ٹیگ کے محفوظات: ترجمانی

نگاہوں سے بیاں دل کی کہانی اب بھی ہوتی ہے

مئی 31, 2021کلیاتِ شکیب جلالی ۔ غیر مدوّن کلام ۔ غزلیں،شکیب جلالی،غزلفشانی،قدردانی،مہربانی،کہانی،ترجمانی،زندگانی،سہانیadmin

محبت میں زباں کی بے زبانی اب بھی ہوتی ہے

نگاہوں سے بیاں دل کی کہانی اب بھی ہوتی ہے

سرِ محفل وہ کوئی بات بھی مجھ سے نہیں کرتے

مگر تنہائیوں میں گُل فِشانی اب بھی ہوتی ہے

چُھپاؤ لاکھ بے چینی کو خاموشی کے پردے میں

تمھارے رُخ سے دل کی ترجمانی اب بھی ہوتی ہے

ہمارا حال چُھپ کر پوچھتا تھا کوئی پہلے بھی

ہمارے حال پر یہ مہربانی اب بھی ہوتی ہے

تمھاری ہی کمی محسوس ہوتی ہے مجھے ورنہ

وہ موسم، وہ فضا، وہ رُت سُہانی اب بھی ہوتی ہے

زمانہ دل کی باتوں کو کبھی کُھل کر نہیں کہتا

بہ اندازِ شکایت قدردانی اب بھی ہوتی ہے

نکل آیا زمان و آشیاں کی قید سے لیکن

بقا کی رَہ میں حائل زندگانی اب بھی ہوتی ہے

شکیب جلالی

یار لوگوں کی زبانی اور ہے

نومبر 7, 2015احمد فراز،شعراء،غزلپانی،پرانی،بیانی،ترجمانی،ثانی،روانی،زبانی،سنانیadmin

احمد فراز ۔ غزل نمبر 144

ہم سنائیں تو کہانی اور ہے

یار لوگوں کی زبانی اور ہے

چارہ گر روتے ہیں تازہ زخم کو

دل کی بیماری پرانی اور ہے

جو کہا ہم نے وہ مضمون اور تھا

ترجماں کی ترجمانی اور ہے

ہے بساطِ دل لہو کی اک بوند

چشمِ پر خوں کی روانی اور ہے

نامہ بر کو کچھ بھی ہم پیغام دیں

داستاں اس نے سنانی اور ہے

آبِ زمزم دوست لائے ہیں عبث

ہم جو پیتے ہیں‌ وہ پانی اور ہے

سب قیامت قامتوں کو دیکھ لو

کیا مرے جاناں کا ثانی اور ہے

شاعری کرتی ہے اک دنیا فراز

پر تری سادہ بیانی اور ہے

احمد فراز

فلم جاری ہے کہانی ختم شد

دسمبر 1, 2007منصور آفاق،شعراء،غزلفانی،لامکانی،مہربانی،معانی،نہانی،ناگہانی،کہانی،کرانی،گمانی،ٹھانی،پانی،پاسبانی،پرانی،بیانی،باغبانی،ترجمانی،جوانی،جاودانی،دخانی،روانی،رائیگانی،زبانی،سرگرانیadmin

منصور آفاق ۔ غزل نمبر 156

زندگی! اب زندگانی ختم شد

فلم جاری ہے کہانی ختم شد

رو لیا ہے جتنا رو سکتا تھا میں

آنکھ میں جو تھا وہ پانی ختم شد

کر رہا ہوں شام سے فکرِ سخن

یعنی عہدِ رائیگانی ختم شد

میں بھی ہوں موجود اب افلاک پر

لامکاں کی لامکانی ختم شد

رک گیا میں بھی کنارہ دیکھ کر

پانیوں کی بھی روانی ختم شد

چھوڑ آیا ہوں میں شورِ ناتمام

گاڑیوں کی سرگرانی ختم شد

اور باقی ہیں مگر امید کی

اک بلائے ناگہانی ختم شد

آنے سے پہلے بتاتی ہیں مجھے

بارشوں کی بے زبانی ختم شد

دیکھتے ہیں آسماں کے کیمرے

اب گلی کی پاسبانی ختم شد

آ گئے جب تم تو کیا پھر رہ گیا

جو تھا سوچا ، جو تھی ٹھانی ختم شد

بھیج غالب آتشِ دوزخ مجھے

سوزِ غم ہائے نہانی ختم شد

اڑ رہی ہے راکھ آتش دان میں

یار کی بھی مہربانی ختم شد

اب مرے کچھ بھی نہیں ہے آس پاس

ایک ہی تھی خوش گمانی ختم شد

وہ سمندر بھی بیاباں ہو گیا

وہ جو کشتی تھی دخانی ختم شد

اک تکلم اک تبسم کے طفیل

میرا شوقِ جاودانی ختم شد

آہٹیں سن کر خدا کی پچھلی رات

میرے دل کی بے کرانی ختم شد

اک مجسم آئینے کے سامنے

آرزو کی خوش بیانی ختم شد

لفظ کو کیا کر دیا ہے آنکھ نے

چیختے روتے معانی ختم شد

کچھ ہوا ایسا ہوا کے ساتھ بھی

جس طرح میری جوانی ختم شد

اہم اتنا تھا کوئی میرے لیے

اعتمادِ غیر فانی ختم شد

دشت کی وسعت جنوں کو چاہیے

اس چمن کی باغبانی ختم شد

اپنے بارے میں کروں گا گفتگو

یار کی اب ترجمانی ختم شد

ذہن میں منصور ہے تازہ محاذ

سرد جنگ اپنی پرانی ختم شد

منصور آفاق

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: ترجمانی

نگاہوں سے بیاں دل کی کہانی اب بھی ہوتی ہے

یار لوگوں کی زبانی اور ہے

فلم جاری ہے کہانی ختم شد

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: