ٹیگ کے محفوظات: انتظام

ناکام ہوں کہ کام نہیں آپ سے مجھے

اگست 4, 2018ناصر کاظمی،دیوانِ ناصر،غزلکلام،کام،انتقام،انتظام،عامadmin

شکوہ بہ طرزِ عام نہیں آپ سے مجھے

ناکام ہوں کہ کام نہیں آپ سے مجھے

کہتا سلوک آپ کے ایک ایک سے مگر

مطلوب انتقام نہیں آپ سے مجھے

اے منصفو حقائق و حالات سے الگ

کچھ بحثِ خاص و عام نہیں آپ سے مجھے

یہ شہرِ دل ہے شوق سے رہیے یہاں مگر

اُمیدِ انتظام نہیں آپ سے مجھے

فرصت ہے اور شام بھی گہری ہے کس قدر

اِس وقت کچھ کلام نہیں آپ سے مجھے

ناصر کاظمی

کہو تو کیوں نہ ابھی سے کچھ اہتمام کریں

اگست 4, 2018ناصر کاظمی،دیوانِ ناصر،غزلنام،کلام،کام،اہتمام،انتظام،حرام،عوامadmin

تم آگئے ہو تو کیوں انتظارِ شام کریں

کہو تو کیوں نہ ابھی سے کچھ اہتمام کریں

خلوص و مہر و وفا لوگ کر چکے ہیں بہت

مرے خیال میں اب اور کوئی کام کریں

یہ خاص و عام کی بیکار گفتگو کب تک

قبول کیجیے جو فیصلہ عوام کریں

ہر آدمی نہیں شائستہِ رموزِ سخن

وہ کم سخن ہو مخاطب تو ہم کلام کریں

جدا ہوئے ہیں بہت لوگ ایک تم بھی سہی

اب اتنی بات پہ کیا زِندگی حرام کریں

خدا اگر کبھی کچھ اختیار دے ہم کو

تو پہلے خاک نشینوں کا انتظام کریں

رہِ طلب میں جو گمنام مر گئے ناصر

متاعِ درد اُنہی ساتھیوں کے نام کریں

ناصر کاظمی

کہا انہوں نے کہ ہو تم تو کام سے فارغ

جولائی 24, 2018ہوائے طرب،باصر کاظمی،غزلنام،کام،اہتمام،انتظام،دھامadmin

ہوا میں جونہی دعا و سلام سے فارغ

کہا انہوں نے کہ ہو تم تو کام سے فارغ

قضا کو سونپ کے بستی کے انتظامی امور

جو منتظم تھے ہوئے انتظام سے فارغ

تھے منتظر مرے دو اور بھی ضروری کام

ہوا نہ تھا میں ابھی ایک کام سے فارغ

وہ جن کو ہونا تھا رخصت بڑی خموشی سے

کیے گئے ہیں بڑی دھوم دھام سے فارغ

کہانی قیس کی سننے سے پہلے وہ بولے

مجھے تو لگتا ہے یہ شخص نام سے فارغ

مرے لیے کوئی مصروفیت نہیں باقی

کیا گیا ہوں کچھ اِس اہتمام سے فارغ

باصر کاظمی

اک نشیمن تھا سو وہ بجلی کے کام آ ہی گیا

اکتوبر 25, 2015قمر جلالوی،شعراء،غزلمقام،نام،کام،پیام،انتظام،جام،شامadmin

قمر جلالوی ۔ غزل نمبر 36

اب مجھے دشمن سے کیا جب زیرِ دام آ ہی گیا

اک نشیمن تھا سو وہ بجلی کے کام آ ہی گیا

سن مآلِ سوزِ الفت جب یہ نام آ ہی گیا

شمع آخر جل بجھی پروانہ کام آ ہی گیا

طالبِ دیدار کا اصرار کام آ ہی گیا

سامنے کوئی بحسنِ انتظام آ ہی گیا

ہم نہ کہتے تھے کہ صبح شام کے وعدے نہ کر

اک مریضِ غم قریبِ صبح شام آ ہی گیا

کوششِ منزل سے تو اچھی رہی دیوانگی

چلتے پھرتے ان سے ملنے کا مقام آ ہی گیا

رازِ الفت مرنے والے نے چھپایا تو بہت

دم نکلتے وقت لب پر ان کا نام آ ہی گیا

کر دیا مشہور پردے میں تجھے زحمت نہ دی

آج کا ہونا ہمارا تیرے کام آ ہی گیا

جب اٹھا ساقی تو واعظ کی نہ کچھ بھی چل سکی

میری قسمت کی طرح گردش میں جام آ ہی گیا

حسن کو بھی عشق کی ضد رکھنی پڑتی ہے کبھی

طور پر موسیٰ سے ملنے کا پیام آ ہی گیا

دیر تک بابِ حرم پر رک کے اک مجبورِ عشق

سوئے بت خانہ خدا کا لے کے نام آ ہی گیا

رات بھر مانگی دعا ان کے نہ جانے کی قمر

صبح کا تارہ مگر لے کر پیام آ ہی گیا

قمر جلالوی

وہ اِک خلش کہ جسے تیرا نام کہتے ہیں

اپریل 2, 2012فیض احمد فیض،دستِ صبا،غزلفام،نام،انتظام،بام،تمام،حرام،عامadmin

فیض احمد فیض ۔ غزل نمبر 25

وہیں ہے دل کے قرائن تمام کہتے ہیں

وہ اِک خلش کہ جسے تیرا نام کہتے ہیں

تم آرہے ہو کہ بجتی ہیں میری زنجیریں

نہ جانے کیا مرے دیوار و بام کہتے ہیں

یہی کنارِ فلک کا سیہ تریں گوشہ

یہی ہے مطلعِ ماہِ تمام کہتے ہیں

پیو کہ مفت لگا دی ہے خونِ دل کی کشید

گراں ہے اب کے مئے لالہ فام کہتے ہیں

فقیہہِ شہر سے مے کا جواز کیا پوچھیں

کہ چاندنی کو بھی حضرت حرام کہتے ہیں

نوائے مرغ کو کہتے ہیں اب زیانِ چمن

کھلے نہ پھول ، اسے انتظام کہتے ہیں

کہو تو ہم بھی چلیں فیض، اب نہیں سِردار

وہ فرقِ مرتبہء خاص و عام ، کہتے ہیں

فیض احمد فیض

مجھے بھی اپنا کوئی انتظام کرنا تھا

دسمبر 1, 2007منصور آفاق،شعراء،غزلقیام،کلام،کام،اہتمام،انتظام،احترام،اختتام،خرام،عامadmin

منصور آفاق ۔ غزل نمبر 87

اسے بھی ربطِ رہائش تمام کرنا تھا

مجھے بھی اپنا کوئی انتظام کرنا تھا

نگار خانے سے اس نے بھی رنگ لینے تھے

مجھے بھی شام کا کچھ اہتمام کرنا تھا

اسے بھی عارض و لب کے دئیے جلانے تھے

مجھے بھی چاند سے کوئی کلام کرنا تھا

بس ایک لنچ ہی ممکن تھا اتنی جلدی میں

اسے بھی جانا تھا میں نے بھی کام کرنا تھا

مراقبہ کسی بگلے کا دیکھنا تھا مجھے

کنارِ آبِ رواں کچھ خرام کرنا تھا

گلی کے لڑکوں کو سچائیاں بتانی تھیں

کوئی چراغ اندھیروں میں عام کرنا تھا

یہ کیا کہ بہتا چلا جا رہا ہوں گلیوں میں

کہیں تو غم کا مجھے اختتام کرنا تھا

بلانے آیا تھا اقبال بزمِ رومی میں

سو حکم نامے کا کچھ احترام کرنا تھا

گزر سکی نہ وہاں ایک رات بھی منصور

جہاں جہاں مجھے برسوں قیام کرنا تھا

منصور آفاق

سخن سرا

اردو اور پنجابی ادب کی شاہکار نظمیں، غزلیں اور نثر

ٹیگ کے محفوظات: انتظام

ناکام ہوں کہ کام نہیں آپ سے مجھے

کہو تو کیوں نہ ابھی سے کچھ اہتمام کریں

کہا انہوں نے کہ ہو تم تو کام سے فارغ

اک نشیمن تھا سو وہ بجلی کے کام آ ہی گیا

وہ اِک خلش کہ جسے تیرا نام کہتے ہیں

مجھے بھی اپنا کوئی انتظام کرنا تھا

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں:

Rate this:

اسے شیئر کریں:

اسے پسند کریں: