شکستِ آرزو اے دِل! کوئی سِتَم تَو نہیں
تُو اُن کی بَزم میں کچھ دِن رَہا یہ کم تَو نہیں
یہ عَکس سازِشِ وقت اَور آئینہ ہے فَقَط
ہمارے دِل نے ہمیشہ کَہا یہ ہم تَو نہیں
ابھی تَلَک وہی سرشاریٔ رفاقَت ہے
دِلِ شکستہ سے پوچھا تھا کوئی غَم تَو نہیں ؟
دِل و نَظَر بھی وہی کام کرتے آئے ہیں
جنابِ خضر کوئی خاص مُحترَم تَو نہیں
خَموش بیٹھے ہیں ضامنؔ وہ سَر جُھکائے ہُوئے
نَظَر اُٹھائیں تَو دیکھوں کہ آنکھ نَم تَو نہیں
ضامن جعفری
