ٹیگ کے محفوظات: اڑاتا

ہوا کا ہاتھ بٹاتا ہے کھا نہیں جاتا

جون 2, 2018افتخار فلک،اذیت،غزلنچاتا،ڈراتا،کھلاتا،اڑاتا،اٹھاتا،بہاتا،بٹاتاadmin

چراغ وقت بچاتا ہے کھا نہیں جاتا

ہوا کا ہاتھ بٹاتا ہے کھا نہیں جاتا

بزرگ پیڑ کی چھاؤں سے دور مت بیٹھو

یہ صرف ہاتھ اٹھاتا ہے کھا نہیں جاتا

یہ میرا باپ مرا آخری سہارا ہے

کما کے سب کو کھلاتا ہے کھا نہیں جاتا

چبا چبا کے نہ باتیں کرو ذرا تو کھلو

وہ سب کے درد بٹاتا ہے کھا نہیں جاتا

یہ عشق ہے سو شرارت سے کام لیتا ہے

بڑے بڑوں کو نچاتا ہے کھا نہیں جاتا

وہ سیر چشم ہے ایسا کہ بھوک لگنے پر

جنوں میں خاک اڑاتا ہے کھا نہیں جاتا

خیالِ یار کا دریا چڑھا ہوا ہے مگر

گلے لگا کے بہاتا ہے کھا نہیں جاتا

تم اس خدا پہ ہنسو گے جو روزإ اول سے

ڈرے ہوؤں کو ڈراتا ہے کھا نہیں جاتا

افتخار فلک

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

ہر ناز آفریں کو ستاتا رہا ہوں میں

اکتوبر 23, 2015Jaun Elia،جون ایلیا،شعراء،غزلچلاتا،ڈھاتا،گھٹاتا،گراتا،پھراتا،اڑاتا،آتا،بتاتا،بجھاتا،دلاتا،ستاتاadmin

جون ایلیا ۔ غزل نمبر 111

ایذا دہی کی داد جو پاتا رہا ہوں میں

ہر ناز آفریں کو ستاتا رہا ہوں میں

اے خوش خرام پاؤں کے چھالے تو گن ذرا

تجھ کو کہاں کہاں نہ پھراتا رہا ہوں میں

تجھ کو خبر نہیں کہ ترا حال دیکھ کر

اکثر ترا مذاق اڑاتا رہا ہوں میں

جس دن سے اعتماد میں آیا ترا شباب

اس دن سے تجھ پہ ظلم ہی ڈھاتا رہا ہوں میں

بیدار کر کے تیرے بدن کی خود آ گہی

تیرے بدن کی عمر گھٹاتا رہا ہوں میں

اک سطر بھی کبھی نہ لکھی میں نے تیرے نام

پاگل تجھی کو یاد بھی آتا رہا ہوں میں

شاید مجھے کسی سے محبت نہیں ہوئی

لیکن یقین سب کو دلاتا رہا ہوں میں

اک حسنِ بے مثال کی تمثیل کے لئے

پرچھائیوں پہ رنگ گراتا رہا ہوں میں

اپنا مثالیہ مجھے اب تک نہ مل سکا

ذروں کو آفتاب بتاتا رہا ہوں میں

کیا مل گیا ضمیرِ ہنر بیچ کر مجھے

اتنا کہ صرف کام چلاتا رہا ہوں میں

کل دوپہر عجیب سی اک بے دلی رہی

بس تیلیاں جلا کے بجھاتا رہا ہوں میں

جون ایلیا

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔

اور اس کے بعد کمرے میں آتا تھا کون شخص

دسمبر 1, 2007منصور آفاق،شعراء،غزللٹاتا،لاتا،مٹاتا،کماتا،گھماتا،گراتا،اڑاتا،آتا،اٹھاتا،بہاتا،بناتا،جگاتا،دکھاتاadmin

منصور آفاق ۔ غزل نمبر 196

راتوں میں کھڑکیوں کو بجاتا تھا کون شخص

اور اس کے بعد کمرے میں آتا تھا کون شخص

قوسِ قزح پہ کیسے مرے پاؤں چلتے تھے

دھیمے سروں میں رنگ بہاتا تھا کون شخص

مٹی ہوں جانتا ہوں کہاں کوزہ گر کا نام

یہ یاد کب ہے چاک گھماتا تھا کون شخص

بادل برستے رہتے تھے جو دل کے آس پاس

پچھم سے کھینچ کر انہیں لاتا تھا کون شخص

ہوتا تھا دشت میں کوئی اپنا جنوں نواز

شب بھر متاعِ درد لٹاتا تھا کون شخص

کوئی دعا تھی، یا کوئی نیکی نصیب کی

گرتا تھا میں کہیں تو اٹھاتا تھا کون شخص

اس کہنہ کائنات کے کونے میں بیٹھ کر

کارِ ازل کے کشف کماتا تھا کون شخص

بہکے ہوئے بدن پہ بہکتی تھی بھاپ سی

اور جسم پر شراب گراتا تھا کون شخص

ہونٹوں کی سرخیوں سے مرے دل کے چاروں اور

داغِ شبِ فراق مٹاتا تھا کون شخص

پاؤں سے دھوپ گرتی تھی جس کے وہ کون تھا

کرنوں کو ایڑیوں سے اڑاتا تھا کون شخص

وہ کون تھا جو دیتا تھا اپنے بدن کی آگ

بے رحم سردیوں سے بچاتا تھا کون شخص

ماتھے پہ رکھ کے سرخ لبوں کی قیامتیں

سورج کو صبح صبح جگاتا تھا کون شخص

منصور بار بار ہوا کون کرچیاں

مجھ کو وہ آئینہ سا دکھاتا تھا کون شخص

منصور آفاق

Rate this:

اسے شیئر کریں:

• Twitter
• فیس بک

اسے پسند کریں:

پسند کریں لوڈ کیا جا رہا ہے۔۔۔