دیوان سوم غزل 1090

دل رات دن رہے ہے سینے میں عشق ملتا

ہرچند چاہتا ہوں پر جی نہیں سنبھلتا

اب تو بدن میں سارے اک پھنک رہی ہے آتش

وہ مہ گلے سے لگتا تو یوں جگر نہ جلتا

شب ماہ چاردہ تھا کس حسن سے نمایاں

ہوتا بڑا تماشا جو یار بھی نکلتا

اے رشک شمع گویا تو موم کا بنا ہے

مہتاب میں تجھی کو دیکھا ہے یوں پگھلتا

تکلیف باغ ہم کو یاروں نے کی وگرنہ

گل پھول سے کوئی دم اپنا بھی دل بہلتا

رونے کا جوش ویسا آنکھوں کو ہے بعینہ

جیسے ہو رود کوئی برسات میں ابلتا

کرتا ہے وے سلوک اب جس سے کہ جان جاوے

ہم میر یوں نہ مرتے اس پر جو دل نہ چلتا

میر تقی میر