں کی بات کر

ہم فرشتے تو نہیں،نوری ہوں کیا خاکی سے ہم

اے زمیں زادے! نہ ہر دم آسماں کی بات کر

غیر ہیں جو گنبد و مِینار ماجِد کیا ہیں وُہ

دیس سے نکلا ہے اپنے آستاں کی بات کر

ماجد صدیقی

پر شہِ بے پیرہن کو میں نے عریاں کہہ دیا

اگست 31, 2017ماجد صدیقی،اَکھیاں بیچ الاؤ،غزلگلستاں،پریشاں،پشیماں،انساں،جاں،درخشاں،عریاںadmin

ماجد صدیقی ۔ غزل نمبر 46

خلق نے تو اس کو ایسے میں بھی ذی شاں کہہ دیا

پر شہِ بے پیرہن کو میں نے عریاں کہہ دیا

رزق نے جس کے مجھے پالا ہے جس کا رزق ہوں

کہہ دیا اس خاک کو میں نے رگِ جاں کہہ دیا

اِس تمنّا پر کہ ہاتھ آ جائے نخلستاں کوئی

خود غرض نے دیکھ صحرا کو گلستاں کہہ دیا

ہمزبانِ شاہ وہ بھی تھے جنہوں نے آز میں

رات تک کو، یار کی زلفِ پریشاں کہہ دیا

میں وہ خوش خُو جس نے دو ٹانگوں پہ چلتا دیکھ کر

شہر کے بن مانسوں تک کو بھی انساں کہہ دیا

کیا کہوں کیوں میں نے سادہ لوح چڑیوں کی طرح

وقفۂ شب کو بھی تھا صبحِ درخشاں کہہ دیا

اس کے ناطے، درگزر جو محض عُجلت میں ہوئی

گرگ کو بھی بھیڑ نے ماجدؔ پشیماں کہہ دیا

ماجد صدیقی

دے دی ہے اُسی حبس نے پیڑوں کو زباں اور

جولائی 31, 2017ماجد صدیقی،دِل دِل کرب کمان،غزلنشاں،کماں،گراں،بیاں،جاں،زباں،سگاںadmin

ماجد صدیقی ۔ غزل نمبر 59

اظہار کو تھا جس کی رعُونت پہ گماں اور

دے دی ہے اُسی حبس نے پیڑوں کو زباں اور

کہتی ہیں تجھے تشنہ شگوفوں کی زبانیں

اے ابر کرم ! کھینچ نہ تو اپنی کماں اور

ہر نقشِ قدم، رِستے لہو کا ہے مرّقع

اِس خاک پہ ہیں، اہلِ مسافت کے نشاں اور

نکلے ہیں لئے ہاتھ میں ہم، خَیر کا کاسہ

اُٹھنے کو ہے پھر شہر میں، غوغائے سگاں اور

صیّاد سے بچنے پہ بھی ، شب خون کا ڈر ہے

اب فاختہ رکھتی ہے یہاں ، خدشۂ جاں اور

دیکھیں گے، گرانی ہے زمانے کی یہی تو

سبزے کے کچلنے کو ابھی ، سنگِ گراں اور

ماجد وُہی کہتے ہیں، تقاضا ہو جو دل کا

ہم اہلِ سیاست نہیں، دیں گے جو بیاں اور

ماجد صدیقی

گرد کے طوفاں

مئی 31, 2017ماجد صدیقی،شہر پناہ،غزلفراواں،گُلستاں،گِریاں،پَرافشاں،جاں،حیراں،داماں،طوفاں،غریباںadmin

ماجد صدیقی ۔ غزل نمبر 23

سانس میں غلطاں

گرد کے طوفاں

مِلک ہے اپنی

رنجِ فراواں

اُڑنے لگا کیوں

رنگِ گُلستاں

ہاتھ ہوا کے

برگ، پَرافشاں

غُنچہ و گُل ہیں

خاک بہ داماں

جبر کا نشتر

نِزدِ رگِ جاں

ہر رُخِ انور

ششدر و حیراں

عمر ہے جیسے

شامِ غریباں

مُزرعۂ ماجِد

دیدۂ گِریاں

ماجد صدیقی

میں کہکشاں ہوں، مجھے نور کی کماں دے دے

مئی 31, 2017ماجد صدیقی،شہر پناہ،غزلنشاں،کماں،آشیاں،اذاں،جاں،زباں،سواںadmin

ماجد صدیقی ۔ غزل نمبر 38

جہاں کُھلیں مرے جَوہر وہ آسماں دے دے

میں کہکشاں ہوں، مجھے نور کی کماں دے دے

مرے سکوں کا جو، میری بقا کا ضامن ہو

جو مختلف ہو قفس سے، وہ آشیاں دے دے

کہوں جو بات وہ جھومر، جبینِ وقت کا ہو

جو حق سرا ہو، وہ منصور سی زباں دے دے

کٹی جو رات تو، نجمِ سحر سے میں نے کہا

میں جی اٹھاہوں مرے کان میں اذاں دے دے

جو بعدِ جنگ علامت ہو، سرفرازی کی

عَلم وہ دے مرے ہاتھوں میں، وہ نشاں دے دے

سو یُوں ہُوا کہ ہُوا اُس کا، اِک مکیں میں بھی

طلب یہ کی تھی ،مجھے وادیٔ سَواں دے دے

جب آئے جی میں تری بزم میں چلا آؤں

یہ اِذنِ خاص بھی،ماجد کو، جانِ جاں دے دے

ماجد صدیقی

جھیل میں اُس کو میں نے عریاں دیکھ لیا ہے

اپریل 30, 2017ماجد صدیقی،آنگن آنگن رات،غزلپرافشاں،جاں،خواہاں،رقصاں،عریاںadmin

ماجد صدیقی ۔ غزل نمبر 20

مجھ سے تھا، جو چاند گریزاں دیکھ لیا ہے

جھیل میں اُس کو میں نے عریاں دیکھ لیا ہے

دیکھ لیا ہے، تنکے کو، پانی پر بہتے

دل نے ہو کر، عدل کا خواہاں دیکھ لیا ہے

راحت کا عرفان بھلا کیا اور مجھے ہو

برگ پہ قطرہ اوس کا رقصاں دیکھ لیا ہے

آخر کو ہونٹوں پر لا کر، حرف دُعا کا

ایک بگولا سا، پرافشاں دیکھ لیا ہے

آز میں خواہش کی تکمیل کے، پڑ کر ماجدؔ

جبر کا کیا کیا بار، سرِ جاں دیکھ لیا ہے

ماجد صدیقی

ایسا بھی کبھی حشر گلستاں میں کہاں تھا

مارچ 31, 2017ماجد صدیقی،غزل،غزل سراکہاں،گماں،جاں،رواں،زباں،سگاں،شہاںadmin

ماجد صدیقی ۔ غزل نمبر 74

تھا جو بھی شجر عرش نشاں، فرش نشاں تھا

ایسا بھی کبھی حشر گلستاں میں کہاں تھا

کانٹوں پہ لرزتی تھی تمنّاؤں کی شبنم

چھالا سا ہر اِک لفظ سرِ نوکِ زباں تھا

ہونٹوں نے بھی لو، زہرِ خموشی سے چٹخ کر

سیکھا وُہی انداز جو مرغوبِ شہاں تھا

باز آئے گھٹانے سے نہ جو رزقِ گدا کو

اَب کے بھی سرِ شہر وُہی شورِ سگاں تھا

توصیف کا ہر حرف مثالِ خس و خاشاک

دیکھا ہے جہاں بھی پسِ شہ زور رواں تھا

غافل نظر آیا نہ کبھی وار سے اپنے

وُہ خوف کا خنجر جو قریبِ رگ جاں تھا

مجروح پرندوں سی جو پیوندِ زمیں ہے

ماجدؔ نگہِ شوق پہ کب ایسا گماں تھا

ماجد صدیقی

منظر وہ ابھی تم نے مری جاں! نہیں دیکھا

فروری 28, 2017ماجد صدیقی،سخناب،غزلفراواں،لرزاں،افشاں،جاں،خواں،زنداں،سلیماںadmin

ماجد صدیقی ۔ غزل نمبر 5

ہوتے ہیں بدن کیسے گلستاں، نہیں دیکھا

منظر وہ ابھی تم نے مری جاں! نہیں دیکھا

ہم صبح ومساجان بہ لب حبسِ چمن سے

اور ہم پہ عتاب اُن کو کہ زنداں نہیں دیکھا

جس شاخ کو تھی راس نہ جنبش بھی ہَوا کی

پھل جب سے لُٹے پھر اُسے لرزاں نہیں دیکھا

چھلکا ہے جو آنکھوں سے شبِ جور میں اب کے

ایسا تو کبھی رنجِ فراواں نہیں دیکھا

مدّاح وہی اُس کے سکوں کا ہے کہ جس نے

مہتاب سرِغرب پر افشاں نہیں دیکھا

جب تک ہے تصّرف میں فضا اُس کے بدن کی

ہم کیوں یہ کہیں تختِ سلیماں نہیں دیکھا

دیوار کے کانوں سے ڈرا لگتا ہے شاید

ماجدؔ کو کئی دن سے غزل خواں نہیں دیکھا

ماجد صدیقی

مدار جس کا ہماری کٹی زباں پر تھا

فروری 27, 2017ماجد صدیقی،سخناب،غزلگلستاں،پرنیاں،آسماں،آستاں،جاں،خزاں،زباںadmin

ماجد صدیقی ۔ غزل نمبر 35

معاملہ ہی رہائی کا اُس بیاں پر تھا

مدار جس کا ہماری کٹی زباں پر تھا

مثالِ ریگ ہوا نے اُسے بکھیرا ہے

جو لختِ ابر کبھی اپنے گلستاں پر تھا

یہ کربِ عجز تو ماتھا ہی جانتا ہے مرا

گُہر مراد کا کس کس کے آستاں پر تھا

ثمر تو تھے ہی مگر سنگ بھی تھے شاخوں پر

وُہ جن کا بوجھ مسلسل شجر کی جاں پر تھا

نشیبِ خاک سے کیا اُس کی پیروی کرتے

مقدّمہ ہی ہمارا جب آسماں پر تھا

لُٹے بھی گر تو زباں پر نہ ہم کبھی لائے

وہ اِتّہام کہ ہر دَور میں خزاں پر تھا

بھُلا سکے نہ وہ پل اُس کے قُرب کا ماجدؔ!

جب اپنا ہاتھ اندھیرے میں پرنیاں پر تھا

ماجد صدیقی

کسی پہلو تو ذکرِ گل رُخاں ہو

دسمبر 31, 2016ماجد صدیقی،تمازتیں،غزلپرنیاں،جاں،رواں،رخاں،زباں،ضوفشاںadmin

ماجد صدیقی ۔ غزل نمبر 6

مہک ہو یا میانِ لب فغاں ہو

کسی پہلو تو ذکرِ گل رُخاں ہو

زباں سے کُچھ سوا لطفِ بدن ہے

سراپا تم حریر و پرنیاں ہو

تمہارے حق میں کیا جانوں کہوں کیا

سُرورِ چشم ہو تم لطفِ جاں ہو

لپک کر لیں جسے پانی کی لہریں

کنارِ آب وہ سروِ رواں ہو

مرے افکار کی بنیادِ محکم

مرے جذبات کی ناطق زباں ہو

کبھی ماجدؔ کے حرفوں میں بھی اُترو

بڑی مُدّت سے تنہا ضوفشاں ہو

ماجد صدیقی

چاہتی ہے نظر ہر سماں دیکھنا

دسمبر 31, 2016ماجد صدیقی،تمازتیں،غزلنشاں،پرنیاں،آسماں،بدگماں،جہاں،جاں،دھواں،زباں،سماںadmin

ماجد صدیقی ۔ غزل نمبر 22

حُسن اُس کا بحّدِ نہاں دیکھنا

چاہتی ہے نظر ہر سماں دیکھنا

کیُوں نہ ہم اِس ادا پر ہی مرتے رہیں

چھیڑنا اور اُسے بدگماں دیکھنا

کنجِ لب جیسے کھڑکی کُھلے خُلد کی

قامت و قد کو طوبیٰ نشاں دیکھنا

ہائے وُہ ہاتھ جن کی ہے تحریر وُہ

حرف در حرف مخفی جہاں دیکھنا

اُس کے رُخ پرنظر کا نہ ٹِکنا تو پھر

دفعتاً جانبِ آسماں دیکھنا

اُس کے پیکر سے اپنی یہ وابستگی

گنگُ لمحوں کے منہ میں زباں دیکھنا

آنکھ سے تو شراروں کا جھڑنا بجا

لمس تک سے بھی اُٹھتے دُھواں دیکھنا

نازکی اُس کی اور تشنگی شوق کی

نوک پر خار کی پرنیاں دیکھنا

اس بیاں پر نہ معتوب ٹھہرو کہیں

دیکھنا ماجدِ خستہ جاں دیکھنا

ماجد صدیقی

کچھ کہہ نہ سکے جو بھی میں اُس کی زباں ٹھہروں

نومبر 30, 2016ہوا کا تخت،ماجد صدیقی،غزلکہاں،بیاں،جہاں،جاں،رواں،زباںadmin

ماجد صدیقی ۔ غزل نمبر 17

نسبت وہ سخن سے ہو اِک نطق رواں ٹھہروں

کچھ کہہ نہ سکے جو بھی میں اُس کی زباں ٹھہروں

ایسا بھی کوئی منظر دکھلائیں تو دُنیا کو

تو گل بکنارِ جو، میں آبِ رواں ٹھہروں

اتنی تو مجھے آخر، اظہار کی فرصت دے

تو راز ہو سربستہ، میں تیرا بیاں ٹھہروں

ہر دم‘ دمِ عیسٰی ہے اپنا بھی، جو پہچانوں

ہوں عہد نئے پیدا، پل بھر کو جہاں ٹھہروں

یہ شہر تو اب جیسے اک شہرِ خموشاں ہے

کس در سے گزر جاؤں، ٹھہروں تو کہاں ٹھہروں

صورت مرے جینے کی ماجدؔ ہو صبا جیسی

نس نس میں گُلوں کی مَیں، اُتری ہوئی جاں ٹھہروں

ماجد صدیقی

ہے میّسر مجھے انساں ہونا

اکتوبر 31, 2016ماجد صدیقی،آغاز،غزلپریشاں،انساں،بیاباں،جاں،داماں،زمستاںadmin

ماجد صدیقی ۔ غزل نمبر 39

قّصۂ دہر کا عنواں ہونا

ہے میّسر مجھے انساں ہونا

کتنا مشکل ہے ترے غم کا حصول

کتنا مشکل ہے پریشاں ہونا

تو مری روح میں، وجدان میں ہے

تجھ کو حاصل ہے مری جاں ہونا

مہر کو سر پہ سجانا پل بھر

پھر شبِ سردِ زمستاں ہونا

پھُولنا شاخ پہ غنچہ غنچہ

اور اِک ساتھ پریشاں ہونا

کب تلک خوفِ ہوا سے آخر

ہو میسّر، تہِ داماں ہونا

تھے کبھی ہم بھی گلستاں ماجدؔ

اَب وطیرہ ہے بیاباں ہونا

ماجد صدیقی

چھوڑتا ہی نہیں اندیشۂ جاں

اکتوبر 31, 2016ماجد صدیقی،آغاز،غزلکہاں،جاں،دھُواں،رواںadmin

ماجد صدیقی ۔ غزل نمبر 51

دل پہ چھایا ہے وہ احساسِ گراں

چھوڑتا ہی نہیں اندیشۂ جاں

جب بھی گزرے ہیں تری یاد میں دن

کھِل اُٹھے پھُول سرِ جوئے رواں

سُونا سُونا ہے نظر کا دامن

چھُپ گیا ہے وہ مرا چاند کہاں

شعلۂ گل سے دئیے تک ماجدؔ

اُٹھ رہا ہے مری آہوں کا دھُواں

ماجد صدیقی

کیا کہوں ذکر ترا کیسے رواں ہوتا ہے

اکتوبر 31, 2016ماجد صدیقی،آغاز،غزلجاں،رواں،رخاں،سماںadmin

ماجد صدیقی ۔ غزل نمبر 63

جب بھی ہوتا ہے بہ احساسِ گراں ہوتا ہے

کیا کہوں ذکر ترا کیسے رواں ہوتا ہے

بِن ترے بھی مجھے محسوس ہوا ہے اکثر

جیسے پہلو میں کوئی ماہِ رواں ہوتا ہے

دیکھتا ہوں گلِ تر روز، بعنوانِ دگر

روز دل سے گزرِ شعلہ رُخاں ہوتا ہے

زندگی میں غمِ جاناں کا یہی حال رہا

جِس طرح پھول سرِ جُوئے رواں ہوتا ہے

درد کی آخری حد چھو کے مَیں کیوں گھبراؤں

رات ڈھلتی ہے تو کچھ اور سماں ہوتا ہے

ایک ہم ہی نہیں ماجدؔ رُخِ بے رنگ لئے

جو بھی ہو شعلہ بیاں، سوختہ جاں ہوتا ہے

ماجد صدیقی

یاد کیا تجھ کو دلائیں ترا پیماں جاناں

نومبر 4, 2015احمد فراز،شعراء،غزلناداں،گُلستاں،پیماں،اِنساں،احساں،جاناں،جاںadmin

احمد فراز ۔ غزل نمبر 57

اب کے تجدیدِ وفا کا نہیں اِمکاں جاناں

یاد کیا تجھ کو دلائیں ترا پیماں جاناں

اوّل اوّل کی محبت کے نشے یاد تو کر

بِن پیۓ ہی ترا چہرہ تھا گُلستاں جاناں

آخر آخر تو یہ عالم تھا کہ اب یاد نہیں

رگِ مِینا سُلگ اٹھی کہ رگِ جاں جاناں

یوں ہی موسم کی ادا دیکھ کے یاد آیا ہے

کِس قدر جلد بدل جاتے ہیں اِنساں جاناں

دل سمجھتا تھا کہ شاید ہو فسُردہ تُو بھی

دل کی کیا بات کریں دل تو ہے ناداں جاناں

مدّتوں سے یہی عالم ۔۔ نہ توقع، نہ اُمید

دل پُکارے ہی چلا جاتا ہے جاناں جاناں

زندگی تیری عطا تھی سو ترے نام کی ہے

ہم نے جیسی بھی گزاری ترا احساں جاناں

احمد فراز

جیسے اک فتنہ بیدار، رواں خواب میں تھا

نومبر 2, 2015احمد فراز،شعراء،غزلہمسفراں،نگراں،جاں،رواں،سماںadmin

احمد فراز ۔ غزل نمبر 23

جانے نشّے میں کہ وہ آفت جاں خواب میں تھا

جیسے اک فتنہ بیدار، رواں خواب میں تھا

وہ سرِ شام، سمندر کا کنارا، ترا ساتھ

اب تو لگتا ہے کہ جیسے یہ سماں خواب میں تھا

جیسے یادوں کا دریچہ کوئی وا رہ جائے

اک ستارہ مری جانب نگراں خواب میں تھا

جب کھلی آنکھ تو میں تھا مری تنہائی تھی

وہ جو تھا قافلۂ ہمسفراں خواب میں تھا

ایسے قاتل کو کوئی ہاتھ لگاتا ہے فراز

شکر کر شکر کہ وہ دشمنِ جاں خواب میں تھا

احمد فراز

کچھ بھی میرے سِوا یہاں نہ رہے

اکتوبر 26, 2015شعراء،عرفان ستار،غزلہاں،نشاں،وہاں،یہاں،کہاں،کلاں،گماں،اماں،بیاں،جہاں،جاں،درمیاں،رائگاں،رازداں،زیاں،سائباںadmin

عرفان ستار ۔ غزل نمبر 100

یہ زمیں اور آسماں نہ رہے

کچھ بھی میرے سِوا یہاں نہ رہے

میں ہی اول بھی اور آخر بھی

کوئی بھی میرے درمیاں نہ رہے

بس معانی ہوں، لفظ کھو جائیں

روح رہ جائے، جسم و جاں نہ رہے

میری یکسوئی میں پڑے نہ خلل

"میں رہوں اور یہ جہاں نہ رہے”

مہرباں آج مجھ پہ ہے جو نظر

عین ممکن ہے کل کلاں نہ رہے

ہاں بلا سے مری، رہے نہ وجود

نہیں رہتا عدم بھی، ہاں نہ رہے

سوچتا ہوں خموش ہو جاؤں

اور یہ حرفِ رائگاں نہ رہے

کاش چھا جائے ایک ابرِ اماں

اور کوئی بھی بے اماں نہ رہے

اک سہارا۔ ہے بے یقینوں کا

کیا کریں وہ اگر گماں نہ رہے

بات کیسی جو سننے والا نہ ہو

راز کیسا جو رازداں نہ رہے

وہی ہوتا ہے رائگاں کہ جو ہو

نہ رہوں میں تو یہ زیاں نہ رہے

زخم تو سارے بھر ہی جاتے ہیں

بات تب ہے اگر نشاں نہ رہے

ہے وہاں ماں، یہاں مرے بچے

اب رہے دل کہاں، کہاں نہ رہے

زخمِ دل کو زبان مل جائے

درد ناقابلِ بیاں نہ رہے

کیا خبر کس گھڑی چلے آندھی

اور سر پر یہ سائباں نہ رہے

شہرِ دام و درم کی تم جانو

اہلِ دل تو کبھی وہاں نہ رہے

ان دنوں ہے یہاں، مگر عرفان

بس چلے تو کبھی یہاں نہ رہے

عرفان ستار

جہاں پہ تُو بھی نہیں تھا وہاں بھی زندہ رہے

اکتوبر 26, 2015شعراء،عرفان ستار،غزلوہاں،گماں،جاں،داستاں،درمیاں،زیاں،زباںadmin

عرفان ستار ۔ غزل نمبر 99

بہت خجل ہیں کہ ہم رائگاں بھی زندہ رہے

جہاں پہ تُو بھی نہیں تھا وہاں بھی زندہ رہے

عجیب شرط ہے اس بے یقیں مزاج کی بھی

کہ تُو بھی پاس ہو تیرا گماں بھی زندہ رہے

تجھے یہ ضد ہے مگر اس طرح نہیں ہوتا

کہ تُو بھی زندہ رہے داستاں بھی زندہ رہے

وہ کون لوگ تھے جن کا وجود جسم سے تھا

یہ کون ہیں جو پسِ جسم و جاں بھی زندہ رہے

جو یہ نہ ہو تو سخن کا کوئی جواز نہیں

ضمیر زندہ رہے تو زباں بھی زندہ رہے

یہ کائنات فقط منفعت کا نام نہیں

یہاں پہ کوئی برائے زیاں بھی زندہ رہے

عدم میں جو بھی نہیں تھا وہ سب وجود میں تھا

یہ ہم ہی تھے جو کہیں درمیاں بھی زندہ رہے

عرفان ستار

تُو جو موجود نہ ہوتا، تو کہاں تھے ہم بھی

اکتوبر 26, 2015شعراء،عرفان ستار،غزلفغاں،نگراں،یہاں،کہاں،کجکلہاں،گماں،گراں،بیاں،جاں،دگراں،زیاں،سخناںadmin

عرفان ستار ۔ غزل نمبر 61

تیری نسبت سے زمانے پہ عیاں تھے ہم بھی

تُو جو موجود نہ ہوتا، تو کہاں تھے ہم بھی

حرمتِ حرف نہیں ہے سو یہ ارزانی ہے

ورنہ وہ دن بھی تھے جب خوابِ گراں تھے ہم بھی

ہم بھی حیراں ہیں بہت خود سے بچھڑ جانے پر

مستقل اپنی ہی جانب نگراں تھے ہم بھی

اب کہیں کیا، کہ وہ سب قصہءِ پارینہ ہُوا

رونقِ محفلِ شیریں سخناں تھے ہم بھی

وقت کا جبر ہی ایسا ہے کہ خاموش ہیں اب

ورنہ تردیدِ صفِ کجکلہاں تھے ہم بھی

رنج مت کر، کہ تجھے ضبط کا یارا نہ رہا

کس قدر واقفِ آدابِ فغاں تھے ہم بھی

تُو بھی کردار کہانی سے الگ تھا کوئی

اپنے قصے میں حدیثِ دگراں تھے ہم بھی

کیسی حیرت، جو کہیں ذکر بھی باقی نہ رہا

تُو بھی تحریر نہ تھا، حرفِ بیاں تھے ہم بھی

ہم کہ رکھتے تھے یقیں اپنی حقیقت سے سِوا

اب گماں کرنے لگے ہیں کہ گماں تھے ہم بھی

رائگاں ہوتا رہا تُو بھی پئے کم نظراں

ناشناسوں کے سبب اپنا زیاں تھے ہم بھی

تُو بھی کس کس کے لیے گوش برآواز رہا

ہم کو سنتا تو سہی، نغمہءِ جاں تھے ہم بھی

ہم نہیں ہیں، تو یہاں کس نے یہ محسوس کیا؟

ہم یہاں تھے بھی تو ایسے، کہ یہاں تھے ہم بھی

عرفان ستار

میں کہ ٹھہرا گدائے دیارِ سخن مجھ کو یہ ذمّہ داری کہاں سونپ دی

اکتوبر 26, 2015شعراء،عرفان ستار،غزلوشاں،کہاں،کماں،کراں،گماں،اماں،آئندگاں،جاں،دلبراں،داستاں،رائگاں،زیاں،عناںadmin

عرفان ستار ۔ غزل نمبر 57

مری کم مائیگی کو ترے ذوق نے دولتِ حرفِ تازہ بیاں سونپ دی

میں کہ ٹھہرا گدائے دیارِ سخن مجھ کو یہ ذمّہ داری کہاں سونپ دی

قاصدِ شہرِ دل نے مرے خیمۂ خواب میں آ کے مجھ سے کہا جاگ جا

بادشاہِ جنوں نے تجھے آج سے لشکرِ اہلِ غم کی کماں سونپ دی

میرا ذوقِ سفر یوں بھی منزل سے بڑھ کر کسی ہمرہی کا طلب گار تھا

اس لیے وصل کے موڑ پر ہجر کو اُس نے رہوارِ دل کی عناں سونپ دی

تشنگی کو مرے شوق کی لہر نے کس سرابِ نظر کے حوالے کیا

کیسے بنجر یقیں کو مرے خواب نے اپنی سر سبز فصلِ گماں سونپ دی

احتیاطِ نظر اور وضعِ خرد کے تقاضوں کی تفصیل رہنے ہی دے

یہ مجھے بھی خبر ہے کہ میں نے تجھے اپنی وارفتگی رائگاں سونپ دی

اپنے ذوقِ نظر سے تری چشمِ حیراں کو تازہ بہ تازہ مناظر دیے

تیرے پہلو میں دھڑکن جگانے کی خاطر ترے جسم کو اپنی جاں سونپ دی

رازداری کی مہلت زیادہ نہ ملنے پہ احباب سب مجھ سے ناراض ہیں

قصہ گو مجھ سے خوش ہیں کہ میں اُنہیں ایک پُر ماجرا داستاں سونپ دی

میری وحشت پسندی کو آرائشِ زلف و رخسار و ابرو کی فرصت کہاں

تُو نے کس بے دلی سے یہ امید کی یہ کسے خدمتِ مہ وشاں سونپ دی

دل پہ جب گُل رُخوں اور عشوہ طرازوں کی یلغار کا زور بڑھنے لگا

میں نے گھبرا کے آخر تری یاد کو اپنی خلوت گہِ بے اماں سونپ دی

کار گاہِ زمانہ میں جی کو لگانے سے آخر خسارہ ہی مقدور تھا

یہ بھی اچھا ہوا میں نے یہ زندگی تیرے غم کو برائے زیاں سونپ دی

اُس نے ذوقِ تماشا دیا عشق کو خوشبوئوں کو صبا کے حوالے کیا

مجھ رفاقت طلب کو نگہبانیٔ دشتِ وحشت کراں تا کراں سونپ دی

مجھ میں میرے سوا کوئی تھا جو ہوس کے تقاضے نبھانے پہ مائل بھی تھا

میں نے بھی تنگ آ کر اُسی شخص کو ناز برداریٔ دلبراں سونپ دی

ایک امکان کیا گنگنایا مرے چند اشعار میں حرفِ اظہار میں

میں یہ سمجھا خدائے سخن نے مجھے مسندِ بزمِ آئندگاں سونپ دی

عرفان ستار

تیری آسودہ حالی کی امید پر، کر گئے ہم تو اپنا زیاں یا اخی

اکتوبر 26, 2015شعراء،عرفان ستار،غزلمہرباں،نشاں،یہاں،کہاں،آسماں،بیاں،جاں،دھواں،داستاں،درمیاں،زیاں،سائباںadmin

عرفان ستار ۔ غزل نمبر 56

رزق کی جستجو میں کسے تھی خبر، تُو بھی ہو جائے گا رائگاں یا اخی

تیری آسودہ حالی کی امید پر، کر گئے ہم تو اپنا زیاں یا اخی

جب نہ تھا یہ بیابانِ دیوار و در، جب نہ تھی یہ سیاہی بھری رہگزر

کیسے کرتے تھے ہم گفتگو رات بھر، کیسے سنتا تھا یہ آسماں یا اخی

جب یہ خواہش کا انبوہِ وحشت نہ تھا، شہر اتنا تہی دستِ فرصت نہ تھا

کتنے آباد رہتے تھے اہلِ ہنر، ہر نظر تھی یہاں مہرباں یا اخی

یہ گروہِ اسیرانِ کذب و ریا، بندگانِ درم بندگانِ انا

ہم فقط اہلِ دل یہ فقط اہلِ زر، عمر کیسے کٹے گی یہاں یا اخی

خود کلامی کا یہ سلسلہ ختم کر، گوش و آواز کا فاصلہ ختم کر

اک خموشی ہے پھیلی ہوئی سر بہ سر، کچھ سخن چاہیے درمیاں یا اخی

جسم کی خواہشوں سے نکل کر چلیں، زاویہ جستجو کا بدل کا چلیں

ڈھونڈنے آگہی کی کوئی رہگزر، روح کے واسطے سائباں یا اخی

ہاں کہاتھا یہ ہم نے بچھڑتے ہوئے، لوٹ آئیں گے ہم عمر ڈھلتے ہوئے

ہم نے سوچا بھی تھا واپسی کا مگر، پھر یہ سوچا کہ تُو اب کہاں یا اخی

خود شناسی کے لمحے بہم کب ہوئے، ہم جو تھے درحقیقت وہ ہم کب ہوئے

تیرا احسان ہو تُو بتا دے اگر، کچھ ہمیں بھی ہمارا نشاں یا اخی

قصۂ رنج و حسرت نہیں مختصر، تجھ کو کیا کیا بتائے گی یہ چشمِ تر

آتش غم میں جلتے ہیں قلب و جگر، آنکھ تک آ رہا ہے دھواں یا اخی

عمر کے باب میں اب رعایت کہاں، سمت تبدیل کرنے کی مہلت کہاں

دیکھ بادِ فنا کھٹکھٹاتی ہے در، ختم ہونے کو ہے داستاں یا اخی

ہو چکا سب جو ہونا تھا سود و زیاں، اب جو سوچیں تو کیا رہ گیا ہے یہاں

اور کچھ فاصلے کا یہ رختِ سفر، اور کچھ روز کی نقدِ جاں یا اخی

تُو ہمیں دیکھ آ کر سرِ انجمن، یوں سمجھ لے کہ ہیں جانِ بزمِ سخن

ایک تو روداد دلچسپ ہے اس قدر، اور اس پر ہمارا بیاں یا اخی

عرفان ستار

کہیں ہو نہ جاؤں میں رائگاں، مری آدھی عمر گزر گئی

اکتوبر 26, 2015شعراء،عرفان ستار،غزلمکاں،ناگہاں،گماں،جاں،دوستاں،داں،داستاں،درمیاں،رائگاں،رازداںadmin

عرفان ستار ۔ غزل نمبر 54

یونہی بے یقیں یونہی بے نشاں، مری آدھی عمر گزر گئی

کہیں ہو نہ جاؤں میں رائگاں، مری آدھی عمر گزر گئی

کبھی سائباں نہ تھا بہم، کبھی کہکشاں تھی قدم قدم

کبھی بے مکاں کبھی لا مکاں، مری آدھی عمر گزر گئی

ترے وصل کی جو نوید ہے، وہ قریب ہے کہ بعید ہے

مجھے کچھ خبر تو ہو جانِ جاں، مری آدھی عمر گزر گئی

کبھی مجھ کو فکرِ معاش ہے، کبھی آپ اپنی تلاش ہے

کوئی گُر بتا مرے نکتہ داں، مری آدھی عمر گزر گئی

کبھی ذکرِ حرمتِ حرف میں، کبھی فکرِ آمد و صرف میں

یونہی رزق و عشق کے درمیاں، مری آدھی عمر گزر گئی

کوئی طعنہ زن مری ذات پر، کوئی خندہ زن کسی بات پر

پئے دل نوازیٔ دوستاں، مری آدھی عمر گزر گئی

ابھی وقت کچھ مرے پاس ہے، یہ خبر نہیں ہے قیاس ہے

کوئی کر گلہ مرے بد گماں، مری آدھی عمر گزر گئی

اُسے پا لیا اُسے کھو دیا، کبھی ہنس دیا کبھی رو دیا

بڑی مختصر سی ہے داستاں، مری آدھی عمر گزر گئی

تری ہر دلیل بہت بجا، مگر انتظار بھی تا کجا

ذرا سوچ تو مرے رازداں، مری آدھی عمر گزر گئی

کہاں کائنات میں گھر کروں، میں یہ جان لوں تو سفر کروں

اسی سوچ میں تھا کہ ناگہاں، مری آدھی عمر گزر گئی

عرفان ستار

عجب یقین پسِ پردہ ءِ گماں ہے یہاں

اکتوبر 26, 2015شعراء،عرفان ستار،غزلنقدِجاں،گماں،آسماں،اماں،بیاں،جاں،داستاں،درمیاں،رفتگاں،رائیگاںadmin

عرفان ستار ۔ غزل نمبر 27

نہیں ہے جو، وہی موجود و بے کراں ہے یہاں

عجب یقین پسِ پردہ ءِ گماں ہے یہاں

نہ ہو اداس، زمیں شق نہیں ہوئی ہے ابھی

خوشی سے جھوم، ابھی سر پہ آسماں ہے یہاں

یہاں سخن جو فسانہ طراز ہو، وہ کرے

جو بات سچ ہے وہ ناقابلِ بیاں ہے یہاں

نہ رنج کر، کہ یہاں رفتنی ہیں سارے ملال

نہ کر ملال، کہ ہر رنج رائیگاں ہے یہاں

زمیں پلٹ تو نہیں دی گئی ہے محور پر؟

نمو پذیر فقط عہدِ رفتگاں ہے یہاں

یہ کارزارِ نفس ہے، یہاں دوام کسے

یہ زندگی ہے مری جاں، کسے اماں ہے یہاں

ہم اور وصل کی ساعت کا انتظار کریں؟

مگر وجود کی دیوار درمیاں ہے یہاں

چلے جو یوں ہی ابد تک، تو اِس میں حیرت کیا؟

ازل سے جب یہی بے ربط داستاں ہے یہاں

جو ہے وجود میں، اُس کو گماں کی نذر نہ کر

یہ مان لے کہ حقیقت ہی جسم و جاں ہے یہاں

کہا گیا ہے جو وہ مان لو، بلا تحقیق

کہ اشتباہ کی قیمت تو نقدِجاں ہے یہاں

عرفان ستار

وسعتیں ایک ایک ذرے کی بیاباں ہو گئیں

اکتوبر 25, 2015قمر جلالوی،شعراء،غزلہجراں،نمایا،کلیں،گلستاں،پنہاں،پیکاں،آساں،ارماں،بیاباں،جاںadmin

قمر جلالوی ۔ غزل نمبر 63

منزلیں غربت میں مجھ کو آفتِ جاں ہو گئیں

وسعتیں ایک ایک ذرے کی بیاباں ہو گئیں

چارہ گر کیونکر نکالے دل میں پنہاں ہو گئیں

ٹوٹ کر نوکیں ترے تیروں کی ارماں ہو گئیں

کیا کروں جو آہیں رسوائی کا ساماں ہو گئیں

مشکلیں ایسی مجھے کیوں دیں جو آساں ہو گئیں

ہم نفس صیاد کی عادت کو میں سمجھتا نہ تھا

بھول کر نظریں مری سوئے گلستاں ہو گئیں

آشیاں اپنا اٹھاتے ہیں سلام اے باغباں

بجلیاں اب دشمنِ جانِ گلستاں ہو گئیں

میری حسرت کی نظر سے رازِ الفت کھل گیا

آرزوئیں اشک بن بن کر نمایا ہو گئیں

کیا نہیں معلوم کون آیا عیادت کے لئے

اسی بند آنکھیں تری بیمارِ ہجراں ہو گئیں

بلبلِ ناشاد ہی منحوس نالے بند کر

پھول غارت ہو گئے برباد کلیں ہو گئیں

وہ اٹھی عاشق کی میت لے مبارک ہو تجھے

اب تو پوری حسرتیں او دشمنِ جاں ہو گئیں

کائناتِ دل ہی کیا تھی چار بوندیں خون کی

دو غذائے غم ہوئیں دو نذرِ پیکاں ہو گئیں

آسماں پر ڈھونڈتا ہوں ان دعاؤں کو قمر

صبح کو جو ڈوبتے تاروں میں پنہاں ہو گئیں

قمر جلالوی

ہے خاکِ تن ہوا و ہوا خوں فشاں ہنوز

اکتوبر 25, 2015مصطفٰی خان شیفتہ،اساتذہ،غزلفشاں،فغاں،مہرباں،مغاں،نہاں،نشاں،کہکشاں،کارواں،پاسباں،آسماں،آشیاں،امتحاں،ارمغاں،جاں،خزاںadmin

مصطفٰی خان شیفتہ ۔ غزل نمبر 52

ہم بے نشان اور وفا کا نشاں ہنوز

ہے خاکِ تن ہوا و ہوا خوں فشاں ہنوز

بیت الحزن میں نغمۂ شادی بلند ہے

نکلا ہی بابِ مصر سے ہے کارواں ہنوز

صبحِ شبِ وصال نیِ صبح ہے، مگر

پرویں ہنوز جلوہ گر و کہکشاں ہنوز

ہرگز ابھی شکایتِ دشمن نہ چاہئے

ہم پر بھی یار خوب نہیں مہرباں ہنوز

کیوں کر کہیں کہ چھٹ گئے ہم بندِ جسم سے

اس زلفِ پیچ پیچ میں الجھی ہے جاں ہنوز

جو بات میکدے میں ہے اک اک زبان پر

افسوس مدرسے میں ہے بالکل نہاں ہنوز

ضبط و شکیب یاں ہے نقابِ جمال میں

بے وجہ واں نہیں ہے سرِ امتحاں ہنوز

مدت ہوئی بہارِ جہاں دیکھتے ہوئے

دیکھا نہیں کسی نے گلِ بے خزاں ہنوز

اکثر ہوا ہے مجھ کو سفر در وطن مگر

لایا نہ دوستوں کے لئے ارمغاں ہنوز

اک شب ہوا تھا جلوہ نما چرخ پر وہ ماہ

مدہوش ہیں ملائکۂ آسماں ہنوز

نا آشنا رقیب سے ہے آشنا ابھی

نا آشنا ہے لب سے ہمارے فغاں ہنوز

آشفتہ زلف، چاک قبا، نیم باز چشم

ہیں صحبتِ شبانہ کے ظاہر نشاں ہنوز

اے موجۂ نسیم ذرا اور ٹھہر جا

ہے خاک پر ہماری وہ دامن فشاں ہنوز

مے خانے میں تمام جوانی بسر ہوئی

لیکن ملا نہ منصبِ پیرِ مغاں ہنوز

اے تابِ برق تھوڑی سی تکلیف اور بھی

کچھ رہ گئے ہیں خار و خسِ آشیاں ہنوز

آتا ہوں میں وہیں سے ذرا صبر شیفتہ

سونے کے قصد میں بھی نہیں پاسباں ہنوز

مصطفٰی خان شیفتہ

نہ ہو بلبلِ زار نالاں عبث

اکتوبر 25, 2015مصطفٰی خان شیفتہ،اساتذہ،غزلمغیلاں،نالاں،گریباں،پنہاں،پیماں،افغاں،ایماں،بستاں،جاں،حیواں،حرماں،خواں،دبستاں،درماں،ساماں،طوفاں،عندلیباںadmin

مصطفٰی خان شیفتہ ۔ غزل نمبر 41

نہ کر فاش رازِ گلستاں عبث

نہ ہو بلبلِ زار نالاں عبث

کفایت تھی مجھ کو تو چینِ جبیں

کیا قتل کا اور ساماں عبث

مقدم ہے ترکِ عدو کی قسم

وگرنہ یہ سب عہد و پیماں عبث

جو آیا ہے وادی میں تو صبر کر

شکایاتِ خارِ مغیلاں عبث

تکبر گدائے خرابات ہے

نہ اے خواجہ کھو جان و ایماں عبث

وہاں صوتِ مینا و آوازِ ساز

خوش آہنگیِ مرغِ شب خواں عبث

وہاں دس بجے دن کو ہوتی ہے صبح

سحر خیزیِ عندلیباں عبث

دمِ خضر ہے چشمۂ زندگی

سکندر سرِ آبِ حیواں عبث

پری کا وہاں مجھ کو سایہ ہوا

نہیں اشتیاقِ دبستاں عبث

طلب گارِ راحت ہیں نا دردمند

اگر درد ہے فکرِ درماں عبث

یہ نازک مزاجوں کا دستور ہے

خشونت سے اندوہِ حرماں عبث

شکایت کو اس نے سنا بھی نہیں

کھلا غیر پر رازِ پنہاں عبث

مرے غم میں گیسوئے مشکیں نہ کھول

نہ ہو خلق کا دشمنِ جاں عبث

محبت جتاتا ہوں ہر طور سے

اثر کی نظر سوئے افغاں عبث

نہ سمجھا کسی نے مجھے گل نہ صبح

ہوا ٹکڑے ٹکڑے گریباں عبث

مجھے یوں بٹھاتے وہ کب بزم میں

اٹھائے رقیبوں نے طوفاں عبث

یہ اندازِ دل کش کہاں شیفتہ

جگر کاویِ مرغِ بستاں عبث

مصطفٰی خان شیفتہ

صبح بلبل کی روش ہمدمِ افغاں دیکھا

اکتوبر 25, 2015مصطفٰی خان شیفتہ،اساتذہ،غزلہجراں،مغیلاں،گلستاں،گریاں،پنہاں،پریشاں،پشیماں،آساں،افغاں،براں،جاںadmin

مصطفٰی خان شیفتہ ۔ غزل نمبر 25

رات واں گل کی طرح سے جسے خنداں دیکھا

صبح بلبل کی روش ہمدمِ افغاں دیکھا

کوئی بے جان جہاں میں نہیں جیتا لیکن

تیرے مہجور کو جیتے ہوئے بے جاں دیکھا

میں نے کیا جانئے کس ذوق سے دی جاں دمِ قتل

کہ بہت اس سے ستم گر کو پشیماں دیکھا

نہ ہوا یہ کہ کبھی اپنے گلے پر دیکھیں

یوں تو سو بار ترا خنجرِ براں دیکھا

اس طرف کو بھی نگہ تا سرِ مژگاں آئی

بارے کچھ کچھ اثرِ گریۂ پنہاں دیکھا

پانی پانی ہوئے مرقد پہ مرے آ کے وہ جب

شمع کو نعش پہ پروانے کی، گریاں دیکھا

غم غلط کرنے کو احباب ہمیں جانبِ باغ

لے گئے کل تو عجب رنگِ گلستاں دیکھا

وَرد میں خاصیتِ اخگرِ سوزاں پائی

نسترن میں اثرِ خارِ مغیلاں دیکھا

ایک نالے میں ستم ہائے فلک سے چھوٹے

جس کو دشوار سمجھتے تھے سو آساں دیکھا

کون کہتا ہے کہ ظلمت میں کم آتا ہے نظر

جو نہ دیکھا تھا سو ہم نے شبِ ہجراں دیکھا

شیفتہ زلفِ پری رو کا پڑا سایہ کہیں

میں نے جب آپ کو دیکھا تو پریشاں دیکھا

مصطفٰی خان شیفتہ

کس نے عذاب جاں سہا کون عذاب جاں میں ہے

اکتوبر 23, 2015Jaun Elia،جون ایلیا،شعراء،غزلہاں،گزشتگاں،آسماں،اماں،امتحاں،جاں،دلاں،زماںadmin

جون ایلیا ۔ غزل نمبر 222

ایک گماں کا حال ہے اور فقط گماں میں ہے

کس نے عذاب جاں سہا کون عذاب جاں میں ہے

لمحہ بہ لمحہ دم بہ دم آن بہ آن رم بہ رم

میں بھی گزشتگاں میں ہوں تو بھی گزشتگاں میں ہے

آدم و ذات کبریا کرب میں ہیں جدا جدا

کیا کہوں ان کا ماجرا جو بھی ہے امتحاں میں ہے

شاخ سے اڑ گیا پرند ہے دل شام درد مند

صحن میں ہے ملال سا حزن سا آسماں میں ہے

خودمیں بھی بےاماں ہوں میں،تجھ میں بھی بےاماں ہوں میں

کون سہے گا اس کا غم وہ جو مری اماں میں ہے

کیسا حساب کیا حساب حالت حال ہے عذاب

زخم نفس نفس میں ہے زہر زماں زماں میں ہے

اس کا فراق بھی زیاں اس کا وصال بھی زیاں

ایک عجیب کشمکش حلقہ بے دلاں میں ہے

بود نبود کا حساب میں نہیں جانتا مگر

سارے وجود کی نہیں میرے عدم کی ہاں میں ہے

جون ایلیا

ہے آگ جامہ زیب۔۔دھواں بے لباس ہے

اکتوبر 23, 2015Jaun Elia،جون ایلیا،شعراء،غزلہوں۔۔فغاں،مکاں،کہاں،جہاں،جاں،رواں،زیاں،زیب۔۔دھواںadmin

جون ایلیا ۔ غزل نمبر 218

بخشش ہوا یقین۔۔گماں بے لباس ہے

ہے آگ جامہ زیب۔۔دھواں بے لباس ہے

ہے یہ فضا ہزار لباسوں کا اک لباس

جو بے لباس ہے وہ کہاں بے لباس ہے

ملبوس تار تارِ نفس ہے زیانِ سود

سُودِ زیان یہ ہے کہ زیاں بے لباس ہے

محمل نشینِ رنگ! کوئی پوستینِ رنگ

ریگِ رواں ہوں۔۔ریگِ رواں بے لباس ہے

اب پارہ پارہ پوششِ گفتار بھی نہیں

ہیں سانس بے رفو سو زیاں بے لباس ہے

صد جامہ پوش جس کا ہے جسم برہنہ ابھی

خلوت سرائے جاں میں وہ جاں بے لباس ہے

ہے دل سے ہر نفس ہوسِ دید کا سوال

خلوت ہے وہ کہاں۔۔وہ جہاں بے لباس ہے

ہے بُود اور نبود میں پوشش نہ پیرہن

یاراں مکین کیا کہ مکاں بے لباس ہے

تُو خود ہی دیکھ رنگِ بدن اپنا جوش رنگ

تُو اپنے ہر لباس میں جاں بے لباس ہے

غم کی برہنگی کو کہاں سے جُڑے لباس

میں لب سیے ہوئے ہوں۔۔فغاں بے لباس ہے

جون ایلیا

زندگی اک زیاں کا دفتر ہے

اکتوبر 23, 2015Jaun Elia،جون ایلیا،شعراء،غزلہاں،کہاں،گماں،آئیندگاں،آسماں،جاں،داستاں،زیاںadmin

جون ایلیا ۔ غزل نمبر 217

نہ تو دل کا نہ جاں کا دفتر ہے

زندگی اک زیاں کا دفتر ہے

پڑھ رہا ہوں میں کاغذاتِ وجود

اور نہیں اور ہاں کا دفتر ہے

کوئی سوچے تو سوزِ کربِ جاں

سارا دفتر گماں کا دفتر ہے

ہم میں سے کوئی تو کرے اصرار

کہ زمیں، آسماں کا دفتر ہے

ہجر تعطیلِ جسم و جاں ہے میاں

وصل، جسم اور جاں کا دفتر ہے

ہے جو بود اور نبود کا دفتر

آخرش یہ کہاں کا دفتر ہے

جو حقیقت ہے دم بدم کی یاد

وہ تو اک داستاں کا دفتر ہے

ہو رہا ہے گزشتگاں کا حساب

اور آئیندگاں کا دفتر ہے

جون ایلیا

کہ ہٹ جاؤں میں اپنے درمیاں سے

اکتوبر 23, 2015Jaun Elia،جون ایلیا،شعراء،غزلفلاں،یہاں،جاں،داستاں،درمیاں،رفتگاں،زباںadmin

جون ایلیا ۔ غزل نمبر 179

ابھی فرمان آیا ہے وہاں سے

کہ ہٹ جاؤں میں اپنے درمیاں سے

یہاں جو ہے تنفس ہی میں گم ہے

پرندے اڑ رہے ہیں شاخِ جاں سے

دریچہ باز ہے یادوں کا اور میں

ہوا سنتا ہوں پیڑوں کی زباں سے

تھا اب تک معرکہ باہر کا در پیش

ابھی تو گھر بھی جانا ہے یہاں سے

فلاں سے تھی غزل بہتر فلاں کی

فلاں کے زخم اچھے تھے فلاں سے

خبر کیا دوں میں شہرِ رفتگاں کی

کوئی لوٹے بھی شہرِ رفتگاں سے

یہی انجام کیا تجھ کو ہوس تھا

کوئی پوچھے تو میرِ داستاں سے

جون ایلیا

اسی گماں کو بچا لوں کہ درمیاں ہے یہی

اکتوبر 23, 2015Jaun Elia،جون ایلیا،شعراء،غزلآسماں،امتحاں،جاں،داں،درمیاں،شگستگاںadmin

جون ایلیا ۔ غزل نمبر 158

کوئی گماں بھی نہیں درمیاں گماں ہے یہی

اسی گماں کو بچا لوں کہ درمیاں ہے یہی

یہ آدمی کے ہیں انفاس جس کے زہر فروش

اسے بٹھاؤ کہ میرا مزاج داں ہے یہی

کبھی کبھی جو نہ آؤ نظر تو سہہ لیں گے

نظر سے دُور نہ ہونا کہ امتحاں ہے یہی

میں آسماں کا عجب کچھ لحاظ رکھتا ہوں

جو اس زمین کو سہہ لے وہ آسماں ہے یہی

یہ ایک لمحہ جو دریافت کر لیا میں نے

وصالِ جاں ہے یہی اور فراقِ جاں ہے یہی

تم اُن میں سے ہو جو یاں فتح مند ٹہرے ہیں

سنو کہ وجہِ غمِ دل شگستگاں ہے یہی

جون ایلیا

جانِ جاں ، جانانِ جاں ، افسوس میں

اکتوبر 23, 2015Jaun Elia،جون ایلیا،شعراء،غزلگہاں،گماں،گراں،آسماں،آشیاں،اماں،جاوداں،جاں،خزاں،دھواں،داستاں،رواں،سماںadmin

جون ایلیا ۔ غزل نمبر 108

سود ہے میرا زیاں ، افسوس میں

جانِ جاں ، جانانِ جاں ، افسوس میں

رائگانی میں نے سونپی ہے تجھے

اے مری عمرِ رواں ، افسوس میں

اے جہانِ بے گمان و صد گماں

میں ہوں اوروں کا گماں ، افسوس میں

نا بہ ہنگامی ہے میری زندگی

میں ہوں ہر دم نا گہاں ، افسوس میں

زندگی ہے داستاں افسوس کی

میں ہوں میرِ داستاں ، افسوس میں

اپنے برزن اپنے ہی بازار میں

اپنے حق میں ہوں گراں ، افسوس میں

گم ہوا اور بے نہائت گم ہوا

مجھ میں ہے میرا سماں ، افسوس میں

میرے سینے میں چراغِ زندگی

میری انکھوں میں دھواں ، افسوس میں

مجھ کو جز پرواز کوئی چارہ نہیں

ہوں میں اپنا آشیاں ، افسوس میں

ہے وہ مجھ میں بے اماں ، افسوس وہ

ہوں میں اس میں بے اماں ، افسوس میں

خود تو میں ہوں یک نفس کا ماجرا

میرا غم ہے جاوداں ، افسوس میں

ایک ہی تو باغِ حسرت ہے میرا

ہوں میں اس کی ہی خزاں ، افسوس میں

اے زمین و آسماں ،، افسوس تم

اے زمین و آسماں ، افسوس میں

جون ایلیا

کیا کہوں میں بس میاں ، افسوس میں

اکتوبر 23, 2015Jaun Elia،جون ایلیا،شعراء،غزلمیاں،کہاں،کماں،کارواں،تپاں،جاں،جاداں،خواں،درمیاں،شمعadmin

جون ایلیا ۔ غزل نمبر 107

ہوں میں یکسر رایگاں ، افسوس میں

کیا کہوں میں بس میاں ، افسوس میں

اب عبث کا کارواں ہے گرم سیر

میں ہوں میرِ کارواں ، افسوس میں

کیسے پہنچوں آخر اپنے آپ تک

میں ہوں اپنے درمیاں ، افسوس میں

شعلہء یاقوت فامِ زخمِ دل

میں ہوں کتنا تیرہ جاں ، افسوس میں

یاد اُس لب کی عطش انگیز ہے

ہوں میں دوزخ درمیاں ، ، افسوس میں

بازوانِ مرمرینِ ۔۔ آرزو

وائے ہجرِ جاداں ، افسوس میں

سبزہ زارِ خوابِ لالہ فام میں

کس قدر ہوں میں تپاں ، افسوس میں

پرتوِ سمیینِ مہتابِ گماں

گم ہوئی شمعِ ، افسوس میں

مجھ کو ہے درپیش اپنے سے فراق

میں کہاں اور میں کہاں ، افسوس میں

دل میں نالہ توڑنا ہے جس کا فن

میں ہوں وہ آوازہ خواں ، افسوس میں

میں ہوں گوشہ گیرِ گردِ صد ملال

اے غبارِ کارواں ، افسوس میں

میرے ہی دل پر لگا ہے جس کا تیر

ہے وہ میری ہی کماں افسوس میں

جون ایلیا

سو ہیں اب کہاں؟ مگر اب کہاں، گئی پل کا تو، گئی پل کا میں

اکتوبر 23, 2015Jaun Elia،جون ایلیا،شعراء،غزلکہاں،کارواں،گماں،بیکراں،جاں،دھواںadmin

جون ایلیا ۔ غزل نمبر 102

ہیں عجیب رنگ کی داستاں، گئی پل کا تو، گئی پل کا میں

سو ہیں اب کہاں؟ مگر اب کہاں، گئی پل کا تو، گئی پل کا میں

نہ یقیں ہیں اب نہ گماں ہیں اب، سو کہاں تھے جب سو کہاں ہیں اب

وہ یقیں یقیں، وہ گماں گماں، گئی پل کا تو، گئی پل کا میں

مری جاں وہ پل جو گئی نکل، کوئی پل تھی وہ کہ ازل، ازل

سو گزشتگی میں ہیں بیکراں، گئی پل کا تو، گئی پل کا میں

وہی کارواں ہے کہ ہے رواں وہی وصل و فصل ہیں درمیاں

ہیں غبارِ رفتہ ءِ کارواں، گئی پل کا تو، گئی پل کا میں

تو مرے بدن سے جھلک بھی لے، میں ترے بدن سے مہک بھی لوں

ہمہ نارسائی ہیں جانِ جاں، گئی پل کا تو، گئی پل کا میں

گلہ ءِ فراق تو کیوں بھلا طلبِ وصال تو کیا بھلا

کسی آگ کا تھے بس اک دھواں، گئی پل کا تو، گئی پل کا میں

جون ایلیا

صحن ہوا دھواں دھواں ! شام بخیر شب بخیر ۔۔۔

اکتوبر 23, 2015Jaun Elia،جون ایلیا،شعراء،غزلنوجواں،یاں،گراں،جاں،خزاں،دھواں،درمیاں،سائباںadmin

جون ایلیا ۔ غزل نمبر 51

جاؤ قرار بے دلاں ! شام بخیر شب بخیر

صحن ہوا دھواں دھواں ! شام بخیر شب بخیر ۔۔۔

شام وصال ہے قریب ، صبح کمال ہے قریب

پھر نہ رہیں گے سر گراں ، شام بخیر شب بخیر

وجد کرے گی زندگی جسم بہ جسم جاں بہ جاں

جسم بہ جسم جاں بہ جاں، شام بخیر شب بخیر

اے مرے شوق کی امنگ میرے شباب کی ترنگ

تجھ پہ شفق کا سائباں، شام بخیر شب بخیر

تو مری شاعری میں ہے رنگِ طراز و گل فشاں

تیری بہار بے خزاں، شام بخیر شب بخیر

تیرا خیال خواب خواب خلوتِ جاں کی آب و تاب

جسم جمیل و نوجواں، شام بخیر شب بخیر

ہے مرا نام ارجمند تیرا حصارِ سر بلند

بانو شہر جسم و جاں، شام بخیر شب بخیر

درد سے جان دید تک دل سے رخِ امید تک

کوئی نہیں ہے درمیاں، شام بخیر شب بخیر

ہو گئی دیر جاؤ تم مجھ کو گلے لگاؤ تم

تو مری جاں ہے مری جاں، شام بخیر شب بخیر

شام بخیر شب بخیر، موجِ شمیمِ پیرہن

تیری مہک رہے گی یاں، شام بخیر شب بخیر

زاہدہ حنا کے نام

جون ایلیا

جوشِ قدح سے بزم چراغاں کئے ہوئے

اکتوبر 8, 2015مرزا اسد اللہ خان غالب،اساتذہ،غزلمژگاں،چراغاں،ویراں،گلستاں،گریباں،پریشاں،جاناں،جاں،داماں،داں،درباں،ساماں،طوفاں،عنواںadmin

دیوانِ غالب ۔ غزل نمبر 211

مدت ہوئی ہے یار کو مہماں کئے ہوئے

جوشِ قدح سے بزم چراغاں کئے ہوئے

کرتا ہوں جمع پھر جگرِ لخت لخت کو

عرصہ ہوا ہے دعوتِ مژگاں کئے ہوئے

پھر وضعِ احتیاط سے رکنے لگا ہے دم

برسوں ہوئے ہیں چاک گریباں کئے ہوئے

پھر گرمِ نالہ ہائے شرر بار ہے نفَس

مدت ہوئی ہے سیرِ چراغاں کئے ہوئے

پھر پرسشِ جراحتِ دل کو چلا ہے عشق

سامانِ صد ہزار نمک داں کئے ہوئے

پھر بھر رہا ہوں@ خامۂ مژگاں بہ خونِ دل

سازِ چمن طرازئ داماں کئے ہوئے

باہم دگر ہوئے ہیں دل و دیدہ پھر رقیب

نظارہ و خیال کا ساماں کئے ہوئے

دل پھر طوافِ کوئے ملامت کو جائے ہے

پندار کا صنم کدہ ویراں کئے ہوئے

پھر شوق کر رہا ہے خریدار کی طلب

عرضِ متاعِ عقل و دل و جاں کئے ہوئے

دوڑے ہے پھر ہر ایک گل و لالہ پر خیال

صد گلستاں نگاہ کا ساماں کئے ہوئے

پھر چاہتا ہوں نامۂ دلدار کھولنا

جاں نذرِ دلفریبئِ عنواں کئے ہوئے

مانگے ہے پھر کسی کو لبِ بام پر ہوس

زلفِ سیاہ رخ پہ پریشاں کئے ہوئے

چاہے ہے پھر کسی کو مقابل میں آرزو

سرمے سے تیز دشنۂ مژگاں کئے ہوئے

اک نوبہارِ ناز کو تاکے ہے پھر نگاہ

چہرہ فروغ مے سے گلستاں کئے ہوئے

پھر جی میں ہے کہ در پہ کسی کے پڑے رہیں

سر زیر بارِ منتِ درباں کئے ہوئے

جی ڈھونڈتا ہے پھر وہی فرصت، کہ@ رات دن

بیٹھے رہیں تصورِ جاناں کئے ہوئے

غالب ہمیں نہ چھیڑ، کہ پھر جوشِ اشک سے

بیٹھے ہیں ہم تہیّۂ طوفاں کئے ہوئے

@نسخۂ مہر میں ” ہے” @ نسخۂ مہر میں ” کہ”

مرزا اسد اللہ خان غالب

اِک چھیڑ ہے وگرنہ مراد امتحاں نہیں

اکتوبر 8, 2015مرزا اسد اللہ خان غالب،اساتذہ،غزلفشاں،مہرباں،نشاں،گراں،الاَماں،امتحاں،تواں،جاں،خونچکاں،دہاں،درمیاں،زباںadmin

دیوانِ غالب ۔ غزل نمبر 178

ہم پر جفا سے ترکِ وفا کا گماں نہیں

اِک چھیڑ ہے وگرنہ مراد امتحاں نہیں

کس منہ سے شکر کیجئے اس لطف خاص کا

پرسش ہے اور پائے سخن درمیاں نہیں

ہم کو ستم عزیز، ستم گر کو ہم عزیز

نا مہرباں نہیں ہے اگر مہرباں نہیں

بوسہ نہیں، نہ دیجیے دشنام ہی سہی

آخر زباں تو رکھتے ہو تم، گر دہاں نہیں

ہر چند جاں گدازئِ قہروعتاب ہے

ہر چند پشت گرمئِ تاب و تواں نہیں

جاں مطربِ ترانہ ھَل مِن مَزِید ہے

لب پر دہ سنجِ زمزمۂِ الاَماں نہیں

خنجر سے چیر سینہ اگر دل نہ ہو دو نیم

دل میں چُھری چبھو مژہ گر خونچکاں نہیں

ہے ننگِ سینہ دل اگر آتش کدہ نہ ہو

ہے عارِدل نفس اگر آذر فشاں نہیں

نقصاں نہیں جنوں میں بلا سے ہو گھر خراب

سو گز زمیں کے بدلے بیاباں گراں نہیں

کہتے ہو “ کیا لکھا ہے تری سرنوشت میں“

گویا جبیں پہ سجدۂ بت کا نشاں نہیں

پاتا ہوں اس سے داد کچھ اپنے کلام کی

رُوح القُدُس اگرچہ مرا ہم زباں نہیں

جاں ہے بہائے بوسہ ولے کیوں کہے ابھی

غالب کو جانتا ہے کہ وہ نیم جاں نہیں

مرزا اسد اللہ خان غالب

کرتے ہیں مَحبّت تو گزرتا ہے گماں اور

اکتوبر 8, 2015مرزا اسد اللہ خان غالب،اساتذہ،غزلہاں،فشاں،فغاں،نہاں،کماں،گماں،گراں،بیاں،جاں،رواں،زباںadmin

دیوانِ غالب ۔ غزل نمبر 120

ہے بس کہ ہر اک ان کے اشارے میں نشاں اور

کرتے ہیں مَحبّت تو گزرتا ہے گماں اور

یارب وہ نہ سمجھے ہیں نہ سمجھیں گے مری بات

دے اور دل ان کو، جو نہ دے مجھ کو زباں اور

ابرو سے ہے کیا اس نگہِ ناز کو پیوند

ہے تیر مقرّر مگر اس کی ہے کماں اور

تم شہر میں ہو تو ہمیں کیا غم، جب اٹھیں گے

لے آئیں گے بازار سے جا کر دل و جاں اور

ہر چند سُبُک دست ہوئے بت شکنی میں

ہم ہیں، تو ابھی راہ میں ہیں سنگِ گراں اور

ہے خوںِ جگر جوش میں دل کھول کے روتا

ہوتے جو کئی دیدۂ خو نبانہ فشاں اور

مرتا ہوں اس آواز پہ ہر چند سر اڑ جائے

جلاّد کو لیکن وہ کہے جائیں کہ ’ہاں اور‘

لوگوں کو ہے خورشیدِ جہاں تاب کا دھوکا

ہر روز دکھاتا ہوں میں اک داغِ نہاں اور

لیتا، نہ اگر دل تمھیں دیتا، کوئی دم چین

کرتا، جو نہ مرتا، کوئی دن آہ و فغاں اور

پاتے نہیں جب راہ تو چڑھ جاتے ہیں نالے

رُکتی ہے مری طبع، تو ہوتی ہے رواں اور

ہیں اور بھی دنیا میں سخنور بہت اچھّے

کہتے ہیں کہ غالب کا ہے اندازِ بیاں اور

مرزا اسد اللہ خان غالب

سب جیسے اڑ گئی ہے رنگینی گلستاں کی

اکتوبر 7, 2015میر تقی میر،اساتذہ،غزلنوجواں،کہاں،گلستاں،آسماں،اذاں،جہاں،جاں،زباںadmin

دیوان ششم غزل 1916

گلبرگ سی زباں سے بلبل نے کیا فغاں کی

سب جیسے اڑ گئی ہے رنگینی گلستاں کی

مطلوب گم کیا ہے تب اور بھی پھرے ہے

بے وجہ کچھ نہیں ہے گردش یہ آسماں کی

مائل ستم کے ہونا جور و جفا بھی کرنا

انصاف سے یہ کہنا یہ رسم ہے کہاں کی

ہے سبزئہ لب جو اس لطف سے چمن میں

جوں بھیگتی مسیں ہوں کوئی سرو نوجواں کی

میں گھر جہاں میں اپنے لڑکوں کے سے بنائے

جب چاہا تب مٹایا بنیاد کیا جہاں کی

صوم و صلوٰۃ یکسو میخانے میں جو تھے ہم

آواز بھی نہ آئی کانوں میں یاں اذاں کی

جب سامنے گئے ہم ہم نے اسے دعا دی

شکل ان نے دیکھتے ہی غصہ کیا زباں کی

دیکھیں تو میر کیونکر ہجراں میں ہم جیے ہیں

ہے اضطراب دل کا بے طاقتی ہے جاں کی

میر تقی میر

کہ یہ پیرانہ سر جاہل جواں ہے

اکتوبر 7, 2015میر تقی میر،اساتذہ،غزلمہرباں،نشاں،کہاں،کماں،آستاں،آشیاں،جواں،جاں،رواںadmin

دیوان ششم غزل 1911

فلک کرنے کے قابل آسماں ہے

کہ یہ پیرانہ سر جاہل جواں ہے

گئے ان قافلوں سے بھی اٹھی گرد

ہماری خاک کیا جانیں کہاں ہے

بہت نامہرباں رہتا ہے یعنی

ہمارے حال پر کچھ مہرباں ہے

ہمیں جس جاے کل غش آگیا تھا

وہیں شاید کہ اس کا آستاں ہے

مژہ ہر اک ہے اس کی تیز ناوک

خمیدہ بھوں جو ہے زوریں کماں ہے

اسے جب تک ہے تیر اندازی کا شوق

زبونی پر مری خاطر نشاں ہے

چلی جاتی ہے دھڑکوں ہی میں جاں بھی

یہیں سے کہتے ہیں جاں کو رواں ہے

اسی کا دم بھرا کرتے رہیں گے

بدن میں اپنے جب تک نیم جاں ہے

پڑا ہے پھول گھر میں کاہے کو میر

جھمک ہے گل کی برق آشیاں ہے

میر تقی میر

سب یہیں رہ گئے کہاں سے گئے

اکتوبر 7, 2015میر تقی میر،اساتذہ،غزلکہاں،جہاں،جاں،خانماں،سانadmin

دیوان ششم غزل 1875

کہتے ہیں مرنے والے یاں سے گئے

سب یہیں رہ گئے کہاں سے گئے

دم میں دم جب تلک تھا سوچ رہا

سانس کے ساتھ سارے سانسے گئے

آنکھ کھلتے ہی گھر گئے وے تو

ہم ستم دیدہ خانماں سے گئے

واں گئے کرتے وے خرام ناز

یاں جواں کیسے کیسے جاں سے گئے

اس گلی سے جو اٹھ گئے بے صبر

میر گویا کہ وے جہاں سے گئے

میر تقی میر

آشوب نالہ اب تو پہنچا ہے آسماں تک

اکتوبر 7, 2015میر تقی میر،اساتذہ،غزلکہاں،کارواں،آسماں،آستاں،آشیاں،استخواں،جہاں،جاں،دہاں،زباںadmin

دیوان ششم غزل 1832

وہ تو نہیں کہ اودھم رہتا تھا آشیاں تک

آشوب نالہ اب تو پہنچا ہے آسماں تک

لبریز جلوہ اس کا سارا جہاں ہے یعنی

ساری ہے وہ حقیقت جاوے نظر جہاں تک

ہجراں کی سختیوں سے پتھر دل و جگر ہیں

صبر اس کی عاشقی میں کوئی کرے کہاں تک

سوداے عاشقی میں نقصاں ہے جی کا لیکن

ہم راضی ہورہے ہیں اپنے زیان جاں تک

وا ماندہ نقش پا سے یک دشت ہم ہیں بیکس

دشوار ہے پہنچنا اب اپنا کارواں تک

جی مارتے ہیں دلبر عاشق کا اس خطر سے

حرف وفا نہ آیا اپنی کبھو زباں تک

دل دھڑکے ہے جو بجلی چمکے ہے سوے گلشن

پہنچے مبادا میری خاشاک آشیاں تک

دیواروں سے بھی مارا پتھروں سے پھوڑ ڈالا

پہنچا نہ سر ہمارا حیف اس کے آستاں تک

یہ تنگی و نزاکت اس رنگ سے کہاں ہے

گل برگ و غنچے پہنچیں کب ان لب و دہاں تک

ان جلتی ہڈیوں پر ہرگز ہما نہ بیٹھے

پہنچی ہے عشق کی تب اے میر استخواں تک

میر تقی میر

کی تم نے مہربانی بے خانماں کے اوپر

اکتوبر 7, 2015میر تقی میر،اساتذہ،غزلنشاں،امتحاں،آسماں،آشیاں،تواں،جہاں،جاں،خانماں،دہاں،دکاں،زیاں،زباںadmin

دیوان ششم غزل 1823

آئے ہو گھر سے اٹھ کر میرے مکاں کے اوپر

کی تم نے مہربانی بے خانماں کے اوپر

پھولوں سے اٹھ نگاہیں مکھڑے پہ اس کے ٹھہریں

وہ گل فروش کا جو آیا دکاں کے اوپر

برسات اب کے گذری خوف و خطر میں ساری

چشمک زناں رہی ہے برق آشیاں کے اوپر

رخسار سا کسو کے کاہے کو ہے فروزاں

ہر چند ماہ تاباں ہے آسماں کے اوپر

بے سدھ پڑا رہوں ہوں بستر پہ رات دن میں

کیا آفت آگئی ہے اس نیم جاں کے اوپر

عشق و ہوس میں کچھ تو آخر تمیز ہو گی

آئی طبیعت اس کی گر امتحاں کے اوپر

الفت کی کلفتوں میں معلوم ہے ہوئی وہ

تھا اعتماد کلی تاب و تواں کے اوپر

محو دعا تھا اکثر غیرت سے لیک گاہے

آیا نہ نام اس کا میری زباں کے اوپر

وہ جان و دل کی خواہش آیا نہیں جہاں میں

آئی ہے اک قیامت اہل جہاں کے اوپر

کیا لوگ ہیں محباں سوداے عاشقی میں

اغماض کرتے ہیں سب جی کے زیاں کے اوپر

حیرت سے اس کے روکی چپ لگ گئی ہے ایسی

گویا کہ مہر کی ہے میرے دہاں کے اوپر

جو راہ دوستی میں اے میر مرگئے ہیں

سر دیں گے لوگ ان کے پا کے نشاں کے اوپر

میر تقی میر

حیرت سے آفتاب جہاں کا تہاں رہا

اکتوبر 7, 2015میر تقی میر،اساتذہ،غزلمہرباں،میہماں،کہاں،تہاں،جہاں،جواں،جاں،خانماں،رواںadmin

دیوان ششم غزل 1807

اب یار دوپہر کو کھڑا ٹک جو یاں رہا

حیرت سے آفتاب جہاں کا تہاں رہا

جو قافلے گئے تھے انھوں کی اٹھی بھی گرد

کیا جانیے غبار ہمارا کہاں رہا

سوکھی پڑی ہیں آنکھیں مری دیر سے جو اب

سیلاب ان ہی رخنوں سے مدت رواں رہا

اعضا گداز عشق سے ایک ایک بہ گئے

اب کیا رہا ہے مجھ میں جو میں نیم جاں رہا

منعم کا گھر تمادی ایام میں بنا

سو آپ ایک رات ہی واں میہماں رہا

اس کے فریب لطف پہ مت جا کہ ہمنشیں

وہ دیر میرے حال پہ بھی مہرباں رہا

اب در پہ اس کے گھر کے گرا ہوں وگر نہ میں

مدت خرابہ گرد ہی بے خانماں رہا

ہے جان تو جہان ہے مشہور ہے مثل

کیا ہے گئے پہ جان کے گو پھر جہاں رہا

ترک شراب خانہ ہے پیری میں ورنہ میر

ترسا بچوں ہی میں رہا جب تک جواں رہا

میر تقی میر

مرنا تمام ہو نہ سکا نیم جاں ہوا

اکتوبر 6, 2015میر تقی میر،اساتذہ،غزلفغاں،لامکاں،مہرباں،مغاں،کہاں،گراں،امتحاں،آشیاں،جواں،جاں،خانماں،رواں،زیاں،سماںadmin

دیوان ششم غزل 1793

میں رنج عشق کھینچے بہت ناتواں ہوا

مرنا تمام ہو نہ سکا نیم جاں ہوا

بستر سے اپنے اٹھ نہ سکا شب ہزار حیف

بیمار عشق چار ہی دن میں گراں ہوا

شاید کہ دل تڑپنے سے زخم دروں پھٹا

خونناب میری آنکھوں سے منھ پر رواں ہوا

غیر از خدا کی ذات مرے گھر میں کچھ نہیں

یعنی کہ اب مکان مرا لامکاں ہوا

مستوں میں اس کی کیسی تعین سے ہے نشست

شیشہ ہوا نہ کیف کا پیر مغاں ہوا

سائے میں تاک کے مجھے رکھا اسیر کر

صیاد کے کرم سے قفس آشیاں ہوا

ہم نے نہ دیکھا اس کو سو نقصان جاں کیا

ان نے جو اک نگاہ کی اس کا زیاں ہوا

ٹک رکھ لے ہاتھ تن میں نہیں اور جاے زخم

بس میرے دل کا یار جی اب امتحاں ہوا

وے تو کھڑے کھڑے مرے گھر آ کے پھر گئے

میں بے دیار و بیدل و بے خانماں ہوا

گردش نے آسماں کی عجائب کیا سلوک

پیر کبیر جب میں ہوا وہ جواں ہوا

مرغ چمن کی نالہ کشی کچھ خنک سی تھی

میں آگ دی چمن کو جو گرم فغاں ہوا

دو پھول لاکے پھینک دیے میری گور پر

یوں خاک میں ملا کے مجھے مہرباں ہوا

سر کھینچا دود دل نے جہاں تیرہ ہو گیا

دم بھر میں صبح زیر فلک کیا سماں ہوا

کہتے ہیں میر سے کہیں اوباش لڑ گئے

ہنگامہ ان سے ایسا الٰہی کہاں ہوا

میر تقی میر

بیمار مرا گراں بہت ہے

اکتوبر 6, 2015میر تقی میر،اساتذہ،غزلمہرباں،مکاں،نشاں،گراں،آسماں،جاں،زماںadmin

دیوان پنجم غزل 1768

دل پہلو میں ناتواں بہت ہے

بیمار مرا گراں بہت ہے

ہر آن شکیب میں کمی ہے

بیتابی زماں زماں بہت ہے

مقصود کو دیکھیں پہنچے کب تک

گردش میں تو آسماں بہت ہے

جی کو نہیں لاگ لامکاں سے

ہم کو کوئی دل مکاں بہت ہے

گو خاک سے گور ہووے یکساں

گم گشتے کا یہ نشاں بہت ہے

جاں بخشی غیر ہی کیا کر

مجھ کو یہی نیم جاں بہت ہے

اکثر پوچھے ہے جیتے ہیں میر

اب تو کچھ مہرباں بہت ہے

میر تقی میر

ہم ہوئے خستہ جاں دریغ دریغ

اکتوبر 6, 2015میر تقی میر،اساتذہ،غزلمکاں،نامہرباں،کارواں،جاں،درمیاں،زماں،زیاںadmin

دیوان پنجم غزل 1648

غم کھنچا رائیگاں دریغ دریغ

ہم ہوئے خستہ جاں دریغ دریغ

عشق میں جی بھی ہم گنوا بیٹھے

ہو گیا کیا زیاں دریغ دریغ

سب سے کی دشمنی جنھوں کے لیے

وے ہیں نامہرباں دریغ دریغ

قطع امید ہے قریب اس سے

تیغ ہے درمیاں دریغ دریغ

دل گئے پر نہ ورد نے تسبیح

کہتے ہیں ہر زماں دریغ دریغ

اٹھنے دیتا نہیں شکستہ دل

ڈھہ گیا کیا مکاں دریغ دریغ

تب کھلی آنکھ میر اپنی جب

جاچکا کارواں دریغ دریغ

میر تقی میر

میرا دماغ تب سے ہے ہفتم آسماں پر

اکتوبر 6, 2015میر تقی میر،اساتذہ،غزللامکاں،ناتواں،آسماں،آشیاں،جاں،دکاں،زباںadmin

دیوان پنجم غزل 1620

شوریدہ سر رکھا ہے جب سے اس آستاں پر

میرا دماغ تب سے ہے ہفتم آسماں پر

گھائل گرا رہا ہے فتراک سے بندھا ہے

کیا کیا ستم ہوئے ہیں اس صید ناتواں پر

لطف بدن کو اس کے ہرگز پہنچ سکے نہ

جا پڑتی تھی ہمیشہ اپنی نگاہ جاں پر

خاشاک و خار و خس کو کر ایک جا جلایا

کیا چشم شور برق خاطف تھی آشیاں پر

وہ باغباں پسر کچھ گل گل شگفتہ ہے اب

یہ اور گل کھلا ہے اک پھولوں کی دکاں پر

پرکالے آگ کے تھے کیا نالہ ہاے بلبل

شبنم سے آبلے ہیں گل برگ سی زباں پر

دل کیا مکاں پھر اس کا کیا صحن میر لیکن

غالب ہے سعی میں تو میدان لامکاں پر

میر تقی میر

تسکیں نہیں ہے جان کو آب رواں سے بھی

اکتوبر 6, 2015میر تقی میر،اساتذہ،غزلیاں،پیرمغاں،آسماں،جہاں،جاں،رواں،زباںadmin

دیوان چہارم غزل 1518

ہوتی نہیں تسلی دل گلستاں سے بھی

تسکیں نہیں ہے جان کو آب رواں سے بھی

تا یہ گرفتہ وا ہو کہاں لے کے جائیے

آئے ہیں اس کی غنچگی میں تنگ جاں سے بھی

آگے تھی شوخی ہم سے کنایوں میں چپ تھے ہم

مشکل ہے اب برا لگے کہنے زباں سے بھی

ہر چند دست بیع جواناں ہوں میں ولے

اک اعتقاد رکھتا ہوں پیرمغاں سے بھی

جھنجھلاہٹ اور غصے میں ہجران یار کے

جھگڑا ہمیں رہے ہے زمیں آسماں سے بھی

دنیا سے درگذر کہ گذرگہ عجب ہے یہ

درپیش یعنی میر ہے جانا جہاں سے بھی

لشکر میں ہے مبیت اسی بات کے لیے

کہتے ہیں لوگ کوچ ہے کل صبح یاں سے بھی

میر تقی میر

اک نالہ حوصلے سے بس ہے وداع جاں کو

اکتوبر 6, 2015میر تقی میر،اساتذہ،غزلکہاں،کماں،آسماں،جہاں،جاں،داستاں،زباںadmin

دیوان چہارم غزل 1467

دیتی ہے طول بلبل کیا شورش فغاں کو

اک نالہ حوصلے سے بس ہے وداع جاں کو

میں تو نہیں پر اب تک مستانہ غنچے ہوکر

کہتے ہیں مرغ گلشن سے میری داستاں کو

نالاں تو ہیں مجھی سے پر وہ اثر کہاں ہے

گو طائر گلستاں سیکھے مری زباں کو

کیا جانیے کہ کیا کچھ پردے سے ہووے ظاہر

رہتے ہیں دیکھتے ہم ہر صبح آسماں کو

اس چشم سرخ پر ہے وہ ابروے کشیدہ

جوں ترک مست رکھ لے سر کے تلے کماں کو

میری نگاہ میں تو معدوم سب ہیں وے ہی

موجود بھی نہ جانا اس راہ سے جہاں کو

بعد از نماز تھے کل میخانے کے در اوپر

کیا جانے میر واں سے پھر اٹھ گئے کہاں کو

میر تقی میر

پیدا ہے عشق کشتے کا اس کے نشاں ہنوز

اکتوبر 6, 2015میر تقی میر،اساتذہ،غزلناتواں،نشاں،آسماں،جاں،داستاں،رواں،زباںadmin

دیوان چہارم غزل 1394

ہے زیرخاک لاشۂ عاشق طپاں ہنوز

پیدا ہے عشق کشتے کا اس کے نشاں ہنوز

گردش سے اس کی خاک برابر ہوئی ہے خلق

استادہ روے خاک پہ ہے آسماں ہنوز

اس تک پہنچنے کا تو نہیں حال کچھ ولے

جاتے ہیں گرتے پڑتے بھی ہم ناتواں ہنوز

پروانہ جل کے خاک ہوا پھر اڑا کیا

اے شمع تیری رہتی نہیں ہے زباں ہنوز

چندیں ہزار جانیں گئیں اس کی راہ میں

ایک آدھ تو بھی مر رہے ہیں نیم جاں ہنوز

مدت ہوئی کہ خوار ہو گلیوں میں مر گئے

قصہ ہمارے عشق کا ہے داستاں ہنوز

لخت جگر کے غم میں کہ تھا لعل پارہ میر

رخسار زرد پر ہے مرے خوں رواں ہنوز

میر تقی میر

تو میاں مجنوں بیاباں سے گئے

اکتوبر 6, 2015میر تقی میر،اساتذہ،غزلپریشاں،ایماں،بیاباں،جاں،سانadmin

دیوان سوم غزل 1276

یوں جنوں کرتے جو ہم یاں سے گئے

تو میاں مجنوں بیاباں سے گئے

مر گئے دم کب تلک رکتے رہیں

بارے جی کے ساتھ سب سانسے گئے

کیا بدن دیکھا چسی چولی سے ہائے

مارے حسرت کے ہی ہم جاں سے گئے

جانب مسجد تھی وہ کافر نگاہ

شیخ صاحب دین و ایماں سے گئے

پیچ میں آئے کسو کی زلف کے

میر اس رستے پریشاں سے گئے

میر تقی میر

مرا دامن بنے تو باندھ دو گل کے گریباں سے

اکتوبر 6, 2015میر تقی میر،اساتذہ،غزلمہماں،گریاں،گریباں،پریشاں،جاں،حیراں،ساماںadmin

دیوان سوم غزل 1274

بہار آئی نکالو مت مجھے اب کے گلستاں سے

مرا دامن بنے تو باندھ دو گل کے گریباں سے

نہ ٹک واشد ہوئی دل کو نہ جی کی لاگ کچھ پائی

رہے دس دن جو اپنی عمر کے یاں ہم سو مہماں سے

غم ہجراں نے شاید آگ دی اس ماہ بن دل کو

شرارے تب تو نکلے ہیں ہماری چشم گریاں سے

سبب آشفتہ طبعی کا ہماری رہتے ہیں دونوں

نہ دل جمعی ہے اس کے خط سے نے زلف پریشاں سے

ادھر زنجیر کے غل ہیں ادھر ہنگامے لڑکوں کے

جنوں اس دشت میں ہم نے کیا ہے کیسے ساماں سے

محبت میں کسو کی رنج و محنت سے گئے دونوں

رہی شرمندگی ہی عمر بھر مجھ کو دل و جاں سے

خدا جانے کہ دل کس خانہ آباداں کو دے بیٹھے

کھڑے تھے میر صاحب گھر کے دروازے پہ حیراں سے

میر تقی میر

برسنا مینھ کا داخل ہے اس بن تیر باراں میں

اکتوبر 6, 2015میر تقی میر،اساتذہ،غزلمیداں،یوسفستاں،گلستاں،پیکاں،ایماں،بیاباں،باراں،جاں،حیراں،دیواں،داماںadmin

دیوان سوم غزل 1193

چمکنا برق کا کرتا ہے کار تیغ ہجراں میں

برسنا مینھ کا داخل ہے اس بن تیر باراں میں

بھرے رہتے ہیں سارے پھول ہی جس کے گریباں میں

وہ کیا جانے کہ ٹکڑے ہیں جگر کے میرے داماں میں

کہیں شام و سحر رویا تھا مجنوں عشق لیلیٰ میں

ہنوز آشوب دونوں وقت رہتا ہے بیاباں میں

خیال یار میں آگے ہے یک مہ پارہ یاں ہر دم

اگر ہجراں میں زندانی ہوں پر ہوں یوسفستاں میں

رکھا عرصہ جنوں پر تنگ مشتاقوں کی دوری سے

کسے مارا ہے اس گھتیے نے سنمکھ ہوکے میداں میں

جہاں سے دیکھیے اک شعر شور انگیز نکلے ہے

قیامت کا سا ہنگامہ ہے ہر جا میرے دیواں میں

جو دیکھو تو نہیں یہ حال اپنا حسن سے خالی

دمک الماس کی سی ہے ہماری چشم حیراں میں

خرابی آگئی دینوں میں ملت گئی اسے دیکھے

ملے سے اس کے رخنے پڑ گئے لوگوں کے ایماں میں

نکل آتا ہے گھر سے ہر گھڑی ننگے بدن باہر

برا یہ آپڑا ہے عیب اس آسائش جاں میں

ستم کے تیر اس کے میرے سینے میں بہت ٹوٹے

کیا جاتا ہے مشکل فرق اب دل اور پیکاں میں

ہواے ابر میں کیا میر ہنستا باغ میں وہ تھا

گری پڑتی ہے بجلی آج کچھ صحن گلستاں میں

میر تقی میر

کچھ ہورہے ہیں غم میں ترے نیم جاں سے ہم

اکتوبر 6, 2015میر تقی میر،اساتذہ،غزلمہرباں،کہاں،آسماں،آستاں،جواں،جاں،زباںadmin

دیوان سوم غزل 1171

آ ٹک شتاب جاتے ہیں ورنہ جہاں سے ہم

کچھ ہورہے ہیں غم میں ترے نیم جاں سے ہم

ہر بات کے جواب میں گالی کہاں تلک

اب جاں بہ لب ہوئے ہیں تمھاری زباں سے ہم

وعدہ کرو تو سوچ لو مدت کو دل میں بھی

یہ حال ہے تو دیر رہیں گے کہاں سے ہم

الجھائو دل کا جس سے ہے جھنجھلاکے اس بغیر

جھگڑا کیا کریں ہیں زمین آسماں سے ہم

لاویں ہماری خاک پر اس کینہ ور کو بھی

یہ کہہ مریں گے اپنے ہر اک مہرباں سے ہم

دربان سنگدل نے خبر واں تلک نہ کی

سر مار مار صبح کی اس آستاں سے ہم

جب اس کی تیغ رکھنے لگا اپنے پاس میر

امید قطع کی تھی تبھی اس جواں سے ہم

میر تقی میر

بلبل نے بھی نہ طور گلوں کا بیاں کیا

اکتوبر 6, 2015میر تقی میر،اساتذہ،غزلامتحاں،بیاں،بدزباں،جہاں،جاں،رواں،زیاںadmin

دیوان سوم غزل 1079

میں گلستاں میں آ کے عبث آشیاں کیا

بلبل نے بھی نہ طور گلوں کا بیاں کیا

پھر اس کے ابرواں کا خم و تاب ہے وہی

تلوار کے تلے بھی مرا امتحاں کیا

دوں کس کو دوش دشمن جانی تھی دوستی

اس سودے میں صریح میں نقصان جاں کیا

گالی ہے حرف یار قلم نے قضا کے ہائے

صورت نکالی خوب ولے بدزباں کیا

اس جنس خوش کے پیچھے کھپا میں چوائو کیا

میں نے کسو کا کیا کیا اپنا زیاں کیا

لڑکے جہان آباد کے یک شہر کرتے ناز

آجاتے ہیں بغل میں اشارہ جہاں کیا

میں منتظر جواب کا نامے کے مر گیا

ناچار میر جان کو اودھر رواں کیا

میر تقی میر

مجھ پہ تودہ ہوا ہے طوفاں کا

اکتوبر 6, 2015میر تقی میر،اساتذہ،غزلمرجاں،مسلماں،ڈھان،گریباں،ایماں،جاں،طوفاںadmin

دیوان سوم غزل 1068

ہوں نشاں کیوں نہ تیر خوباں کا

مجھ پہ تودہ ہوا ہے طوفاں کا

ہاتھ زنجیر ہو جنوں میں رہا

اپنے زنجیرئہ گریباں کا

چپکے دیکھو جھمکتے وے لب سرخ

ذکر یاں کیا ہے لعل و مرجاں کا

ایک رہزن ہے اس کی کافر زلف

غم ہی رہتا ہے دین و ایماں کا

عمر آوارگی میں سب گذری

کچھ ٹھکانا نہیں دل و جاں کا

کافرستاں ہے خال و خط و زلف

وقر کیا ہے دل مسلماں کا

مر گیا میر نالہ کش بیکس

نَے نے ماتم میں اس کے منھ ڈھانکا

میر تقی میر

یا محبت کہہ کے یہ بارگراں میں لے گیا

اکتوبر 6, 2015میر تقی میر،اساتذہ،غزلفشاں،مہرباں،آسماں،بارگراں،جہاں،جاں،داستاںadmin

دیوان سوم غزل 1056

دین و دل کے غم کو آساں ناتواں میں لے گیا

یا محبت کہہ کے یہ بارگراں میں لے گیا

خاک و خوں میں لوٹ کر رہ جانے ہی کا لطف ہے

جان کو کیا جو سلامت نیم جاں میں لے گیا

سرگذشت عشق کی تہ کو نہ پہنچا یاں کوئی

گرچہ پیش دوستاں یہ داستاں میں لے گیا

عرصۂ دشت قیامت باغ ہوجائے گا سب

اس طرح سے جو یہ چشم خوں فشاں میں لے گیا

ذکر دل جانے کا وہ پرکینہ سن کہنے لگا

یہ سناتے ہو کسے کیا مہرباں میں لے گیا

یک جہاں مہر و وفا کی جنس تھی میرے کنے

لیکن اس کو پھیر ہی لایا جہاں میں لے گیا

ریختہ کاہے کو تھا اس رتبۂ اعلیٰ میں میر

جو زمیں نکلی اسے تا آسماں میں لے گیا

میر تقی میر

سو ہی بات آئی اٹھے اس پاس سے جاں سے گئے

اکتوبر 6, 2015میر تقی میر،اساتذہ،غزلقرآں،مہماں،گلستاں،پریشاں،ایماں،بیاباں،جاںadmin

دیوان دوم غزل 1013

ہم نہ کہتے تھے رہے گا ہم میں کیا یاں سے گئے

سو ہی بات آئی اٹھے اس پاس سے جاں سے گئے

کیا بخود رہنا ہمارا کچھ رکھے ہے اعتبار

آپ میں آئے کبھو اب ہم تو مہماں سے گئے

جب تلک رہنا بنا دل تنگ غنچے سے رہے

دیکھیے کیا گل کھلے گا اب گلستاں سے گئے

کیا غزالوں ہی کو ہم بن وحشت بسیار ہے

کوہ بھی نالاں رہے جب ہم بیاباں سے گئے

لائی آفت خانقاہ و مسجد اوپر وہ نگاہ

صوفیاں دیں سے گئے سب شیخ ایماں سے گئے

دور کر خط کو کیا چہرہ کتابی ان نے صاف

اب قیامت ہے کہ سارے حرف قرآں سے گئے

جی تو اس کی زلف میں دل کا کل پیچاں میں میر

جا بھی نکلے اس کنے تو ہم پریشاں سے گئے

میر تقی میر

سو یوں رہے کہ جیسے کوئی میہماں رہے

اکتوبر 6, 2015میر تقی میر،اساتذہ،غزلمہرباں،میہماں،نہاں،نشاں،یاں،کہاں،آسماں،جہاں،جاں،درمیاں،رواں،زباں،سماںadmin

دیوان دوم غزل 1004

یاں ہم براے بیت جو بے خانماں رہے

سو یوں رہے کہ جیسے کوئی میہماں رہے

تھا ملک جن کے زیرنگیں صاف مٹ گئے

تم اس خیال میں ہو کہ نام و نشاں رہے

آنسو چلے ہی آنے لگے منھ پہ متصل

کیا کیجے اب کہ راز محبت نہاں رہے

ہم جب نظر پڑیں تو وہ ابرو کو خم کرے

تیغ اپنے اس کے کب تئیں یوں درمیاں رہے

کوئی بھی اپنے سر کو کٹاتا ہے یوں ولے

جوں شمع کیا کروں جو نہ میری زباں رہے

یہ دونوں چشمے خون سے بھر دوں تو خوب ہے

سیلاب میری آنکھوں سے کب تک رواں رہے

دیکھیں تو مصر حسن میں کیا خواریاں کھنچیں

اب تک تو ہم عزیز رہے ہیں جہاں رہے

مقصود گم کیا ہے تب ایسا ہے اضطراب

چکر میں ورنہ کاہے کو یوں آسماں رہے

کیا اپنی ان کی تم سے بیاں کیجیے معاش

کیں مدتوں رکھا جو تنک مہرباں رہے

گہ شام اس کے مو سے ہے گہ رو سے اس کے صبح

تم چاہو ہو کہ ایک سا ہی یاں سماں رہے

کیا نذر تیغ عشق سرِتیر میں کیا

اس معرکے میں کھیت بہت خستہ جاں رہے

اس تنگناے دہر میں تنگی نفس نے کی

جوں صبح ایک دم ہی رہے ہم جو یاں رہے

اک قافلے سے گرد ہماری نہ ٹک اٹھی

حیرت ہے میر اپنے تئیں ہم کہاں رہے

میر تقی میر

آئے ہیں پھر کے یارو اب کے خدا کے ہاں سے

اکتوبر 6, 2015میر تقی میر،اساتذہ،غزلہاں،فغاں،کہاں،آسماں،آشیاں،جواں،جاں،دہاں،زباںadmin

دیوان دوم غزل 976

کعبے میں جاں بہ لب تھے ہم دوری بتاں سے

آئے ہیں پھر کے یارو اب کے خدا کے ہاں سے

تصویر کے سے طائر خاموش رہتے ہیں ہم

جی کچھ اچٹ گیا ہے اب نالہ و فغاں سے

جب کوندتی ہے بجلی تب جانب گلستاں

رکھتی ہے چھیڑ میرے خاشاک آشیاں سے

کیا خوبی اس کے منھ کی اے غنچہ نقل کریے

تو تو نہ بول ظالم بو آتی ہے دہاں سے

آنکھوں ہی میں رہے ہو دل سے نہیں گئے ہو

حیران ہوں یہ شوخی آئی تمھیں کہاں سے

سبزان باغ سارے دیکھے ہوئے ہیں اپنے

دلچسپ کاہے کو ہیں اس بے وفا جواں سے

کی شست و شو بدن کی جس دن بہت سی ان نے

دھوئے تھے ہاتھ میں نے اس دن ہی اپنی جاں سے

خاموشی ہی میں ہم نے دیکھی ہے مصلحت اب

ہر یک سے حال دل کا مدت کہا زباں سے

اتنی بھی بدمزاجی ہر لحظہ میر تم کو

الجھائو ہے زمیں سے جھگڑا ہے آسماں سے

میر تقی میر

ابھی کیا جانیے یاں کیا سماں ہو

اکتوبر 6, 2015میر تقی میر،اساتذہ،غزلمہرباں،مکاں،نشاں،کہاں،اماں،آستاں،جواں،جاں،درمیاں،زباں،سماںadmin

دیوان دوم غزل 917

نہ میرے باعث شور و فغاں ہو

ابھی کیا جانیے یاں کیا سماں ہو

یہی مشہور عالم ہیں دوعالم

خدا جانے ملاپ اس سے کہاں ہو

جہاں سجدے میں ہم نے غش کیا تھا

وہیں شاید کہ اس کا آستاں ہو

نہ ہووے وصف ان بالوں کا مجھ سے

اگر ہر مو مرے تن پر زباں ہو

جگر تو چھن گیا تیروں کے مارے

تمھاری کس طرح خاطر نشاں ہو

نہ دل سے جا خدا کی تجھ کو سوگند

خدائی میں اگر ایسا مکاں ہو

تم اے نازک تناں ہو وہ کہ سب کے

تمناے دل و آرام جاں ہو

ہلے ٹک لب کہ اس نے مار ڈالا

کہے کچھ کوئی گر جی کی اماں ہو

سنا ہے چاہ کا دعویٰ تمھارا

کہو جو کچھ کہ چاہو مہرباں ہو

کنارہ یوں کیا جاتا نہیں پھر

اگر پاے محبت درمیاں ہو

ہوئے ہم پیر سو ساکت ہیں اب میر

تمھاری بات کیا ہے تم جواں ہو

میر تقی میر

برہم زدہ شہر ہے جہاں تو

اکتوبر 6, 2015میر تقی میر،اساتذہ،غزلمکاں،نشاں،پاسباں،آسماں،جہاں،جواں،جاں،دہاں،زباںadmin

دیوان دوم غزل 911

سب حال سے بے خبر ہیں یاں تو

برہم زدہ شہر ہے جہاں تو

اس تن پہ نثار کرتے لیکن

اپنی بھی نظر میں ٹھہرے جاں تو

برباد نہ دے کہیں سراسر

رہتی نہیں شمع ساں زباں تو

کیا اس کے گئے ہے ذکر دل کا

ویران پڑا ہے یہ مکاں تو

کیا کیا نہ عزیز خوار ہوں گے

ہونے دو اسے ابھی جواں تو

غنچہ لگے منھ تمھارے لیکن

صحبت کا اسے بھی ہو دہاں تو

کیا اس سے رکھیں امید بہبود

پھرتا ہے خراب آسماں تو

یہ طالع نارسا بھی جاگیں

سو جائے ٹک اس کا پاسباں تو

مت تربت میر کو مٹائو

رہنے دو غریب کا نشاں تو

میر تقی میر

پہ جوش دل میں کبھو آگیا تو طوفاں ہیں

اکتوبر 6, 2015میر تقی میر،اساتذہ،غزلمہماں،مسلماں،نمایاں،ایماں،بداماں،جاں،حیراں،ساماں،طوفاںadmin

دیوان دوم غزل 898

اگرچہ اب کے ہم اے ابر خشک مژگاں ہیں

پہ جوش دل میں کبھو آگیا تو طوفاں ہیں

صنم پرستی میں اے راہباں نہ کی تقصیر

تم اہل صومعہ سے پوچھو وے مسلماں ہیں

کریں انھوں پہ بھلا کس طرح نظر گستاخ

بتان شہر ہمارے تو دین و ایماں ہیں

چمن میں جاکے بھرو تم گلوں سے جیب و کنار

ہم اپنے دل ہی کے ٹکڑوں سے گل بداماں ہیں

رہے ہیں دیکھ جو تصویر سے ترے منھ کو

ہماری آنکھ سے ظاہر ہے یہ کہ حیراں ہیں

رہا ہے کون سا پردہ ترے ستم کا شوخ

کہ زخم سینہ ہمارے سبھی نمایاں ہیں

شبیہ شکل سا ہے حال ضبط عشق کے بیچ

کہ رنگ روپ ہے سب کچھ ولیک بے جاں ہیں

بنے تو عزت عشاق میں نہ کر تقصیر

کہ ایسے لوگ پیارے عزیز مہماں ہیں

جو ابر دشت میں برسے تو ہم اڑاویں خاک

وہ میر آب ہے ہم یاں کے میر ساماں ہیں

میر تقی میر

جن کے نشاں تھے فیلوں پر ان کا نشاں نہیں

اکتوبر 6, 2015میر تقی میر،اساتذہ،غزلمہرباں،نشاں،کہاں،آسماں،جاں،درمیاں،زباںadmin

دیوان دوم غزل 865

کیا کیا جہاں اثر تھا سو اب واں عیاں نہیں

جن کے نشاں تھے فیلوں پر ان کا نشاں نہیں

دفتر بنے کہانی بنی مثنوی ہوئی

کیا شرح سوز عشق کروں میں زباں نہیں

اپنا ہی ہاتھ سر پہ رہا اپنے یاں سدا

مشفق کوئی نہیں ہے کوئی مہرباں نہیں

ہنگامہ و فساد کی باعث ہے وہ کمر

پھر آپ خوب دیکھیے تو درمیاں نہیں

جی ہی نکل گیا جو گیا یار پاس سے

جسم ضعیف و زار میں اب میرے جاں نہیں

ہے عشق ہی سے چار طرف بحث و گفتگو

شور اس بلاے جاں کا جہاں میں کہاں نہیں

اس عہد کو نہ جانیے اگلا سا عہد میر

وہ دور اب نہیں وہ زمیں آسماں نہیں

میر تقی میر

حالانکہ رفتنی ہیں سب اس کارواں کے لوگ

اکتوبر 6, 2015میر تقی میر،اساتذہ،غزلہندوستاں،مکاں،یاں،کہاں،کارواں،بتاں،بدگماں،جاں،خانداں،درمیاں،زباںadmin

دیوان دوم غزل 846

غافل ہیں ایسے سوتے ہیں گویا جہاں کے لوگ

حالانکہ رفتنی ہیں سب اس کارواں کے لوگ

مجنوں و کوہکن نہ تلف عشق میں ہوئے

مرنے پہ جی ہی دیتے ہیں اس خانداں کے لوگ

کیونکر کہیں کہ شہر وفا میں جنوں نہیں

اس خصم جاں کے سارے دوانے ہیں یاں کے لوگ

رونق تھی دل میں جب تئیں بستے تھے دلبراں

اب کیا رہا ہے اٹھ گئے سب اس مکاں کے لوگ

تو ہم میں اور آپ میں مت دے کسو کو دخل

ہوتے ہیں فتنہ ساز یہی درمیاں کے لوگ

مرتے ہیں اس کے واسطے یوں تو بہت ولے

کم آشنا ہیں طور سے اس کام جاں کے لوگ

پتی کو اس چمن کی نہیں دیکھتے ہیں گرم

جو محرم روش ہیں کچھ اس بدگماں کے لوگ

بت چیز کیا کہ جس کو خدا مانتے ہیں سب

خوش اعتقاد کتنے ہیں ہندوستاں کے لوگ

فردوس کو بھی آنکھ اٹھا دیکھتے نہیں

کس درجہ سیرچشم ہیں کوے بتاں کے لوگ

کیا سہل جی سے ہاتھ اٹھا بیٹھتے ہیں ہائے

یہ عشق پیشگاں ہیں الٰہی کہاں کے لوگ

منھ تکتے ہی رہے ہیں سدا مجلسوں کے بیچ

گویا کہ میر محو ہیں میری زباں کے لوگ

میر تقی میر

جی رندھ گیا ہے ظالم اب رحم کر کہاں تک

اکتوبر 6, 2015میر تقی میر،اساتذہ،غزلنشاں،یاں،کہاں،گلستاں،پاسباں،آسماں،آشیاں،استخواں،جہاں،جاںadmin

دیوان دوم غزل 844

سو خونچکاں گلے ہیں لب سے مری زباں تک

جی رندھ گیا ہے ظالم اب رحم کر کہاں تک

ملنے میں میرے گاہے ٹک تن دیا نہ ان نے

حاضر رہا ہوں میں تو اپنی طرف سے جاں تک

ہر چند میں نے سر پر اس رہ کی خاک ڈالی

لیکن نہ پہنچیں آنکھیں اس پائوں کے نشاں تک

ان ہڈیوں کا جلنا کوئی ہما سے پوچھو

لاتا نہیں ہے منھ وہ اب میرے استخواں تک

اس کی گلی کے سگ سے کی ہے موافقت میں

اس راہ سے بھی پہنچیں شاید کہ پاسباں تک

ابربہار نے شب دل کو بہت جلایا

تھا برق کا چمکنا خاشاک آشیاں تک

اس مہ کے گوش تک تو ہرگز نہیں پہنچتی

گو آہ بے سرایت جاتی ہے آسماں تک

قید قفس میں مرنا کب شوق کا ہے مانع

پہنچیں گے مشت پر بھی اڑ کر یہ گلستاں تک

ہونا جہاں کا اپنی آنکھوں میں ہے نہ ہونا

آتا نظر نہیں کچھ جاوے نظر جہاں تک

جاتی ہیں خط کے پیچھے جوں مہر آنکھیں میری

اب کارشوق میرا پہنچا ہے میر یاں تک

میر تقی میر

جی لگ رہا ہے خار و خس آشیاں کی اور

اکتوبر 6, 2015میر تقی میر،اساتذہ،غزلمکاں،ناتواں،آسماں،آشیاں،جہاں،جواں،جاں،دہاں،رواں،زباںadmin

دیوان دوم غزل 811

چمکی ہے جب سے برق سحر گلستاں کی اور

جی لگ رہا ہے خار و خس آشیاں کی اور

وہ کیا یہ دل لگے ہے فنا میں کہ رفتگاں

منھ کرکے بھی نہ سوئے کبھو پھر جہاں کی اور

رنگ سخن تو دیکھ کہ حیرت سے باغ میں

رہ جاتے ہیں گے دیکھ کے گل اس دہاں کی اور

آنکھیں سی کھل ہی جائیں گی جو مر گیا کوئی

دیکھا نہ کر غضب سے کسو خستہ جاں کی اور

کیا بے خبر ہے رفتن رنگین عمر سے

جوے چمن میں دیکھ ٹک آب رواں کی اور

یاں تاب سعی کس کو مگر جذب عشق کا

لاوے اسی کو کھینچ کسو ناتواں کی اور

یارب ہے کیا مزہ سخن تلخ یار میں

رہتے ہیں کان سب کے اسی بد زباں کی اور

یا دل وہ دیدنی تھی جگہ یا کہ تجھ بغیر

اب دیکھتا نہیں ہے کوئی اس مکاں کی اور

آیا کسے تکدر خاطر ہے زیرخاک

جاتا ہے اکثر اب تو غبار آسماں کی اور

کیا حال ہو گیا ہے ترے غم میں میر کا

دیکھا گیا نہ ہم سے تو ٹک اس جواں کی اور

میر تقی میر

لاتا ہے تازہ آفت تو ہر زماں زمیں پر

اکتوبر 6, 2015میر تقی میر،اساتذہ،غزلمہرباں،مکاں،ناتواں،نشاں،یاں،کہاں،آسماں،استخواں،جہاں،جاں،رواں،زماں،عیاںadmin

دیوان دوم غزل 802

رفتار میں یہ شوخی رحم اے جواں زمیں پر

لاتا ہے تازہ آفت تو ہر زماں زمیں پر

آنکھیں لگی رہیں گی برسوں وہیں سبھوں کی

ہو گا قدم کا تیرے جس جا نشاں زمیں پر

میں مشت خاک یارب بارگران غم تھا

کیا کہیے آ پڑا ہے اک آسماں زمیں پر

آنکھیں ہی بچھ رہی ہیں لوگوں کی تیری رہ میں

ٹک دیکھ کر قدم رکھ اے کام جاں زمیں پر

خاک سیہ سے یکساں ہر ایک ہے کہے تو

مارا اٹھا فلک نے سارا جہاں زمیں پر

چشمے کہیں ہیں جوشاں جوئیں کہیں ہیں جاری

جوں ابر ہم نہ روئے اس بن کہاں زمیں پر

آتا نہ تھا فرو سرجن کا کل آسماں سے

ہیں ٹھوکروں میں ان کے آج استخواں زمیں پر

جو کوئی یاں سے گذرا کیا آپ سے نہ گذرا

پانی رہا کب اتنا ہوکر رواں زمیں پر

پھر بھی اٹھالی سر پر تم نے زمیں سب آکر

کیا کیا ہوا تھا تم سے کچھ آگے یاں زمیں پر

کچھ بھی مناسبت ہے یاں عجز واں تکبر

وے آسمان پر ہیں میں ناتواں زمیں پر

پست و بلند یاں کا ہے اور ہی طرف سے

اپنی نظر نہیں ہے کچھ آسماں زمیں پر

قصر جناں تو ہم نے دیکھا نہیں جو کہیے

شاید نہ ہووے دل سا کوئی مکاں زمیں پر

یاں خاک سے انھوں کی لوگوں نے گھر بنائے

آثار ہیں جنھوں کے اب تک عیاں زمیں پر

کیا سر جھکا رہے ہو میر اس غزل کو سن کر

بارے نظر کرو ٹک اے مہرباں زمیں پر

میر تقی میر

ہر گام پر تلف ہوئے آب رواں کی طرح

اکتوبر 6, 2015میر تقی میر،اساتذہ،غزلفغاں،مکاں،کہاں،آشیاں،جواں،جاں،خواں،دہاں،رواں،زباںadmin

دیوان دوم غزل 793

آنے کی اپنے کیا کہیں اس گلستاں کی طرح

ہر گام پر تلف ہوئے آب رواں کی طرح

کیا میں ہی چھیڑ چھیڑ کے کھاتا ہوں گالیاں

اچھی لگے ہے سب کو مرے بد زباں کی طرح

آگے تو بے طرح نہ کبھو کہتے تھے ہمیں

اب تازہ یہ نکالی ہے تم نے کہاں کی طرح

یہ شور دل خراش کب اٹھتا تھا باغ میں

سیکھے ہے عندلیب بھی ہم سے فغاں کی طرح

کرتے تو ہو ستم پہ نہیں رہنے کے حواس

کچھ اور ہو گئی جو کسو خستہ جاں کی طرح

نقشہ الٰہی دل کا مرے کون لے گیا

کہتے ہیں ساری عرش میں ہے اس مکاں کی طرح

مرغ چمن نے زور رلایا سبھوں کے تیں

میری غزل پڑھی تھی شب اک روضہ خواں کی طرح

لگ کر گلے سے اس کے بہت میں بکا کیا

ملتی تھی سرو باغ میں کچھ اس جواں کی طرح

جو کچھ نہیں تو بجلی سے ہی پھول پڑ گیا

ڈالی چمن میں ہم نے اگر آشیاں کی طرح

یہ باتیں رنگ رنگ ہماری ہیں ورنہ میر

آجاتی ہے کلی میں کبھو اس دہاں کی طرح

میر تقی میر

دامن گل گریۂ خونیں سے سب افشاں ہوا

اکتوبر 6, 2015میر تقی میر،اساتذہ،غزلمہماں،نالاں،ویراں،گریاں،پاں،افشاں،آساں،جاں،حیراں،داماں،طوفاںadmin

دیوان دوم غزل 710

وارد گلشن غزل خواں وہ جو دلبر یاں ہوا

دامن گل گریۂ خونیں سے سب افشاں ہوا

طائران باغ کو تھا بیت بحثی کا دماغ

پر ہر اک درد سخن سے میر کے نالاں ہوا

دل کی آبادی کو پہنچا اپنے گویا چشم زخم

دیکھتے ہی دیکھتے یہ شہر سب ویراں ہوا

سبز بختی پر ہے اس کی طائر سدرہ کو رشک

جو شکار اس تیغ کے سائے تلے بے جاں ہوا

خاک پر بھی دوڑتی ہے چشم مہر و ماہ چرخ

کس دنی الطبع کے گھر جا کے میں مہماں ہوا

تھا جگر میں جب تلک قطرہ ہی تھا خوں کا سرشک

اب جو آنکھوں سے تجاوز کر چلا طوفاں ہوا

اس کے میرے بیچ میں آئینہ آیا تھا ولے

صورت احوال ساری دیکھ کر حیراں ہوا

دل نے خوں ہو عشق خوباں میں بھی کیا بدلے ہیں رنگ

چہروں کو غازہ ہوا ہونٹوں کا رنگ پاں ہوا

تم جو کل اس راہ نکلے برق سے ہنستے گئے

ابر کو دیکھو کہ جب آیا ادھر گریاں ہوا

جی سے جانا بن گیا اس بن ہمیں پل مارتے

کام تو مشکل نظر آتا تھا پر آساں ہوا

جب سے ناموس جنوں گردن بندھا ہے تب سے میر

جیب جاں وابستۂ زنجیر تا داماں ہوا

میر تقی میر

ٹہنی جو زرد بھی ہے سو شاخ زعفراں ہے

اکتوبر 6, 2015میر تقی میر،اساتذہ،غزلکہاں،جاں،داستاں،درمیاں،رواں،زباں،زعفراں،سماں،عیاںadmin

دیوان اول غزل 585

نازچمن وہی ہے بلبل سے گو خزاں ہے

ٹہنی جو زرد بھی ہے سو شاخ زعفراں ہے

گر اس چمن میں وہ بھی اک ہی لب ودہاں ہے

لیکن سخن کا تجھ سے غنچے کو منھ کہاں ہے

ہنگام جلوہ اس کے مشکل ہے ٹھہرے رہنا

چتون ہے دل کی آفت چشمک بلاے جاں ہے

پتھر سے توڑنے کے قابل ہے آرسی تو

پر کیا کریں کہ پیارے منھ تیرا درمیاں ہے

باغ و بہار ہے وہ میں کشت زعفراں ہوں

جو لطف اک ادھر ہے تو یاں بھی اک سماں ہے

ہر چند ضبط کریے چھپتا ہے عشق کوئی

گذرے ہے دل پہ جو کچھ چہرے ہی سے عیاں ہے

اس فن میں کوئی بے تہ کیا ہو مرا معارض

اول تو میں سند ہوں پھر یہ مری زباں ہے

عالم میں آب و گل کا ٹھہرائو کس طرح ہو

گر خاک ہے اڑے ہے ورآب ہے رواں ہے

چرچا رہے گا اس کا تاحشر مے کشاں میں

خونریزی کی ہماری رنگین داستاں ہے

ازخویش رفتہ اس بن رہتا ہے میر اکثر

کرتے ہو بات کس سے وہ آپ میں کہاں ہے

میر تقی میر

نکالا سر سے میرے جاے مو خار مغیلاں کو

اکتوبر 6, 2015میر تقی میر،اساتذہ،غزلہجراں،فراواں،مہماں،مغیلاں،نیستاں،نامسلماں،گریاں،پنہاں،پریشاں،انساں،آساں،بیاباں،باراں،جواناں،جاں،خنداں،دہقاں،دنداں،سازاں،سخنداں،سردرگریباں،عریاں،عزیزاں،غزالاںadmin

دیوان اول غزل 377

فلک نے گر کیا رخصت مجھے سیر بیاباں کو

نکالا سر سے میرے جاے مو خار مغیلاں کو

وہ ظالم بھی تو سمجھے کہہ رکھا ہے ہم نے یاراں کو

کہ گورستان سے گاڑیں جدا ہم اہل ہجراں کو

نہیں یہ بید مجنوں گردش گردون گرداں نے

بنایا ہے شجر کیا جانیے کس مو پریشاں کو

ہوئے تھے جیسے مرجاتے پر اب تو سخت حسرت ہے

کیا دشوار نادانی سے ہم نے کار آساں کو

کہیں نسل آدمی کی اٹھ نہ جاوے اس زمانے میں

کہ موتی آب حیواں جانتے ہیں آب انساں کو

تجھے گر چشم عبرت ہے تو آندھی اور بگولے سے

تماشا کر غبار افشانی خاک عزیزاں کو

لباس مرد میداں جوہر ذاتی کفایت ہے

نہیں پرواے پوشش معرکے میں تیغ عریاں کو

ہواے ابر میں گرمی نہیں جو تو نہ ہو ساقی

دم افسردہ کردے منجمد رشحات باراں کو

جلیں ہیں کب کی مژگاں آنسوئوں کی گرم جوشی سے

اس آب چشم کی جوشش نے آتش دی نیستاں کو

وہ کافر عشق کا ہے دل کہ میری بھی رگ جاں تک

سدا زنار ہی تسبیح ہے اس نامسلماں کو

غرور ناز سے آنکھیں نہ کھولیں اس جفا جونے

ملا پائوں تلے جب تک نہ چشم صد غزالاں کو

نہ سی چشم طمع خوان فلک پر خام دستی سے

کہ جام خون دے ہے ہر سحر یہ اپنے مہماں کو

زبس صرف جنوں میرے ہوا آہن عجب مت کر

نہ ہو گر حلقۂ در خانۂ زنجیر سازاں کو

بنے ناواقف شادی اگر ہم بزم عشرت میں

دہان زخم دل سمجھے جو دیکھا روے خنداں کو

نہیں ریگ رواں مجنوں کے دل کی بے قراری نے

کیا ہے مضطرب ہر ذرئہ گرد بیاباں کو

کسی کے واسطے رسواے عالم ہو پہ جی میں رکھ

کہ مارا جائے جو ظاہر کرے اس راز پنہاں کو

گری پڑتی ہے بجلی ہی تبھی سے خرمن گل پر

ٹک اک ہنس میرے رونے پر کہ دیکھے تیرے دنداں کو

غرور ناز قاتل کو لیے جا ہے کوئی پوچھے

چلا تو سونپ کر کس کے تئیں اس صید بے جاں کو

وہ تخم سوختہ تھے ہم کہ سرسبزی نہ کی حاصل

ملایا خاک میں دانہ نمط حسرت سے دہقاں کو

ہوا ہوں غنچۂ پژمردہ آخر فصل کا تجھ بن

نہ دے برباد حسرت کشتۂ سردرگریباں کو

غم و اندوہ و بیتابی الم بے طاقتی حرماں

کہوں اے ہم نشیں تاچند غم ہاے فراواں کو

گل وسرو وسمن گر جائیں گے مت سیرگلشن کر

ملا مت خاک میں ان باغ کے رعنا جواناں کو

بہت روئے جو ہم یہ آستیں رکھ منھ پہ اے بجلی

نہ چشم کم سے دیکھ اس یادگارچشم گریاں کو

مزاج اس وقت ہے اک مطلع تازہ پہ کچھ مائل

کہ بے فکرسخن بنتی نہیں ہرگز سخنداں کو

میر تقی میر

دیتا ہے آگ رنگ ترا گلستاں کے تیں

اکتوبر 6, 2015میر تقی میر،اساتذہ،غزلفغاں،کہاں،کارواں،گلستاں،آشیاں،بتاں،جواں،جاں،زباںadmin

دیوان اول غزل 358

تکلیف باغ کن نے کی تجھ خوش دہاں کے تیں

دیتا ہے آگ رنگ ترا گلستاں کے تیں

تنکا بھی اب رہا نہیں شرمندگی ہے جو

گر پڑ کے برق پاوے مرے آشیاں کے تیں

آئے عدم سے ہستی میں تس پر نہیں قرار

ہے ان مسافروں کا ارادہ کہاں کے تیں

سناہٹے سے باغ سے کچھ اٹھتے ہیں نسیم

مرغ چمن نے خوب متھا ہے فغاں کے تیں

بے رحم ٹک تو پائوں تو چھاتی پہ رکھے رہ

مارا بھی ہے کبھی تیں کسی خستہ جاں کے تیں

اک گردش اے فلک کہ ہو اثناے راہ سے

کنعاں کی اور راہ غلط کارواں کے تیں

تو اک زباں پہ چپکی نہیں رہتی عندلیب

رکھتا ہے منھ میں غنچۂ گل سو زباں کے تیں

دیکھے کہاں ہیں زلف تری مردمان شہر

سودا ہوا ہے کہنے لگے اس جواں کے تیں

ہم تو ہوئے تھے میر سے اس دن ہی ناامید

جس دن سنا کہ ان نے دیا دل بتاں کے تیں

میر تقی میر

پر مل چلا کرو بھی کسو خستہ جاں سے تم

اکتوبر 6, 2015میر تقی میر،اساتذہ،غزلمکاں،کہاں،پاسباں،امتحاں،جہاں،جاں،داستاں،رواں،زباںadmin

دیوان اول غزل 278

جانا کہ شغل رکھتے ہو تیر و کماں سے تم

پر مل چلا کرو بھی کسو خستہ جاں سے تم

ہم اپنی چاک جیب کو سی رہتے یا نہیں

پھاٹے میں پائوں دینے کو آئے کہاں سے تم

اب دیکھتے ہیں خوب تو وہ بات ہی نہیں

کیا کیا وگرنہ کہتے تھے اپنی زباں سے تم

تنکے بھی تم ٹھہرتے کہیں دیکھے ہیں تنک

چشم وفا رکھو نہ خسان جہاں سے تم

جائو نہ دل سے منظر تن میں ہے جا یہی

پچھتائوگے اٹھوگے اگر اس مکاں سے تم

قصہ مرا سنوگے تو جاتی رہے گی نیند

آرام چشم مت رکھو اس داستاں سے تم

کھل جائیں گی پھر آنکھیں جو مر جائے گا کوئی

آتے نہیں ہو باز مرے امتحاں سے تم

جتنے تھے کل تم آج نہیں پاتے اتنا ہم

ہر دم چلے ہی جاتے ہو آب رواں سے تم

رہتے نہیں ہو بن گئے میر اس گلی میں رات

کچھ راہ بھی نکالو سگ و پاسباں سے تم

میر تقی میر

آشوب نالہ اب تو پہنچا ہے لامکاں تک

اکتوبر 6, 2015میر تقی میر،اساتذہ،غزللامکاں،واں،کہاں،آستاں،آشیاں،استخواں،جہاں،جاں،زباںadmin

دیوان اول غزل 254

اب وہ نہیں کہ شورش رہتی تھی آسماں تک

آشوب نالہ اب تو پہنچا ہے لامکاں تک

بہ بھی گیا بدن کا سب ہوکے گوشت پانی

اب کارد اے عزیزاں پہنچی ہے استخواں تک

تصویر کی سی شمعیں خاموش جلتے ہیں ہم

سوز دروں ہمارا آتا نہیں زباں تک

روتے پھرے ہیں لوہو یک عمر اس گلی میں

باغ و بہار ہی ہے جاوے نظر جہاں تک

آنکھیں جو روتے روتے جاتی رہیں بجا ہے

انصاف کر کہ کوئی دیکھے ستم کہاں تک

بے لطف تیرے کیونکر تجھ تک پہنچ سکیں ہم

ہیں سنگ راہ اپنی کتنے یہاں سے واں تک

ہم بے نصیب سر کو پتھر سے کیوں نہ پھوڑیں

پہنچا کبھو نہ جبہہ اس سنگ آستاں تک

مانند طیر نوپر اٹھے جہاں گئے ہم

دشوار ہے ہمارا آنا پھر آشیاں تک

تن کام میں ہمارے دیتا نہیں وہی کچھ

حاضر ہیں میر ہم تو اپنی طرف سے جاں تک

میر تقی میر

تیر تو نکلا مرے سینے سے لیکن جاں سمیت

اکتوبر 6, 2015میر تقی میر،اساتذہ،غزلنالاں،ویراں،افشاں،جاں،داماںadmin

دیوان اول غزل 182

سب ہوئے نادم پئے تدبیر ہو جاناں سمیت

تیر تو نکلا مرے سینے سے لیکن جاں سمیت

تنگ ہوجاوے گا عرصہ خفتگان خاک پر

گر ہمیں زیرزمیں سونپا دل نالاں سمیت

باغ کر دکھلائیں گے دامان دشت حشر کو

ہم بھی واں آئے اگر مژگان خون افشاں سمیت

قیس و فرہاد اور وامق عاقبت جی سے گئے

سب کو مارا عشق نے مجھ خانماں ویراں سمیت

اٹھ گیا پردہ نصیحت گر کے لگ پڑنے سے میر

پھاڑ ڈالا میں گریباں رات کو داماں سمیت

میر تقی میر

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں: