دیوان اول غزل 448

لاعلاجی سے جو رہتی ہے مجھے آوارگی

کیجیے کیا میر صاحب بندگی بے چارگی

کیسی کیسی صحبتیں آنکھوں کے آگے سے گئیں

دیکھتے ہی دیکھتے کیا ہو گیا یکبارگی

روے گل پر روز و شب کس شوق سے رہتا ہے باز

رخنۂ دیوار ہے یا دیدئہ نظارگی

اشک خونیں آنکھ میں بھر لا کے پی جاتا ہوں میں

محتسب رکھتا ہے مجھ پر تہمت مے خوارگی

مت فریب سادگی کھا ان سیہ چشموں کا میر

ان کی آنکھوں سے ٹپکتی ہے بڑی عیارگی

میر تقی میر