کِتابِ عِشق میں شکووں کی آیتیں کیسی
رَہِ سُلوک و صَفا میں وضاحتیں کیسی
نہ کارواں ہے نہ منزل نہ راہ و راہنما
تَو مشکلاتِ سفر کی حکایتیں کیسی
اِنہیں اُجالوں سے روزِ اَزَل سے بَیر رَہا
یہ ظُلمَتوں کی یکایک عنایتیں کیسی
تُمہاری بزم کے آداب میں نہ ہَوں شامل
"یہ ہم پہ بیت رہی ہیں قیامتیں کیسی”
نہ توڑے کوئی جنون و خِرَد کے پیمانے
گذشتہ عہد نے دی ہیں ہدایتیں کیسی
کِیا نہ دعویِٰ بینائی کور چشموں میں
نبھائیں ہم نے بھی ضامنؔ روایتیں کیسی
ضامن جعفری
