اذان | سخن سرا

ماجد صدیقی ۔ غزل نمبر 53

جذبوں کو زبان دے ر ہا ہوں

میں وقت کو دان دے رہا ہوں

موسم نے شجر پہ لکھ دیا کیا

ہر حرف پہ جان دے رہا ہوں

یوں ہے نمِ خاک بن کے جیسے

فصلوں کو اُٹھان دے رہا ہوں

جو جو بھی خمیدہ سر ہیں اُن کے

ہاتھوں میں کمان دے رہا ہوں

کیسی حدِ جبر ہے یہ جس پر

بے وقت اذان دے رہا ہوں

اوقات مری یہی ہے ماجد

ہاری ہوں لگان دے رہا ہوں

ماجد صدیقی

مجید امجد ۔ غزل نمبر 114

جنگ بھی، تیرا دھیان بھی، ہم بھی

سائرن بھی، اذان بھی، ہم بھی

سب تری ہی اماں میں شب بیدار

مورچے بھی، مکان بھی، ہم بھی

تیری منشاؤں کے محاذ پہ ہیں

چھاؤنی کے جوان بھی، ہم بھی

دیکھنے والے، یہ نظارہ بھی دیکھ

عزم بھی، امتحان بھی، ہم بھی

اک عجب اعتماد سینوں میں

فتح کا یہ نشان بھی، ہم بھی

تو بھی اور تیری نصرتوں کے ساتھ

شہر میں ٹکا خان بھی، ہم بھی

مجید امجد

سخن سرا